Қазақстан Республикасының Үкiметi қаулы етеді:
1. Қазақстан Республикасының Бiлiм және ғылым министрлiгi ұсынған, Қазақстан Республикасының Сыртқы iстер министрлiгiмен келiсiлген және тәжiк жағымен алдын ала пысықталған Қазақстан Республикасының Үкiметi мен Тәжiкстан Республикасының Үкiметi арасындағы Жоғары бiлiктi ғылыми және ғылыми-педагогтiк кадрларды даярлау және аттестациялау саласындағы ынтымақтастық жөнiндегi келiсiмнiң жобасы мақұлдансын.
2. Қазақстан Республикасының Сыртқы iстер министрi тәжiк жағымен
келiссөздер жүргізсiн және уағдаластыққа қол жеткiзiлгеннен кейiн, осы
ретте Келiсiмнiң жобасына қағидатты сипаты жоқ өзгерiстер мен толықтырулар
енгізуге рұқсат бере отырып, Қазақстан Республикасының Yкiметi атынан
көрсетiлген Келiсiмге қол қойсын.
3. Осы қаулы қол қойылған күнінен бастап күшiне енедi.
Қазақстан Республикасының
Премьер-Министрі
Қазақстан Республикасының Yкiметi мен Тәжікстан Республикасының Yкiметi
арасындағы Жоғары бiлiктi ғылыми және ғылыми-педагогтiк кадрларды
даярлау және аттестациялау саласындағы ынтымақтастық жөнiндегi
КЕЛIСIМ
Бұдан әрi Тараптар деп аталатын Қазақстан Республикасының Үкiметi мен
Тәжiкстан Республикасының Үкiметi
1992 жылғы 13 наурыздағы Тәуелсiз Мемлекеттер Достастығының қатысушылары - мемлекеттер шеңберiнде ғылыми-техникалық ынтымақтастық туралы үкiметаралық Келiсiмдi негізге ала отырып,
1995 жылғы 3 қарашадағы ТМД елдерiнiң жалпы ғылыми-технологиялық кеңiстiгін құру туралы үкiметаралық Келiсiмді басшылыққа алып,
ғылымдағы, техникадағы, білім мен мәдениеттегі тарихи қалыптасқан өзара тығыз байланыстарға сүйене отырып,
бiрыңғай ғылыми кеңiстiктi сақтауға ұмтыла отырып,
жоғары бiлiктi ғылыми және ғылыми-педагог кадрларды даярлау мен аттестациялау жүйелерiнiң тиiмділігін арттырудағы мемлекетаралық кооперацияның мақсатқа сәйкес екенiн мойындай отырып,
жоғары бiлiктi ғылыми және ғылыми-педагог кадрларды даярлау және аттестациялау саласындағы өзара тиiмдi ынтымақтастықты жалғастыруға ұмтылушылықты растай отырып,
төмендегiлер туралы уағдаласты:
1-бап
Тараптар, келiсе отырып, жоғары біліктi ғылыми және ғылыми-педагог кадрларды даярлау және аттестациялауға байланысты ұлттық тұжырымдар мен талаптарды әзiрлеу кезiнде өзара консультациялар өткiзетiн болады.
2-бап
Тараптар:
жоғары бiлiктi ғылыми және ғылыми-педагог кадрларды өзара мақсатты түрде даярлауды және сынау мерзiмiнен өткiзудi ұйымдастырады;
ғылыми қызметкерлердiң мамандығының (номенклатуралардың) тiзбелерiн әзiрлеу кезiнде консультациялар өткiзедi;
жоғары бiлiктi ғылыми және ғылыми-педагог кадрларды мемлекеттiк аттестациялау жүйесiндегі ғылыми дәрежелер мен ғылыми атақтар iзденушiлерiне қойылатын негiзгі талаптардың салыстырылуын қамтамасыз ететiн болады.
3-бап
Бiр Тараптың оқуы, бiлiктiлiгiн арттыруы және диссертация әзiрлеуi үшiн сынау мерзiмiн өткiзушiлердi, аспиранттарды, докторанттарды, ғылыми қызметкерлердi басқа Тараптың ғылыми ұйымдары мен жоғары оқу орындарына жiберуi Тараптардың мүдделi ұйымдарының тiкелей шарттарына сәйкес жүзеге асырылады, ол шарттарда жiберушi және қабылдаушы ұйымдардың құқы, мiндетi және жауапкершiлiгi анықталады.
4-бап
Тараптар жоғары бiлiктi ғылыми және ғылыми-педагог кадрларды аттестациялау саласындағы ынтымақтастықты:
бiр Тараптың iзденушiлерiнiң басқа Тараптың ғылыми дәрежелер беру жөнiндегi кеңестерiнде диссертациялар қорғауларын өткiзуi үшiн ғылыми дәрежелер мен ғылыми атақтар беруге рұқсат ететiн құқық берушi бiлiм туралы құжаттарды нострификациялауға (теңестiруге) байланысты талаптарды есепке ала отырып, бiрдей жағдай туғызу;
жоғары бiлiктi ғылыми және ғылыми-педагог кадрларды аттестациялау жүйелерiндегi өзгерiстер туралы дер кезiнде өзара хабарлау осы кадрларды даярлау мен аттестациялау мәселелерi бойынша тиiстi нормативтiк актілерiмен және басқа да материалдармен алмасу арқылы дамытатын болады.
5-бап
Диссертациялық жұмыстарды сараптау сапасын арттыру үшiн әр Тарап:
өз мемлекетiнiң ғылыми ұйымдары мен жоғары оқу орындарының жетекшi ғалымдарының және ғылыми ұйымдар мен жоғары оқу орындары мамандарының басқа Тараптың ғылыми дәрежелер беру жөнiндегi кеңестердiң жұмысына қатысуына;
өз мемлекетiнiң ғылыми дәрежелер беру жөнiндегi кеңестерiнде қорғалған диссертацияларды басқа тараптың ғылыми дәрежелер беру жөнiндегi кеңестерiнде қосымша сараптаудан өткiзуге жәрдемдеседi.
6-бап
Тараптар өз мемлекеттерiнiң аумақтарында Тараптардың тиiстi мемлекеттік аттестациялық органдары берген ғылыми дәрежелер және атақтар туралы бiлiктiлiктi айқындайтын мемлекеттiк үлгідегі құжаттарды белгiленген тәртiпте олардың иелерiн қайта аттестациялау жолымен таниды.
7-бап
Тараптар жоғары бiлiктi ғылыми және ғылыми-педагог кадрларды аттестациялау процестерiн басқаруды, оны жетiлдiруге бағытталған тәжiрибе алмасу жөнiндегі қажетті бiрлескен шараларды өткiзудi қамтамасыз етедi.
8-бап
Осы Келiсiмге қатысу Тараптардың жоғары бiлiктi ғылыми және ғылыми-педагог кадрларды даярлау және аттестациялау саласындағы ынтымақтастықтың басқа түрлерiн пайдалану құқын шектемейдi.
9-бап
Осы Келiсiмнiң ережелерiн түсiндiру және қолдану мәселелерi жөнiндегі таластар мен келiспеушiлiктердiң бәрi консультациялар және келiссөздер жолымен шешiлетiн болады.
10-бап
Осы Келiсiм оның күшiне енуi үшiн қажеттi мемлекетішiлiк
тәртiптердiң орындалғаны туралы жазбаша хабарлама алынған күннен бастап
күшiне енедi.
Осы Келiсiм мерзiмсiз қолданыста болады. Келiсiмнiң iс-әрекетi
Тараптардың бiрi осы Келiсiмнiң iс-әрекетiн тоқтату тiлегi туралы жазбаша
хабарлама алған күннен бастап алты ай өткеннен кейiн тоқтатылуы мүмкiн.
____________ қаласында _____ жылғы "____ " ___________ екі данада,
әрқайсысы қазақ, тәжік және орыс тілдерінде жасалды.
Мәтіннің түсіндіруінде пікір алшақтығы болған жағдайда Тараптар орыс
тіліндегі мәтінге назар аударатын болады.
Қазақстан Республикасының Тәжікстан Республикасының
Үкіметі үшін Үкіметі үшін
Оқығандар:
Қобдалиева Н.М.
Орынбекова Д.К.
