Қазақстан Республикасының Үкіметі ҚАУЛЫ ЕТЕДІ:
"Республикалық бюджеттің атқарылуы туралы жылдық есепті жасау және ұсыну ережесін бекіту туралы" Қазақстан Республикасының Президенті Жарлығының жобасы Қазақстан Республикасы Президентінің қарауына енгізілсін.
Қазақстан Республикасының
Премьер-Министрі К. Мәсімов
Қазақстан Республикасы Президентінің Жарлығы Республикалық бюджеттің атқарылуы туралы жылдық есепті жасау және ұсыну ережесін бекіту туралы
Қазақстан Республикасының 2008 жылғы 4 желтоқсандағы Бюджет кодексінің 127-бабына сәйкес ҚАУЛЫ ЕТЕМІН:
1. Қоса беріліп отырған Республикалық бюджеттің атқарылуы туралы жылдық есепті жасау және ұсыну ережесі бекітілсін.
2. "Республикалық бюджеттің атқарылуы туралы есепті жасау және ұсыну ережесін бекіту туралы" Қазақстан Республикасы Президентінің 2004 жылғы 17 қыркүйектегі N 1443 Жарлығының (Қазақстан Республикасының ПҮАЖ-ы, 2004 ж., N 36, 469-құжат; 2005 ж., N 21, 246-құжат; 2006 ж., N 46, 483-құжат) күші жойылды деп танылсын.
3. Осы Жарлық 2009 жылғы 1 қаңтардан бастап қолданысқа енгізіледі.
Қазақстан Республикасының
Президенті Н. Назарбаев
Қазақстан Республикасы
Президентінің
2009 жылғы ____________
N ___ Жарлығымен
бекітілген
Республикалық бюджеттің атқарылуы туралы жылдық есепті жасау және ұсыну ережесі 1. Жалпы ережелер
1. Осы Республикалық бюджеттің атқарылуы туралы жылдық есепті жасау және ұсыну ережесі (бұдан әрі - Ереже) есепті қаржы жылындағы республикалық бюджеттің атқарылуы туралы жылдық есепті жасау және ұсыну тәртібін анықтайды.
2. Түсімдердің және төлемдер бойынша қаржыландырудың жиынтық жоспарының, міндеттемелер бойынша қаржыландырудың жиынтық жоспарының атқарылуы туралы есептердің деректері есепті қаржы жылындағы республикалық бюджеттің атқарылуы туралы жылдық есепті жасау үшін негіз болып табылады.
3. Республикалық бюджеттің атқарылуы туралы жылдық есеп есепті қаржы жылы жүргізілген республикалық бюджеттің түсімдері және шығыстарын қаржыландыру жөніндегі барлық операцияларды көрсетеді.
4. Республикалық бюджеттің атқарылуы туралы жылдық есепті Қазақстан Республикасының Бюджет кодексіне және осы Ережеде белгіленген талаптарға сәйкес бюджеттің атқарылуы жөніндегі орталық уәкілетті орган жасайды.
5. Есепті қаржы жылындағы республикалық бюджеттің атқарылуы туралы жылдық есепті қалыптастыру Қазақстан Республикасының Бюджет кодексінде айқындалған бюджет құрылымы бойынша кассалық негізде, мың теңгемен жүзеге асырылады.
2. Жылдық есепті жасау тәртібі
6. Есепті қаржы жылындағы республикалық бюджеттің атқарылуы туралы жылдық есеп тиісті қаржы жылына арналған республикалық бюджет туралы заңға сәйкес жасалады және мыналар:
есепті қаржы жылына арналған бекітілген, нақтыланған, түзетілген республикалық бюджеттің сомаларын;
есепті қаржы жылына арналған қабылданған міндеттемелердің сомаларын;
есепті қаржы жылында төленбеген міндеттемелердің сомаларын;
есепті қаржы жылындағы республикалық бюджеттік бағдарламалар бойынша бюджет түсімдерінің және (немесе) төленген міндеттемелердің атқарылу сомаларын;
есепті қаржы жылындағы бюджет түсімдерінің атқарылу және (немесе) республикалық бюджеттік бағдарламалар бойынша төленген міндеттемелер сомаларының есепті қаржы жылындағы орындалған (бекітілген, нақтыланған, түзетілген) республикалық бюджеттің сомаларынан ауытқуын;
есепті қаржы жылындағы бюджет түсімдерінің атқарылу және (немесе) республикалық бюджеттік бағдарламалар бойынша төленген міндеттемелер сомаларының есепті қаржы жылындағы орындалған (бекітілген, нақтыланған, түзетілген) республикалық бюджеттің сомаларына пайыздық қатынасын көрсетіп, Бірыңғай бюджеттік сыныптаманың бюджет түсімдері сыныптамасының кодтары мен бюджет шығыстарының функционалдық сыныптамасы бойынша қалыптастырылады.
7. Есепті қаржы жылындағы республикалық бюджеттің атқарылуы туралы жылдық есеп:
1) республикалық бюджет туралы заңға қосымшаларға сәйкес республикалық бюджет көрсеткіштерінің атқарылуы туралы деректерді білдіретін тиісті қаржы жылындағы республикалық бюджеттің атқарылуы туралы есептен;
2) республикалық бюджеттің түсімдер бойынша атқарылуы, жүргізілген бюджеттік мониторинг және оның нәтижелерін бағалау негізінде республикалық бюджеттік бағдарламалардың орындалуы туралы, сондай-ақ мемлекеттік органдардың есепті қаржы жылы ішінде стратегиялық жоспарларының нәтижелеріне, мақсаттарына қол жеткізілуін және міндеттерінің шешілуін талдау нәтижелері туралы талдамалық есептен;
3) түсіндірме жазбадан тұрады.
8. Республикалық бюджеттің атқарылуы туралы талдамалық есеп мынадай:
салықтық түсімдердің, салықтық емес түсімдердің, негізгі капиталды сатудан түсетін түсімдердің, түсімдер жоспарының атқарылуына әсер еткен негізгі факторларды баяндай отырып, трансферттер түсімдерінің атқарылуын және кірістер түсімдерінің жоспарынан іс жүзіндегі атқарылудың ауытқу себептерін талдауды қамтитын "Кірістер" бөлімі бойынша республикалық бюджеттің атқарылуы туралы;
республикалық бюджеттік бағдарламалардың әкімшілері мен Қазақстан Республикасының Президенті уәкілеттік берген мемлекеттік органдар жүргізген нәтижелерді бағалауды қамтитын "Шығындар" бөлімі бойынша республикалық бюджеттік бағдарламаларды іске асыру туралы;
кредит беруге байланысты республикалық бюджеттік бағдарламалардың орындалу нәтижелерін бағалауды қамтитын, іс жүзіндегі атқарылудың бюджеттік кредиттерді ұсыну және оларды өтеу жөніндегі қаражат түсімдері бойынша жоспардан ауытқудың негізгі факторлары мен себептерін қамтитын "Таза бюджеттік кредиттеу" бөлімінің атқарылуы туралы;
қаржы активтерінің нәтижелерін бағалауды қамтитын оларды сатып алуға байланысты бюджеттік бағдарламалардың атқарылу нәтижелерін, сондай-ақ мемлекеттің қаржы активтерінің іс жүзіндегі түсімдерінің жоспарлыдан ауытқу себептерін көрсете отырып, оларды сатудан түсетін түсімдер жоспарының атқарылу көрсеткіштерін қамтитын "Қаржы активтерімен жасалатын операциялар бойынша сальдо" бөлімінің атқарылуы туралы;
республикалық бюджеттің атқарылу қорытындылары бойынша тапшылықтың (профициттің) іс жүзінде қалыптасқан сомасын түсіндіретін "Бюджет тапшылығы (профициті)" бөлімінің атқарылуы туралы;
бюджет қаражатының қарызға алу және пайдаланылатын қалдықтары есебінен бюджет тапшылығын жабуды іс жүзінде қамтамасыз ету немесе бюджет профицитін, қарыз қаражатын, бюджет қаражатының пайдаланылатын қалдықтарын қарыздар бойынша негізгі борышты өтеуге жұмсау жолымен бюджет профицитін пайдалану нәтижелерін қамтитын "Бюджет тапшылығын қаржыдандыру (профицитін пайдалану)" бөлімінің атқарылуы туралы талдамалық ақпаратты қамтиды.
9. Түсіндірме жазбада елдегі экономикалық ахуал және республиканың тиісті кезеңге арналған әлеуметтік-экономикалық даму болжамында және бюджеттік өлшемдерде қабылданған салық-бюджет саясатының негізгі бағыттарының іске асырылуы туралы, тиісті қаржы жылына арналған республикалық бюджет туралы заң баптарының орындалуы туралы талдамалық ақпарат көрсетіледі.
3. Жылдық есепті ұсыну тәртібі
10. Бюджетті атқару жөніндегі орталық уәкілетті орган есепті жылдан кейінгі жылдың 1 сәуірінен кешіктірмей есепті қаржы жылындағы республикалық бюджеттің атқарылуы туралы жылдық есепті осы Ереженің 6 - 9-тармақтарында белгіленген талаптарға сәйкес Қазақстан Республикасының Үкіметіне, мемлекеттік жоспарлау жөніндегі орталық уәкілетті органға және мемлекеттік қаржылық бақылау органдарына ұсынады.
11. Есепті қаржы жылындағы республикалық бюджеттің атқарылуы туралы жылдық есепті Қазақстан Республикасының Үкіметі жыл сайын ағымдағы жылдың 1 мамырынан кешіктірмей Қазақстан Республикасының Парламентіне және Республикалық бюджеттің атқарылуын бақылау жөніндегі есеп комитетіне ұсынады.
Бюджетті атқару жөніндегі орталық уәкілетті орган есепті қаржы жылындағы республикалық бюджеттің атқарылуы туралы жылдық есепті Қазақстан Республикасының Парламентінде қарау кезінде бюджеттік бағдарламалар әкімшілерінің жұмысын үйлестіруді қамтамасыз етеді.
