"Қазақстан Республикасындағы жергілікті мемлекеттік басқару және өзін-өзі басқару туралы" Қазақстан Республикасы Заңының 27-бабы 2-тармағына, "Мемлекеттік мүлік туралы" Қазақстан Республикасы Заңының 17-бабы 7) тармақшасына, 164-бабына, Қазақстан Республикасы Әкімшілік рәсімдік-процестік кодексінің 40-бабы 2-тармағына сәйкес Шығыс Қазақстан облысының әкімдігі ҚАУЛЫ ЕТЕДІ:
1. Осы қаулыға қосымшаға сәйкес "Шығыс Қазақстан облысының қоғамдық даму басқармасы" мемлекеттік мекемесінің ережесі бекітілсін.
2. Қоғамдық даму басқармасы:
1) осы қаулыға қол қойылған күннен бастап күнтізбелік жиырма күн ішінде оның көшірмесін электрондық түрде қазақ және орыс тілдерінде Қазақстан Республикасының нормативтік құқықтық актілерінің эталондық бақылау банкінде жариялау үшін "Қазақстан Республикасының Заңнама және құқықтық ақпарат институты" шаруашылық жүргізу құқығындағы республикалық мемлекеттік кәсіпорнына жіберуді;
2) осы қаулыдан туындайтын өзге де шараларды қабылдауды қамтамасыз етсін.
3. Осы қаулының орындалуын бақылау облыс әкімінің әлеуметтік сала және ішкі саясат мәселелеріне жетекшілік ететін орынбасарына жүктелсін.
| Шығыс Қазақстан облысының әкімі | Д. Ахметов |
| Шығыс Қазақстан облысы әкімдігінің 2022 жылғы "4" қазандағы № 243 қаулысына қосымша |
"Шығыс Қазақстан облысының қоғамдық даму басқармасы" мемлекеттік мекемесінің ережесі
1 тарау. Жалпы ережелер
1. "Шығыс Қазақстан облысының қоғамдық даму басқармасы" мемлекеттік мекемесі (бұдан әрі – Басқарма) Шығыс Қазақстан облысы аумағында ақпарат, ішкі саясат және қоғамдық даму, мемлекеттік жастар саясаты, діни қызмет саласында басшылықты жүзеге асыратын Қазақстан Республикасының мемлекеттік органы болып табылады.
2. Басқарма өз қызметін Қазақстан Республикасының Конституциясына және заңдарына, Қазақстан Республикасының Президенті мен Үкіметінің актілеріне, өзге де нормативтік құқықтық актілерге, сондай-ақ осы Ережеге сәйкес жүзеге асырады.
3. Басқарма мемлекеттік мекеменің ұйымдастырушылық-құқықтық нысанындағы заңды тұлғасы болып табылады, символдары мен ерекшелік белгілері (олар болған жағдайда), қазақ тілінде және орыс тілінде өз атауы бар, Қазақстан Республикасының Елтаңбасы бейнеленген мөрі мен мөртаңбалары, белгіленген үлгідегі бланкілері, Қазақстан Республикасының заңнамасына сәйкес қазынашылық органдарында шоттары болады.
4. Басқарма азаматтық-құқықтық қатынастарға өз атынан түседі.
5. Басқарма егер заңнамаға сәйкес осыған уәкілеттілік берілген болса, мемлекеттің атынан азаматтық-құқықтық қатынастардың тарапы болуға құқығы бар.
6. Басқарма өз құзыретінің мәселелері бойынша заңнамада белгіленген тәртіппен Басқарманың бірінші басшысының бұйрықтарымен ресімделетін және Қазақстан Республикасының заңнамаларымен көзделген өзге де актілермен шешімдер қабылдайды.
7. Басқарманың құрылымы мен штат санының лимиті Қазақстан Республикасының заңнамасына сәйкес бекітіледі.
8. Заңды тұлғаның орналасқан жері: индексі 070019, Қазақстан Республикасы, Шығыс Қазақстан облысы, Өскемен қаласы, М. Горький көшесі, 40.
9. Осы Ереже Басқарманың құрылтайшылық құжаты болып табылады.
10. Басқарманың қызметін қаржыландыру республикалық және жергілікті бюджеттерден, Қазақстан Республикасының заңнамасына сәйкес Қазақстан Республикасының Ұлттық Банкінің бюджетінен (шығындар сметасы) жүзеге асырылады.
11. Басқармаға кәсіпкерлік субъектілерімен Басқарманың өкілеттіктері болып табылатын міндеттерді орындау тұрғысынан шарттық қатынастарға түсуге тыйым салынады, егер Басқармаға заңнамалық актілермен кірістер әкелетін қызметті жүзеге асыру құқығы берілсе, онда алынған кірістер, егер Қазақстан Республикасының заңнамасында өзгеше белгіленбесе, мемлекеттік бюджетке жіберіледі.
2 тарау. Мемлекеттік органның міндеттері мен өкілеттіктері
12. Міндеттері:
1) бұқаралық ақпарат құралдары мен телерадио хабар тарату саласындағы мемлекеттік саясатты іске асыруға қатысу;
2) мемлекет пен азаматтық қоғамның өзара іс-қимылы, ішкі саяси тұрақтылық, мемлекеттік әлеуметтік тапсырыс, волонтерлік қызмет, қоғамдық кеңестердің қызметі, этносаралық қарым-қатынас салаларындағы мемлекеттік саясатты қалыптастыруға және іске асыруға қатысу;
3) мемлекеттік жастар саясатын қалыптастыруға және іске асыруға қатысу;
4) қызметкерлерді жұмысқа қабылдау және қызметі бойынша жоғарлату кезінде гендерлік теңгерімді сақтау;
5) Басқарма құзыреттілігіне жататын қызмет салаларындағы салааралық үйлестіруді жүзеге асыру;
6) діни ахуалды талдау және мониторинг жасау және дін саласындағы ақпараттық-түсіндіру жұмысын жүргізу;
7) конфессияаралық келісімді және мемлекеттің діни бірлестіктермен өзара қарым қатынасын нығайту, дін саласындағы Қазақстан Республикасының заңнамасы нормаларының орындалуына бақылау жүргізу;
8) Шығыс Қазақстан облысы аумағында дін мәселелерін зерттеу;
9) Басқармаға жүктелген өзге де міндеттер.
13. Өкілеттіктері:
1) құқықтары:
заңнамамен белгіленген тәртіпте мемлекеттік органдардан, ұйымдардан, олардың лауазымды тұлғаларынан қажетті ақпараттар мен материалдар сұрау және алу;
Басқарманың ведомстволық ұйымдарын құру, қайта ұйымдастыру және тарату бойынша ұсыныстар енгізу;
аумақтық кәсіподақтар бірлестіктерін, салалық және жергілікті кәсіподақтарды тарату туралы талаптармен сот органдарына жүгіну;
Қазақстан Республикасының заңнамасына сәйкес өз функцияларын орындау үшін өзге де құқықтарды жүзеге асыру.
консультациялар алу, арнайы білім мен дағдыларды талап ететін мәселелерді зерттеу үшін консультанттарды (тәуелсіз сарапшыларды) тарту;
Басқарманың құзыретіне кіретін мәселелер бойынша құқық қорғау және өзге де мемлекеттік органдармен өзара іс-қимыл жасау;
Басқарманың құзыретіне кіретін мәселелер бойынша кеңестер, семинарлар, конференциялар, дөңгелек үстелдер және өзге де іс-шаралар өткізу;
Басқарма қызметінің бағыттары бойынша консультативтік-кеңесші органдарды (жұмыс топтары, комиссиялар, кеңестер) құру жөнінде ұсыныстар енгізу;
Шығыс Қазақстан облысының әкімдігі отырыстарында қарау үшін дін қызметі саласында қызмет ететін мемлекеттік органдардың жұмысын жетілдіру және жақсарту жөнінде мәселелер мен ұсыныстарды енгізу;
2) міндеттері:
Қазақстан Республикасы заңнамасының талаптарына сәйкес өз қызметін жүзеге асыру.
14. Функциялары:
1) ақпарат, мемлекет пен азаматтық қоғамның өзара іс-қимылы, мемлекеттік жастар саясаты, қоғамдық сананы жаңғырту, волонтерлік қызмет, ішкі саяси тұрақтылық пен этносаралық келісімді қамтамасыз ету салаларындағы мемлекеттік саясатты қалыптастыру;
2) өңірлік бұқаралық ақпарат құралдары арқылы мемлекеттік ақпараттық саясатты іске асыру;
3) діни қызмет саласындағы мемлекеттік саясатты іске асыру;
4) облыстық деңгейде мемлекеттік ақпараттық саясатты жүргізу бойынша белгіленген тәртіппен мемлекеттік тапсырысты қалыптастыру, орналастыру және жүзеге асырылуын бақылау;
5) өңірлік деңгейде бұқаралық ақпарат құралдарында мемлекеттік ақпараттық саясатты жүргізу үшін сатып алынатын қызметтер құнын анықтау әдістемесін дайындау;
6) мемлекеттік жастар саясатын іске асыру;
7) мемлекеттік жастар саясатын іске асыру жөніндегі қызметті әдістемелік қамтамасыз етуді жүзеге асыру;
8) мемлекеттік жастар саясатын іске асырудағы үрдістерді талдауды және болжауды жүзеге асыру;
9) мемлекеттік жастар саясаты мәселелері бойынша жастар ұйымдарымен өзара іс-қимыл және ынтымақтастықты жүзеге асыру;
10) мемлекеттік жастар саясаты мәселелері бойынша мемлекеттік әлеуметтік тапсырысты қалыптастыру және іске асыру;
11) жастардың волонтерлік қызметін және жастардың өзін өзі басқаруын дамытуға қолдау көрсету;
12) өңірлік жастар форумын өткізуді қамтамасыз ету;
13) қазақстандық патриотизмді, конфессияаралық келісім мен этносаралық толеранттықты нығайту бойынша шаралар қабылдау;
14) өзекті проблемаларды анықтау және шешу үшін жастардың қажеттіліктеріне мониторинг және бағалау жүргізуді қамтамасыз ету, мемлекеттік жастар саясатын іске асырудың тиімділігін арттыру;
15) волонтерлік қызмет саласында жеке, заңды тұлғалармен және мемлекеттік органдармен өзара іс-қимыл;
16) мемлекет пен азаматтық қоғамның өзара іс-қимылы, үкіметтік емес ұйымдар үшін мемлекеттік әлеуметтік тапсырыс саласындағы мемлекеттік саясаттың негізгі бағыттарын іске асыру;
17) Қазақстан Республикасының заңнамасына сәйкес операторлар арқылы гранттар ұсыну;
18) Басқарма құзыретіне жататын мәселелер бойынша саяси партиялармен, қоғамдық ұйымдармен, коммерциялық емес ұйымдармен, кәсіподақтармен және өзге де ұйымдармен өзара іс-қимыл;
19) мемлекеттік әлеуметтік тапсырысты жүзеге асыратын үкіметтік емес ұйымдарға ақпараттық, консультативтік, әдістемелік қолдау көрсету;
20) Шығыс Қазақстан облысы аумағында қызметін жүзеге асыратын үкіметтік емес ұйымдар туралы мәліметтер жинауды, жалпылауды және уәкілетті органға ұсынуды жүзеге асыру;
21) мемлекеттік әлеуметтік тапсырысты қалыптастыруды, іске асыруды, іске асырылуына мониторинг жүргізуді және нәтижелерін бағалауды жүзеге асыру;
22) жоспарланып отырған және іске асырылып жатқан мемлекеттік әлеуметтік тапсырыс тақырыптарын және мемлекеттік әлеуметтік тапсырыс нәтижелерінің бағаларын Басқарманың интернет-ресурсына орналастыру;
23) мемлекеттік тапсырысты іске асыру бойынша уәкілетті органға ақпарат ұсыну;
24) Басқарма құзыретіне жататын мәселелер бойынша қоғамдық кеңестермен өзара іс-қимыл;
25) қоғамдық келісім мен жалпыұлттық бірлікті қамтамасыз ету жөніндегі мемлекеттік саясатты іске асыру;
26) Шығыс Қазақстан облысында этносаралық келісімді зерттеуді және талдауды жүргізу;
27) этносаралық келісім мен толеранттықты нығайту бойынша этномәдени бірлестіктермен және өзге де қоғамдық ұйымдармен өзара іс-қимыл мен ынтымақтастықты жүзеге асыру;
28) этномәдени қоғамдық бірлестіктерге әдістемелік, ұйымдастырушылық және құқықтық көмек көрсету;
29) Шығыс Қазақстан облысының Қазақстан халқы Ассамблеясының қызметін қамтамасыз ету;
30) өңірдегі діни ахуалды зерттеу және оған талдау жүргізу;
31) өңірде әрекет ететін діни бірлестіктер, миссионерлер, білім берудің рухани (діни) ұйымдарының қызметін зерделеу және талдау жүргізу;
32) уәкілетті органға Қазақстан Республикасының діни қызмет және діни бірлестіктер туралы заңнамасын жетілдіру жөнінде ұсыныстар енгізу;
33) құқық қорғау органдарына Қазақстан Республикасының діни қызмет және діни бірлестіктер туралы заңнамасын бұзатын жеке және заңды тұлғалардың қызметіне тыйым салу жөнінде ұсыныстар енгізу;
34) жергілікті деңгейде діни қызмет және діни бірлестіктермен өзара іс-қимыл мәселелері бойынша түсіндіру жұмыстарын жүргізу;
35) Шығыс Қазақстан облысының әкімдігіне діни әдебиетті және діни мазмұндағы өзге де ақпараттық материалдарды, діни мақсаттағы заттарды тарату үшін арнайы тұрақты үй-жайлардың орналастырылуын бекіту, сондай-ақ ғибадат үйлерінен тыс жерлерде діни жораларды өткізуге арналған үй-жайлардың орналастырылуын келісу бойынша ұсыныстар енгізу;
36) Шығыс Қазақстан облысының әкімдігіне ғибадат үйлерін (ғимараттарын) салу туралы, олардың орналасатын жерін айқындау, сондай-ақ ғимараттарды ғибадат үйлері (ғимараттары) етіп қайта бейіндеу (функционалдық мақсатын өзгерту) туралы ұсыныс енгізу;
37) діни бірлестіктерді құруға бастамашы азаматтардың тізімдеріне тексеру жүргізуді қамтамасыз ету;
38) миссионерлік қызметті жүзеге асыратын адамдарды тіркеуді жүргізу, "Әкімшілік құқық бұзушылық туралы" Қазақстан Республикасы Кодексінің 490 бабымен қарастырылған әкімшілік құқық бұзушылықтар туралы хаттамалар толтыру;
39) діни экстремизм мен терроризмнің алдын алу шеңберінде жалпы профилактикалық және оңалту жұмыстарын ұйымдастыру және жүргізу жөніндегі қызметті үйлестіруді жүзеге асыру;
40) дін саласындағы мемлекеттік саясатты іске асыру бойынша жергілікті деңгейде ақпараттық-түсіндіру жұмысын ұйымдастыру;
41) Басқарма реттейтін салаларда мемлекеттік органдар қызметін үйлестіру және әдістемелік басшылықты жүзеге асыру;
42) Басқарма құзыретіне кіретін мәселелер бойынша консультативтік-кеңестік органдар қызметін қамтамасыз ету;
43) облыстық бюджеттік бағдарламаларды іске асыру;
44) ведомстволық ұйымдарға қатысты мемлекеттік басқарудың тиісті саласына басшылықты жүзеге асыру;
45) Қазақстан Республикасының заңнамасына сәйкес жеке және заңды тұлғалардың өтініштерін қарау;
46) мемлекеттік стратегиялық бағдарламалар мен құжаттарды түсіндіру және алға бастыру бойынша ақпараттық-насихаттық іс-шараларды ұйымдастыру және жүзеге асыру;
47) Басқарма құзыретіне кіретін мәселелер бойынша ақпараттық-түсіндіру жұмыстарын жүзеге асыруды қамтамасыз ету;
48) қоғамдық сананы жаңғырту саласында мемлекеттік саясатты үйлестіру;
49) Шығыс Қазақстан облысы аумағында Қазақстан Республикасының мемлекеттік рәміздерінің пайдаланылуын (орнатылуын, орналастырылуын) бақылауды жүзеге асыру;
50) Қазақстан Республикасының заңдарымен, Қазақстан Республикасының Президенті мен Үкіметінің актілерімен көзделген өзге де функцияларды жүзеге асыру.
3 тарау. Мемлекеттік органның бірінші басшысының мәртебесі, өкілеттігі
15. Басқармаға басшылықты бірінші басшы жүзеге асырады, ол Басқармаға жүктелген міндеттердің орындалуына және өз өкілеттіліктерін жүзеге асыруға дербес жауапты болады.
16. Басқарманың бірінші басшысы Қазақстан Республикасының заңнамасына сәйкес лауазымға тағайындалады және лауазымнан босатылады.
17. Басқарманың бірінші басшысының Қазақстан Республикасының заңнамасына сәйкес лауазымға тағайындалатын және лауазымдарынан босатылатын орынбасарлары болады.
18. Бірінші басшының өкілеттігі:
1) Басқарма реттейтін салаларда мемлекеттік саясатты қалыптастыру бойынша ұсыныстар әзірлейді;
2) Қазақстан Республикасының заңнамасымен көзделгендер шегінде салааралық үйлестіруді қамтамасыз етеді;
3) заңнамаға сәйкес Басқарма қызметкерлерін, сондай-ақ Басқарма қарамағындағы ұйымдардың басшыларын (олардың орынбасарларын және бас бухгалтерді) лауазымдарға тағайындайды және лауазымдарынан босатады;
4) заңнамамен белгіленген тәртіпте Басқарма қызметкерлерін, сондай-ақ Басқарма қарамағындағы ұйымдардың басшыларын (олардың орынбасарларын және бас бухгалтерді) ынталандырады және тәртіптік жазаға тартады;
5) Басқарманың актілеріне қол қояды;
6) Басқарманың құрылымдық бөлімшелері туралы ережені бекітеді;
7) мемлекеттік органдарда және өзге де ұйымдарда Басқарма атынан сенімхатсыз өкілдік етеді;
8) ерлер мен әйелдердің тәжірибесіне, қабілеттеріне және кәсіптік дайындықтарына сәйкес мемлекеттік қызметке теңдей қолжетімділігін қамтамасыз етеді;
9) Басқармада сыбайлас жемқорлыққа қарсы іс-қимыл бойынша шаралар қабылдайды және бұл үшін дербес жауапты болады;
10) Қазақстан Республикасының қолданыстағы заңнамасына сәйкес өзге де өкілеттіктерді жүзеге асырады.
Басқарманың бірінші басшысы болмаған кезеңде оның өкілеттіктерін қолданыстағы заңнамаға сәйкес оны алмастыратын тұлға жүзеге асырады.
19. Бірінші басшы өз орынбасарларының өкілеттіктерін қолданыстағы заңнамаға сәйкес анықтайды.
4 тарау. Мемлекеттік органның мүлкі
20. Басқарманың заңнамада көзделген жағдайларда жедел басқару құқығында оқшауланған мүлкінің болуы мүмкін.
Басқарманың мүлкі оған меншік иесі берген мүлік, сондай-ақ өз қызметі нәтижесінде сатып алған (ақшалай кірістерді қоса алғанда) және Қазақстан Республикасы заңнамасында тыйым салынбаған өзге де көздер есебінен қалыптастырылады.
21. Басқармаға бекітілген мүлік Шығыс Қазақстан облысының коммуналдық меншігіне жатады.
22. Егер заңнамада өзгеше көзделмесе, Басқарма өзіне бекітілген мүлікті және қаржыландыру жоспары бойынша өзіне бөлінген қаражат есебінен сатып алынған мүлікті өз бетімен иеліктен шығаруға немесе оған өзгедей тәсілмен билік етуге құқығы жоқ.
5 тарау. Мемлекеттік органды қайта ұйымдастыру және тарату
23. Басқарманы қайта ұйымдастыру және тарату Қазақстан Республикасының заңнамасына сәйкес жүзеге асырылады.
Басқарма қарамағындағы ұйымдардың тізбесі
1. "Шығыс ақпарат" жауапкершілігі шектеулі серіктестігі.
2. Шығыс Қазақстан облысы қоғамдық даму басқармасының "Жастар ресурстық орталығы" коммуналдық мемлекеттік мекемесі.
3. Шығыс Қазақстан облысы қоғамдық даму басқармасының "Рухани жаңғыру" өңірлік орталығы" коммуналдық мемлекеттік мекемесі.
4. Шығыс Қазақстан облысы қоғамдық даму басқармасының "Достық үйі - қоғамдық келісім орталығы" коммуналдық мемлекеттік мекемесі.
5. Шығыс Қазақстан облысы қоғамдық даму басқармасының "Шығыс Қазақстан облысының дін мәселелерін зерттеу орталығы" коммуналдық мемлекеттік мекемесі.
