"Алматы облысының кәсіпкерлік және индустриялық-инновациялық даму басқармасы" мемлекеттік мекемесінің Ережесін бекіту туралы

Жаңа

Алматы облысы әкімдігінің 2015 жылғы 27 қаңтардағы № 52 қаулысы. Алматы облысының Әділет департаментінде 2015 жылы 16 ақпанда № 3051 болып тіркелді

      РҚАО ескертпесі.
      Құжаттың мәтінінде түпнұсқасының пунктуациясы мен орфографиясы сақталған.
      "Мемлекеттік мүлік туралы" 2011 жылғы 1 наурыздағы Қазақстан Республикасы Заңының 17-бабының 7) тармақшасына және "Қазақстан Республикасы мемлекеттік органының үлгі ережесін бекіту туралы" 2012 жылғы 29 қазандағы № 410 Қазақстан Республикасы Президентінің Жарлығына сәйкес облыс әкімдігі ҚАУЛЫ ЕТЕДІ:
      1. Қоса беріліп отырған "Алматы облысының кәсіпкерлік және индустриялық-инновациялық даму басқармасы" мемлекеттік мекемесінің Ережесі бекітілсін.
      2. "Алматы облысының экономика және бюджеттік жоспарлау басқармасы" мемлекеттік мекемесі (Н.Сатыбалдина) "Алматы облысының кәсіпкерлік және индустриялық-инновациялық даму басқармасы" мемлекеттік мекемесінің қызметін қаржыландыруды қамтамасыз етсін және осы қаулыдан туындайтын басқа да шараларды қабылдасын.
      3. Басқарма басшысына осы қаулыны әділет органдарында мемлекеттік тіркелгеннен кейін ресми және мерзімді баспа басылымдарында, сондай-ақ Қазақстан Республикасының Үкіметі белгілеген интернет-ресурста және облыс әкімдігінің интернет-ресурсында жариялау жүктелсін.
      4. Осы қаулының орындалуын бақылау облыс әкімінің бірінші орынбасары М.Бигелдиевке жүктелсін.
      5. Осы қаулы әділет органдарында мемлекеттік тіркелген күннен бастап күшіне енеді және алғашқы ресми жарияланған күнінен кейін қолданысқа енгізіледі.
      Алматы облысының әкімі А. Баталов

  Облыс әкімдігінің 2015 жылғы "27" қаңтардағы № 52 қаулысымен бекітілген қосымша

"Алматы облысының кәсіпкерлік және индустриялық-инновациялық даму басқармасы" мемлекеттік мекемесі туралы Ереже 1. Жалпы ережелер

      1. "Алматы облысының кәсіпкерлік және индустриялық-инновациялық даму басқармасы" мемлекеттік мекемесі (бұдан әрі - Басқарма) кәсіпкерлік, сауда, индустриялық-инновациялық даму және жер қойнауын пайдалану салаларында басшылықты жүзеге асыратын Қазақстан Республикасының мемлекеттік органы болып табылады.
      2. Басқарманың ведомстволары жоқ.
      3. Басқарма өз қызметін Қазақстан Республикасының Конституциясы мен Заңдарына, Қазақстан Республикасы Президенті мен Үкіметінің актілеріне, өзге де нормативтік құқықтық актілерге, сондай-ақ осы Ережеге сәйкес жүзеге асырады.
      4. Басқарма ұйымдық-құқықтық нысанындағы заңды тұлға болып табылады, мемлекеттік тілде өз аталуы бар мөрі мен мөртаңбалары, белгіленген үлгідегі бланкілері, сондай-ақ Қазақстан Республикасының заңнамасына сәйкес қазынашылық органдарында шоттары болады.
      5. Басқарма азаматтық-құқықтық қатынастарға өз атынан түседі.
      6. Басқарма егер заңнамаға сәйкес осыған уәкілеттік берілген болса, мемлекеттің атынан азаматтық-құқықтық қатынастардың тарапы болуға құқығы бар.
      7. Басқарма өз құзыретінің мәселелері бойынша заңнамада белгіленген тәртіппен Басқарма басшысының бұйрықтарымен және Қазақстан Республикасының заңнамасында көзделген басқа да актілермен ресімделетін шешімдер қабылдайды.
      8. Басқарманың құрылымы мен штат санының лимиті қолданыстағы заңнамаға сәйкес бекітіледі.
      9. Заңды тұлғаның орналасқан жері: индекс 040000, Қазақстан Республикасы, Алматы облысы, Талдықорған қаласы, Шевченко көшесі, № 131.
      10. Мемлекеттік органның толық атауы – "Алматы облысының кәсіпкерлік және индустриялық-инновациялық даму басқармасы" мемлекеттік мекемесі.
      11. Осы Ереже Басқарманың құрылтай құжаты болып табылады.
      12. Басқарманың қызметін қаржыландыру жергілікті бюджеттен жүзеге асырылады.
      13. Басқармаға кәсіпкерлік субъектілерімен Басқарманың функциялары болып табылатын міндеттерді орындау тұрғысында шарттық қатынастарға түсуге тыйым салынады.
      Егер Басқармаға заңнамалық актілермен кірістер әкелетін қызметті жүзеге асыру құқығы берілсе, онда осындай қызметтен алынған кірістер республикалық бюджеттің кірісіне жіберіледі.

2. Басқарманың миссиясы, негізгі міндеттері, функциялары, құқықтары мен міндеттері

      14. Басқарманың миссиясы: Алматы облысының аумағында кәсіпкерлік және сауда қызметін, инвестициялық климатты, өнеркәсіп және шикізат секторын дамыту үшін жағдай құру.
      15. Міндеттері:
      1) заңнамаға сәйкес жеке кәсіпкерлікті дамыту және қолдау бойынша мемлекеттік саясатты жүргізу;
      2) мемлекеттік сауда саясатын жүргізуді қамтамасыз ету;
      3) индустриялық-инновациялық дамытудың мемлекеттік саясатын жүзеге асыру;
      4) кең таралған пайдалы қазбаларды барлауға немесе өндіруге арналған келісімшарттардың орындалуын және қолданысының тоқтатылуын қамтамасыз ету.
      16. Функциялары:
      1) жеке кәсiпкерлiктi қолдау мен дамытудың мемлекеттiк саясатын жүзеге асыру;
      2) жеке кәсіпкерлікті дамыту үшін жағдайлар жасау;
      3) өңірде шағын кәсіпкерлікті және инновациялық қызметті қолдау инфрақұрылымының объектілерін құру мен дамытуды қамтамасыз ету;
      4) өз құзыреті шегінде сауда қызметі субъектілерінің қызметін реттеуді жүзеге асыру;
      5) Қазақстан Республикасының мемлекеттік бағдарламаларын жүзеге асыру;
      6) түстi және қара металл сынықтары мен қалдықтарын жинау, (дайындау), сақтау, қайта өңдеу және өткiзу жөнiндегi қызмет түрiн жүзеге асыруға лицензия беру және лицензия көшірмелерін қайта ресiмдеу;
      7) меншік түріне қарамастан сауда рыноктарының қызметін мемлекеттік реттеу және үйлестіруді қамтамасыз ету, сауда рыноктарының қызметін ұйымдастыру ережесіне және олардың түрлеріне сәйкес рыноктарға санаттар беру;
      8) өз құзыретi шегiнде әлеуметтiк маңызы бар азық-түлiк тауарларына рұқсат етiлген шектi бөлшек сауда бағалары мөлшерiнiң сақталуына мемлекеттiк бақылауды жүзеге асыру;
      9) облыстың Өңірлік тұрақтандыру қорын басқару жөніндегі комиссияның жұмысын ұйымдастыру;
      10) кәсіпкерлік мәселелері бойынша сарапшылық кеңестердiң қызметiн және өңірлік үйлестіру кеңесінің отырыстарын ұйымдастыру;
      11) облыстың өңiрлiк индустрияландыру картасын әзiрлеу және бекiту;
      12) арнайы экономикалық және индустриялық аймақтардың жұмыс істеу саласында мемлекеттік саясатты жүзеге асыру;
      13) кең таралған пайдалы қазбаларды барлауға, өндiруге арналған келiсiмшарттарды жасау, тiркеу және сақтау;
      14) облыс аумағында өндiрiлетiн тауарлар, жұмыстар мен көрсетілетін қызметтердің және оларды өндiрушiлердiң тiзбесiн қалыптастыру;
      15) облыс бойынша индустриялық-инновациялық қызмет саласындағы салалық бағдарламалардың жүзеге асырылуын үйлестiрудi қамтамасыз ету;
      16) "Жетісу" әлеуметтік-кәсіпкерлік корпорациясы" ұлттық компаниясы" акционерлік қоғамын, "Алматы облысының өңірлік дамыту орталығы" жауапкершілігі шектеулі серіктестігін басқаруды жүзеге асыру;
      17) жергілікті мемлекеттік басқарудың мүддесінде Қазақстан Республикасының заңнамасымен Басқармаға жүктелген өзге де өкілеттіктерді жүзеге асыру.
      17. Құқықтары мен міндеттері:
      1) заңнамада белгіленген тәртіпте мемлекеттік органдардан, ұйымдардан, олардың лауазымды тұлғаларынан қажетті ақпараттар мен материалдарды сұратуға және алуға;
      2) облыс бойынша арнайы экономикалық және индустриялық аймақтардың жұмыс істеуін үйлестіруді қамтамасыз ету;
      3) сыбайлас жемқорлық құқықбұзушылықтар мен қылмыстар жасауға жол бермеу бойынша шараларды қабылдау;
      4) Қазақстан Республикасының заңнамасына сәйкес өзге де міндеттер мен құқықтарды іске асыруға құқығы бар.

3. Басқарманың қызметін ұйымдастыру

      18. Басқармаға басшылықты Басқарманың жүктелген міндеттердің орындалуына және оның функцияларын жүзеге асыруға дербес жауапты болатын бірінші басшы жүзеге асырады.
      19. Басқарманың бірінші басшысын облыс әкімі қызметке тағайындайды және қызметтен босатады.
      20. Басқарманың бірінші басшысының Қазақстан Республикасының заңнамасына сәйкес қызметке тағайындалатын және қызметтен босатылатын орынбасарлары болады.
      21. Басқарманың бірінші басшысының өкілеттігі:
      1) Қазақстан Республикасының заңнамасына сәйкес Басқарма қызметкерлерін лауазымға тағайындайды және лауазымынан босатады;
      2) Басқарма қызметкерлеріне тәртіптік жаза қолданады және ынталандырады;
      3) өз құзыреті шегінде Басқарма қызметкерлері орындауға міндетті бұйрықтар, нұсқаулықтар шығарады;
      4) Басқармадағы сыбайлас жемқорлыққа қарсы іс-әрекет бойынша жеке жауапкершілік алады;
      5) Қазақстан Республикасының заңнамасына сәйкес өз құзыреті шегінде мемлекеттік органдар мен ұйымдарда Басқарма мүддесін білдіреді;
      6) өз құзыретіне жататын басқа да мәселелер бойынша шешімдер қабылдайды.
      Басқарманың бірінші басшысы болмаған кезеңде оның өкілеттіктерін қолданыстағы заңнамаға сәйкес оны алмастыратын тұлға орындайды.
      22. Бірінші басшы өз орынбасарларының өкілеттіктерін қолданыстағы заңнамаға сәйкес белгілейді.
      23. Басқарманы Қазақстан Республикасының қолданыстағы заңнамасына сәйкес қызметке тағайындалатын және қызметтен босатылатын Басқарма басшысы басқарады.

4. Басқарманың мүлкі

      24. Басқарманың заңнамада көзделген жағдайларда жедел басқару құқығында оқшауланған мүлкі болу мүмкін.
      Басқарманың мүлкі оған меншік иесі берген мүлік, сондай-ақ өз қызметі нәтижесінде сатып алынған мүлік (ақшалай кірістерді қоса алғанда) және Қазақстан Республикасының заңнамасында тыйым салынбаған өзге де көздер есебінен қалыптастырылады.
      25. Басқармаға бекітілген мүлік коммуналдық меншікке жатады.
      26. Егер заңнамада өзгеше көзделмесе, Басқарма, өзіне бекітілген мүлікті және қаржыландыру жоспары бойынша өзіне бөлінген қаражат есебінен сатып алынған мүлікті өз бетімен иеліктен шығаруға немесе оған өзгедей тәсілмен билік етуге құқығы жоқ.

5. Басқарманы қайта ұйымдастыру және тарату

      27. Басқарманы қайта ұйымдастыру және тарату Қазақстан Республикасының заңнамасына сәйкес жүзеге асырылады.
      Басқарманың қарамағындағы ұйымдардың тізбесі:
      1) "Жетісу" әлеуметтік-кәсіпкерлік корпорациясы" ұлттық компаниясы" акционерлік қоғамы;
      2) "Алматы облысының өңірлік дамыту орталығы" жауапкершілігі шектеулі серіктестігі.

Егер Сіз беттен қате тапсаңыз, тінтуірмен сөзді немесе фразаны белгілеңіз және Ctrl+Enter пернелер тіркесін басыңыз

 

бет бойынша іздеу

Іздеу үшін жолды енгізіңіз

Кеңес: браузерде бет бойынша енгізілген іздеу бар, ол жылдамырақ жұмыс істейді. Көбінесе, ctrl-F пернелері қолданылады