Қазақстан Республикасының Үкiметi қаулы етеді:
1. Қоса беріліп отырған Қазақстан Республикасының Үкiметi мен Украинаның Министрлер Кабинетi арасындағы Әскери-техникалық ынтымақтастық туралы келiсiмнiң жобасы мақұлдансын.
2. Қазақстан Республикасының Қорғаныс министрi Мұхтар Қапашұлы Алтынбаевқа қағидаттық сипаты жоқ өзгерiстер мен толықтырулар енгiзуге рұқсат бере отырып Қазақстан Республикасының Үкiметi атынан Қазақстан Республикасының Yкiметi мен Украинаның Министрлер Кабинетi арасындағы Әскери-техникалық ынтымақтастық туралы келiсiм жасасуға өкiлеттiк берiлсiн.
3. Осы қаулы қол қойылған күнінен бастап күшiне енедi.
Қазақстан Республикасының
Премьер-Министрі
Жоба
Қазақстан Республикасының Yкіметi мен Украинаның Министрлер Кабинетi арасындағы Әскери-техникалық ынтымақтастық туралы
КЕЛIСIМ
Қазақстан Республикасының Үкiметi мен Украинаның Министрлер Кабинетi (бұдан әрi - Тараптар),
1994 жылғы 20 қаңтардағы Қазақстан Республикасы мен Украина арасындағы Достық пен ынтымақтастық туралы шарттың мақсаттары мен қағидаттарына өздерінің адалдықтарын растай отырып,
1993 жылғы 22 қаңтардағы Тәуелсіз Мемлекеттер Достастығына қатысушы мемлекеттердiң мемлекетаралық құпияларды сақтауды бiрлесiп қамтамасыз ету туралы келiсiмдi басшылыққа ала отырып,
Тараптар мемлекеттерінiң өзара құрметiне, сенiмiне және мүдделерiн ескеруге негiзделген өзара тиiмдi ұзақ мерзiмдi ынтымақтастыққа ұмтыла отырып,
Тараптар мемлекеттерінiң қорғаныс қабiлетiн нығайту қажеттiлiгiне сүйене отырып, төмендегiлер туралы келiстi:
1-бап
Осы Келiсiмнiң мақсаты Тараптар мемлекеттерiнің арасындағы әскери-техникалық ынтымақтастықты дамыту және реттеу болып табылады.
2-бап
Тараптар әскери-техникалық ынтымақтастықты Тараптар мемлекеттерiнiң ұлттық заңнамасына негiзделген, Тараптар мемлекеттерiнiң ұлттық қауiпсiздiгi мен қорғаныс қабiлетiн ғылыми, өндiрiстiк және материалдық-техникалық қамтамасыз ету саласындағы келiсiлген қызмет ретiнде қарастырады.
3-бап
Тараптар әскери-техникалық ынтымақтастықты мынадай бағыттар бойынша жүзеге асыратын болады:
1) Тараптар мемлекеттерінің қарулы күштерi, басқа да әскерлерi мен әскери құралымдары үшiн келiсiлген әзiрлемелердi, қару-жарақты, әскери техника мен басқа да материалдық құралдарды өндiрудi, жаңғыртуды және жөндеуді, қару-жарақ пен әскери техниканың қазiргі түрлерiн, жеке қорғанудың арнайы құралдарын жаңғырту және олардың жаңа түрлерiн игеру мақсатында қорғаныс өнеркәсiбi кешенiнiң қолда бар жөндеу кәсiпорындарын бiрлесiп ұтымды пайдалану жөнiндегi iс-шараларды жүзеге асыру;
2) Тараптар мемлекеттерiнiң ұлттық заңнамаларына сәйкес бекiтiлген тiзбелер бойынша қару-жарақты, әскери техниканы, қосалқы бөлшектердi, техникалық құжаттаманы және әскери-техникалық мүлікті жеткiзiп беру;
3) қару-жарақты, әскери техниканы және басқа да материалдық құралдардың өндiрiсiн бiрлесiп құруға және өндiруге қатысатын кәсiпорындар мен ұйымдардың өндiрiстiк және жұмылдыру қуатын, ғылыми-эксперименталдық базаларын сақтау және дамыту;
4) осы Келiсiмге сәйкес бiр Тараптың басқа Тарапқа шарттық негiзде немесе бiрлесiп iргелi, iзденiстiк және қолданбалы зерттеулер, перспективалық ғылыми-техникалық және технологиялық әзiрлемелер, ғылыми-зерттеу және тәжiрибелiк-конструкторлық жұмыстар жүргiзу;
5) қару-жарақ пен әскери техниканы стандарттау және бiрiздендiру, Тараптар мемлекеттерiнiң қарулы күштерiн, басқа да әскерлерi мен әскери құралымдарын метрологиялық қамтамасыз ету саласындағы өзара iс-қимыл;
6) қару-жарақ пен әскери техниканы жауынгерлiк әзiрлiк жағдайында ұстаудағы өзара iс-қимыл;
7) жауынгерлiк пайдалануға жарамсыз қару-жарақ пен әскери техниканы кәдеге жарату жөнiндегi жұмыстарды бiрлесiп жүргiзу;
8) қару-жарақ пен әскери техника сату әрi әскери және арнаулы мақсаттағы қызмет көрсетулер саласындағы ынтымақтастық;
9) бiр Тараптың екiншi Тарап мемлекетiнiң әскери және өндiрiстiк инфрақұрылымының элементтерiн, жұмыс iстеп тұрған және жаңадан құрылған полигондарының, ғылыми-зерттеу орталықтары мен зертханаларының мүмкiндiктерiн пайдалануы немесе осы Келісімге сәйкес оларды шарттық негiзде бiрлесiп пайдалануы;
10) әскери топогеодезия саласындағы ынтымақтастық;
11) әскери-техникалық кадрлар мен мамандарды даярлау және оқыту;
12) әскерлердi басқару және техникалық қамтамасыз ету процесiн басқаруды автоматтандыру кезiнде қолданылатын немесе қолдануға жоспарланатын перспективалық ақпараттық технологиялардың бiрiздендiрілген бағдарламалары мен техникалық құралдарын пайдалану саласындағы ынтымақтастық;
13) Тараптардың өзара келiсiмi бойынша басқа да бағыттар.
Тараптар арасындағы осы Келiсiм шеңберiндегi қаржылық, мiндеттемелермен байланысты қатынастар жекелеген шарттармен реттелетiн болады.
4-бап
Тараптар мемлекеттерiнiң осы Келiсiмдi iске асыру жөнiндегi Уәкiлеттi органдары мыналар болып табылады:
қазақстан Тарабынан - Қазақстан Республикасының Қорғаныс министрлiгi, Қазақстан Республикасының Iшкі істер министрлiгi, Қазақстан Республикасының Ұлттық қауiпсiздiк комитетi, Қазақстан Республикасының Индустрия және сауда министрлiгі;
украина Тарабынан - Украина Қорғаныс министрлiгi, Украина Өнеркәсiптiк саясат министрлiгi.
Тараптар осы Келiсiмнiң ережелерiн iске асыру мақсатында әскери-техникалық ынтымақтастық мәселелерi бойынша қазақстан-украина үкіметаралық бiрлескен комиссиясын (бұдан әрi - Комиссия) құрады.
Комиссия Тараптар белгiлеген мерзiм iшiнде өз қызметі туралы Ереженi әзірлейдi.
5-бап
Тараптар ынтымақтастықты мынадай нысандарда жүзеге асырады:
Тараптар мемлекеттерiнiң уәкiлеттi органдарының арасында халықаралық шарттар жасасу, әскери-техникалық бағдарламалар әзiрлеу;
хаттамаларды ресiмдей отырып, Комиссия мен оның жұмыс органдарының отырыстарын өткiзу;
Тараптар мемлекеттерiнiң ұлттық заңнамаларына сәйкес Тараптар мемлекеттердiң Уәкілеттi органдары және/немесе Тараптар мемлекеттерінiң кәсiпорындары мен ұйымдары арасында шарттар (келісім-шарттар) жасасу;
әскери-техникалық ынтымақтастықтың нақты мәселелерi бойынша консультациялар өткiзу, мамандар шақыру, тәжiрибе және ақпарат алмасу.
6-бап
Осы Келiсiмнiң шеңберiнде өнiмдердiң жеткізілiмi, жұмыстарды орындау мен қызметтер көрсету Тараптар мемлекеттерiнің ұлттық заңнамаларына сәйкес Тараптар мемлекеттерiнiң уәкілетті органдары арқылы ұйымдар шарттық негiзде жүзеге асыратын болады.
Жеткiзiп беру, жұмыстар жүргізу мен қызметтер көрсету көлемi мен тәртiбi жекелеген шарттармен (келiсiм-шарттармен) реттеледi.
7-бап
Тараптар жасалған шарттарға және Тараптар мемлекеттерiнiң әскери өкiлдiктерiне берiлген өкiлеттіктерге сәйкес өз мемлекеттерінiң кәсiпорындарында Тараптар мемлекеттерiнiң қолданылып жүрген техникалық және нормативтiк құжаттамаларына сәйкес әскери мақсаттағы және осы өнiмге жинақтаушы өнiмдердi қабылдауды жүзеге асырады және қабылдау нәтижелерiн өзара таниды.
8-бап
Тараптар Құпия ақпараттарды өзара қорғау туралы үкiметаралық келiсiмдi жасасқаннан кейiн ғана құпия ақпарат алмасуды жүзеге асырады.
9-бап
Тараптар зияткерлiк меншiк құқығын тиiмдi қорғауды қамтамасыз етуге мiндеттенедi.
Тараптардың бiр де бiрi үшiншi тарапқа берушi Тараптың алдын ала жазбаша келiсiмiнсiз қару-жарақты, әскери техниканы немесе оларды өндiру жөнiндегi техникалық құжаттаманы, берушi Тараптан алынған немесе осы Келiсiмнiң шеңберiнде бiрлесiп құрылған әскери-техникалық саладағы тәжiрибелiк және конструкторлық жұмыстар жөнiндегi ақпаратты сатпайды және бермейдi.
Ақпарат алмасу және зияткерлiк меншiк құқығын қорғау мәселелерi жекелеген Келiсiмдермен реттеледi, көрсетiлген Келiсiм жасалғанға дейiн ақпарат алмасу және зияткерлiк меншiк құқығын қорғау мәселелерi әрбiр жеке шартта (келiсiм-шартта) ескертілетiн болады.
10-бап
Осы Келiсiмнiң ережелерi Тараптар мемлекеттерi қатысушылары болып табылатын басқа да халықаралық шарттардан туындайтын Тараптардың құқықтары мен мiндеттемелерiн қозғамайды.
11-бап
Осы Келiсiмге Тараптардың өзара келiсiмi бойынша осы Келiсiмнiң ажырамас бөлiгi болып табылатын жеке хаттамалармен ресiмделетiн өзгерістер мен толықтырулар енгiзілуi мүмкiн.
Осы Келiсiмнiң ережелерді түсiндiру және қолдану жөнiнде даулар туындаған жағдайда Тараптар оларды келiссөздер мен консультациялар жолымен шешетiн болады.
12-бап
Осы Келiсiм бес жыл мерзiмге жасалады және егер Тараптардың бiрде бiрi кезектi бес жыл мерзiм аяқталардан кем дегенде алты ай бұрын оның қолданыста болуын тоқтату ниетi туралы дипломатиялық арналар бойынша екiншi Тарапқа жазбаша хабарламаса, келесi бес жылдық мерзiмге өздiгiнен ұзартылады.
Осы Келiсiм Тараптардың оның күшiне ену үшiн қажеттi мемлекетiшiлiк рәсiмдердi орындағаны туралы соңғы жазбаша хабарламасы алынған күннен бастап күшiне енедi.
Осы Келiсiмнiң қолданыста болуының тоқтатылуы оларға қатысты өзгеше жазбаша уағдаластық болғаннан басқа жағдайларда, бұдан бұрын осы Келiсiмнің шеңберiнде басталған бағдарламалар мен жобалар шарттарының (келiсiм-шарттарының) орындалуына әсер етпейдi.
Осы Келiсiмнің қолданылуы тоқтатылған жағдайда Тараптардың әрқайсысы осы Келiсiмнiң 9-бабының ережелерiн сақтауды жалғастырады.
1994 жылғы 20 қаңтардағы Қазақстан Республикасының Yкiметi мен Украинаның Yкіметi арасындағы Әскери-техникалық ынтымақтастық туралы келiсiм осы Келiсiм күшiне енген күннен бастап өз күшін тоқтатады.
200 ___ жылғы _________ _________ қаласында әрқайсысы қазақ, украин және орыс тілдерiнде екi түпнұсқалық данада жасалды, әрi барлық мәтіндердiң бiрдей күшi бар.
Осы Келiсiмнiң ережелерiн түсiндiруде келiспеушіліктер туындаған жағдайда Тараптар орыс тiлдегi мәтiнге жүгiнетiн болады.
Қазақстан Республикасының Украинаның Министрлер
Үкiметi үшін Кабинетi үшiн
