Ауғанстан Ислам Республикасы мен Ливан Республикасында қалыптасқан күрделі экономикалық және қаржылық ахуалға байланысты Қазақстан Республикасының Үкіметі ҚАУЛЫ ЕТЕДІ:
1. Қазақстан Республикасы Төтенше жағдайлар министрлігі Ауғанстан Ислам Республикасына ресми ізгілік көмек көрсету үшін мемлекеттік материалдық резервтен 160000 (бір жүз алпыс мың) литр көлемінде өсімдік майын, 60 (алпыс) тонна көлемінде қарақұмық жармасын броннан шығарсын.
2. Қазақстан Республикасы Көлік және коммуникация министрлігі ізгілік жүкті межелі пунктіне дейін Ауғанстан Ислам Республикасына тасымалдау және жеткізу үшін жылжымалы құрамды уақтылы беруді қамтамасыз етсін.
3. Қазақстан Республикасы Қаржы министрлігі заңнамада белгіленген тәртіппен Қазақстан Республикасы Сыртқы істер министрлігіне Ливан Республикасына ресми ізгілік көмек көрсету үшін Қазақстан Республикасының және басқа мемлекеттердің аумағындағы табиғи және техногендік сипаттағы төтенше жағдайларды жою үшін 2013 жылға арналған республикалық бюджетте көзделген Қазақстан Республикасы Үкіметінің төтенше резервінен 200000 (екі жүз мың) АҚШ долларына баламалы сомада қаражат бөлсін.
4. Қазақстан Республикасы Сыртқы істер министрлігі заңнамада белгіленген тәртіппен көрсетілген қаражатты арнайы банктік шотқа аударуды қамтамасыз етсін:
Name: |
OIC - Assistance |
IBAN: |
SA29 4000 0000 0000 0560 0758 |
Bank: |
SAMBA Financial Group |
Branch: |
Main Branch |
Address: |
Al-Andalus Street |
Swift: |
SAMBSARI |
5. Қазақстан Республикасы Қаржы министрлігі бөлінген қаражаттың заңнамада белгіленген тәртіппен пайдаланылуын бақылауды қамтамасыз етсін.
6. Қазақстан Республикасы Төтенше жағдайлар, Қаржы, Көлік және коммуникация министрліктері осы қаулыдан туындайтын шараларды қабылдасын.
7. Қазақстан Республикасы Сыртқы істер министрлігі ізгілік көмекті алушыны анықтасын және оны көрсету жөніндегі шараларды үйлестіруді қамтамасыз етсін.
8. Осы қаулы қол қойылған күнінен бастап қолданысқа енгізіледі.
Қазақстан Республикасының
Премьер-Министрі С. Ахметов
