"Ойын бизнесі туралы" Қазақстан Республикасы Заңының 8-бабы 1-тармағының 7-3) тармақшасына сәйкес БҰЙЫРАМЫН:
1. Қоса беріліп отырған Ақпаратты жүйелі түрде жинауды және интернет-ресурстардың мазмұнын интернет-казино белгілерінің болуы-болмауы тұрғысынан талдауды жүзеге асыру қағидалары бекітілсін.
2. Қазақстан Республикасы Мәдениет және спорт министрлігінің Туризм индустриясы комитеті Қазақстан Республикасы заңнамасында белгіленген тәртіппен:
1) осы бұйрықтың Қазақстан Республикасы Әділет министрлігінде мемлекеттік тіркелуін;
2) осы бұйрықты қолданысқа енгізілгеннен кейін Қазақстан Республикасы Мәдениет және спорт министрлігінің интернет-ресурсында орналастыруды;
3) осы бұйрықпен көзделген іс-шаралар орындалғаннан кейін он жұмыс күні ішінде Қазақстан Республикасы Мәдениет және спорт министрлігінің Заң қызметі департаментіне іс-шаралардың орындалуы туралы мәліметтерді ұсынуды қамтамасыз етсін.
3. Осы бұйрықтың орындалуын бақылау жетекшілік ететін Қазақстан Республикасының Мәдениет және спорт вице-министріне жүктелсін.
4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.
Қазақстан Республикасы Мәдениет және спорт министрі |
А. Раимкулова |
Қазақстан Республикасы Мәдениет және спорт министрі 2021 жылғы 10 қыркүйектегі № 282 бұйрығымен бекітілген |
Ақпаратты жүйелі түрде жинауды және интернет-ресурстардың мазмұнын интернет-казино белгілерінің болуы-болмауы тұрғысынан талдауды жүзеге асыру қағидалары 1-тарау. Жалпы ережелер
1. Осы Ақпаратты жүйелі түрде жинауды және интернет-ресурстардың мазмұнын интернет-казино белгілерінің болуы-болмауы тұрғысынан талдауды жүзеге асыру қағидалары (бұдан әрі – Қағидалар) "Ойын бизнесі туралы" Қазақстан Республикасы Заңының (бұдан әрі – Заң) 8-бабы 1-тармағының 7-3) тармақшасына сәйкес әзірленді және ақпаратты жүйелі түрде жинауды және интернет-ресурстардың мазмұнын интернет-казино белгілерінің болуы-болмауы тұрғысынан талдауды жүзеге асыру тәртібін айқындайды.
2. Осы Қағидаларда мынадай ұғымдар пайдаланылады:
1) Интернет – электрондық ақпараттық ресурстарды жіберуге арналған телекоммуникациялардың біріктірілген желілерінің және есептеу ресурстарының дүниежүзілік жүйесі;
2) интернет-казино – нақты уақыт режимінде Интернет желісі және (немесе) электрондық ақша арқылы құмар ойындарды ұйымдастыру мен өткізу мүмкіндігін іске асыратын және ұтыс алуды көздейтін интернет-ресурс;
3) интернет-ресурс – бірегей желілік адресі және (немесе) домендік аты бар және Интернетте жұмыс істейтін аппараттық-бағдарламалық кешенде орналастырылған (мәтіндік, графикалық, аудиокөрінімді немесе өзге де түрдегі) ақпарат;
4) құмар ойын – ұтысты көздейтін, қатысушылардың өз арасында не ойын бизнесін ұйымдастырушымен аталған адамдар қатысатын оқиға нәтижесіне жасалған, тәуекелге негізделген келісім;
5) ойын бизнесi саласындағы уәкiлеттi орган (бұдан әрi – уәкiлеттi орган) – Заңның 1-бабының 13) тармақшасына сәйкес айқындалатын және ойын бизнесi саласындағы мемлекеттiк саясатты iске асыруды және бақылауды жүзеге асыратын мемлекеттiк орган;
6) ұтыс – құмар ойынның және (немесе) бәс тігудің ойын бизнесін ұйымдастырушы белгілеген қағидаларда көзделген нәтижесі шыққан кезде құмар ойынға және (немесе) бәс тігуге қатысушыға міндетті түрде төленуге жататын мүліктік пайда;
7) электрондық ақша – электрондық нысанда сақталатын және электрондық ақша жүйесінде жүйеге басқа да қатысушылар төлем құралы ретінде қабылдайтын электрондық ақша эмитентінің шартсыз және кері қайтарып алынбайтын ақшалай міндеттемелері.
2-тарау. Интернет-ресурстардың мазмұнында интернет-казино белгілерінің болуы-болмауы тұрғысынан ақпаратты жүйелі түрде жинауды жүзеге асыру тәртібі
3. Интернет-казино заңсыз қызметін анықтау мақсатында уәкілетті орган тұрақты негізде интернет-казино белгілерінің болуы-болмауы тұрғысынан, оның ішінде жеке және заңды тұлғалардан алынатын интернет-казино белгілері бар интернет-ресурстар туралы мәліметтер бойынша интернет-ресурстардың мазмұны туралы ақпаратты жүйелі түрде жинауды (бұдан әрі – жүйелі түрде жинау) жүзеге асырады.
4. Жүйелі түрде жинау келесі кезеңдерді қамтиды:
1) интернет-казино белгілерін анықтау;
2) анықталған интернет-казиноларды тіркеу.
5. Интернет-казино белгілерін анықтау нақты уақыт режимінде Интернет желісі және (немесе) электрондық ақша арқылы құмар ойындарды ұйымдастыру мен өткізу мүмкіндігін іске асыратын және ұтыс алуды көздейтін интернет-ресурстарды іздеу және қарау арқылы жүзеге асырылады.
6. Анықталған интернет-казиноны тіркеу осы Қағидаларға қосымшаға сәйкес нысан бойынша интернет-казино белгілері бар интернет-ресурстар тізбесіне интернет-казино белгілері бар интернет-ресурс туралы негізгі деректерді енгізу арқылы жүргізіледі.
3-тарау. Интернет-ресурстардың мазмұнын интернет-казино белгілерінің болуы-болмауы тұрғысынан талдауды жүзеге асыру тәртібі
7. Жүйелі түрде жинау нәтижелері бойынша уәкілетті орган жиналған ақпарат негізінде тоқсан сайын, келесі тоқсанның бірінші айының 20-күнінен кешіктірмей интернет-ресурстардың мазмұнына интернет-казино белгілерінің болуы-болмауы тұрғысынан талдауды жүзеге асырады және мынадай мақсаттарда пайдаланылатын талдамалық ақпаратты қалыптастырады:
1) интернет-казино белгілері бар интернет-ресурстар санының ұлғаю немесе азаю серпінін қадағалау;
2) интернет-казино қызметіне қарсы іс-қимыл мәселелері бойынша заңнаманы жетілдіру;
3) Қазақстан Республикасының аумағында интернет-казино қызметінің жолын кесу жөніндегі шараларды дайындау.
8. Уәкілетті орган тоқсан сайын келесі тоқсанның бірінші айының 25-күнінен кешіктірмей өзінің интернет-ресурсында интернет-ресурстардың мазмұнын интернет-казино белгілерінің болуы-болмауы тұрғысынан талдау нәтижелері бойынша қорытынды талдамалық ақпаратты орналастырады.
Ақпаратты жүйелі түрде жинауды және интернет-ресурстардың мазмұнын интернет-казино белгілерінің болуы-болмауы тұрғысынан талдауды жүзеге асыру қағидаларына қосымша |
Нысан
Интернет-казино белгілері бар интернет-ресурстардың тізімі
№ | Бірегей желілік адресі және (немесе) домендік аты | Интернет-казино анықталған белгілерінің сипаттамасы | Интернет-казино белгілері бар интернет-ресурсты анықталған күні |
---|---|---|---|
1 | 2 | 3 | 4 |