Қазақстан Республикасы ішкі істер органдарының полиция қызметкерлерін кезектен тыс аттестаттаудан өткізу туралы

Жаңартылған

Қазақстан Республикасы Президентінің 2019 жылғы 18 наурыздағы № 879 Жарлығы.

  Қазақстан Республикасы Президенті мен Үкiметі
актiлерiнiң жинағында және республикалық
баспасөзде жариялануға тиiс

      "Құқық қорғау қызметі туралы" 2011 жылғы 6 қаңтардағы Қазақстан Республикасы Заңының 47-1-бабына сәйкес ҚАУЛЫ ЕТЕМІН:

      1. Қазақстан Республикасының Президенті жанындағы Қазақстан Республикасы ішкі істер органдарының полиция қызметкерлерін кезектен тыс аттестаттаудан өткізу жөніндегі жоғары аттестаттау комиссиясы (бұдан әрі – Комиссия) құрылсын.

      2. Қоса беріліп отырған:

      1) Комиссия туралы ереже;

      2) Комиссияның құрамы;

      3) Қазақстан Республикасы ішкі істер органдарының полиция қызметкерлерін кезектен тыс аттестаттаудан өткізу қағидалары бекітілсін.

      3. Қазақстан Республикасы Президентінің Әкімшілігі, Қазақстан Республикасының Ішкі істер министрлігі Қазақстан Республикасы ішкі істер органдарының полиция қызметкерлерін кезектен тыс аттестаттауды 2019 жылғы 1 қазан мен 2020 жылғы 31 наурыз аралығында өткізсін, сондай-ақ осы Жарлықтан туындайтын өзге де шараларды қабылдасын.

      Ескерту. 3-тармақ жаңа редакцияда - ҚР Президентiнiң 02.04.2019 № 15 Жарлығымен.

      4. Осы Жарлық қол қойылған күнінен бастап қолданысқа енгізіледі.

      Қазақстан Республикасының
Президенті
Н. Назарбаев

  Қазақстан Республикасы
Президентінің
2019 жылғы 18 наурыздағы
№ 879 Жарлығымен
БЕКІТІЛГЕН

Қазақстан Республикасының Президенті жанындағы Қазақстан Республикасы ішкі істер органдарының полиция қызметкерлерін кезектен тыс аттестаттаудан өткізу жөніндегі жоғары аттестаттау комиссиясы туралы
ЕРЕЖЕ

1. Жалпы ережелер

      1. Осы Ережеде Қазақстан Республикасының Президенті жанындағы Қазақстан Республикасы ішкі істер органдарының полиция қызметкерлерін кезектен тыс аттестаттаудан өткізу жөніндегі жоғары аттестаттау комиссиясының (бұдан әрі – Комиссия) құқықтық мәртебесі мен өкілеттігі айқындалады.

      2. Комиссия өз қызметінде Қазақстан Республикасының Конституциясын, заңнамалық актілерін, Қазақстан Республикасы Президентінің актілерін, оның ішінде Қазақстан Республикасы ішкі істер органдарының полиция қызметкерлерін кезектен тыс аттестаттаудан өткізу қағидаларын және осы ережені басшылыққа алады.

2. Комиссияның міндеттері

      3. Комиссияның міндеттері:

      1) мыналарды:

      әкімшілік полиция, көші-қон қызметі комитеттерінің төрағаларын және олардың орынбасарларын;

      Қазақстан Республикасының Ішкі істер министрлігі орталық аппараты департаменттерінің бастықтарын және олардың орынбасарларын;

      облыстардың, республикалық маңызы бар қалалардың, астананың, көліктегі полиция департаменттерінің бастықтарын, сондай-ақ олардың орынбасарларын;

      Алматы, Қарағанды, Қостанай академияларының, Ақтөбе заң институтының бастықтарын және олардың орынбасарларын кезектен тыс аттестаттаудан өткізу;

      2) Қазақстан Республикасы ішкі істер органдарының полиция қызметкерлерін кезектен тыс аттестаттаудан өткізуді ұйымдастыру және үйлестіру болып табылады.

      Ескерту. 3-тармаққа өзгеріс енгізілді - ҚР Президентінің 19.09.2019 № 164 Жарлығымен.

3. Комиссияның құқықтары

      4. Комиссия:

      1) Комиссия құзыретіне жататын мәселелер бойынша мемлекеттік органдардан және ұйымдардан қажетті ақпаратты сұратуға;

      2) қажеттілігіне қарай мемлекеттік органдардың лауазымды адамдарын және мамандарын, сондай-ақ мүдделі ұйымдардың өкілдерін тартуға;

      3) отырыстарында аттестатталатын қызметкерлерді, сондай-ақ Комиссия құзыретіне жататын мәселелер бойынша мемлекеттік органдардың және өзге де ұйымдардың өкілдерін тыңдауға;

      4) Комиссияға жүктелген міндеттерді жүзеге асыру үшін қажетті өзге де құқықтарды жүзеге асыруға құқылы.

4. Комиссия қызметін ұйымдастыру

      5. Қазақстан Республикасы Президенті Әкімшілігінің Басшысы Комиссия төрағасы болып табылады, ол болмаған жағдайда міндетін атқару Комиссия төрағасының орынбасарына жүктеледі.

      6. Комиссия төрағасы:

      1) Комиссия қызметін жалпы басқаруды жүзеге асырады;

      2) Комиссия отырыстарын өткізу орны мен уақытын белгілейді;

      3) Комиссия отырыстарында төрағалық етеді;

      4) Комиссия мүшелеріне орындауға міндетті нұсқаулар береді.

      7. Комиссия мүшелері:

      1) Комиссияның жұмыс кестесі бойынша ұсыныстар енгізуге;

      2) Комиссия отырысында қаралатын мәселелерді талқылауға қатысуға құқылы.

      8. Комиссия хатшысы оның жұмысын ұйымдастырушылық қамтамасыз етуді жүзеге асырады және дауыс беруге қатысуға құқығы жоқ.

      9. Егер Комиссия отырысына оның құрамының кемінде үштен екі бөлiгi қатысса, құқықтық күші бар деп есептеледі.

      Комиссия шешімі Комиссия мүшелерінің отырысқа қатысып отырған жалпы санының қарапайым көпшілік даусымен қабылданады. Дауыстар тең болған жағдайда Комиссия төрағасының даусы шешуші болып табылады.

      10. Комиссия қабылдаған шешім Комиссия төрағасы мен хатшысы қол қоятын және Комиссияның мүшелерінің пікірін білдіретін хаттамамен ресімделеді.

      11. Қазақстан Республикасы Қауіпсіздік Кеңесінің Құқық қорғау жүйесі бөлімі Комиссияның жұмыс органы болып табылады.

  Қазақстан Республикасы
Президентінің
2019 жылғы 18 наурыздағы
№ 879 Жарлығымен
БЕКІТІЛГЕН

Қазақстан Республикасы Президентінің жанындағы Қазақстан Республикасы ішкі істер органдарының полиция қызметкерлерін кезектен тыс аттестаттаудан өткізу жөніндегі жоғары аттестаттау комиссиясының
ҚҰРАМЫ

      Ескерту. Құрамға өзгеріс енгізілді - ҚР Президентінің 22.07.2019 № 74 Жарлығымен.

      Қазақстан Республикасы Президенті Әкімшілігінің Басшысы, төраға

      Қазақстан Республикасы Президентінің көмекшісі – Қауіпсіздік Кеңесінің Хатшысы, төрағаның орынбасары

      Қазақстан Республикасы Президентінің Әкімшілігі Басшысының орынбасары

      Қазақстан Республикасы Президенті Кеңсесінің бастығы

      Қазақстан Республикасының Бас прокуроры

      Қазақстан Республикасы Ұлттық қауіпсіздік комитетінің Төрағасы

      Қазақстан Республикасы Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызметтің) төрағасы

      Қазақстан Республикасының Ішкі істер министрі

      Қазақстан Республикасы Қауіпсіздік Кеңесінің Құқық қорғау жүйесі бөлімінің меңгерушісі, хатшы

  Қазақстан Республикасы
Президентінің
2019 жылғы 18 наурыздағы
№ 879 Жарлығымен
БЕКІТІЛГЕН

Қазақстан Республикасы ішкі істер органдарының полиция қызметкерлерін кезектен тыс аттестаттаудан өткізу
ҚАҒИДАЛАРЫ

      Ескерту. Қағидалар жаңа редакцияда - ҚР Президентінің 19.09.2019 № 164 Жарлығымен.

1. Жалпы ережелер

      1. Осы Қазақстан Республикасы ішкі істер органдарының полиция қызметкерлерін кезектен тыс аттестаттаудан өткізу қағидалары (бұдан әрі – Қағидалар) Қазақстан Республикасы ішкі істер органдарының полиция қызметкерлерін (бұдан әрі – қызметкерлер) кезектен тыс аттестаттаудан өткізу тәртібін айқындайды.

      2. Жүктілігі және бала күтіміне байланысты демалыс кезеңінде қызметкерлер қатарындағы әйелдерді қоспағанда, осы Жарлықпен бекітілген Қазақстан Республикасының Президенті жанындағы Қазақстан Республикасы ішкі істер органдарының полиция қызметкерлерін кезектен тыс аттестаттаудан өткізу жөніндегі жоғары аттестаттау комиссиясы туралы ереженің 3-тармағының 1) тармақшасында аталған полиция қызметкерлері аттестаттауға жатады.

2. Аттестаттауды өткізуге дайындықты ұйымдастыру

      3. Кезектен тыс аттестаттау кезінде бағалаудың негізгі өлшемшарттары:

      1) қызметкерлердің өздеріне жүктелген лауазымдық міндеттерді орындау қабілеттілігі және олардың жұмыс нәтижелері;

      2) білім мен практикалық дағдылардың деңгейі болып табылады.

      4. Аттестаттау үш кезеңді қамтиды:

      1) аттестаттаудан өткізуге дайындық;

      2) Қазақстан Республикасының Президенті жанындағы Қазақстан Республикасы ішкі істер органдарының полиция қызметкерлерін кезектен тыс аттестаттаудан өткізу жөніндегі жоғары аттестаттау комиссиясы (бұдан әрі – Комиссия) өткізетін қызметкерлермен әңгімелесу;

      3) Комиссияның шешім шығаруы.

      5. Кадр бөлімшесі кезектен тыс аттестаттаудан өткізу мерзімдері туралы оны өткізу басталғанға дейін бір айдан кешіктірмей қызметкерлерді жазбаша хабардар етеді.

      6. Аттестаттауға жататын қызметкердің басшысы осы Қағидаларға 1-қосымшаға сәйкес нысан бойынша оның қызметтік мінездемесін ресімдейді, оны таныстырады және аттестаттау өткізілетін күнге дейін он күннен кешіктірмей оны тиісті кадр бөлімшесіне жолдайды.

3. Аттестаттауды өткізу

      7. Комиссия отырысында аттестатталатын қызметкермен әңгімелесу жүргізіледі. Әңгімелесу стенографиялануға жатады.

      Комиссияның отырысында дәлелді себептер бойынша болмаған қызметкерлер қызметке шыққаннан кейін кезектен тыс аттестаттаудан өтеді.

      Қызметкер Комиссияның отырысына дәлелсіз себептермен келмеген жағдайда аттестаттау комиссиясы осы Қағидалардың 8-тармағының 5) тармақшасында көзделген шешім қабылдайды.

      8. Әңгімелесудің қорытындысы бойынша Комиссия мынадай шешімдердің бірін қабылдайды:

      1) атқаратын лауазымына сәйкес келеді және кадр резервіне қабылдауға немесе жоғары тұрған лауазымға өсіруге ұсынылады*;

      2) атқаратын лауазымына сәйкес келеді;

      3) атқаратын лауазымына сәйкес келмейді және лауазымын төмендету ұсынылады;

      4) атқаратын лауазымына сәйкес келмейді және басқа қызметке (лауазымға) ауыстыру ұсынылады;

      5) атқаратын лауазымына сәйкес келмейді және ішкі істер органдарынан жұмыстан шығаруға ұсынылады.

      9. Комиссия шешімдері Комиссия мүшелерінің отырыста дауыс беру парақтарын толтыруы жолымен дауыс беру арқылы қабылданады.

      Комиссия шешімі үш жұмыс күні ішінде хаттамамен ресімделеді.

      10. Кадр бөлімшесі Комиссияның шешімін осы Қағидаларға 2-қосымшаға сәйкес нысан бойынша қызметкердің аттестаттау парағына енгізеді.

      Қызметкер Комиссияның шешімімен ол қабылданған күннен бастап бес жұмыс күні ішінде қол қойып танысады.

      11. Кезектен тыс аттестаттаудан өтпеген және (немесе) ішкі істер органдарында өзге, оның ішінде төмен тұрған лауазымдарда қызметін жалғастырудан бас тартқан қызметкер "Құқық қорғау қызметі туралы" Қазақстан Республикасының Заңында (бұдан әрі – Заң) белгіленген тәртіппен жұмыстан шығарылуға жатады.

4. Аттестаттау комиссиясының шешіміне шағымдану

      12. Комиссияның шешіміне Заңда белгіленген тәртіппен шағым жасалуы мүмкін.

      Ескертпе:* – Комиссияның отырысында осы Қағидалардың 8-тармағының 1) тармақшасы бойынша шешім қабылданған қызметкерлер Президенттік резервке есепке алуға ұсынылады.

  Қазақстан Республикасы ішкі
істер органдарының полиция
қызметкерлерін кезектен тыс
аттестаттаудан өткізу
қағидаларына
1-қосымша

Кезектен тыс аттестаттаудан өтуге жататын қызметкердің қызметтік мінездемесінің үлгілік нысаны
(қызметкердің тікелей басшысы толтырады)

      Қызметкердің Т.А.Ә. _____________________________________________

      Лауазымы ______________________________________________________

      Тағайындалған күні ______________________________________________

      Атағы __________________________________________________________

      1. Лауазымдық міндеттерін орындауы (қызметкер шешуге қатысқан негізгі мәселелердің тізбесі келтіріледі; қызметтік міндеттерін орындаудың тиімділігі мен адалдығы, шығармашылық бастамашылығы, азаматтармен жұмысы және т.б. бағаланады).

      2. Мемлекеттік органның қызметі саласындағы стратегиялық және бағдарламалық құжаттарды білуі, кәсіптік білімін қолдануы, сондай-ақ егер лауазымдық міндеттеріне кірсе, коммуникациялық және ақпараттық технологияларды қолдануы (стратегиялық және бағдарламалық құжаттарды білуі, кәсіптік білімінің, коммуникациялық және ақпараттық технологияларды білуінің деңгейі, оларды жұмыста қолдануы және т.б. сипатталады).

      3. Заңдылықты, оның ішінде сыбайлас жемқорлыққа қарсы заңнаманы, мемлекеттік қызметшілердің әдебі, сондай-ақ еңбек тәртібін, ішкі қызметтік тәртіптемені сақтауы (тәртіптік жазалары, заңдылықты, оның ішінде сыбайлас жемқорлыққа қарсы заңнаманы сақтау туралы мәліметтер және т.б. көрсетіледі).

      4. Жеке қасиеттері (қызметкердің жеке қасиеттері: адамдармен тіл табысуы, азаматтармен жұмыс істеу қабілеті, психологиялық орнықтылығы, өзін-өзі жетілдіруге қабілеті және т.б. сипатталады).

      5. Қызметкер жұмысының қорытынды бағасы (тікелей басшының қызметкер туралы пікірі көрсетіледі: атқаратын лауазымына сәйкес келеді не сәйкес келмейді, жоғары тұрған немесе төмен тұрған лауазымға ұсынылуы мүмкін).

      6. Аттестатталатын адам басқаратын бөлімше не ол жетекшілік ететін бөлімше жұмысының нәтижелері, оның ішінде сыбайлас жемқорлық көріністеріне қарсы іс-қимылдың жай-күйі туралы мәліметтер.

      7. Өзге де мәліметтер.

      Басшының Т.А.Ә. ________________________________________

      Лауазымы ____________ Атағы ____________

      Күні 20__ жылғы "____"___________

      МО

      Таныстым _______________________ Күні ________________ (қызметкердің Т.А.Ә., қолы)

      _____________________

  Қазақстан Республикасы ішкі
істер органдарының полиция
қызметкерлерін кезектен тыс
аттестаттаудан өткізу
қағидаларына
2-қосымша

Кезектен тыс аттестаттауға жататын полиция қызметкерін аттестаттау парағының үлгілік нысаны

      1. Тегі, аты, әкесінің аты ____________________________________________

      2. Туған жылы, айы-күні _______ ____ ____________

      3. Білімі _________________________________________________________

      4. Мамандығы ____________________________________________________

      5. Кезектен тыс аттестаттау кезіндегі сәтіндегі атқаратын лауазымы _______

      6. Атағы ____________________

      7. Кезектен тыс аттестаттау комиссиясының шешімі ____________________

      8. Өзге де мәліметтер ______________________________________________

      Кезектен тыс аттестаттау комиссиясының төрағасы _____________________ (қолы) Кезектен тыс аттестаттау комиссиясының хатшысы _____________________ (қолы)Кезектен тыс аттестаттауды өткізу күні 20__ жылғы "____" ______________

      Аттестаттау парағымен таныстым ____________________________________ (қызметкердің қолы және күні)

      МО


Егер Сіз беттен қате тапсаңыз, тінтуірмен сөзді немесе фразаны белгілеңіз және Ctrl+Enter пернелер тіркесін басыңыз

 

бет бойынша іздеу

Іздеу үшін жолды енгізіңіз

Кеңес: браузерде бет бойынша енгізілген іздеу бар, ол жылдамырақ жұмыс істейді. Көбінесе, ctrl-F пернелері қолданылады