"Қазақстан Республикасындағы жергілікті мемлекеттік басқару және өзін-өзі басқару туралы" Қазақстан Республикасының 2001 жылғы 23 қаңтардағы № 148 Заңының 31-бабына, "Мемлекеттік мүлік туралы" Қазақстан Республикасының 2011 жылғы 1 наурыздағы Заңының 18-бабының 8)-тармақшасына, "Мемлекеттік органдар мен олардың құрылымдық бөлімшелерінің қызметін ұйымдастырудың кейбір мәселелері туралы" Қазақстан Республикасы Үкіметінің 2021 жылғы 1 қыркүйектегі № 590 қаулысына сәйкес аудандық әкімдігі ҚАУЛЫ ЕТЕДІ:
1. Қоса беріліп отырған "Махамбет аудандық экономика және қаржы бөлімі" мемлекеттік мекемесінің Ережесі бекітілсін.
2. "Махамбет аудандық экономика және қаржы бөлімі" мемлекеттік мекемесі заңнамада белгіленген тәртіппен осы қаулыдан туындайтын шараларды қабылдасын.
3. Осы қаулының орындалысын бақылау аудан әкімінің орынбасары С.Аманшиеваға жүктелсін.
4. Осы қаулы 2023 жылдың 1 қаңтарынан бастап қолданысқа енгізіледі.
| Махамбет ауданының әкімі | К. Нурлыбаев |
| Аудандық әкімдігінің 2022 жылғы "19" желтоқсандағы № 339 қаулысымен бекітілген |
"Махамбет аудандық экономика және қаржы бөлімі" мемлекеттік мекемесінің Ережесі
1. Жалпы ережелер
1. "Махамбет аудандық экономика және қаржы бөлімі" мемлекеттік мекемесі (бұдан әрі – Бөлім) ауданның әлеуметтік-экономикалық дамуын және бюджетін жоспарлау, бюджетін атқару және коммуналдық меншігін басқару бойынша мемлекеттік саясатты іске асыру жөніндегі қызметтер салаларындағы басшылықты жүзеге асыратын Қазақстан Республикасының мемлекеттік органы болып табылады.
2. Бөлім өз қызметін Қазақстан Республикасының Конституциясына және заңдарына, Қазақстан Республикасының Президенті мен Үкіметінің актілеріне, өзге де нормативтік құқықтық актілерге, сондай- ақ осы Ережеге сәйкес жүзеге асырады.
3. Бөлім мемлекеттік мекеме ұйымдық-құқықтық нысанындағы заңды тұлға болып табылады, Қазақстан Республикасының Мемлекеттік Елтаңбасы бейнеленген мөрлері және атауы қазақ және орыс тілдерінде жазылған мөртабандары, белгіленген үлгідегі бланкілері, сондай-ақ Қазақстан Республикасының заңнамасына сәйкес қазынашылық органдарында шоттары болады.
4. Бөлім азаматтық-құқықтық қатынастарды өз атынан жасайды.
5. Бөлім Қазақстан Республикасының заңнамасына сәйкес уәкілеттік берілген жағдайда ол мемлекеттің атынан азаматтық-құқықтық қатынастардың тарапы болуға құқылы.
6. Бөлім өз құзыретінің мәселелері бойынша заңнамада белгіленген тәртіппен Бөлім басшысының бұйрықтарымен және Қазақстан Республикасының заңнамасында көзделген басқа да актілермен рәсімделетін шешімдер қабылдайды.
7. Бөлімінің құрылымы мен штат санының лимиті қолданыстағы заңнамаға сәйкес бекітіледі.
8. Заңды тұлғаның орналасқан жері: 060700, Атырау облысы, Махамбет ауданы, Махамбет ауылы, Абай көшесі, 13-үй.
9. Осы Ереже Бөлімінің құрылтай құжаты болып табылады.
10. Бөлімінің қызметін қаржыландыру Қазақстан Республикасының заңнамасына сәйкес жергілікті бюджеттерден жүзеге асырылады.
11. Бөлімге кәсіпкерлік субъектілерімен Бөлімнің өкілеттіктері болып табылатын міндеттерді орындау тұрғысынан шарттық қарым-қатынас жасауға тыйым салынады.
Егер Бөлімге заңнамалық актілермен кіріс әкелетін қызметті жүзеге асыру құқығы берілсе, онда алынған кіріс, Қазақстан Республикасының заңнамасында өзгеше белгіленбесе, мемлекеттік бюджетке жіберіледі.
2. Мемлекеттік органның мақсаттары мен өкілеттіктері
12. Мақсаттары:
1) ауданның әлеуметтік экономикалық дамуының негізгі басым бағыттарын, стратегиялық мақсаттары мен міндеттерін жоспарлау және талдау;
2) тиісті әкімшілік - аумақтың бірлігінде бюджеттік жоспарлау;
3) тиісті әкімшілік – аумақтың бірлігінде бюджеттің атқарылуын ұйымдастыру;
4) аудандық коммуналдық мүлікті басқару саласында мемлекеттік саясатты іске асыру;
5) жоспарлау, бюджеттің атқарылуы, бухгалтерлік, бюджеттік, қаржылық есеп және аудандық коммуналдық мүлікті басқару саласындағы басшылық және салааралық үйлестіру;
6) заңнамамен жүктелген өзге де міндеттер.
13. Өкілеттіктері:
1) Құқықтары:
- бөлімнің құзіретіне кіретін мәселелер бойынша жеке және заңды тұлғалардың өтініштерін, мәлімдемелері мен шағымдарын Қазақстан Республикасы заңнамасында белгіленген тәртіппен қарау;
- Қазақстан Республикасы заңнамасына сәйкес бөлімнің құқтары мен мүдделерін қорғау мақсатында сотқа жүгіну, талап арыз беру;
- жеке және заңды тұлғалармен аудандық коммуналдық мүлікті сатып алу-сату, сенімгерлік басқаруға беру, мүліктік жалдауға (жалға алуға) беру, уақытша өтеусіз пайдалануға (орналастыруға) беру шарттарын жасау;
- заңнамаға сәйкес аудандық коммуналдық мүлікті жекешелендіру бойынша сауда-саттық өткізу;
- аудандық коммуналдық мүлікті иелену, пайдалану және билік ету мәселелері бойынша Қазақстан Республикасы соттарында мемлекеттің мүддесін білдіру;
- аудандық коммуналдық мүлікті сенімгерлікпен басқару (концессиялар) шарттарына сәйкес сенімгерлік басқарушылардың (концессионерлер) өз міндеттерін орындауы мәселесі жөнінде тыңдаулар өткізу;
- аудандық коммуналдық мүліктің ұрлығы және оны пайдалануға байланысты өзге де құқық бұзушылықтардың анықталған деректері бойынша материалдарды тергеу органдарына жолдау;
- тиісті уәкілетті органның сұрау салуы бойынша өзінің ақпараттық жүйелерінен мәліметтерді Қазақстан Республикасы заңнамасында айқындалған тәртіппен беру;
- құпиялық режимінің, қызметтік, коммерциялық немесе заңмен қорғалатын өзге де құпияның сақталуын ескере отырып, бақылау объектілерінің бақылау іс-шарасы мәселелеріне қатысты құжаттамасымен кідіріссіз танысу;
- қолданыстағы заңнамалық актілерде көзделген өзге де құқықтар мен міндеттерді жүзеге асыру.
2) Міндеттері:
- аудандық әкімдігіне ауданның әлеуметтік-экономикалық дамуының негізгі бағыттары бойынша ұсыныстар енгізу;
- аймақтың даму бағдарламасын іске асыру жөніндегі іс-шаралар жоспарының іске асырылуын бақылауды жүзеге асыру;
- өз құзыреті шегінде аудандық және ауылдық бюджетті жоспарлау және атқару, сондай-ақ аудандық коммуналдық мүліктерін басқару саласындағы мемлекеттік саясатты іске асыру бойынша ұсыныстар енгізу;
- аудандық коммуналдық мүліктердің мақсатты және тиімді пайдалануына, сақталуына, сенімгерлік басқару шарты бойынша міндеттемелердің орындалуына, жекешелендіру бойынша сатып алу-сату шарттары талаптарының сақталуына бақылау жүргізу;
- Қазақстан Республикасына тиесілі акцияларға дивидендтердің уақытылы және толық есептелуіне және олардың төленуіне, сондай-ақ жарғылық капиталдарға қатысу үлесі Қазақстан Республикасына тиесілі жауапкершілігі шектеулі серіктестіктің қатысушылары арасында табыстың бөлінуіне бақылау жүргізу;
- өз құзыреті шегінде аймақтың даму бағдарламасын және ауданның өзге де салалық бағдарламаларын және бюджетін түзету және нақтылау бойынша ұсыныстар енгізу;
- бөлімнің құзыретіне кіретін мәселелер бойынша қолданыстағы заңнаманы пайдалану бойынша түсіндірулер мен түсініктемелер беру;
- Қазақстан Республикасы Еңбек кодексінде және мемлекеттік қызмет туралы заңнамасында көзделген жағдайларда және тәртіппен қызметкерлерді көтермелеу, оларға тәртіптік жаза қолдану, қызметкерлерді материалдық жауапкершілікке тарту;
- мемлекеттік органдардан, олардың лауазымды тұлғаларынан және өзге де тұлғалардан заңнамада белгіленген тәртіппен бөлімге жүктелген функцияларды жүзеге асыру үшін қажетті ақпаратпен материалдарды сұрату, алу және беру;
- сараптамалар мен консультациялар жүргізу үшін мемлекеттік атқарушы органдардың мамандарын, сондай-ақ тәуелсіз сарапшыларды тарту;
- өз құзыреті шегінде ақпараттық – талдау материалдарын дайындау және оларды мемлекеттік органдарға ұсыну.
14. Функциялары:
1) облыстың әлеуметтік-экономикалық даму болжамын әзірлеуге қатынасу;
2) аумақтың даму бағдарламасын және оны іске асыру жөніндегі іс-шаралар жоспарын әзірлеу;
3) ауданның әлеуметтік-экономикалық даму болжамы көрсеткіштерін мониторингілеу және талдау;
4) аумақтың даму бағдарламасының орындалысына мониторинг және талдау жүргізу;
5) ауданның әлеуметтік-экономикалық дамуының нәтижелері және аумақтың даму бағдарламасының орындалу барысы туралы талдамалы ақпаратты дайындау;
6) жергілікті мемлекеттік басқару органдарының қызметін функционалдық талдау;
7) ауылдық елді мекендерге жұмыс істеу және тұру үшін келген денсаулық сақтау, білім беру, әлеуметтік қамсыздандыру, мәдениет, спорт және агроөнеркәсіптік кешен саласындағы мамандарға, ауылдық округтер әкімдері аппараттарының мемлекеттік қызметшілеріне әлеуметтік қолдау шараларын ұйымдастыру;
8) тиісті жоспарлы кезеңге аудандық және ауылдық бюджет, бюджетке өзгерістер мен толықтырулар енгізу туралы аудандық мәслихаттың шешімдері жобаларын әзірлеу және оларды аудандық әкімдігінің қарауына ұсыну;
9) аудандық әкімдігінің аудандық бюджет туралы мәслихат шешімін іске асыру туралы, аудандық әкімдігінің тиісті қаржы жылына арналған аудандық бюджеті туралы аудандық мәслихат шешімін іске асыру туралы қаулысына өзгерістер мен толықтырулар енгізу туралы қаулыларының жобаларын әзірлеу;
10) бюджеттік бағдарлама әкімшілерінің бюджеттік өтінімдерін қарау және оларға қорытындылар дайындау;
11) әлеуметтік – экономикалық даму болжамын ескере отырып, аудандық бюджетке Бірыңғай бюджеттік сыныптаманың санаттары, сыныптары мен кіші сыныптары бойынша түсімдерді болжау;
12) басым аудандық бюджеттік инвестициялардың тізбесін қалыптастыру;
13) бюджеттік инвестициялық жобаларды іске асыру мониторингін жүзеге асыру;
14) заңды тұлғалардың жарғылық капиталында мемлекет қатысуы арқылы бюджеттік инвестицияларды жүзеге асыру туралы бюджеттік бағдарлама әкімшілерінің қаржылық-экономикалық негіздемелеріне қорытынды беру және оларды бағалауды жүзеге асыру;
15) аудандық бюджеттік инвестициялық және концессиялық жобалардың техникалық-экономикалық негіздемелерді әзірлеу және түзету бойынша қорытындылар дайындау, сондай-ақ ұсыныстар енгізу, сараптамалар жүргізу және консультациялық сүйемелдеу бойынша қызметтерді жүзеге асыру;
16) аудандық бюджет комиссиясының қызметін ұйымдастыру және қамтамасыз ету;
17) бюджеттік бағдарламалар әкімшілерінің бағдарламалар жобаларында ұсынылған нәтижелік және тиімділік көрсеткіштерін бюджеттік бағдарламалар әкімшісі функцияларына, өкілеттіктеріне, бағыттарына сәйкестігі мәніне қарау;
18) бюджеттік қаржыландыру көлемімен қамтамасыз етілу бөлігінде аумақтың даму және салалық бағдарламаларын келісуді жүзеге асыру;
19) аудандық және ауылдық бюджетті нақтылау (түзету) және секвестрлеу бойынша ұсыныстар енгізу;
20) бюджеттік жоспарлау саласындағы басшылық және салааралық үлестіру;
21) аудандық бюджеттің атқарылуын ұйымдастыру және бюджеттің атқарылуы жөніндегі бюджеттік бағдарламалар әкімшілерінің қызметін үйлестіру;
22) бюджеттік мониторингті жүзеге асыру;
23) бюджеттің атқарылуы туралы талдамалы ақпаратты дайындау;
24) бюджеттік ақшаны басқаруды жүзеге асыру;
25) аудандық бюджеттің міндеттемелері бойынша қаржыландырудың жиынтық жоспарын, түсімдері мен төлемдері бойынша қаржыландырудың жиынтық жоспарын жасау, бекіту және жүргізу;
26) жылдық сомаларды қоса алғанда, түсімдер мен төлемдер бойынша қаржыландырудың жиынтық жоспарына өзгерістер мен толықтырулар енгізу;
27) бюджеттік кредиттерді беру, олардың мониторингін және қайтарылуын қамтамасыз ету;
28) жергілікті атқарушы органның борыштарын алу, пайдалану, өтеу және қызмет көрсету мониторингін жүзеге асыру;
29) бюджет қаражатын басқару тиімділігін бағалау жүргізу үшін ақпараттар дайындау және ұсыну;
30) жергілікті атқарушы органның резервінен қаражат бөлу туралы аудандық әкімдігінің қаулыларының жобаларына қорытындылар дайындау;
31) аудандық коммуналдық мүлікті жекешелендіруге дайындау бойынша жұмыстарды ұйымдастыру;
32) аудандық коммуналдық мүлікті жекешелендіру бойынша жұмыстарды ұйымдастыру;
33) аудандық коммуналдық мүлікті мүліктік жалдауға (жалға алуға) және уақытша өтеусіз пайдалануға (орналастыруға) беру;
34) аудандық коммуналдық мүлікті, оның ішінде коммуналдық кәсіпорындардың және жергілікті атқарушы орган қатысатын заңды тұлғалардың басқару тиімділігінің мониторингін жүргізу;
35) аудандық коммуналдық мүлікті сенімгерлік басқаруға беру бойынша жұмыстарды ұйымдастыру;
36) аудандық коммуналдық заңды тұлғаларға бекітіліп берілген мүлікті және дебиторлық берешекті есептен шығаруға немесе беруге келісім беру;
37) жекеленген негіздер бойынша аудандық коммуналдық меншікке айналдырылған (түскен) мүлікті есепке алу, сақтау, бағалау және одан әрі пайдалану бойынша жұмыстарды ұйымдастыру;
38) тиісті саланың уәкілетті органына аудандық коммуналдық заңды тұлғаны қайта ұйымдастыруды және таратуды жүзеге асыруына келісім беру;
39) аудандық коммуналдық мүлікті кепілге және өтеусіз пайдалануға беру бойынша жұмыстарды ұйымдастыру;
40) аудандық коммуналдық мүлік мәселелері бойынша мемлекет мүдделерін білдіру және мүліктік құқықтарын қорғау;
41) Қазақстан Республикасына тиесілі акцияларға дивидендтердің уақытылы және толық есептелуіне және олардың төленуіне, сондай-ақ жарғылық капиталдарға қатысу үлесі Қазақстан Республикасына тиесілі жауапкершілігі шектеулі серіктестіктің қатысушылары арасында таза табыстың бөлінуіне бақылауды жүзеге асыру;
42) мемлекеттік мүлік тізілімінде мемлекеттік мүліктің бірыңғай есепке алынуын қамтамасыз ету жөніндегі жұмыстарды үйлестіру және ұйымдастыру, сондай-ақ оны қалыптастыруға және жүргізуге арналған шығыстарды қаржыландыру;
43) аудандық коммуналдық мүліктің пайдалануына және сақталуына, сенімгерлік басқару шарты бойынша міндеттемелердің орындалуына, жекешелендіру бойынша сатып алу-сату шарттары талаптарының сақталуына бақылау жүргізу;
44) мемлекеттік емес заңды тұлғалар мен жеке тұлғалардың аудандық коммуналдық меншікке берілетін мүлкі жөнінде сыйға тарту шартын жасау туралы шешімді қабылдауға қатынасу;
45) аудандық коммуналдық мүліктің нысаналы пайдалануын бақылаудың нәтижелерімен анықталған, аудандық коммуналдық заңды тұлғалардың артық, не мақсатқа сай пайдаланылмаған мүлікті алып қою бойынша ұсыныстар беру;
46) "Мемлекеттік мүлік туралы" Қазақстан Республикасы Заңында белгіленген жағдайлар мен шарттарды ауданның коммуналдық меншігіне алынатын мүлік үшін өтемді төлеуді жүзеге асыру;
47) аудандық коммуналдық мүлікті жекешелендіру бойынша сауда-саттық жүргізу туралы хабарламаны электрондық форматта тізілімнің веб-порталы – www.gosreestr.kz Интернет желісіне орналастырып жариялау;
48) бюджеттік есеп пен есептілікті жүргізу;
49) есепті қаржы жылындағы аудан бюджетінің атқарылуы туралы есепті жасау және аудандық әкімдігіне, бюджетті атқару жөніндегі облыстық уәкілетті органға және мемлекеттік қаржылық бақылау органдарына ұсыну, есепті қаржы жылындағы аудандық бюджеттің атқарылуы туралы жылдық есепті аудандық мәслихаттың тұрақты комиссияларында қарау кезінде бюджеттік бағдарламалар әкімшілерінің жұмысын үйлестіруді қамтамасыз ету;
50) ай сайын аудан бюджетінің атқарылуы туралы есепті жасау және аудандық әкімдігіне, бюджетті атқару жөніндегі облыстық уәкілетті органға, ішкі бақылау жөніндегі уәкілетті органға, тексеру комиссиясына ұсыну;
51) аудандық бюджет бойынша тауарларды (жұмыстарды, көрсетілген қызметтерді) өткізуден түсетін ақша түсімдері мен шығыстары жоспарларының орындалуы туралы, демеушілік және қайырымдылық көмектен түскен ақшанын түсуі мен жұмсалуы туралы есептерді жасау;
52) аудан бюджетінің кредиторлық және дебиторлық берешектері туралы есептер жасау;
53) аудан бюджетінің атқарылуы бойынша шоғырландырылған қаржылық есептілікті жасау және ұсыну;
54) мемлекеттік мекемелердің қолма-қол ақшаны бақылау шоттарын ашуға рұқсат және өтінім беру;
55) аудандық бюджеттің атқарылуы, коммуналдық мүлікті басқару, бухгалтерлік және бюджеттік есепке алу, қаржылық және бюджеттік есептілік саласындағы басшылық және салааралық үйлестіру;
56) мемлекеттік жоспарлау жүйесі, мемлекеттік қаржы, мемлекеттік мүлікті басқару, бухгалтерлік есеп және қаржылық есептілік жүргізу, бюджеттік есеп және есептілікті жүргізу саласындағы заңнамалардың қолдану тәжірибесін талдау және оны жетілдіру жөніндегі ұсыныстар әзірлеу;
57) салық салу үшін жеке тұлғалардың кәсіпкерлік қызметке пайдаланылмайтын жылжымайтын объектілерін бағалау бойынша жұмыстарды ұйымдастыру;
58) алып тасталды - Атырау облысы Махамбет ауданы әкімдігінің 24.01.2024 № 17 қаулысымен (алғашқы ресми жарияланған күнінен кейін күнтізбелік он күн өткен соң қолданысқа енгізіледі).59) заңнамамен жүктелген өзге де функциялар.
3. Мемлекеттік органның бірінші басшысының мәртебесі, өкілеттіктері
15. Бөлімді басқаруды бірінші басшы жүзеге асырады, ол бөлімге жүктелген міндеттердің орындалуына және оның өз өкілеттіктерін жүзеге асыруына дербес жауапты болады.
16. Бөлімнің бірінші басшысы Қазақстан Республикасының заңнамасына сәйкес лауазымға тағайындалады және лауазымнан босатылады.
17. Бөлімнің бірінші басшысының Қазақстан Республикасының заңнамасына сәйкес лауазымға тағайындалатын және лауазымнан босатылатын орынбасары болады.
18. Бөлімнің бірінші басшысының өкілеттігі:
1) өз орынбасары мен қызметкерлерінің міндеттері мен өкілеттігін айқындайды;
2) заңнамаға және аудан әкімімен бекітілген лауазымдар номенклатурасына сәйкес қызметкерлерді қызметке тағайындап, қызметтен босатады;
3) заңнамамен белгіленген тәртіпте қызметкерлерге көтермелеу шараларын немесе тәртіптік жаза қолданады;
4) сыбайлас жемқорлықты болдырмау бағытында іс-қимыл жасайды және сыбайлас жемқорлық бойынша алынған шараларға тікелей жауапкершілікте болады;
5) өз құзыреті шегінде бұйрықтар шығарады, нұсқаулар береді, қызметтік құжаттамаларға, бұйрықтарға қол қояды;
6) қолданыстағы заңнамаға сәйкес мемлекеттік органдарда және өзге де ұйымдарда Бөлімнің атынан өкілдік етеді;
7) қолданыстағы заңнамаға сәйкес өзге де өкілеттіктерді жүзеге асырады.
Бөлімнің бірінші басшысы болмаған кезеңде оның өкілеттіктерін қолданыстағы заңнамаға сәйкес оны алмастыратын тұлға жүзеге асырады.
19. Бірінші басшы өз орынбасарының өкілеттіктерін қолданыстағы заңнамаға сәйкес айқындайды.
20. Бөлім аппаратын Қазақстан Республикасының қолданыстағы заңнамасына сәйкес лауазымға тағайындалатын және лауазымнан босатылатын бөлім басшысы басқарады.
4. Мемлекеттік органның мүлкі
21. Бөлімнің заңнамада көзделген жағдайларда жедел басқару құқығында оқшауланған мүлкі болуы мүмкін.
Бөлімнің мүлкі оған меншік иесі берген мүлік, сондай-ақ өз қызметі нәтижесінде сатып алынған мүлік (ақшалай кірістерді қоса алғанда) және Қазақстан Республикасының заңнамасында тыйым салынбаған өзге де көздер есебінен қалыптастырылады.
22. Бөлімге бекітілген мүлік аудандық коммуналдық меншікке жатады.
23. Егер заңнамада өзгеше көзделмесе, Бөлімнің өзіне бекітілген мүлікті және қаржыландыру жоспары бойынша өзіне бөлінген қаражат есебінен сатып алынған мүлікті өз бетімен иеліктен шығаруға немесе оған өзгедей тәсілмен билік етуге құқығы жоқ.
5. Мемлекеттік органды қайта ұйымдастыру және тарату
24. Бөлімді қайта ұйымдастыру және тарату Қазақстан Республикасының заңнамасына сәйкес жүзеге асырылады.
