БҰЙЫРАМЫН:
1. "Қазақстан Республикасы Ішкі істер министрлігінің ведомстволары, аумақтық органдары туралы ережелерді және оқу орындарының жарлықтарын бекіту туралы" Қазақстан Республикасы Ішкі істер министрінің 2014 жылғы 1 қазандағы № 662 бұйрығына (Нормативтік құқықтық актілерді мемлекеттік тіркеу тізілімінде № 9792 болып тіркелген) мынадай толықтыру енгізілсін:
1-тармақ мынадай мазмұндағы 54-1) тармақшамен толықтырылсын:
"54-1) осы бұйрыққа 54-1-қосымшаға сәйкес "Қазақстан Республикасы Ішкі істер министрлігінің Басқару академиясы" республикалық мемлекеттік мекемесінің жарғысы;
осы бұйрыққа 1-қосымшаға сәйкес 54-1- қосымшамен толықтырылсын.
2. Қазақстан Республикасы Ішкі істер министрлігі Басқару академиясының бастығы:
1) Жарғыны заңнамада белгіленген тәртіпте әділет органдарында тіркеу бойынша шаралар қабылдасын;
2) жеке құрамның Жарғыны зерделеуін ұйымдастырсын және оларға практикалық қызметте басшылық етуді қамтамасыз етсін;
3) осы бұйрықтан туындайтын шараларды қабылдасын.
3. Осы бұйрықтың орындалуын бақылау Қазақстан Республикасы Ішкі істер министрінің жетекшілік ететін орынбасарына және Кадр саясаты департаментіне жүктелсін.
4. Осы бұйрық қол қойылған күнінен бастап қолданысқа енгізіледі.
| Министр полиция генерал-лейтенанты | Е. Саденов |
| 1-қосымша Қазақстан Республикасы Ішкі істер министрінің 2014 жылғы 1 қазандағы № 662 бұйрығына 54-1-қосымша |
"Қазақстан Республикасы Ішкі істер министрлігінің Басқару академиясы" республикалық мемлекеттік мекемесінің ЖАРҒЫСЫ
2024 жыл
1-тарау. Жалпы ережелер
1. "Қазақстан Республикасы Ішкі істер министрлігінің Басқару академиясы" республикалық мемлекеттік мекемесі (бұдан әрі – Академия) ұйымдастырушылық-құқықтық нысанда құрылған, заңды тұлға мәртебесіне ие коммерциялық емес ұйым болып табылады.
2. Академияның түрі: республикалық мемлекеттік мекеме.
3. "Қазақстан Республикасы Ішкі істер министрлігінің кейбір мәселелері туралы" мемлекеттік мекемесін құру туралы" Қазақстан Республикасы Үкіметінің 31 қазандағы № 908 қаулысымен құрылған.
4. Академия өз қызметінде Қазақстан Республикасының Конституциясын, заңдарын, Қазақстан Республикасы Президентінің актілерін, өзге де нормативтік құқықтық актілерді, сондай-ақ осы Жарғыны басшылыққа алады.
5. Республикалық мемелекеттік мекеменің құрылтайшысы Қазақстан Республикасының Үкіметі болып табылады.
6. Қазақстан Республикасы Ішкі істер министрлігі (бұдан әрі – ІІМ) Академияны жалпы басқаруды, сондай-ақ Академияның мүлкіне қатысты құқық субъектісінің функцияларын жүзеге асыратын уәкілетті орган болып табылады.
7. Академияның құрылымы мен штат кестесін Қазақстан Республикасының Ішкі істер министрі (бұдан әрі – Министр) бекітеді.
8. Академияның толық және қысқартылған атауы:
толық:
мемлекеттік тілде – "Қазақстан Республикасы Ішкі істер министрлігінің Басқару академиясы" республикалық мемлекеттік мекемесі;
орыс тілінде – Республиканское государственное учреждение "Академия управления Министерства внутренних дел Республики Казахстан";
ағылшын тілінде – Republican state institution "Academy of the Ministry of Internal Affairs of the Republic of Kazakhstan named after Makan Yesbulatov";
қысқартылған атауы:
мемлекеттік тілде – "Қазақстан Республикасы ІІМ Мақан Есболатов атындағы Алматы академиясы" РММ;
орыс тілінде – "Алматинская академия МВД РК имени Макана Есбулатова";
ағылшын тілінде – RSI " Academy of Management of the Ministry of Internal Affairs of the Republic of Kazakhstan".
9. Академияның орналасқан жері: 010000, Республика Казахстан, г. Астана, проспект Тәуелсіздік, 1.
2-тарау. Академияның заңды мәртебесі
10. Академияның Қазақстан Республикасының заңнамасына сәйкес Туы, дербес балансы, Қазақстан Республикасының Мемлекеттік Елтаңбасы бейнеленген мөрі және өз атауы бар мөртаңбалары, белгіленген үлгідегі бланкілері, нышандары, қазынашылық органдарында және банктерде шоттары болады, өз атынан мүліктік және мүліктік емес құқықтарды иемденіп ала алады және міндетті болады, сотта талапкер және жауапкер бола алады.
11. Академия заңды тұлғаларды құра алмайды, сондай-ақ басқа заңды тұлғаның құрылтайшысы (қатысушысы) бола алмайды. Академия ІІМ-мен келісім бойынша филиалдар мен өкілдіктер құруға құқылы.
12. Академия міндеттемелері бойынша өзінің қарамағындағы қаражатпен жауап береді, қаражат жеткіліксіз болған кезде оның міндеттемелері бойынша Қазақстан Республикасы субсидарлық жауапкершілікте болады.
13. Академия азаматтық-құқықтық қатынастарға Қазақстан Республикасының заңнамасында көзделген тәртіппен өз атынан түседі.
14. Академия міндеттемелер мен төлемдер бойынша бекітілген жеке қаржыландыру жоспарлары шегінде жасасатын азаматтық-құқықтық мәмілелер Қазақстан Республикасының заңнамасында белгіленген тәртіппен тіркелуге жатады. Шарттық міндеттемелер бойынша Академияның жауапкершілігі Қазақстан Республикасының заңнамасына сәйкес Академияны ұстауға арналған міндеттемелер мен төлемдер бойынша бекітілген жеке қаржыландыру жоспарлары шегінде туындайды.
3-тарау. Академия қызметінің мәні мен мақсаттары
15. Академия қызметінің мәні:
1) ішкі істер органдарының аға және орта басшы құрамдағы басшыларын (аудандық және облыстық бөліністердің бастықтарын) оқыту;
2) жоғары оқу орнынан кейінгі білім беру бағдарламалары бойынша ішкі істер органдары үшін кадрларды даярлау. Іске асырылатын білім беру бағдарламаларының тізбесін ғылым және жоғары білім саласындағы уәкілетті орган берген мемлекеттік лицензияларға сәйкес ІІМ айқындайды;
3) ішкі істер органдары, Қазақстан Республикасының басқа да құқық қорғау және арнаулы органдары үшін, сондай-ақ шет елдер үшін қосымша білім берудің білім беру бағдарламалары бойынша кадрлардың біліктілігін арттыру және қайта даярлау;
4) құқық қорғау қызметін жетілдірудің өзекті проблемалары бойынша ғылыми қызметті жүзеге асыру;
5) Қазақстан Республикасының заңнамасына сәйкес төтенше жағдайлар туындаған кезде және соғыс уақыты жағдайларында қажетті іс-шараларды өткізу және қамтамасыз ету;
16. Академия қызметінің мақсаттары:
1) ұлттық және жалпы адамзаттық құндылықтар, ғылым мен практика жетістіктері негізінде тұлғаны қалыптастыруға, дамытуға және кәсіби қалыптастыруға бағытталған сапалы білім алу үшін қажетті жағдайлар жасау;
2) ішкі істер органдарының жоғары білікті кадрларға қажеттіліктерін қамтамасыз ету;
3) ішкі істер органдары қызметкерлерінің зияткерлік және кәсіби дамуына қажеттілігін қанағаттандыру;
4) заңдылық пен құқық тәртібін қамтамасыз етудің проблемалық мәселелерін шешудің жаңа жолдарын ғылыми әдістермен әзірлеу болып табылады.
17. Академия өз мақсаттарына қол жеткізу үшін мынадай қызмет түрлерін жүзеге асырады:
1) ішкі істер органдарының қызметкерлеріне білім беру қызметтерін көрсету;
2) ғылыми зерттеулерді ұйымдастыру және жүргізу Ішкі істер органдарының қызметін ғылыми-әдістемелік қамтамасыз ету;
3) заң шығару қызметіне қатысу;
4) Қазақстан Республикасының заңнамасында көзделген тәртіпте ІІМ айқындайтын ақылы қызметтер тізбесін ұсыну;
5) мемлекеттік бюджеттен және Қазақстан Республикасының заңнамасында тыйым салынбаған өзге де көздерден қаржыландырылатын ғылыми, ғылыми-техникалық жобалар мен бағдарламалар конкурстарына қатысу;
6) ғылыми-зерттеу, білім беру және оқу-әдістемелік қызметті жүзеге асыру кезінде мемлекеттік органдармен, ғылыми, білім беру, мамандандырылған ұйымдармен және мекемелермен ынтымақтастық және өзара іс-қимыл жасау;
7) ғылыми және білім беру саласындағы халықаралық ынтымақтастықты дамыту және жүзеге асыру, оның ішінде шетелдік кадрларды даярлау;
8) баспа-баспаханалық қызметті жүзеге асыру;
9) оқу процесін, ғылыми зерттеулерді, кітапхананы және Академияның өзге де қызметін цифрландыруға бағытталған бағдарламалық өнімдер мен Интернет-ресурстарды әзірлеу, енгізу, сүйемелдеу және дамыту;
10) Қазақстан Республикасының заңнамасына сәйкес өзге де қызмет түрлерін жүзеге асырады.
18. Академияның осы жарғыда бекітілген оның мәні мен мақсаттарына сай келмейтін қызметті жүзеге асыруға, сондай-ақ мәмілелер жасауға құқығы жоқ.
19. Қазақстан Республикасының заңдарында немесе құрылтай құжаттарында белгілі бір шек қойылған қызмет мақсаттарына қайшы не Академия бастығының жарғылық құзыретін бұза отырып, Академия жасаған әміле: ІІМ, ғылым және жоғары білім саласындағы уәкілетті орган, мемлекеттік мүлік жөніндегі уәкілетті орган немесе жергілікті атқарушы орган не прокурор талап-арызы бойынша жарамсыз деп танылуы мүмкін.
4-тарау. Академияны басқару
20. Академияны жалпы басқаруды ІІМ (уәкілетті орган) жүзеге асырады.
21. Уәкілетті орган Қазақстан Республикасының заңнамасында белгіленген тәртіппен мынадай функцияларды жүзеге асырады:
1) Академияға мүлікті бекітеді;
2) Академия мүлкінің сақталуына бақылауды жүзеге асырады;
3) Академияның қаржыландыру жоспарын бекітеді;
4) Академияның Жарғысын, оған енгізілетін өзгерістер мен толықтыруларды бекітеді;
5) белгіленген штат саны шегінде Академияның құрылымы мен штат кестесін бекітеді;
6) Академия бастығының құқықтарын, міндеттерін және жауапкершілігін, оны атқаратын лауазымынан босатудың негіздерін белгілейді;
7) Академия бастығының ұсынымы бойынша оның орынбасарларын лаузымға тағайындайды және лауазымнан босатады;
8) жылдық қаржылық есептілікті бекітеді;
9) уәкілетті органға мемлекеттік мүлік бойынша Академияға берілген немесе ол өзінің шаруашылық қызметінің нәтижесінде сатып алған мүлікті алып қоюға немесе қайта бөлуге жазбаша келісім береді;
10) Академияның білім беру қызметінің тиісті деңгейлерінің мемлекеттік жалпыға міндетті стандарттарының жекелеген бөлімдерін әзірлеуге қатысады;
11) Академияның білім беру қызметіне қойылатын біліктілік талаптарының жекелеген бөлімдерін және оларға сәйкестікті растайтын құжаттар тізбесін әзірлеуге қатысады;
12) Академия қызметінің қағидаларын әзірлейді және бекітеді;
13) Академияда оқу процесін, оқу-әдістемелік және ғылыми-әдістемелік қызметті ұйымдастыру және жүзеге асыру қағидаларын әзірлейді және бекітеді;
14) Академияда қашықтықтан оқыту бойынша оқу процесін ұйымдастыру қағидаларын әзірлейді және бекітеді;
15) Академияда білім алушылардың үлгеріміне ағымдағы бақылау, аралық және қорытынды аттестаттау жүргізу қағидаларын әзірлейді және бекітеді;
16) орта білім беру ұйымдарын қоспағанда, оқу басылымдары мен оқуәдістемелік кешендерді дайындау, сараптау, сынақтан өткізу, басып шығару және оларға мониторинг жүргізу жөніндегі жұмыстарды ұйымдастыру қағидаларын әзірлейді және бекітеді;
17) Академияға оқуға қабылдау қағидаларын әзірлейді және бекітеді.
18) Академиядағы оқу жылының басталу және аяқталу мерзімдерін айқындайды;
19) білім алушылардың Академияда кәсіби практикадан және тағылымдамадан өтуін ұйымдастырады, әзірлейді және бекітеді;
20) Академияға ауыстыру және қайта қабылдау қағидаларын әзірлейді және бекітеді;
21) Академияның профессорлық-оқытушылық құрамы лауазымдарының біліктілік сипаттамаларын әзірлейді және бекітеді;
22) Академияның профессор-оқытушылар құрамы мен ғылыми қызметкерлерінің лауазымдарына орналасу қағидаларын әзірлейді және бекітеді;
23) Академияның ақпараттық жүйелері мен интернет-ресурстарына қойылатын талаптарды әзірлейді және бекітеді;
24) Академияда іске асырылатын мамандықтар мен біліктіліктердің, білім беру бағдарламаларының тізбесін бекітеді;
25) Академияда білім алудың нысандары мен технологияларын айқындайды;
26) Академияда білім беру технологияларын қолдана отырып, оқу процесін ұйымдастыру қағидаларын әзірлейді және бекітеді;
27) осы Жарғыға және Қазақстан Республикасының өзге де заңнамасына сәйкес өзге де өкілеттіктерді жүзеге асырады.
22. Академия бастығын Қазақстан Республикасының заңнамасында белгіленген тәртіппен Министр лауазымға тағайындайды және лауазымнан босатады.
23. Академия бастығы Академияның жұмысын ұйымдастырады және оған басшылық жасайды, Министрге тікелей бағынады және Академияға жүктелген міндеттердің орындалуы мен оның өз функцияларын жүзеге асыруы үшін дербес жауапты болады.
24. Академия бастығы басшылық қағидаттарында әрекет етеді және Академия қызметінің мәселелерін Қазақстан Республикасының заңнамасымен және осы Жарғымен айқындалатын құзыретке сәйкес дербес шешеді.
25. Академия бастығы заңнамада белгіленген тәртіпте:
1) Академия қызметіне басшылық жасайды, өз орынбасарларының, көмекшілерінің және Академияның өзге де басшы қызметкерлерінің міндеттері мен өкілеттіктерін айқындайды;
2) өз құзыреті шегінде Академияның барлық қызметкерлері үшін міндетті бұйрықтар шығарады және нұсқаулар береді, олардың орындалуын бақылауды ұйымдастырады;
3) Академиядағы ішкі тәртіп ережелерін, өз орынбасарлары мен көмекшілерінің лауазымдық нұсқаулықтарын, өзге де актілерді орындау үшін міндетті Академияның құрылымдық бөліністері туралы ережелерді бекітеді;
4) Академияның Ғылыми кеңесінің жұмысын ұйымдастыру тәртібін бекітеді, оның қызметіне басшылық жасайды, сондай-ақ Академияның алқалы басқарудың басқа органдарын ұйымдастыру тәртібін бекітеді;
5) Академия атынан сенімхатсыз әрекет етеді, Қазақстан Республикасының заңнамасына, осы Жарғыға сәйкес мемлекеттік органдарда, басқа ұйымдарда оның мүдделерін білдіреді;
6) Академия атынан Қазақстан Республикасының заңнамасына сәйкес шарттар, келісімдер және келісімшарттар жасасады;
7) Академия қызметкерлері мен жұмыскерлеріне қажетті жекелеген өкілеттіктерді жүзеге асыруға сенімхат береді, қаржылық құжаттарға бірінші қол қою құқығына ие болады;
8) Академияның іссапарлар, тағылымдамалар, қызметкерлерді қазақстандық және шетелдік оқу орталықтарында оқыту және қызметкерлердің біліктілігін арттырудың өзге де түрлері жөніндегі тәртібі мен жоспарларын бекітеді;
9) Қазақстан Республикасының заңнамасына сәйкес қолма-қол ақшаның бақылау шоттарын және банктерде шоттар ашады;
10) белгіленген тәртіпте және өз құзыреті шегінде қызметкерлер мен жұмыскерлерді лауазымға тағайындайды, жұмысқа қабылдайды, қызмет бойынша ауыстырады, басқа жұмысқа ауыстырады, атқаратын лауазымынан босатады және қызметтен (жұмыстан) босатады;
11) Қазақстан Республикасы ІІМ номенклатурасы бойынша өз орынбасарларын, Академияның құрылымдық бөліністерінің басқа да басшыларын лауазымға тағайындау немесе лауазымнан босату туралы ұсыныстар енгізеді;
12) Министрге білім беру, ғылыми-зерттеу және қаржы-шаруашылық қызметті жетілдіру және материалдық-техникалық қамтамасыз етуді нығайту жөнінде ұсыныстар енгізеді;
13) қатардағы және кіші басшы құрамның бірінші және кезекті арнаулы атақтарын, сондай-ақ полиция капитанын қоса алғанда орта басшы құрамның кезекті арнаулы атақтарын береді, сондай-ақ қызметкерлерге біліктілік атақтарын береді (растайды);
14) өз құзыреті шегінде Академия қызметкерлеріне, жұмыскерлеріне және білім алушыларына көтермелеу шараларын және тәртіптік жаза қолданады;
15) қызметкерлерге (жұмыскерлерге) Қазақстан Республикасының заңнамасында белгіленген тәртіпте қауіпсіз еңбек жағдайларын қамтамасыз етеді;
16) Академияның ІІМ құрылымдық бөліністерімен, Қазақстан Республикасының мемлекеттік билік органдарымен, мекемелермен және ұйымдармен өзара іс-қимыл жасасуын ұйымдастырады;
17) Академияда мемлекеттік, қызметтік құпияны және құпиялылық режимін сақтау, қажетті жұмылдыру іс-шараларын жүргізу, азаматтық қорғаныс жөніндегі жұмыстарды ұйымдастыруды қамтамасыз етеді;
18) жеке құрам арасында сыбайлас жемқорлыққа қарсы іс-қимыл жөніндегі жұмысты ұйымдастырады және ол үшін дербес жауапты болады;
19) өзіне Қазақстан Республикасының заңнамасымен, Қазақстан Республикасы ІІМ нормативтік құқықтық актілерімен жүктелген өзге де функцияларды жүзеге асырады;
20) заңнамада көзделген тәртіппен және Академия құзыреті шегінде азаматтық-құқықтық мәмілелер жасасады;
21) мемлекет өзіне берген мүліктің және Академия қызметі барысында сатып алынған мүліктің тиімді пайдаланылуы мен сақталуына бақылауды жүзеге асырады;
22) Академияны қаржыландырудың жеке жоспарларында көзделген бюджет қаражатын уақтылы және тиімді пайдалануды қамтамасыз етеді;
23) қаржылық құжаттар мен есептіліктерге қол қояды.
26. Академия қызметінің жекелеген бағыттарына Академия бастығының орынбасарлары (көмекшілері) белгіленген тәртіпте лауазымға тағайындалатын, лауазымнан босатылатын және жетекшілік ететін қызмет бағыттары бойынша жұмысты ұйымдастырудың тиімділігі мен сапасы үшін жауапты болады және жүзеге асырады.
27. Академия бастығы болмаған кезде оның құқықтары мен міндеттерін белгіленген тәртіпте тағайындалатын орынбасары жүзеге асырады.
28. Академия бастығының бұйрығымен құрылған Ғылыми кеңес Академияның жоғары алқалы басқару органы болып табылады. Ғылыми кеңестің құрамы мен қызметін ұйымдастыру тәртібі Қазақстан Республикасының заңнамасымен, Министрдің және Академия бастығының бұйрықтарымен айқындалады.
29. Ғылыми кеңестің құзыретіне мыналар жатады:
1) Академияны дамыту тұжырымдамасын айқындау, Академияның оқу-тәрбие, ғылыми-зерттеу, редакциялық-баспа қызметінің өзекті мәселелерін қарау;
2) Академия Жарғысына өзгерістер мен толықтырулар енгізу жөніндегі ұсыныстарды талқылау;
3) Академияның құрылымы, оқу және ғылыми бөліністерді құру, қайта ұйымдастыру және тарату бойынша ұсыныстар әзірлеу;
4) жұмыс оқу жоспарлары мен бағдарламаларының жобаларын, жылдық есептердің жобаларын, Академия қызметінің бағыттары бойынша іс-шаралар жоспарларын талқылау;
5) оқулықтарды, оқу құралдарын және оқу-әдістемелік әзірлемелерді қарау және басып шығаруға ұсыным беру;
6) магистранттардың, докторанттардың диссертациялық зерттеулер бойынша тақырыптары мен ғылыми жетекші консультанттарын бекіту;
7) Академия басшылығының, құрылымдық бөліністер басшыларының жыл сайынғы есептерін тыңдау;
8) алқалық шешімді талап ететін Академияның ағымдағы қызметінің өзге де мәселелерін қарау болып табылады.
30. Академияда оқу процесін оқу-әдістемелік қамтамасыз ету мақсатында Академия бастығының бұйрығымен құрылған Оқу-әдістемелік кеңес жұмыс істейді. Оқу-әдістемелік кеңестің құрамы мен қызметін ұйымдастыру тәртібі Қазақстан Республикасының заңнамасымен, ІІМ және Академия бастығының бұйрықтарымен айқындалады.
31. Оқу-әдістемелік кеңестің құзыретіне: білім беру процесін әдістемелік және дидактикалық қамтамасыз етуді жетілдіру, оған ғылым мен практиканың озық жетістіктерін, инновациялық және заманауи педагогикалық технологияларды енгізу, ішкі істер органдары үшін мамандарды даярлау, қайта даярлау және біліктілігін арттыру сапасын жақсарту жөніндегі профессорлық-оқытушылық және оқу-көмекші құрамның қызметін үйлестіру жатады.
32. Академия бастығының бұйрығымен Академияда өзге де алқалы және консультативтік-кеңесші органдар (кеңестер, жұмыс топтары, комиссиялар, оның ішінде құпиялылық режимі бойынша, аттестаттау, тұрмыстық-тұрғын үй және басқалар) құрылуы мүмкін.
33. Академияны қызметтік және орындаушылық тәртіпті жедел басқаруға байланысты өзге де мәселелер Академия бастығы жанындағы жедел кеңестерде қаралады.
5-тарау. Академияға қабылдау тәртібі
34. Жоғары оқу орнынан кейінгі білім беру бағдарламалары бойынша Академия контингентін қалыптастыру ғылым жәнежоғары білім саласындағы уәкілетті органның бұйрығымен, қабылдау жоспарымен, Министрдің жыл сайынғы бекітілетін бұйрығымен айқындалатынмемлекеттік оқу тапсырысын орналастыру арқылы жүзеге асырылады.
35. Білім алушыларды Академияға ауыстыру және қайта қабылдау тек бос орындар болған кезде жүзеге асырылады.
36. Академияға оқуға қабылдау, сондай-ақ ауыстыру, қайта қабылдау тәртібі Қазақстан Республикасының заңнамасымен, Министрдің бұйрықтарымен регламенттеледі.
Жоғары оқу орнынан кейінгі білімнің білім беру бағдарламалары бойынша оқуға ішкі істер органдарының қызметкерлері, сондай-ақ Қазақстан Республикасы ІІМ-нің келісімі бойынша Қазақстан Республикасы Ұлттық ұланның әскери қызметшілері қабылданады.
Қосымша білімнің білім беру бағдарламалары бойынша оқуға ішкі істер органдарының қызметкерлері, Қазақстан Республикасы Ұлттық ұланының, арнаулы мемлекеттік және басқа да құқық қорғау органдарының әскери қызметшілері Қазақстан Республикасы Ішкі істер министрінің бұйрығымен бекітілетін жоспар-кестелер негізінде жіберіледі.
37. Академияға оқуға қабылдау комиссиясының отырысында түсу емтихандарын тапсыру нәтижелері бойынша конкурстық негізде жүзеге асырылады.
38. Білім алушыларды ЖОО-дан Академияның бос орындарына ауыстыру ІІМ арнаулы оқу орындарына ауысу қағидаларының талаптарына сәйкес келген кезде ІІМ шешімімен жазғы демалыс кезеңінде конкурстық негізде жүзеге асырылады.
39. Білім алушыларды қайта қабылдау Академия бастығының бұйрығымен аумақтық полиция департаменті немесе қылмыстық-атқару жүйесі басшысының өтінішхаты негізінде қайта қабылданатын білім алушыны жұмысқа орналастыру кепілдігімен жүзеге асырылады.
40. Ішкі істер органдарына қызметке кіретін адамдар үшін бастапқы кәсіптік даярлыққа іріктеу тәртібі және оны өткеру шарттары, сондай-ақ оларды оқудан шығару негіздері Министрдің бұйрығымен регламенттеледі.
6-тарау. Академиянын білім беру процесін ұйымдастыру тәртібі
41. Академияның білім беру процесі мен ғылыми-зерттеу қызметін ұйымдастыру тәртібі Қазақстан Республикасының нормативтік құқықтық актілерімен, Министрдің және Академия бастығының бұйрықтарымен реттеледі.
42. Оқу процесін ұйымдастыру Академияның академиялық саясатына сәйкес жүзеге асырылады.
43. Білім беру бағдарламалары күндізгі оқыту нысаны бойынша, сондай-ақ қашықтықтан оқыту шеңберінде іске асырылады.
44. Білім беру бағдарламалары мемлекеттік, орыс тілдерінде іске асырылады, сондай-ақ ағылшын тілінде жүзеге асырылуы мүмкін.
45. Академиядағы магистранттар және докторанттар үшін оқу жылы академиялық күнтізбеге сәйкес басталады және нақты даярлау бағыты бойынша даярлаудың оқу жоспарына сәйкес аяқталады. Оқу жылы академиялық кезеңдерден (семестрлерден) тұрады.
46. Біліктілікті арттыру және қайта даярлау курстарын өткізу мерзімдері Министрдің бұйрығымен бекітілетін жоспар-кестеге сәйкес белгіленеді.
47. Оқу сабақтары оқу жоспарлары мен оқу бағдарламаларына сәйкес жасалған кесте бойынша өткізіледі. Аудиториялық жұмыстың бір академиялық сағаты кемінде 40 минутты құрайды.
48. Білім алушылардың оқу жүктемесі академиялық сағаттың ұзақтығымен және оқу жұмысының барлық түрлері бойынша оқу сағатының көлемімен анықталады.
49. Күндізгі және қашықтықтан оқыту бойынша емтихан сессиялары, олардың кезеңдері мен оқу жылындағы саны Академияның ғылыми кеңесімен бекітіледі.
50. Кәсіптік практика (тағылымдама) ғылым және жоғары білім саласындағы уәкілетті орган министрінің бұйрықтарына сәйкес ұйымдастырылады және өткізіледі. Практиканың түрлері, мерзімдері және мазмұны оқу жоспарларымен және кәсіптік бағдарламаларымен анықталады.
51. Академияда оқуды аяқтаған және қорытынды аттестаттаудан өткен адамдарға мемлекеттік үлгідегі білімі туралы тиісті құжат беріледі.
7-тарау. Білімдерді ағымдағы бақылау, білім алушыларды аралық және қорытынды аттестаттау жүйесі, оларды Академияда өткізудің нысандарды және тәртібі
52. Академиядағы білім алушылардың үлгерімін ағымдағы бақылау, аралық және қорытынды аттестаттау, оларды өткізу нысандары мен тәртібі ғылым және жоғары білім саласындағы уәкілетті органның, Министрдің және Академия бастығының бұйрықтарымен регламенттеледі және Академияның академиялық саясаты негізінде өткізіледі.
53. Білім алушылардың үлгерімін ағымдағы бақылау оқу пәнінің әрбір тақырыбы бойынша жүргізіледі және аудиториялық және аудиториядан тыс сабақтар кезінде білім сапасын бақылауды қамтиды.
54. Білім алушыларды емтихандар тапсыру нысанында аралық аттестаттау жұмыс оқу жоспарына, академиялық күнтізбеге және білім беру бағдарламаларына сәйкес жүзеге асырылады. Оқу пәні бойынша аралық аттестаттауды өткізу кезінде білім алушылардың білімін бағалаудың балдық-рейтингтік жүйесіне сәйкес емтиханда алынған балдар және рейтинг-рұқсат (модуль) бағалары ескеріледі.
55. Оқу жылының қорытындысы бойынша үлгерімнің орташа балын (GPA) есептейді, ол көшіру балы болып табылады және білім алушыларды курстан курсқа көшіруді жүзеге асыруға мүмкіндік береді. Келесі курсқа көшіру үшін GPA ең төменгі көшіру балының мәнін Академияның Академиялық саясаты анықтайды.
56. Білім алушыларды қорытынды аттестаттау ұзақтығы мен мерзімі академиялық саясатта, академиялық күнтізбеде және даярлау бағыттарының жұмыс оқу жоспарларында көзделген нысандар бойынша өткізіледі.
57. Білім алушыларды қорытынды аттестаттауды өткізу үшін оқытудың барлық нысандары үшін даярлаудың әрбір бағыты бойынша Мемлекеттік аттестаттау комиссиясы құрылады.
58. Бақылаудың барлық түрлері бойынша білім алушылардың оқу жетістіктері Академияның Академиялық саясатына сәйкес білімді бағалаудың балдық-рейтінгтік әріптік жүйесі бойынша бағаланады.
59. Білім алушылардың құқықтары мен міндеттері, оларды Академиядан шығару негіздері мен тәртібі, сондай-ақ Академияның білім алушылармен қарым-қатынастарын ресімдеу тәртібі нормативтік құқықтық актілерде, осы Жарғыда, ішкі тәртіп қағидаларында және білім беру қызметтерін көрсету шартында (келісімшартында) айқындалады.
9-тарау. Академияның тұрақты және ауыспалы құрамы
60. Академияның жеке құрамы тұрақты және ауыспалы құрамға бөлінеді.
61. Академияның тұрақты құрамына ішкі істер органдарына қызметке қабылданған және қатардағы, кіші, орта және аға басшы құрам лауазымдарына тағайындалған адамдар, сондай-ақ лауазымдары ІІМ бұйрығымен бекітілетін штаттарда көзделген жұмыскерлер жатады.
62. Академияның тұрақты құрамы:
1) Ғылыми кеңесті (Академияның басқа кеңестері мен комиссияларын) сайлауға және сайлануға, олардың жұмысына қатысуға;
2) Академия қызметіне қатысты мәселелерді талқылауға және шешуге қатысуға;
3) кітапханалардың, ақпараттық қорлардың қызметтерін пайдалануға;
4) өзінің кәсіби қызметін ұйымдастырушылық және материалдықтехникалық қамтамасыз етуге;
5) Қазақстан Республикасының заңнамасында, Министрдің бұйрықтарында көзделген өзге де құқықтарды пайдалануға құқылы.
63. Академияның тұрақты құрамы:
1) Осы Жарғының талаптарын сақтауға;
2) білім алушылардың кәсіби, адамгершілік, эстетикалық және дене тәрбиесін жүзеге асыруға, олардың ішкі тәртіп пен қызметтік тәртіп қағидаларын
3) ұсынылатын білім беру қызметтерінің және жүргізілетін ғылыми зерттеулердің сапасын қамтамасыз етуге;
4) білім алушылардың таңдаған дайындық бағыты бойынша кәсіби қасиеттерін, азаматтық ұстанымын қалыптастыруға;
5) өзінің кәсіби шеберлігін, зияткерлік, шығармашылық және жалпы ғылыми деңгейін ұдайы жетілдіруге;
6) білім алушылар үшін қызметтік (кәсіби борышын мінсіз орындаудың, тәртіптің, еңбекке шығармашылық көзқарастың, жоғары мәдениет пен адамгершіліктің үлгісі болуға;
7) мемлекеттік және заңмен қорғалатын өзге де құпияны қатаң сақтауға;
8) Қазақстан Республикасы заңнамасының, ішкі тәртіп қағидаларының, Академияның басқа да нормативтік актілерінің, тікелей бастықтардың бұйрықтары мен өкімдерінің талаптарын сақтауға міндетті.
64. Академияның ауыспалы құрамына білім алушылардың барлық санаттары кіреді.
65. Академияда білім алушылар:
1) тиісті даярлау бағыты бойынша мемлекеттік жалпыға міндетті білім беру стандартына сәйкес білім алуға;
2) оқу процесін, ғылыми-зерттеу, тәрбие жұмысын жетілдіру, үлгерімді, тәртіпті және тұрмысты жақсарту мәселелерін шешуге қатысуға;
3) Академияның қоғамдық өміріне, спорт секцияларының, көркемөнерпаздар ұжымдарының және шығармашылықтың басқа да түрлерінің жұмысына қатысуға;
4) белгіленген тәртіпте Академияның ақпараттық қорларын, интернет ресурстарын, кітапханаларын, Академияның оқу, ғылыми және өзге де бөліністерінің қызметтерін пайдалануға;
5) Академияның оқу, ғылыми-зерттеу жұмысындағы жетістіктері және қоғамдық қызметіне белсенді қатысқаны үшін көтермеленуге;
6) қолданыстағы заңнамада, Министрдің және Академия бастығының бұйрықтарында көзделген өзге де құқықтарды пайдалануға құқығы бар.
66. Білім алушылар:
1) Осы Жарғының, ішкі тәртіп қағидаларының және Академияның басқа да нормативтік актілерінің талаптарын сақтауға;
2) даярлаудың тиісті бағыты бойынша теориялық білімді, кәсіби дағдыларды және іскерлікті меңгеруге, оқу жоспарын, көзделген барлық оқу тапсырмаларын орындауға, оқу сабақтарының барлық түрлеріне қатысуға, ағымдағы, аралық және қорытынды аттестаттаудан өтуге;
3) білім және кәсіби деңгейін, жалпы мәдениетін арттыруға;
4) ғылыми және құқықтық білімді насихаттауға, сондай-ақ Академия өткізетін қоғамдық іс-шараларға қатысуға;
5) Академияның мүлкіне, үй-жайларына, жабдықтарына, музей және кітапхана қорларына ұқыпты қарауға және Қазақстан Республикасының заңнамасына сәйкес Академияға келтірілген материалдық залал үшін жауапты болуға;
6) қауіпсіздік техникасы қағидаларын, еңбекті қорғау, өрт қауіпсіздігі және санитария талаптарын сақтауға;
7) мемлекеттік және қызметтік құпияны қатаң сақтауға;
8) академиялық адалдық кағидатын сақтауға;
9) ішкі істер органдарының қызметкерлеріне жүктелетін өзге де міндеттерді орындауға міндетті.
10-тарау. Академияда білім алушыларды оқудан шығару негіздері мен тәртібі
67. Білім алушылар:
1) өз қалауы бойынша, оның ішінде басқа білім беру ұйымына ауысуына байланысты;
2) Қазақстан Республикасы ІІМ әскери, арнаулы оқу орындарында білім алушылардың үлгеріміне ағымдағы бақылау, оларға аралық және қорытынды аттестаттау жүргізу қағидаларына сәйкес академиялық үлгермегені үшін;
3) тәртіпті бұзғаны, "Құқық қорғау қызметі туралы" Қазақстан Республикасының Заңында, осы Жарғыда, ішкі тәртіп қағидаларында және білім алушы қызметкерлерді жұмыстан шығарудың өзге де негіздерінде көзделген талаптарды орындамағаны және тиісінше орындамағаны үшін;
4) "Құқық қорғау қызметі туралы" Қазақстан Республикасының Заңына сәйкес адамды құқық қорғау қызметіне қабылдауға болмайтын өмірбаяндық сипаттағы мәліметтерді ұсынбағаны немесе бұрмалағаны үшін;
5) денсаулық жағдайы бойынша әскери-дәрігерлік комиссияның қызметке жарамсыздығы немесе шектеулі жарамдылығы туралы қорытындысы негізінде Академиядан шығарылуы мүмкін.
68. Білім алушыларды оқудан шығару факультеттің, оқу-саптық бөліністің және кадр қызметінің қорытындысы негізінде Академия бастығының бұйрығымен ресімделеді.
69. Білім алушы Академиядан шығарылған кезде оған оқығаны туралы транскрипт беріледі. Оқудан шығарылған адам мемлекет жұмсаған бюджет қаражатын толық өтеуі және Академия алдындағы барлық міндеттемелерді орындауға тиіс. Ұсталатын сома Академияда болған әрбір толық ай үшін пропорционалды түрде есептеледі.
11- тарау. Академияның ақылы қызметтер көрсетуінің тізбесі мен тәртібі
70. Академия Қазақстан Республикасының ІІМ бекітетін қағидаларға сәйкес ақылы қызмет түрлерін көрсетуді жүзеге асыруға құқылы.
71. Академия мемлекеттік жалпыға міндетті білім беру стандарттарының талаптарынан тыс ақылы қызметтер көрсету туралы келісімшарт жасасу арқылы мына тауарларды (жұмыстарды, көрсетілетін қызметтерді) ақылы негізде ұсынады:
1) қосымша білім беру бағдарламаларын іске асыру;
2) кәсіби білім беруді ұйымдастыру;
3) ғылыми зерттеулер жүргізу;
4) оқу-әдістемелік әдебиетті әзірлеу және (немесе) өткізу.
72. Академия ғимараттарда көрінетін жерде ұсынылатын ақылы қызметтер түрлерінің тізбесі мен ұсынылатын тауарлардың (жұмыстардың, көрсетілетін қызметтердің) баға прейскурантын көрсете отырып ақпарат орналастырады.
73. Тауарларды (жұмыстарды, көрсетілетін қызметтерді) төлеу қолма-қол ақша алу арқылы кассалық кіріс ордерлерінің негізінде міндетті түрде бақылаукассалық машиналарды қолдана отырып және Академия шотына ақша аудару жолымен қолма-қол ақшасыз есеп айырысу негізінде жүргізіледі.
74. Академияның тауарларды (жұмыстарды, көрсетілетін қызметтерді) өткізу бойынша қызметтің ақылы түрлерін көрсетуден түсетін қаражаты бюджетті жоспарлау саласындағы уәкілетті органның бұйрығымен бекітілетін Академияның тауарларды (жұмыстарды, қызметтерді) сатудан түсетін түсімдер мен ақша жұмсау жоспарларына сәйкес жұмсалады.
75. Академия ақылы қызмет түрлерін көрсетуді Қазақстан Республикасының ІІМ бұйрығымен бекітілетін тауарларға, жұмыстарға (көрсетілетін қызметтерге) бағаларға сәйкес жүзеге асырады.
12-тарау. Академияның ғылыми және халықаралық қызметі
76. Академия Қазақстан Республикасының заңнамасында, Министр мен Академия бастығының бұйрықтарында белгіленген тәртіпте ғылыми-білім беру қызметін үйлестіруді, мониторингтеуді және бағалауды жүзеге асырады.
77. Академия Қазақстан Республикасының заңнамасында белгіленген тәртіпте шет мемлекеттердің құқық қорғау органдарымен, шетелдік білім беру және ғылыми-зерттеу мекемелерімен, халықаралық ұйымдармен, шетелдік заңды және жеке тұлғалармен ғылыми және білім беру қызметі саласындағы халықаралық ынтымақтастықты жүзеге асырады.
78. Академия ғылыми қызметін Қазақстан Республикасының заңнамасына сәйкес жүзеге асырады.
79. Ғылыми қызметті курсанттарды, магистранттарды, докторанттарды басқа да ғылыми және практикалық қызметкерлерді тарта отырып, профессороқытушылар құрамы мен ғылыми қызметкерлер жүзеге асырады.
80. Академияның ғылыми қызметінің негізгі міндеттері:
1) Академияда білім беру процесі мен ғылыми қызметтің бірлігін қамтамасыз ету;
2) ішкі істер органдарының практикалық қызметінің міндеттерін шешуге бағытталған іргелі және қолданбалы зерттеулер жүргізу;
3) Академияның оқу, ғылыми-зерттеу базасын нығайту және дамыту;
4) ғылыми-зерттеу жұмыстарының нәтижелерін білім беру процесіне, Қазақстан Республикасы ішкі істер органдарының практикалық қызметіне енгізу, оларды авторлық сүйемелдеу;
5) заңнамалық және өзге де нормативтік құқықтық актілердің жобаларын әзірлеуге және рецензиялауға (сараптамаға) қатысу;
6) білім алушылардың оқу-ғылыми қызметін ұйымдастыру, ғылымипедагогикалық және ғылыми кадрларды даярлау және олардың біліктілігін арттыру.
81. Академияның нормативтік актілері негізінде әрекет ететін білім алушылардың ғылыми қоғамдарының қызметін, оларды институттар, факультеттер, кафедралар және т.б. жүргізетін ғылыми-зерттеу жұмыстарына тартуды ұйымдастырады.
82. Академияда жоспарлы және жоспардан тыс негізде жүзеге асырылатын редакциялық-баспа қызметі қолжазбаларды баспаға дейінгі даярлауды, әдебиеттерді басып шығаруды, полиграфиялық қызметті қамтиды.
83. Академияның редакциялық-баспа қызметінің негізгі міндеттері:
1) оқулықтарды, монографияларды, оқу құралдарын, дәрістерді, ғылыми еңбектер жинақтарын, конференциялар, кеңестер материалдарын, қызметтік құжаттаманы, сондай-ақ анықтамалық, ақпараттық, талдамалық және полиграфиялық өнімнің басқа да түрлерін дайындау және басып шығару;
2) білім беру процесін қажетті оқу-әдістемелік және оқу материалдарымен қамтамасыз ету;
3) Академия басылымдарын білім беру мекемелерінде және ішкі істер органдарында насихаттау және тарату.
84. Білім беру процесі мен ғылыми қызметті ғылыми-ақпараттық қамтамасыз ету функцияларын Академияның құрылымдық бөліністері олар туралы ережелерге және олардың қызмет қағидаларына сәйкес орындайды.
85. Академиядағы ғылыми-ақпараттық қызмет мыналарды қамтиды:
1) ғылыми-педагогикалық құрам мен білім алушылардың ақпараттық қажеттіліктерін зерделеу, білім беру процесінде және ғылыми қызметте қажетті материалдарды қамтитын анықтамалық-ақпараттық қорды жинақтау;
2) қазіргі заманғы ақпараттық технологиялардың мүмкіндіктерін пайдалана отырып, білім беру процесі мен ғылыми-зерттеу қызметін ақпараттық қамтамасыз ету.
13-тарау. Академияның мүлкін құру тәртібі
86. Академия мүлкінің құны оның теңгерімінде көрсетілетін заңды тұлғаның активтері құрайды. Академияның мүлкі:
1) оған меншік иесі берген мүлік;
2) өз қызметі нәтижесінде сатып алынған мүлік (ақшалай кірістерді қоса алғанда);
3) Қазақстан Республикасының заңнамасында тыйым салынбаған өзге де көздер есебінен қалыптастырылады.
87. Академияның өзіне бекітілген мүлікті және оған смета бойынша бөлінген қаражат есебінен сатып алынған мүлікті өз бетімен иеліктен шығаруға немесе оған өзге де тәсілмен билік етуге құқығы жоқ.
88. Егер Қазақстан Республикасының заңдарында Академияға табыс әкелетін қызметті жүзеге асыру құқығы берілсе, онда Қазақстан Республикасының заңдарына сәйкес білім беру салаларындағы мемлекеттік мекемелер өндіретін тауарларды (жұмыстарды, көрсетілетін қызметтерді) өткізуден түсетін ақшаны қоспағанда, осындай қызметтен алынған ақша тиісті бюджетке есептелуге жатады.
89. Академияның қызметі республикалық бюджеттен қаржыландырылады.
90. Академия бухгалтерлік есеп жүргізеді және Қазақстан Республикасының заңнамасына сәйкес есеп ұсынады.
91. Академияның қаржы-шаруашылық қызметін тексеру және ревизия жүргізу Қазақстан Республикасының заңнамасында белгіленген тәртіпте жүзеге асырылады.
14-тарау. Академиядағы жұмыс режимі
92. Академияның жұмыс режимі "Құқық қорғау қызметі туралы" Қазақстан Республикасының Заңында көзделген ерекшеліктерді ескере отырып, Қазақстан Республикасының еңбек заңнамасына сәйкес ішкі еңбек тәртібі қағидаларымен белгіленеді.
15-тарау. Академия Жарғысына өзгерістер мен толықтырулар енгізу тәртібі
93. Академияның құрылтай құжаттарына өзгерістер мен толықтырулар енгізу Министрдің бұйрығымен жүргізіледі және "Заңды тұлғаларды мемлекеттік тіркеу және филиалдар мен өкілдіктерді есептік тіркеу туралы" Қазақстан Республикасының Заңына сәйкес әділет органдарында мемлекеттік тіркеу рәсімінен өтеді.
16-тарау. Академияны қайта ұйымдастыру және тарату шарттары
94. Академияны қайта ұйымдастыру және тарату Қазақстан Республикасының заңнамасына сәйкес жүзеге асырылады.
95. ІІМ Академияны қайта ұйымдастыруды және таратуды егер Қазақстан Республикасының заңдарында өзгеше белгіленбесе, мемлекеттік мүлік жөніндегі уәкілетті органның келісімі бойынша жүзеге асырады.
96. Таратылған Академияның кредиторлардың талаптарын қанағаттандырғаннан кейін қалған мүлкін мемлекеттік мүлік жөніндегі уәкілетті орган қайта бөледі.
97. Таратылған Академияның мүлкін өткізу нәтижесінде алынған қаражатты қоса алғанда, кредиторлардың талаптары қанағаттандырылғаннан кейін қалған ақшасы тиісті бюджеттің кірісіне есептеледі.
