Қазақстан Республикасының Үкiметi ҚАУЛЫ ЕТЕДI:
"Төтенше жағдай туралы" Қазақстан Республикасының Заңына толықтырулар мен өзгерiстер енгiзу туралы" Қазақстан Республикасы Заңының жобасы Қазақстан Республикасының Парламентi Мәжiлiсiнiң қарауына енгiзiлсiн.
Қазақстан Республикасының
Премьер-Министрі
Жоба
ҚАЗАҚСТАН РЕСПУБЛИКАСЫНЫҢ
ЗАҢЫ "Төтенше жағдай туралы" Қазақстан Республикасының
Заңына толықтырулар мен өзгерiстер енгiзу туралы
1-бап. "Төтенше жағдай туралы" Қазақстан Республикасының 2003 жылғы 8 ақпандағы Заңына (Қазақстан Республикасы Парламентiнiң Жаршысы, 2003 ж., N 3, 18-құжат) мынадай толықтырулар мен өзгерiстер енгізiлсiн:
1) 1-бап мынадай мазмұндағы 6) тармақшамен толықтырылсын:
"6) Төтенше жағдай режимiн қамтамасыз ету жөнiндегi мемлекеттiк комиссия - Қазақстан Республикасының Президентi құратын уақытша арнайы мемлекеттiк басқару органы.";
2) 11-баптың 2-тармағы мынадай редакцияда жазылсын:
"2. Төтенше жағдайды енгiзуге негiз болған мән-жайлар бiрнеше әкiмшілiк-аумақтық бiрлiктердiң аумағында туындаған жағдайда, Қазақстан Республикасы Президентiнiң шешiмiмен жергілiктi жердiң комендатурасымен қатар, осы Заңның 7-бабына сәйкес өз қызметiн тоқтататын төтенше жағдай режимiн қамтамасыз ету жөнiндегі мемлекеттiк комиссия (бұдан әрi - Мемлекеттiк комиссия) құрылуы мүмкiн.";
3) 12-бап мынадай редакцияда жазылсын:
"12-бап. Мемлекеттiк комиссияның негізгi мiндеттерi мен
функциялары
1. Мемлекеттік комиссияның негiзгi мiндеттерi мыналар болып табылады:
1) төтенше жағдайды енгiзуге негiз болған мән-жайларды жою жөнiнде шаралар әзiрлеу;
2) төтенше жағдай енгiзiлген аумақтың қызметiн басқару мен қамтамасыз ету жөнiнде жедел iс-шаралар жүргізудi ұйымдастыру;
3) төтенше жағдайды енгізуге негiз болған мән-жайлардың салдарынан зардап шеккен жеке тұлғаларды уақытша тұруға арналған тұрғын үй-жайға орналастыруды, оларға қажетті көмек көрсетудi ұйымдастыру;
4) орталық және жергілiктi атқарушы органдардың, сондай-ақ жергiлiктi жерлердiң комендатураларының төтенше жағдайды енгізуге негіз болған мән-жайларды жою жөніндегi қызметiн үйлестiру;
5) төтенше жағдай кезеңiнде жүргізілетiн iс-шаралардың орындалуын бақылау.
2. Мемлекеттiк комиссия алдына қойылған мiндеттердi орындау үшiн мынадай функцияларды жүзеге асырады:
1) төтенше жағдай енгізiлген жергіліктi жердiң комендатураларының, орталық және жергiлiктi атқарушы органдардың, меншiк нысанына қарамастан, ұйымдардың төтенше жағдайды енгiзуге негiз болған мән-жайларды жою жөнiндегi iс-әрекеттерiн үйлестiру бойынша ұсыныстар әзiрлейдi;
2) Мемлекеттiк комиссияға жүктелген мiндеттердi орындау мәселелерi бойынша орталық, жергiлiктi атқарушы органдардың лауазымды адамдары мен төтенше жағдай енгізiлген жергiлiктi жерлердiң коменданттарын тыңдайды;
3) орталық және жергiлiктi атқарушы органдарда, меншiк нысанына қарамастан, ұйымдарда олардың қызметi туралы Мемлекеттiк комиссияның жұмысына қажеттi ақпаратқа сұрау салады;
4) төтенше жағдай енгiзілген жергiлiктi жерлердiң комендатураларының, орталық және жергілiктi атқарушы органдардың төтенше жағдайды енгiзуге негіз болған мән-жайларды жою жөнiндегі iс-шараларды орындауын бақылайды;
5) орталық және жергiлiктi атқарушы органдардың, меншiк нысанына қарамастан, ұйымдардың мамандарын талдамалық, сараптау және төтенше жағдай енгiзуге негіз болған мән-жайларды жою мәселелерiн шешу үшiн қажеттi басқа да жұмыстарды орындауға тартады;
6) осы Заңның 15, 16-баптарында көрсетiлген қосымша шаралар мен уақытша шектеулердi енгiзудiң тиiмділігiн қарайды. Төтенше жағдай енгiзуге негіз болған мән-жайлар толық немесе iшiнара жойылған кезде Қазақстан Республикасының Президентiне қосымша шараларды, уақытша шектеулердi немесе төтенше жағдайды толық немесе iшiнара жою туралы ұсыныс дайындайды.";
4) мынадай мазмұндағы 12-1-баппен толықтырылсын:
"12-1-бап. Мемлекеттiк комиссияның қызметiн ұйымдастыру
1. Мемлекеттiк комиссия орталық, жергіліктi атқарушы органдардың өкiлдерiнен және төтенше жағдай енгізiлген жергiлiктi жерлердiң коменданттарынан құрылады. Мемлекеттiк комиссияның дербес құрамын Қазақстан Республикасының Президентi бекiтедi әрi ол төтенше жағдайды енгiзуге негіз болған мән-жайларға байланысты болады. Мемлекеттік комиссия төрағадан, мүшелерден және хатшыдан тұрады. Комиссияның төрағасы Қазақстан Республикасының Президентiне есеп бередi.
Мемлекеттiк комиссия мүшелерiнiң, оның жұмысын қамтамасыз етуге тартылатын сарапшылар мен қызметшiлердiң жұмыс орындары мен негізгi жұмыс орнындағы жалақысы сақталады.
2. Мемлекеттік комиссияның отырыстарын қажеттiлiгiне қарай оның төрағасы шақырады, ал шешiмдерi хаттамалармен ресiмделедi. Мемлекеттiк комиссияның мүшелерi отырыстарға алмастыру құқығынсыз қатысады.
Отырыстың күн тәртiбiндегi әрбiр мәселе бойынша шешiмдер ашық дауыс беру арқылы қабылданады және егер олар үшiн Мемлекеттiк комиссия мүшелерiнiң жалпы санының көпшілігі дауыс берсе, қабылданды деп саналады. Дауыстар тең болған жағдайда төраға дауыс берген шешiм қабылданды деп саналады. Мемлекеттiк комиссия өз құзыретiне сәйкес қабылдайтын шешiмдер жергiлiктi жердiң комендатуралары, орталық және жергiлiктi атқарушы органдар, меншiк нысанына қарамастан, ұйымдар мен жеке тұлғалар үшiн мiндеттi сипатта болады.
3. Қазақстан Республикасы Президентiнiң құзыретiне жататын мәселелер бойынша Мемлекеттiк комиссия Қазақстан Республикасы Президентiнiң қарауына жарлықтар мен өкiмдердiң тиiстi жобаларын енгiзедi. Қазақстан Республикасы Yкiметiнiң құзыретiне жататын мәселелер бойынша Комиссия Қазақстан Республикасы Үкiметiнiң қарауына Қазақстан Республикасы Үкiметiнiң қаулылары мен Премьер-Министрi өкiмдерiнiң тиiстi жобаларын енгiзедi.";
5) 13-баптың 1-тармағы мынадай редакцияда жазылсын:
"1. Төтенше жағдай енгiзiлген жергілiктi жердiң комендатурасы өзiнiң төтенше жағдай режимiн қамтамасыз ету жөнiндегi қызметiн жергiлiктi атқарушы органдармен өзара iс-қимыл жасаса отырып жүзеге асырады.
Жергілiктi жердiң комендатурасын Қазақстан Республикасының Президентi тағайындайтын комендант және құрамы төтенше жағдай енгiзуге негiз болған мән-жайларды ескере отырып айқындалатын жергілiктi жер комендатурасының аппараты құрады.
Комендант Қазақстан Республикасының Президентiне, ал Мемлекеттiк комиссия құрылған кезде - Мемлекеттiк комиссияның төрағасына бағынады.
Жергiлiктi жер комендатурасының қызметi осы Заңның 7-бабы негiзiнде тоқтатылады.";
6) 18-баптың 1-тармағы алынып тасталсын.
2-бап. Осы Заң ресми жарияланған күнiнен бастап қолданысқа енгiзiледi.
Қазақстан Республикасының
Президентi
