Көлік құралының паспортын (көлік құралы шассиінің паспортын) және өздігінен жүретін машина мен басқа да техника түрлерінің паспортын қорғау элементтеріне қойылатын талаптарды бекіту туралы

Жаңа

Қазақстан Республикасы Индустрия және инфрақұрылымдық даму министрінің 2019 жылғы 12 наурыздағы № 129 бұйрығы. Қазақстан Республикасының Әділет министрлігінде 2019 жылғы 15 наурызда № 18394

      "Жол жүрісі туралы" 2014 жылғы 17 сәуірдегі Қазақстан Республикасы Заңының 15-1-бабының 5) тармақшасына сәйкес БҰЙЫРАМЫН:

      1. Қоса беріліп отырған Көлік құралының паспортын (көлік құралы шассиінің паспортын) және өздігінен жүретін машина мен басқа да техника түрлерінің паспортын қорғау элементтеріне қойылатын талаптар бекітілсін.

      2. Қазақстан Республикасы Индустрия және инфрақұрылымдық даму министрлігінің Индустриялық даму және өнеркәсіптік қауіпсіздік комитеті заңнамада белгіленген тәртіпте:

      1) осы бұйрықты Қазақстан Республикасы Әділет министрлігінде мемлекеттік тіркеуді;

      2) осы бұйрық мемлекеттік тіркелген күнінен бастап күнтізбелік он күн ішінде қазақ және орыс тілдерінде Қазақстан Республикасы Нормативтік құқықтық актілерінің эталондық бақылау банкіне ресми жариялау және енгізу үшін "Республикалық құқықтық ақпарат орталығы" шаруашылық жүргізу құқығындағы республикалық мемлекеттік кәсіпорнына жіберуді;

      3) осы бұйрықты Қазақстан Республикасы Индустрия және инфрақұрылымдық даму министрлігінің интернет-ресурсында орналастыруды қамтамасыз етсін.

      3. Осы бұйрықтың орындалуын бақылау жетекшілік ететін Қазақстан Республикасының Индустрия және инфрақұрылымдық даму вице-министріне жүктелсін.

      4. Осы бұйрық алғашқы ресми жарияланған күнінен бастап қолданысқа енгізіледі.

      Қазақстан Республикасының
Индустрия және инфрақұрылымдық даму министрі
Р. Скляр

  Қазақстан Республикасы
Индустрия және
инфрақұрылымдық
даму министрінің
2019 жылғы 12 наурыздағы
№ 129 бұйрығымен
бекітілген

Көлік құралының паспортын (көлік құралы шассиінің паспортын) және өздігінен жүретін машина мен басқа да техника түрлерінің паспортын қорғау элементтеріне қойылатын талаптар

      1. Осы Көлік құралының паспортын (көлік құралы шассиінің паспортын) және өздігінен жүретін машинаның және техниканың басқа түрлерінің паспортын қорғау элементтеріне қойылатын талаптар "Жол жүрісі туралы" 2014 жылғы 17 сәуірдегі Қазақстан Республикасы Заңының 15-1-бабының 5) тармақшасына сәйкес және "Өздігінен жүретін машинаның және басқа да техника түрлерінің паспорты туралы" Еуразиялық экономикалық комиссия Алқасының 2015 жылғы 18 тамыздағы № 100 шешімін іске асыру үшін әзірленген.

      2. Өздігінен жүретін машинаның және басқа да техника түрлері паспортының бланкілері қатаң есептілік құжаты болып табылады, олар Еуразиялық экономикалық одаққа мүше мемлекеттерде (бұдан әрі – мүше мемлекеттер) А4 форматтағы (210 х 297 мм) ақ қағазда, түзетуден немесе сүртіп кетіруден қорғауды қамтамасыз ететін бояуды пайдалана отырып, мүше мемлекеттердің заңнамасында белгіленген бланкілердіқорғау дәрежесіне қойылатын талаптарға сәйкес баспаханалық тәсілмен дайындалады және кем дегенде 8 қорғау дәрежесі болады, соның ішінде:

      1) айқын кереғар түсті, сенімді түрде көзбен шолып бақылануы қамтамасыз етілетін 2 түсті ашық-көлеңкелі су белгісі;

      2) спектрдің көрінетін немесе өзге де салаларында бақыланатын талшықтың кем дегенде 2 түрі болады. Бұл ретте талшық түрінің бірін енгізудің басқа түрлерімен – конфеттимен, полимерлік жіптермен, капсулданған люминоформен ауыстыруға жол беріледі. Ультракүлгін сәуленің әсерімен көрінетін көгілдір түсті люминесценциясы бар арнайы талшықтарды қолдануға жол берілмейді;

      3) 2 түс аясындағы торды ауыспалы адымменжәне түрлі-түсті жіп тәрізді жаймалап салу;

      4) қарпінің биіктігі оң орындауда 150 -200 мкм, ал кері орындауда – 200 - 250 мкм микромәтін;

      5) бояумен басылған, көрінетін спектрде көрінбейтін және сары-жасыл түсті ультракүлгін сәуленің әсерімен люминесценцияланатын элемент;

      6) ксерокөшіруден қорғау элементі;

      7) ыстықтайбедерлеу әдісімен салынған микромәтіні бар голограмма;

      8) бланк сериясынан, елдің 2 әріптік кодынан (ISO 3166-1 (alpha) анықтамалығына сәйкес) және бланктің реттік нөмірінен (2 бас әріп және 6 араб цифры) тұратын баспаханалық нөмірі болады.

Егер Сіз беттен қате тапсаңыз, тінтуірмен сөзді немесе фразаны белгілеңіз және Ctrl+Enter пернелер тіркесін басыңыз

 

бет бойынша іздеу

Іздеу үшін жолды енгізіңіз

Кеңес: браузерде бет бойынша енгізілген іздеу бар, ол жылдамырақ жұмыс істейді. Көбінесе, ctrl-F пернелері қолданылады