Шетелдік ресми құжаттарды заңдастыруды талап етудің күшін жоятын конвенция (Гаага, 1961 жылғы 5 қазан) ережелерін іске асыру жөніндегі шаралар туралы

Жаңартылған

Қазақстан Республикасы Үкіметінің қаулысы 2001 жылғы 24 сәуір N 545

      Гаага қаласында 1961 жылғы 5 қазанда жасалған Шетелдік ресми құжаттарды заңдастыруды талап етудің күшін жоятын конвенция ережелерін іске асыру мақсатында Қазақстан Республикасының Үкіметі қаулы етеді: 
      1. Гаага қаласында 1961 жылғы 5 қазанда жасалған Шетелдік ресми құжаттарды заңдастыруды талап етудің күшін жоятын конвенцияның 1-бабында көрсетілген ресми құжаттар қосымшаға сәйкес, сол құжаттарға апостиль қою жолымен куәландырылады деп белгіленсін. 
      2. Апостиль қою бойынша өкілеттікке ие ұйымдар ретінде мына мемлекеттік органдар белгіленсін: 
      Қазақстан Республикасының Әділет министрлігі - әділет органдарынан және өзге де мемлекеттік органдардан, сондай-ақ нотариустардан шығатын ресми құжаттарға; 
      Қазақстан Республикасының Білім және ғылым министрлігі - республиканың білім, ғылым органдары мен оқу орындарынан шығатын ресми құжаттарға; 
      Қазақстан Республикасы Ішкі істер министрлігі – көші-қон полициясының құрылымдық бөліністерінен шығатын ресми құжаттарға, Қазақстан Республикасы Ішкі істер министрлігінің арнайы мемлекеттік мұрағатынан шығатын мұрағаттық анықтамаларға және мұрағаттық құжаттардың көшірмелеріне;
      Қазақстан Республикасы Мәдениет, ақпарат және спорт министрлiгiнiң Ақпарат және мұрағат комитетi - Қазақстан Республикасының мемлекеттік мұрағаттарынан шығатын мұрағаттық анықтамаларға және мұрағаттық құжаттар көшірмелеріне; 
      Қазақстан Республикасы Жоғарғы Сотының жанындағы Соттардың қызметін қамтамасыз ету департаменті (Қазақстан Республикасы Жоғарғы Сотының аппараты) (келісім бойынша) – сот органдарынан шығатын ресми құжаттарға;
      Қазақстан Республикасының Қаржы министрлiгі - Қазақстан Республикасы Қаржы министрлiгiнiң құрылымдық бөлiмшелерiнен және (немесе) олардың аумақтық бөлiмшелерiнен шығатын ресми құжаттарға;
      Қазақстан Республикасының Бас прокуратурасы (келісім бойынша) - прокуратура органдарынан, тергеу және анықтау органдарынан шығатын ресми құжаттарға; 
      Қазақстан Республикасының Қорғаныс министрлігі - Қазақстан Республикасы Қорғаныс министрлігінің арнаулы мемлекеттік мұрағатынан шығатын мұрағаттық анықтамаларға және мұрағаттық құжаттар көшірмелеріне. 
      Аталған органдар өздерінің аумақтық органдарына апостиль қою жөніндегі өкілеттігін беруге құқылы. 
       Ескерту. 2-тармаққа өзгерістер енгізілді - ҚР Үкіметінің 2004.03.04. N 272, 2005.01.28. N 73, 2012.06.25 N 833; 10.09.2015 N 770 (алғашқы ресми жарияланған күнінен кейін күнтізбелік он күн өткен соң қолданысқа енгізіледі); 25.04.2016 № 246 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) қаулылырымен.
      3. Жоғарыда аталған мемлекеттік органдар заңнамамен белгіленген тәртіппен бір айлық мерзімде: 
      мемлекеттік органдардың өздерінің міндеттері мен функцияларын реттейтін нормативтік құқықтық кесімдерге тиісті өзгерістер мен толықтырулар енгізсін; 
      апостиль қою тәртібін және шарттарын белгілейтін бірыңғай ережені әзірлесін және бекітсін; 
      апостиль қою жөніндегі функцияларды орындауға уәкілетті адамдар мен оларды ауыстыратын адамдар тобын айқындасын; 
      апостиль мөртаңбасын дайындау жөнінде шаралар қабылдасын. 
      4. Қазақстан Республикасының Сыртқы істер министрлігі Конвенция депозитарийі - Нидерланды Корольдігінің Сыртқы істер министрлігіне апостиль қою құқығы берілген органдар туралы хабарласын. 
      5. Қазақстан Республикасының Қаржы министрлігі Қазақстан Республикасының Мемлекеттік кіріс министрлігімен және Қазақстан Республикасының Әділет министрлігімен бірлесіп, апостиль қойғаны үшін алымдар алу мөлшері мен тәртібі туралы ұсыныстарды  Қазақстан Республикасының Үкіметіне бір айлық мерзімде енгізсін.
      6. Осы қаулы қол қойылған күнінен бастап күшіне енеді және жариялауға жатады.     

       Қазақстан Республикасының
      Премьер-Министрі

Қазақстан Республикасы Үкіметінің      
2001 жылғы 24 сәуірдегі N 545        
қаулысына қосымша                

      ____________________________________________________________________
                           APOSTILLE 
                    (Convention de la Haye du 5 octobre 1961)

     1. Ел: Қазақстан Республикасы
     Рауs, Country     

                       Осы ресми құжатқа,
     Le present acte рubliс, This publi document

     2. _________________________________________________ қол қойды
        a ete signe раr, has been signed by
     3. _________________________________________________ ретінде
        agissant en qualite dе, acting in the capacity of

     4. ___________________________________________________________
        ________________мөрімен/мөртаңбасымен бекітілді 
        est revetu du sсеаu/tiмbrе dе, bears the sеаl/stамр of

                     Куәландырылды, Аttеstе,
                            Certified
     5. ______________                  6. _________________күні
        а, at                              le the

     7. кіммен ___________________________________________________
        раr, by     

        __________________________________________________________
     8. sous N  _____________________
     9. Мөр/мөртаңба                    10. Қолы _________________
        Sсеаu/tiмbrе, Sеаl/stамр            Signature
     _____________________________________________________________
 
        Ескерту. Гаага қаласында 1961 жылғы 5 қазанда жасалған шетелдік ресми құжаттарды заңдастыруды талап етудің күшін жоятын конвенцияда апостиль мөртаңбасының нысаны кемінде 9х9 см. мөлшеріндегі шаршы түрінде көзделген.
      Апостиль мөртаңбасы мәтінінің қарпі оның таңбалануы мен оқылуының қолайлылығы үшін оның алаңы шегінде ұлғайтылатындай 13х13 см. мөлшерде болғаны жөн.
      Атқарылу тілін, мәтінін және оның мөртаңбада орналасу ретін өзгертуге болмайды.
      Мөртаңба мәтіні тек қана Қазақстан Республикасының мемлекеттік тілінде толтырылады.

Егер Сіз беттен қате тапсаңыз, тінтуірмен сөзді немесе фразаны белгілеңіз және Ctrl+Enter пернелер тіркесін басыңыз

 

бет бойынша іздеу

Іздеу үшін жолды енгізіңіз

Кеңес: браузерде бет бойынша енгізілген іздеу бар, ол жылдамырақ жұмыс істейді. Көбінесе, ctrl-F пернелері қолданылады