"Әділет органдары туралы" Қазақстан Республикасының Заңының 7-бабы 2-тармағының 3) тармақшасына, сондай-ақ Қазақстан Республикасы Үкіметінің 2004 жылғы 28 қазандағы №1120 қаулысымен бекітілген Қазақстан Республикасы Әділет министрлігі туралы ережесінің 3-тармағына сәйкес БҰЙЫРАМЫН:
1. Осы бұйрыққа қоса беріліп отырған "Халықаралық төрелік институтының төрешілер мен медиаторлар тізімдеріне кандидаттарды іріктеу жөніндегі нұсқаулық" бекітілсін.
2. Қазақстан Республикасы Әділет министрлігінің Мемлекеттің мүліктік құқықтарын қорғау департаменті:
1) осы бұйрықты мемлекеттік тіркеуді;
2) осы бұйрықты Қазақстан Республикасы Әділет министрлігінің интернет-ресурсына орналастыруды қамтамасыз етсін.
3. Осы бұйрықтың орындалуын бақылау жетекшілік ететін Қазақстан Республикасы Әділет вице-министріне жүктелсін.
4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.
|
Қазақстан Республикасы Әділет министрі |
К. Мусин |
|
"КЕЛІСІЛДІ" Қазақстан Республикасы Ақпарат және қоғамдық даму министрлігі |
|
"КЕЛІСІЛДІ" Қазақстан Республикасы Cыртқы істер министрлігі |
| Қазақстан Республикасы | |
| Әділет министрі | |
| 2022 жылғы 27 мамырдағы | |
| № 442 бұйрығына | |
| қосымша |
Халықаралық төрелік институтының төрешілер мен медиаторлар тізімдеріне кандидаттарды іріктеу жөніндегі нұсқаулық
1-тарау. Жалпы ережелер
1. Осы Халықаралық төрелік институтының төрешілер мен медиаторлар тізіміне кандидаттарды іріктеу жөніндегі нұсқаулық (бұдан әрі - Нұсқаулық) "Әділет органдары туралы" Қазақстан Республикасы Заңының 7-бабы 2-тармағының 3) тармақшасына, сондай-ақ Қазақстан Республикасы Үкіметінің 2004 жылғы 28 қазандағы № 1120 қаулысымен бекітілген Қазақстан Республикасы Әділет министрлігі туралы ереженің 3) тармағына сәйкес әзірленіп, Қазақстан Республикасының Заңымен ратификацияланған Мемлекеттер мен шетелдік тұлғалар арасындағы инвестициялық дауларды шешу тәртібі туралы конвенцияның (бұдан әрі - Конвенция) 13-бабының негізінде Халықаралық төрелік институтының төрешілер мен медиаторлар тізіміне кандидаттарды іріктеуді нақтылайды.
2. Осы Нұсқаулықта мынадай негізгі ұғымдар пайдаланылады:
1) Қазақстан Республикасы Үкіметінің консультанты (бұдан әрі - Консультант) – төреліктерде, шетелдік төреліктерде, шетелдік мемлекеттік және сот органдарында, сондай-ақ дауды төрелікке дейінгі реттеу процесінде мемлекеттің мүдделерін қорғау және білдіру үшін Қазақстан Республикасының Үкіметі тартатын заң консультанттары;
2) төреші – тараптар сайлаған немесе дауды шешу үшін тиісті төрелік ережелеріне сәйкес тағайындалған жеке тұлға.
3) медиатор – кәсіби немесе қоғамдық медиация жүргізу үшін тараптар тартатын тәуелсіз жеке тұлға;
4) кандидат - халықаралық төрелік институтының төрешілері мен медиаторларының тізімдеріне қосылған, Қазақстан Республикасының азаматы болып табылатын, халықаралық құқықтың тиісті салаларында білімі/біліктілігі, төрелік және/немесе сот ісіне қатысу, инвестициялық мәселелер бойынша медиация рәсімдерін жүргізу тәжірибесі бар және ағылшын тілін еркін меңгерген тұлға.
2-тарау. Кандидаттарды анықтауды нақтылау
3. Әлеуетті төрешілер мен медиаторларға кандидаттарды Халықаралық төрелік институтының Төрешілер мен медиаторлар тізіміне кандидаттарды іріктеу жөніндегі комиссиясы (бұдан әрі – Комиссия) қарайды.
Комиссия әлеуетті кандидаттарды Халықаралық арбитраж институтының төрешілер мен медиаторлар тізіміне енгізу бойынша ұсыныстар әзірлеу үшін Министрлік жанынан құрылған консультативтік-кеңесші орган болып табылады. Комиссияның құрамы Министрдің бұйрығымен бекітіледі.
Комиссия құрамы функцияларына әртүрлі юрисдикциялардағы халықаралық төрелік (сот) сот ісін жүргізуде мемлекет мүдделерін білдіруді және қорғауды қамтамасыз ету (бұдан әрі – Жұмыс органы) кіретін Министрліктің құрылымдық бөлімшесінің үш өкілінен тұрады.
Комиссия төрағасы Комиссия мүшелерінің арасынан Комиссия мүшелерінің көпшілік дауысымен сайланады.
Хатшы Комиссияның мүшесі болып табылмайды және дауыс беруге құқығы жоқ. Комиссия шешімі консультативтік сипатта болады.
4. Халықаралық төрелік институттардың төрешілері мен медиаторларының тізімдерінде бос орындар болған жағдайда жұмыс органы консультанттардан Қазақстан Республикасының атынан төрешілер және медиаторлар тізімдеріне енгізу үшін әлеуетті кандидаттардың тізімін сұратады.
5. Консультанттар сұрау салуды алған күннен бастап күнтізбелік 30 (отыз) күн ішінде келесі растаушы құжаттарды ұсына отырып, үміткерлерге ұсыныстарды жібереді:
- жеке басын куәландыратын құжаттың көшірмелері;
- халықаралық құқықтың тиісті салаларында (атап айтқанда, инвестициялық құқық, адам құқықтары саласындағы, сондай-ақ сауда, өнеркәсіп, қаржы саласындағы халықаралық инвестициялық төрелік) білімін/біліктілігін растайтын құжаттың көшірмелері;
- еңбек қызметін растайтын құжаттың көшірмелері (атап айтқанда, төрелік және/немесе сот ісін жүргізудегі, сондай-ақ инвестициялық делдалдық рәсімдеріндегі, сараптамалық қорытындыларды дайындаудағы, ғылыми еңбектерді жариялаудағы, халықаралық ұйымда/заң фирмасындағы жұмыстағы тәжірибесін растайтын);
- ағылшын тілін еркін меңгергенін растайтын құжаттың көшірмелері (ағылшын тілінде сөйлейтін елде тұру, халықаралық ұйымда/заң фирмасында қатарынан 2 жылдан астам жұмыс істеген, IELTS, TOEFL немесе ағылшын тілін білу деңгейін растайтын басқа сертификаттар).
6. Жұмыс органы бес жұмыс күні ішінде қоса берілген құжаттардың толықтығын тексереді. Ұсынылған құжаттар осы Нұсқаулықтың 5-тармағында көрсетілген тізбеге сәйкес келмеген жағдайда, жұмыс органы әлеуетті кандидатқа бес жұмыс күні ішінде оларды толықтыру қажеттілігі туралы хабарлайды.
Үміткерлерге толық тізімі қалыптастырылғаннан кейін жұмыс органы үш жұмыс күні ішінде растайтын құжаттарды қоса бере отырып, Комиссияның қарауына енгізеді.
7. Комиссия әлеуетті кандидаттарды Қазақстан Республикасына және/немесе мемлекеттік органдарға, ұйымдарға, квазимемлекеттік құрылымдарға төреліктерде, шетелдік мемлекеттік және сот органдарында мүдделерді білдіру және қорғау бойынша, дауларды төрелікке дейін (сотқа дейін) реттеу процесінде, сондай-ақ шетелде мемлекеттің мүдделерін ілгерілету жөніндегі басқа да іс-шараларды өткізу бойынша қызметтер көрсету тәжірибесін ескере отырып (яғни, қаралатын іс жүргізудің көлемін, процеске қатысушыларды, даудың мәнін, нәтижелерін) қарайды.
8. Кандидаттардың тізіміне Қазақстан Республикасына, Қазақстан Республикасының мемлекеттік органдарына, халықаралық төреліктерде (инвестициялық және коммерциялық), Қазақстан Республикасының және/немесе шет мемлекеттердің соттарында қарсы тараптың мүдделерін білдірген тұлғалар енгізілмейді.
9. Комиссия мүшелері бес жұмыс күні ішінде халықаралық төрелік институттарының төрешілері мен медиаторларының тізіміне енгізуге ұсынылатын әлеуетті кандидаттардың алдын ала тізімін қалыптастырады. Ол хаттамамен ресімделеді және Комиссия төрағасы қол қояды.
10. Әлеуетті кандидаттардың алдын ала тізімі растау құжаттарымен бірге бес жұмыс күні ішінде Қазақстан Республикасы Сыртқы істер министрлігіне (бұдан әрі – СІМ), Қазақстан Республикасы Ақпарат және әлеуметтік даму министрлігіне (бұдан әрі – мемлекеттік органдар) келісуге жіберіледі.
11. Мемлекеттік органдар материалдар келіп түскен күннен бастап күнтізбелік 30 (отыз) күн ішінде жазбаша түрде әрбір кандидат (төреші және медиатор) бойынша ескертпелер мен ұсыныстарды береді, не олардың жоқтығы туралы хабарлайды.
12. Мемлекеттік органдар алдын ала тізіммен келіспеген жағдайда халықаралық төрелік институтының төрешілер мен медиаторлардың тізіміне кандидаттарды іріктеу рәсімі осы Нұсқаулықтың 2-тарауында көрсетілген алгоритм бойынша жүзеге асырылады.
Мемлекеттік органдар алдын ала тізімде көрсетілген жеке кандидатпен келіспеген жағдайда, бұл кандидат тізімнен шығарылады.
13. Ұсыныстар мен ескертулер болмаған жағдайда кандидаттар тізімі Министрдің бұйрығымен бекітіледі. Жұмыс органы осы бұйрықтың ресми интернет-ресурсында жариялануын қамтамасыз етсін.
14. Кандидаттардың бекiтiлген тiзiмi күнтiзбелiк бес күн iшiнде СІМ одан әрi тиiстi халықаралық төрелiк институтына жеткiзiлу үшiн жiберiледi.
15. Жұмыс органы Халықаралық арбитраж институтының төрешілер мен медиаторлар тізімдеріне енгізілген тұлғалармен жұмысты үйлестіреді және осы тұлғалардың мәртебесі туралы ақпаратты жаңартады.
