Ұйымдардың қызметкерлерiне орташа жалақы есептеуге бiрыңғай көзқарасты қамтамасыз ету мақсатында Қазақстан Республикасының Үкiметi қаулы етедi:
1. Ұйымдардың қызметкерлерiне орташа жалақы есептеу үшiн зейнетақы тағайындаудан басқа, барлық жағдайда есептеу кезеңi онымен тиiстi төлем байланысты болатын оқиғаның алдындағы кейiнгi 12 күнтiзбелiк ай (1-iнен 1-i күнiне дейiн) болып табылады деп белгiленсiн.
2. Бес күндiк те, алты күндiк те жұмыс аптасы кезiнде орташа жалақы есептеу тиiстi есептi кезең үшiн күндiк жалақы есебiнен осы кезең үшiн сақтандыру жарналары есептелетiн белгiленген үстемақылар мен қосымша ақылар, сыйлықақылар мен басқа да төлемдер ескерiле отырып жүргiзiледi деп айқындалсын.
3. Қазақстан Республикасының Еңбек және халықты әлеуметтiк қорғау министрлiгi Қаржы министрлiгiмен бiрлесе отырып бiр ай мерзiм iшiнде бұқаралық ақпарат құралдарында жариялай отырып, Ұйымдардың қызметкерлерiне орташа жалақы есептеудiң тәртiбi туралы нұсқаулықты бекiтсiн.
4. Мыналардың:
"Негiзгi жалақыны есептеудiң тәртiбi туралы" Қазақстан Республикасы Министрлер Кабинетiнiң 1991 жылғы 26 маусымдағы N 397 қаулысының (Қазақ ССР ҚЖ, 1991 ж., N 17, 108-құжат);
"Демалысқа ақы төлеу немесе пайдаланылмаған демалысқа өтем төлеу үшiн орташа жалақыны есептеудiң тәртiбi туралы" Қазақстан Республикасы Үкiметiнiң 1997 жылғы 13 қаңтардағы N 51 қаулысының (Қазақстан Республикасының ПҮАЖ-ы, 1997 ж., N 1, 9-құжат) ұйымдардың қызметкерлерiне орташа жалақы есептеудiң жаңа тәртiбi туралы нұсқаулық бекiтiлген күннен бастап күшi жойылған деп танылсын.
Қазақстан Республикасының
Премьер-Министрi
