Байланыс формасы

"Aстана Хаб" халықаралық технологиялық паркі қызметінің қағидаларын бекіту туралы

Жаңа

Қазақстан Республикасы Ақпарат және коммуникациялар министрінің 2018 жылғы 26 қыркүйектегі № 415 бұйрығы. Қазақстан Республикасының Әділет министрлігінде 2018 жылғы 26 қыркүйекте № 17437 болып тіркелді.

      "Ақпараттандыру туралы" 2015 жылғы 24 қарашадағы Қазақстан Республикасының Заңы 7-бабының 24-1) тармақшасына сәйкес БҰЙЫРАМЫН:

      1. Қоса беріліп отырған "Aстана Хаб" халықаралық технологиялық паркі қызметінің қағидалары бекітілсін.

      2. Қазақстан Республикасы Ақпарат және коммуникациялар министрлігінің Ақпараттандыру департаменті заңнамада белгіленген тәртіппен мыналарды:

      1) осы бұйрықты Қазақстан Республикасы Әділет министрлігінде мемлекеттік тіркеуді;

      2) осы бұйрық мемлекеттік тіркелген күннен бастап күнтізбелік он күн ішінде оны "Республикалық құқықтық ақпарат орталығы" шаруашылық жүргізу құқығындағы республикалық мемлекеттік кәсіпорнына Қазақстан Республикасы нормативтік құқықтық актілерінің эталондық бақылау банкінде ресми жариялау және енгізу үшін жіберуді;

      3) осы бұйрық ресми жарияланғаннан кейін оны Қазақстан Республикасы Ақпарат және коммуникациялар министрлігінің интернет-ресурсында орналастыруды;

      4) осы бұйрық Қазақстан Республикасы Әділет министрлігінде мемлекеттік тіркелгеннен кейін он жұмыс күні ішінде осы тармақтың 1), 2) және 3) тармақшаларына сәйкес іс-шаралардың орындалуы туралы мәліметтерді Қазақстан Республикасы Ақпарат және коммуникациялар министрлігінің Заң департаментіне ұсынуды қамтамасыз етсін.

      3. Осы бұйрықтың орындалуын бақылау жетекшілік ететін Қазақстан Республикасының Ақпарат және коммуникациялар вице-министріне жүктелсін.

      4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.

      Қазақстан Республикасының
Ақпарат және коммуникациялар министрі
Д. Абаев

      "КЕЛІСІЛДІ"

      Қазақстан Республикасының

      Инвестициялар және даму министрлігі

      2018 жылғы "__"______________

      "КЕЛІСІЛДІ"

      Қазақстан Республикасының

      Қаржы министрлігі

      2018 жылғы "__"______________

  Қазақстан Республикасы
Ақпарат және коммуникациялар
министрінің
2018 жылғы 26 қыркүйектегі
№ 415 бұйрығымен
бекітілген

"Aстана Хаб" халықаралық технологиялық паркі қызметінің қағидалары

1-тарау. Жалпы ережелер

      1. Осы "Aстана Хаб" халықаралық технологиялық паркі қызметінің қағидалары (бұдан әрі – Қағидалар) "Ақпараттандыру туралы" 2015 жылғы 24 қарашадағы Қазақстан Республикасының Заңы 7-бабының 24-1) тармақшасына сәйкес әзірленді және "Aстана Хаб" халықаралық технологиялық паркі (бұдан әрі – Технопарк) қызметінің тәртібін айқындайды.

      2. Технопарк өз қызметінде Қазақстан Республикасының заңнамасын, осы Қағидаларды, сондай-ақ Технопарк жарғысын және өзге де ішкі құжаттарды басшылыққа алады.

      3. Технопарктің функцияларына:

      1) Технопарк қатысушыларына акселерация, технологиялық бизнес-инкубациялау қызметін көрсету;

      2) Технопарк қатысушылары үшін маркетинг және өзге де іс-шараларды өткізу бойынша қызметтер ұсыну;

      3) Технопарк қатысушыларын дамытуды ынталандыру үшін консультациялық, ақпараттық, талдамалық, білім беру іс-шараларын өткізу бойынша қызметтерді көрсету;

      4) Технопарк қатысушыларын дамытуды ынталандыру үшін ақпараттық, білім беру және қаржылық ресурстарды тарту, халықаралық тәжірибені зерделеу және білім алмасу мақсатында халықаралық ұйымдармен, шетелдік серіктестермен ынтымақтасу;

      5) Технопарк қатысушыларының ақпараттық-коммуникациялық технологиялар саласындағы индустриялық-инновациялық жобаларды іске асыруы үшін әлеуетті инвесторларды іздеу;

      6) шетелдіктердің және азаматтығы жоқ адамдардың Технопарк бағдарламалары бойынша оқудан өтуі үшін Технопаркке қатысушы жұмыскерлерге визалар алуға шақырулар, өтініш хаттар жіберу;

      7) Қазақстан Республикасының резиденттері мен бейрезиденттерді Технопаркқа қатысуға тарту;

      8) Технопарк қатысушыларын тіркеу және тиісті растайтын құжаттарды беру;

      9) Технопаркте акселерациядан өтетін адамдарға тұрғын жай беру және тұруға жағдай жасау;

      10) Технопарк қатысушыларының ақпараттық-коммуникациялық технологиялар саласындағы индустриялық-инновациялық жобаларын қаржыландыру;

      11) инвестициялық қорларды құру немесе инвестициялық қорларға қатысу үлесін қабылдау жатады.

      4. Ақпараттық-коммуникациялық технологиялар саласындағы индустриялық-инновациялық жобаларды іске асыру үшін әлеуетті инвесторларды іздеу келесі:

      1) отандық және шетелдік инвесторларды тарту;

      2) ақпараттық-коммуникациялық технологиялар саласындағы индустриялық-инновациялық жобаларды көрсету бойынша іс-шараларды ұйымдастыру және өткізу;

      3) айрықша (мүліктік) құқықтарды тапсыру немесе ұсыну жөніндегі шарт бойынша ақпараттық-коммуникациялық технологиялар саласындағы отандық әзірлемелерді коммерциялық өткізу және (немесе) тапсыру бойынша іс-шараларды ұйымдастыру мен өткізу;

      4) Технопарк қызметінің маркетингін ілгерілету мақсатында бұқаралық ақпарат құралдарымен тұрақты байланыс орнату және қолдап отыру;

      5) Технопарктің қызметі үшін қажетті шетелдік заңды және жеке тұлғалармен шарттық қатынастарды орнату;

      6) ақпараттық-коммуникациялық технологиялар саласындағы отандық іс-шараларды және жобаларды (көрмелер, форумдар мен конференциялар) өткізуге жәрдемдесу және шетелдік іс-шараларға, оның ішінде қаржы ресурстарын бөлу арқылы қатысу тәсілдерімен жүзеге асырылады.

      5. Технопарктің функцияларын орындау Технопарк әзірлеген бағдарламаларды іске асыру арқылы жүзеге асырылады.

      6. Бағдарламалар ақпараттық-коммуникациялық технологияларды келесі бағыттар:

      1) кадрлардың біліктілігін арттыру және оларды қайта даярлау курстары, семинарлар мен тренингтер түрінде оқыту іс-шараларын ұйымдастыру және өткізу мақсатында жоғары, кәсіптік және техникалық білім беру бағдарламаларын іске асыруды жүзеге асыратын ұйымдармен білім беру консорциумдарын құру;

      2) Қазақстан Республикасының аумағында және одан тыс жерлерде Технопарк қызметіне байланысты облыстарда, оның ішінде әріптестік бағдарламалар мен жобаларды құру және іске асыру, ұйым қызметкерлерінің кәсіби деңгейін арттыру, оларды бейімдеудің жаңа әдістерін игеру және ұйымның қызметі шеңберінде қолдану мақсатында жұмыс істейтін мемлекеттік, қоғамдық және өзге де ұйымдармен қарым-қатынас орнату және қолдап отыру;

      3) даярлау, қайта даярлау және біліктілікті арттыру, оның ішінде семинарлар, тренингтер және басқару мен өндірістік-техникалық пәндердің кең ауқымы бойынша өзге команда қалыптастырушы корпоративтік іс-шаралар түрінде оқыту іс-шаралары мен курстарын ұйымдастыру және өткізу;

      4) әдістемелік материалдарды, оқу құралдарын, оның ішінде электрондық түрде, қашықтықтан оқыту курстарын, модульдік және мультимедиялық бағдарламалар әзірлеу;

      5) көрмелер, форумдар, конкурстар, дөңгелек үстелдер, кездесулер, олимпиадалар және заңмен тыйым салынбаған басқа да іс-шараларды ұйымдастыру және өткізу;

      6) Технопарктің қызметіне байланысты мәселелер бойынша басқа ұйымдар, мемлекеттік органдар, қоғамдық шетелдік қорлар ұйымдастыратын іс-шараларды дайындауға және өткізуге қатысу;

      7) инновациялық білім беру және ғылыми бағдарламалар мен технологияларды енгізу және іске асыру;

      8) жаңа технологиялардың эксперименттік және тәжірибелік үлгілерін жасау және оларды сынақтан өткізу;

      9) инфокоммуникациялық технологиялар саласындағы талдамалық зерттеулерді ұйымдастыру және өткізу;

      10) ақпараттық-коммуникациялық технологиялар саласындағы технологиялық бизнес-инкубациялау;

      11) акселерация;

      12) ақпараттық-коммуникациялық технологиялар саласындағы отандық және шетелдік сарапшыларды тарту;

      13) зияткерлік меншік құқықтарын қорғауды қолдау бойынша дамытуды ынталандыру мақсатында әзірленеді.

2-тарау. Технопарктің қызмет ету тәртібі

1-параграф. Технопарк қатысушыларына талаптар

      7. Технопарк қатысушысы ретінде тіркелу үшін өтініш беруші келесі талаптарға сәйкес келуі тиіс:

      1) заңды тұлға болуы;

      2) өтініш беру кезінде, өкілдіктерді қоспағанда, филиалдардың, сондай-ақ оқшауланған құрылымдық бөлімшелердің болмауы;

      3) Қазақстан Республикасы Кәсіпкерлік кодексінің 284-бабына сәйкес инвестициялық басым жобаны, сондай-ақ 2015 жылғы 1 қаңтарға дейін жасалған инвестициялық келісімшарттар бойынша ұйымдарға кірмеуі;

      4) акцияларының (жарғылық капиталындағы үлестерінің) елу және одан көп пайызы тікелей немесе жанама түрде мемлекетке, ұлттық басқарушы холдингтерге, ұлттық холдингтерге және ұлттық компанияларға немесе олардың еншілес ұйымдарына тиесілі заңды тұлғалар қатарында болмау;

      5) жер қойнауын пайдаланушы немесе арнайы экономикалық аймақтың қатысушысы болып табылмау;

      6) "Салық және бюджетке төленетін басқа да міндетті төлемдер туралы (Салық кодексі)" 2017 жылғы 25 желтоқсандағы Қазақстан Республикасы Кодексінің (бұдан әрі – Кодекс) 461-бабына сәйкес сәйкес кіші акцизделетін тауарлардың төлеушісі болмауы.

2-параграф. Технопарк қатысушыларын тіркеу және тиісті растайтын құжаттар беру тәртібі

      8. Технопарк қатысушысы ретінде тіркелу үшін мүдделі тұлға Технопарктің интернет-ресурсында толтырылатын Технопаркке қатысу туралы электрондық өтінішті (бұдан әрі – қатысу туралы өтініш) Технопаркке жібереді.

      9. Қатысу туралы өтінішке мына құжаттар:

      1) заңды тұлғалар-резиденттер үшін – заңды тұлғаны мемлекеттік тіркеу (қайта тіркеу) туралы анықтама;

      заңды тұлғалар-бейрезиденттер үшін – мемлекеттік тіркеу нөмірін (немесе оның аналогын) көрсете отырып, бейрезиденттің инкорпорация еліндегі мемлекеттік тіркелуін растайтын құжат;

      2) өтініш беру кезінде, егер мұндай тұлғаны өтініш беруші тағайындаса өтініш берушінің атынан әрекет ететін тұлғаның өкілеттігін растайтын құжаттардың электрондық көшірмелері;

      3) мыналарды:

      жобаның сипаттамасын;

      жобаны іске асырудағы күтілетін түпкілікті нәтиженің сипаттамасын;

      оларды іске асыру және дамыту бойынша нақты іс-шараларды;

      сатуға ұсынылатын тауарлардың (жұмыстардың, қызметтердің, мүліктік құқықтардың) түрлері мен көлемдерін;

      оларды сату қажеттілігінің негіздемесін және сатудан күтілетін табысты (кірісті) қамтитын жобаның бизнес-жоспары қоса беріледі.

      Бұл ретте өтінім берушінің жобасы келесі салалардағы бір немесе бірнеше бағыттарға қатысты болуы тиіс:

      бағдарламалық қамтылымды әзірлеу;

      ақпараттық жүйелерді жобалау, әзірлеу және енгізу;

      бағдарламалық қамтылымды қолдана отырып деректерді өңдеу қызметі;

      ақпараттандыру саласындағы іргелі және қолданбалы зерттеулер;

      ақпараттық жүйелердің ақпараттарын қорғау жүйелерін жобалау және енгізу;

      жасанды интелектінің мамандандырылған бөлімдерінде нейронды желілерді және өзге де алғышарттарды жасау және оқыту;

      өтініш беруші мен Технопарк қатысушысы әзірлеген бағдарламалық қамтылымды пайдалана отырып консультациялық, жарнамалық және делдалдық қызметтер;

      виртуалды шыдық саласында әзірлеу;

      робототехника саласында әзірлеу;

      киберспорт саласындағы қызмет;

      4) салық органдарында есепке алынатын, өтiнiш республикалық бюджет туралы заңда тиiстi қаржы жылына белгiленген айлық есептiк көрсеткiштiң алты еселенген мөлшерiнен асатын борыштардың болмауы (бар болуы) туралы өтініш берiлген күнге дейiн күнтiзбелiк он күннен кешiктiрiлмей берiлген мәлiметтер. Бұл құжаттарды Қазақстан Республикасының бейрезиденттері ұсынбайды.

      5) Өтініш беруші өз қызметін жүзеге асыратын мекенжай туралы мәліметтер. Мекенжайы өзгерген жағдайда өтініш беруші жедел түрде ол туралы Технопаркті хабардар етеді;

      6) жобаны іске асыру үшін тартуға жаспарланатын бейрезиденттердің және резиденттердің саны туралы мәліметтер (болжамдалған саны және мерзімі).

      10. Қатысу туралы өтініш және оған қоса берілген құжаттар қазақ немесе орыс не ағылшын тілдерінде жіберіледі. Құжаттарды ағылшын тілінде берген кезде Технопарк олардың қазақ немесе орыс тіліндегі аудармасын қамтамасыз етеді.

      11. Өтініш беруші ұсынылған құжаттардың толықтығы мен сенімділігін, өтінімде қамтылған бастапқы деректерді, есептеулерді, негіздемелерді қамтамасыз етеді.

      12. Технопарк қатысуға өтініш жіберілген күннен бастап бес жұмыс күні ішінде оның осы Қағидалардың 7 және 9-тармақтарының талаптарына сәйкестігін қарастырады.

      13. Қарау нәтижелері бойынша Технопарк қатысу туралы өтінішті Технопарк қатысушыларын іріктеу жөніндегі комиссиясының (бұдан әрі – Комиссия) қарауына жібереді. Комиссияның ережесі мен құрамын Технопарк анықтайды және олар бекітілген күннен бастап он жұмыс күні ішінде Технопарктің интернет-ресурсында орналастырылады.

      Комиссия Технопарктің, мемлекеттік органдардың өкілдерінен және сәйкес біліктілігі бар ІТ-технологиялар саласындағы мамандардан тұрады, сондай-ақ Комиссия мүшесіне халықаралық сарапшылар тартылуы мүмкін.

      14. Қатысуға өтініш осы Қағидалардың 7 және 9-тармақтарында көзделген талаптарға сәйкес келмеген жағдайда, Технопарк қатысуға өтiнiш жіберiлген күннен бастап бес жұмыс күнiнен кешiктiрмей өтiнiш берушiге ескертулер көрсетілген хабарламаны жiбередi.

      15. Өтініш беруші ескертулерді алған күннен бастап он жұмыс күнінен кешіктірілмейтін мерзімде ескертулерді жоюды жүзеге асырады.

      16. Технопарк ескертулерді жойған сәттен бастап Комиссияда қарауға қатысу үшін өтініш береді.

      Комиссия он жұмыс күнi iшiнде өтінішті қарастырады және өтініш берушіні қатысушы ретiнде тiркеу туралы немесе мұндай тіркеуден бас тарту туралы шешiм қабылдайды.

      Комиссия қатысушы ретінде өтініш берушіні тіркеуді келесі негіздер бойынша бас тартады:

      1) осы Қағидалардың 7 және 9-тармақтарында көзделген мәліметтерді ұсынбаса;

      2) жобаның бизнес-жоспарының осы Қағидалардың 9-тармағы 3) тармақшада көзделген талаптарға сәйкес келмеуі.

      17. Технопарк өтініш берушіні Технопарктің қатысушысы ретінде тіркеу немесе мұндай тіркеуден дәлелді бас тарту туралы Комиссияның шешімін өтініш берушіге осындай шешім қабылданған күннен бастап бес жұмыс күні ішінде жібереді.

      Өтініштен бас тартуға негіз болған себептерді жойған жағдайда қабылдамаудан бас тарту өтініш берушінің қайта өтініш беруіне кедергі болмайды.

      18. Қатысушы ретінде тіркеу туралы шешім қабылданған күннен бастап бес жұмыс күні ішінде қатысушыға осы Қағидаларға 1-қосымшаға сәйкес нысан бойынша Технопаркке қатысушыны тіркеу туралы куәлік беріледі.

      19. Қатысу туралы өтінішті қарау қорытындылары бойынша комиссияның оң шешімі кезінде Технопарк шетелдіктердің және азаматтығы жоқ адамдардың Технопаркте қызметті жүзеге асыру үшін Қазақстан Республикасының аумағына кіруіне визалар алуға шақыру, өтінішхат жібереді.

      20. Қатысушы ретінде тіркеу туралы шешім қабылдауға қатысты өтініш беруші туралы мәліметтер үш жұмыс күні ішінде Технопарк қатысушыларының тізбесіне енгізіледі. Қатысушылар тізбесін Технопарк Комиссияның шешімі негізінде бекітеді.

      21. Қатысушылар тізімі Технопарктің интернет-ресурсында Тізбе бекітілген күні орналастырылады. Жаңа қатысушыны тіркеу туралы шешім қабылданған жағдайда қатысушылар тізімі мұндай шешім қабылданған күні жаңартылуға жатады.

3-параграф. Технопаркке қатысу үшін Қазақстан Республикасының бейрезиденттері мен резиденттерін тарту тәртібі

      22. Резиденттерді тарту шектеусіз жүзеге асырылады.

      23. Қатысушының бейрезиденттерді тартуы Технопаркке ерікті нысандағы өтініштер беру арқылы Технопаркпен келісіледі.

      Өтініште келесі мәліметтер көрсетіледі:

      тегі, аты, әкесінің аты (бар болған жағдайда), оның ішінде латын әріптерімен;

      туған күні;

      азаматтығы (тұрақты тұратын елі);

      паспорттың (жеке басын куәландыратын құжаттың) нөмірі, берілген күні және берген органы;

      Қазақстан Республикасының аумағында болжалды болу мерзімі (айы, жылы);

      біліктілігі туралы мәліметтер;

      визаның қолданыс мерзімін ұзарту туралы мәліметтер (бар болса);

      Қазақстан Республикасының аумағында болу мақсаты;

      бейрезиденттердің отбасы мүшелері туралы мәліметтер.

      Бұл ретте отбасы мүшелері туралы мәліметтер мыналарды қамтуы тиіс:

      тегі, аты, әкесінің аты (бар болған жағдайда), оның ішінде латын әріптерімен;

      туған күні;

      Технопарк тартқан, олар отбасы мүшелері болып табылатын адамның тегі, аты, әкесінің аты (бар болған жағдайда), оның ішінде латын әріптерімен;

      туыстық дәрежесі және туыстығын растайтын құжаттар туралы (неке туралы, туу туралы куәлігі немесе туыстығы туралы мәліметтерді растайтын өзге құжаттар);

      паспорттың нөмірі (жеке басын куәландыратын құжаттың), берілген күні және берген орган;

      визаның қолданыс мерзімін ұзарту туралы мәліметтер (бар болса);

      Қазақстан Республикасының аумағында болу мақсаты.

      24. Қатысушы жыл сайын есептіліктен кейінгі жылдың 10 қаңтарына дейін Технопаркке есептілік кезеңде тартылған бейрезиденттер мен резиденттердің саны туралы жыл сайынғы есепті ұсынады. Қажет болған жағдайда қатысушы Технопарктің сұрау салуы бойынша тартылған бейрезиденттер мен резиденттер туралы мәліметтерді береді.

4-параграф. Технопарктің олардың қызметтерін ұйымдастыру бойынша қатысушылармен өзара іс-қимылы

      25. Технопарк қатысушыға осы Қағидаларға сәйкес ақпараттық-коммуникациялық технологиялар саласындағы индустриялық-инновациялық жобаларды жүзеге асыру үшін жағдай жасайды.

      26. Технопарк жобаны іске асыру үшін қажетті әкімшілік, өндірістік, қосалқы мақсаттағы үйжайларды уақытша пайдалануға береді.

      Үйжайларды беру шарттары Технопарк қатысушысымен жасасқан шартпен айқындалады.

      27. Технопарктің сұранысын алған күннен бастап он жұмыс күні ішінде қатысушы мемлекеттік статистикалық есептіліктің көшірмесін, өзі төлеуші болып табылатын салықтар, алымдар (баж) бойынша салық декларацияларын (есептеулер), сондай-ақ жылдық бухгалтерлік (қаржылық) есептіліктің шынайылығы туралы аудиторлық қорытындыны береді.

      28. Қатысушы заңды тұлғаны мемлекеттік қайта тіркеген және жойған күннен бастап он жұмыс күні ішінде Технопаркке растайтын құжаттарының көшірмелерін ұсына отырып, тиісті оқиға туралы хабардар етеді.

      29. Қатысушы Технопаркке салықтық есепке алу мақсатында қажетті мәліметтерді береді. Қажет болған жағдайда қатысушы Технопарктің сұрау салуы бойынша бухгалтерлік (қаржылық) есептілік туралы мәліметтерді береді.

      30. Қатысушы немесе Технопарк тиісті қатысушының қызметіне байланысты ұсынған техникалық, экономикалық және коммерциялық сипаттағы ақпарат құпия болып табылады және қатысушының немесе Технопарктің алдын ала жазбаша келісімінсіз үшінші тұлғаларға жария етуге жатпайды.

5-параграф. Қатысушылардың Технопаркке алымдар мен төлемдер енгізу тәртібі

      31. Қатысушы Технопаркке қызметін жүзеге асыру кезінде алдыңғы тоқсан үшін алынған табысынан алымдар мен төлемдерді өткен тоқсаннан кейінгі айдың 20 күнінен кешіктермей енгізеді.

      32. Қатысушылардың алымдары мен төлемдері Технопарктің Қазақстан Республикасының екінші деңгейдегі банктегі ағымдағы шотына жіберіледі.

      33. Технопаркке осы Қағидалардың 31-тармағына сәйкес алымдар мен төлемдерді уақтылы төлемегені үшін мерзiмiнiң өткiзiп алудың әрбір күні үшін төлем сомасының 0,1 пайызы көлемінде, бірақ төлем сомасының 10 пайызынан артық емес өсім төлейді.

      34. Алымдар мен төлемдердің мөлшері мен түрлері Технопарк қатысушысымен жасалған шартпен айқындалады.

6-параграф. Технопаркке қатысу мерзімі және аяқталуы

      35. Технопаркке қатысу мерзімін Технопарк айқындайды және бір жылдан кем болмауы керек.

      36. Технопаркке қатысу мерзiмiн ұзарту туралы өтiнiш Технопаркке қатысу мерзiмi аяқталғанға дейiн бiр айдан кешiктiрiлмей берiледi.

      Өтінішті Технопарк Технопаркке өтініш келіп түскен күннен бастап он бес жұмыс күні ішінде жобаны Технопарк бағдарламасының шеңберінде одан әрі іске асырудың орындылығын ағымдағы бағалау негізінде қарайды.

      Технопарк осы Қағидаларға 2-қосымшаға сәйкес нысан бойынша Технопаркке қатысу мерзімін ұзарту туралы куәлік береді.

      37. Технопаркке қатысу жоспарлы немесе мерзімінен бұрын аяқталады.

      38. Технопаркке жоспарлы түрде қатысудың аяқталуы деп Технопаркке қатысу мерзімінің аяқталуы түсінділеді.

      39. Технопаркке қатысудың мерзімінен бұрын тоқтатылуы мынадай жағдайларда жүзеге асырылады:

      1) Технопарктің осы тараудың 9-параграфына сәйкес өткізілетін мониторинг нәтижелері бойынша жобаны одан әрі іске асырудың орынсыздығын анықтауы;

      2) жоспарланған нәтижелерге қол жеткізу;

      3) қатысушының Технопарктің бағдарламалары шеңберінде жобаны одан әрі іске асырудан бас тартуы;

      4) қатысушы заңды тұлғаның таратылуы;

      5) қатысушының мекенжайының өзгергені және қатысушының мекенжайының анықтау мүмкін еместігі туралы қатысушының хабарламауы;

      6) осы Қағидалардың 24 және 64-тармақтарында көзделген мәліметтер мен есептіліктерді уақытылы бермеу немесе бермеу;

      7) қатысушылардың Технопарк пен қатысушы арасында жасалған шартта көзделген қызметтерді іске асыру бойынша міндеттемелерді орындамауы;

      40. Қатысушы Технопарк бағдарламалары шеңберінде жобаны одан әрі іске асырудан бас тарту туралы шешім қабылдағанға дейін бір ай бұрын ол туралы Технопаркке хабарлайды.

      41. Технопарк осы Қағидалардың 39-тармағы 1), 2), 5), 6) және 7) тармақшаларында көзделген жағдайда қатысушының Технопаркке қатысуы мерзімінен бұрын тоқтатылуы туралы мәселені Комиссияның қарауына шығарады.

      Комиссия осы Қағидалардың 39-тармағы 1), 2), 5), 6) және 7) тармақшаларында көзделген негіздемелер болған жағдайда Технопаркке қатысудың мерзімінен бұрын тоқтатылуы туралы шешім қабылдайды.

7-параграф. Технопарктің қызметтер көрсету тәртібі және олардың құнын анықтау

      42. Технопарк Қазақстан Республикасының резиденттері мен бейрезиденттерін тарту бойынша функциялар шеңберінде Технопарк актілеріне сәйкес Технопарктің қатысушыларына, Технопарктің қатысушылары болып табылмайтын жеке және заңды тұлғаларға (бұдан әрі – Қызмет алушы) Технопарк бағдарламаларында көзделген қызметтерді көрсетеді.

      43. Акселерация ақпараттық-коммуникациялық технологиялар саласындағы индустриалдық-инновациялық жобаларды дамыту бағдарламасын көздейді, онда бағдарлама қатысушыларына білім беру курстарына, трекерлерден (тәлімгерлерден) сабақ алуға, сарапшылардан кеңестер алуға мүмкіндік беріледі.

      44. Технологиялық бизнес-инкубациялау Технопарк қатысушыларының ақпараттық-коммуникациялық технологиялар саласындағы индустриялық-инновациялық жобаларын бастапқы жұмыс істеу кезеңiнде қолдау бағдарламасын көздейді, олар үйжайлар, жабдықтар беру, бухгалтерлiк есеп жүргiзу, заңдық, ақпараттық және консультациялық қолдау, инвестициялар тарту, жобаларды басқару бойынша қызметтерді, сондай-ақ ақпараттық-коммуникациялық технологиялар саласындағы индустриялық-инновациялық жобаларды iске асыру үшiн қажеттi өзге де қызметтерді қамтиды.

      45. Технопарк өнімнің бәскеге қабілеттілігін бағалаумен және оны нарыққа жылжытумен байланысты маркетингтік және өзге де іс-шараларды өткізумен байланысты қызметтерді көрсетеді.

      46. Технопарк білім беру іс-шараларын өткізу бойынша қызметтер шеңберінде отандық және шетелдік тренерлерді, оқытушыларды, сарапшыларды тартады.

      47. Қызмет алушы қызметтерді алу үшін Технопарктің интернет-ресурсында толтырылатын қызметтерді алуға электрондық өтінішті (бұдан әрі – өтініш) өтініштерді қабылдау мерзімі аяқталғанға дейін жібереді.

      48. Өтінішке мынадай мәліметтер:

      1) жобаның атауы, жобаның бағыты, жобадан күтілетін нәтижелер бар жобаның қысқаша сипаттамасы;

      2) өтініш берушінің байланыс деректері:

      телефон нөмірі;

      электрондық мекенжайы;

      қала және елі;

      3) жобаның (өнімнің) дайындық сатысы, қолданылатын технологиялар, өнім шешетін проблемасы, жобаның бизнес-моделі, жобаның қолданыс мерзімі;

      4) жобаға қатысушылардың саны, команданың жобаға тартылуы;

      5) жоба таныстырылымына сілтеме;

      6) қажеттіліктердің және Технопарктен күтілетін нәтижелер сипаттамасы;

      7) Кодекстің 74-бабына сәйкес тіркелген салық төлеушілер үшін есебі салық органдарында жүргізілетін, республикалық бюджет туралы заңда тиісті қаржы жылына белгіленген айлық есептік көрсеткіштің алты еселенген мөлшерінен асып түсетін берешектің жоқ (бар) екендігі туралы, өтініш берілген күннің алдындағы күнтізбелік он күннен ерте берілмеген мәліметтер қоса беріледі.

      49. Өтініштер және оған қоса берілетін мәліметтер қазақ немесе орыс, не ағылшын тілдерінде беріледі. Құжаттар ағылшын тілінде ұсынылған кезде Технопарк олардың қазақ немесе орыс тілдеріндегі аудармасын қамтамасыз етеді.

      50. Өтініш беруші ұсынылған құжаттардың, өтініште қамтылған бастапқы деректердің, есептеулердің, негіздемелердің толық және дұрыс болуын қамтамасыз етеді.

      51. Технопарк өтініштің осы Қағидалардың 48-тармағына сәйкестігі тұрғысында қарайды және қызметтерді көрсетуге шарт жасасу немесе мұндай шарт жасасудан бас тарту туралы шешім қабылдайды.

      Өтініштерді қарау және олар бойынша шешімдер қабылдау рәсімі Технопарктің актілерімен реттеледі.

      52. Өтінішке қоса берілетін құжаттар осы Қағидалардың 48-тармағына сәйкес келмеген жағдайда, Технопарк өтініш берушіге ескертулерді көрсете отырып, хабарлама жібереді.

      53. Өтініш беруші ескертулерді алған күннен бастап он жұмыс күнінен кешіктірілмейтін мерзімде ескертулерді жоюды жүзеге асырады.

      54. Өтінішке қоса берілген құжаттардың осы Қағидалардың 48-тармағына сәйкес келмеуі, ескертулердің белгіленген мерзімде жойылмауы, өтініш берушінің шарт жасасу талаптарына сәйкес келмеуі шарт жасасудан бас тарту үшін негіз болып табылады.

      55. Шарт жасасудан бас тарту шарт жасасудан бас тарту үшін негіз болған себептерді жойған жағдайда, өтініш берушінің қайтадан өтініш беруіне кедергі келтірмейді.

      56. Шарт жасасу талаптары, сондай-ақ шарт жобасы өтінішдерді қабылдау басталған күнге дейін бір айдан кешіктірілмей Технопарктің интернет-ресурсында орналастырылады.

      Көрсетілетін қызметті алушымен жасалатын шарт жобасында Технопарктің қызметтерді көрсету талаптары, сондай-ақ өтінішті қарау қорытындысы бойынша Технопарктің оң қорытындысын алған адамдарды қоспағанда, көрсетілетін қызметті алушының Технопарктің көрсетілген қызметінің төлем тәртібі мен мөлшері қамтылады.

      57. Технопарктің көрсетілетін қызметінің құны Технопарк әзірлейтін және бекітетін Технопарктің ішкі құжаттарында айқындалады.

      Технопарк көрсететін қызметтердің ерекшеліктеріне байланысты көрсетілетін қызметтерінің құны коммерциялық бағалық ұсыныстар негізінде үшінші тарапты тартуы мүмкін.

8-параграф. Технопаркте акселерациядан өтетін адамдарға тұрғын үй беру және олардың тұруына жағдай жасау тәртібі

      58. Технопарк іріктелген жобалардың ішінен акселерациядан өту үшін жобалары бірінші болып берілген, шетелдіктерге және астанада тұрмайтын Қазақстан Республикасының азаматтарына жататын Технопаркте акселерациядан өтетін адамға бар болған жағдайда тұрғын үй береді.

      59. Технопаркте акселерациядан өтетін Технопарк қатысушыларының жұмыскерлері Технопаркпен жасалған шарт негізінде берілген тұрғын үйге орналастырылады және Қазақстан Республикасының тұрғын үй заңнамасына сәйкес тұрғын үйдің және ортақ мүліктің сақталуын қамтамасыз етеді.

      60. Акселерациядан өтуден шеттетілген Технопарк қатысушыларының жұмыскерлері тұрғын үйді босатады және екі жұмыс күні ішінде қабылдау-тапсыру актісі бойынша Технопаркке тапсырады.

      61. Технопарк босатылған тұрғын үй бар болған жағдайда, оны осы Қағидалардың 58-тармағында көрсетілген басқа адамдарға береді.

9-параграф. Қатысушылар жобалары қызметінің мониторингі және іске асыру

      62. Қатысушы Технопаркке осы Қағидаларға сәйкес есептілікті ұсынады.

      63. Технопарктің бағдарламалары шеңберінде жобаларды іске асыру мониторингінің мақсаты қатысушы жобасының нақты іске асырылу барысын көрсету болып табылады.

      64. Жобаларды іске асыру мониторингі Технопарктің қатысушылары және Көрсетілетін қызметті алушылар ұсынатын құрамында мынадай есептер:

      1) қол жеткізілген нәтижелердің талдауы және оны одан әрі дамыту бойынша ұсынымдар бар жоба қызметінің және оның іске асырылу барысы туралы тоқсан сайынғы есеп.

      2) қол жеткізілген нәтижелердің талдауы және оны одан әрі дамыту бойынша ұсынымдар бар жоба қызметінің және оның іске асырылу барысы туралы жыл сайынғы есеп бар мәліметтерді есепке алуды қамтиды.

      65. Есептің нысаны мен мазмұны Технопарк пен қатысушы, Көрсетілетін қызметті алушы арасында жасалатын шартта айқындалады.

      66. Қатысушы тоқсан сайын, есепті кезеңнен кейінгі айдың 5 күнінен кешіктірмей Технопаркке қатысушы жүзеге асыратын қызмет туралы тоқсан сайынғы есепті ұсынады.

      67. Қатысушы жыл сайын, есепті кезеңнен кейінгі жылдың 10 қаңтарына дейін Технопаркке қатысушы жүзеге асыратын қызмет туралы жыл сайынғы есепті ұсынады.

      68. Тоқсандық және жылдық есептерді жасау үшін есепті кезең тиісінше күнтізбелік тоқсан мен күнтізбелік жыл болып табылады.

      69. Қатысушылардың тоқсан сайынғы есептері негізінде Технопарк уәкілетті органға есепті кезеңнен кейінгі бір ай ішінде Технопарк бағдарламаларының іске асырылу барысы туралы талдамалық ақпарат дайындайды.

      70. Қатысушылар қызметінің мониторингі және оларды бағалау нәтижелері бойынша Технопарк жобаны Технопарк бағдарламалары шеңберінде одан әрі іске асырудың орындылығы немесе жобаны іске асырудың орынсыздығы туралы қорытынды береді.

  "Aстана Хаб" халықаралық
технологиялық паркі
қызметінің қағидаларына
1-қосымша
  Нысан

"Aстана Хаб" халықаралық технологиялық паркіне қатысушыны тіркеу туралы КУӘЛІК

      __________________________________________________________________________

      атауы, бизнес-сәйкестендіру нөмірі

      _________________________________________________________________________

      орналасқан жері

      __________________________________________________________________________

      қызмет түрі берілді.

      __________________________________________________________________________

      жобаның өнімі

      Ескертпе: жобаның өнімі деп қатысушының жобаны іске асыру процесінде өндіруге жоспарлаған тауарлары, жұмыстары немесе көрсетілетін қызметтері түсініледі.

      Берілген күні: _____________

      Мерзімге берілді: ____________

      Мөрге арналған орын

  "Aстана Хаб" халықаралық
технологиялық паркі
қызметінің қағидаларына
2-қосымша
  Нысан

"Aстана Хаб" халықаралық технологиялық паркіне қатысу мерзімін ұзарту туралы КУӘЛІК

      __________________________________________________________________________

      атауы, бизнес-сәйкестендіру нөмірі

      __________________________________________________________________________

      орналасқан жері

      __________________________________________________________________________

      қызмет түрі берілді.

      __________________________________________________________________________

      жобаның өнімі

      Ескертпе: жобаның өнімі деп қатысушының жобаны іске асыру процесінде өндіруге жоспарлаған тауарлары, жұмыстары немесе көрсетілетін қызметтері түсініледі.

      Берілген күні: _____________

      Мерзімге берілді: ____________

      Мөрге арналған орын

Егер Сіз беттен қате тапсаңыз, тінтуірмен сөзді немесе фразаны белгілеңіз және Ctrl+Enter пернелер тіркесін басыңыз

 

бет бойынша іздеу

Іздеу үшін жолды енгізіңіз

Кеңес: браузерде бет бойынша енгізілген іздеу бар, ол жылдамырақ жұмыс істейді. Көбінесе, ctrl-F пернелері қолданылады