Шымкент қаласының әкімдігі ҚАУЛЫ ЕТЕДІ:
1. "Шымкент қаласының дін істері басқармасы" мемлекеттік мекемесінің ережесін бекіту туралы" Шымкент қаласы әкімдігінің 2022 жылғы 14 ақпандағы № 266 қаулысына мынадай өзгеріс енгізілсін:
көрсетілген қаулымен бекітілген "Шымкент қаласы дін істері басқармасы" мемлекеттік мекемесі туралы ережеге мынадай өзгерістер енгізіліп, жаңа редакцияда бекітілсін:
1) 9-тармақ мынадай редакцияда жазылсын:
"9. Заңды тұлғаның орналасқан жері: Қазақстан Республикасы, Шымкент қаласы, Әл-Фараби ауданы, Түркістан көшесі, 91, индекс 160011.";
2) 15-тармақта 7) және 11) тармақшалар мынадай редакцияда жазылсын:
"7) діни әдебиетті және діни мазмұндағы өзге де ақпараттық материалдарды, діни мақсаттағы заттарды тарату үшін арнайы тұрақты үй-жайлардың орналастырылуын келіседі, сондай-ақ ғибадат үйлерінен (ғимараттарынан) тыс жерлерде діни іс-шаралар өткізу туралы діни бірлестіктер берген хабарламаларды қарайды;";
"11) Басқарма мүддесінде Қазақстан Республикасы заңнамасында жергілікті атқарушы органдарға жүктелетін "Діни қызмет және діни бірлестіктер туралы" Қазақстан Республикасы заңы 5-бабына, "Терроризмге қарсы іс-қимыл туралы" Қазақстан Республикасы заңы 7-бабының 21-тармағына, "Мемлекеттік сатып алу туралы" Қазақстан Республикасы Заңының 16-бабы 3-тармағы 7) тармақшасына сәйкес өкілеттіктерді жүзеге асырады;";
3) 3-тарауда:
тақырып мынадай редакцияда жазылсын:
"3 тарау. Мемлекеттік орган басшысының мәртебесі, өкілеттіктері";
19-тармақта 1) және 8) тармақшалар мынадай редакцияда жазылсын:
"1) Қазақстан Республикасының заңнамасына сәйкес басқарма қызметкерлерін, "Дін мәселелерін зерттеу орталығы" коммуналдық мемлекеттік мекемесінің басшысын қызметке тағайындайды және қызметтен босатады;";
"8) басқарма қызметкерлеріне, ведомстволық бағынысты ұйымның басшысы мен орынбасарына көтермелеу, материалдық көмек көрсету шараларын қабылдайды және тәртіптік жаза қолданады;";
4) 23-тармақта орыс тілінде өзгеріс енгізілді, қазақ тіліндегі мәтін өзгеріссіз қалады.
2. "Шымкент қаласының дін істері басқармасы" мемлекеттік мекемесі Қазақстан Республикасының заңнамасында белгіленген тәртіпте:
1) осы қаулыны қол қойылған күнінен бастап бес жұмыс күні ішінде Қазақстан Республикасы Әділет министрлігінің "Қазақстан Республикасының Заңнама және құқықтық ақпарат институты" шаруашылық жүргізу құқығындағы республикалық мемлекеттік кәсіпорнына электрондық цифрлық қолтаңбасымен куәландырылған қазақ және орыс тілдерінде электрондық түрде жіберуді;
2) осы қаулыны ресми жарияланғанынан кейін Шымкент қаласы әкімдігінің интернет-ресурсында орналастыруды;
3) осы қаулыдан туындайтын өзге де шаралардың қабылдануын қамтамасыз етсін.
3. Осы қаулының орындалуын бақылау Шымкент қаласы әкiмiнің жетекшілік ететін орынбасарына жүктелсiн.
4. Осы қаулы алғашқы ресми жарияланған күнінен бастап қолданысқа енгізіледі.
| Шымкент қаласының әкімі | Ғ. Сыздықбеков |
| Шымкент қаласы әкімдігінің 2025 жылғы "18" сәуірдегі № 1786 қаулысына қосымша |
"Шымкент қаласы дін істері басқармасы" мемлекеттік мекемесі туралы ережесі
1 тарау. Жалпы ережелер
1. "Шымкент қаласы дін істері басқармасы" мемлекеттік мекемесі (бұдан әрі - Басқарма) Шымкент қаласының аумағында дін саласындағы мемлекеттік саясатты басшылықты жүзеге асыратын Қазақстан Республикасының мемлекеттік органы болып табылады.
2. Басқарманың ведомстволары жоқ.
3. Басқарма өз қызметін Қазақстан Республикасының Конституциясына және заңдарына, Қазақстан Республикасының Президенті мен Үкіметінің актілеріне, сондай-ақ осы Ережеге сәйкес жүзеге асырады.
4. Басқарма мемлекеттік мекеменің ұйымдық-құқықтық нысанындағы заңды тұлға болып табылады. Қазақстан Республикасының Мемлекеттік Елтаңбасы бейнеленген мөрлері және атау қазақ және орыс тілдерінде жазылған мөртаңбалары, белгіленген үлгідегі бланкілері, Қазақстан Республикасының заңнамасына сәйкес қазынашылық органдарында шоттары бар.
5. Басқарма азаматтық-құқықтық қатынастарды өз атынан жасайды.
6. Басқарманың, Қазақстан Республикасының заңнамасына сәйкес уәкілеттік берілген жағдайда ол мемлекеттің атынан азаматтық-құқықтық қатынастардың тарапы болуға құқылы.
7. Басқарма өз құзыретінің мәселелері бойынша заңнамада белгіленген тәртіппен Басқарма басшысының бұйрықтарымен рәсімделетін шешімдер қабылдайды.
8. Басқарманың құрылымы мен штат санының лимиті Қазақстан Республикасының заңнамасына сәйкес бекітіледі.
9. Заңды тұлғаның орналасқан жері: Қазақстан Республикасы, Шымкент қаласы, Әл-Фараби ауданы, Түркістан көшесі, 91, индекс 160011.
10. Осы Ереже Басқарманың құрылтай құжаты болып табылады.
11. Басқарманың қызметін қаржыландыру Қазақстан Республикасының заңнамасына сәйкес жергілікті бюджеттен, Қазақстан Республикасының Ұлттық Банкінің бюджетінен жүзеге асырылады.
12. Басқармаға кәсіпкерлік субъектілерімен басқарманың өкілеттіктері болып табылатын міндеттерді орындау тұрғысында шарттық қарым-қатынас жасауға тыйым салынады.
Егер Басқармаға заңнамалық актілермен кіріс әкелетін қызметті жүзеге асыру құқығы берілсе, онда алынған кіріс, егер Қазақстан Республикасының заңнамасына өзгеше белгіленбесе, мемлекеттік бюджетке жіберіледі.
2 тарау. Мемлекеттік органның міндеттері мен өкілеттіктері
13. Мақсаттары:
1) Шымкент қаласының аумағында дін саласындағы Қазақстан Республикасының мемлекеттік саясатын іске асыру;
2) мәдениеттер мен діндер диалогының жаңа нысандарын іздеу арқылы конфессияаралық келісім мен тұрақтылықты нығайту;
3) діни, этно - мәдени және қоғамдық бірлестірмен өзара іс-қимылды жүзеге асыру.
14. Өкілеттіктер:
1) құқықтар:
өз функцияларын орындау үшін қажетті ақпаратты мемлекеттік органдар мен лауазымды тұлғалардан, өзге де ұйымдар мен азаматтардан сұратуға. Басқарманың құзіретіне жататын мәселелерді дайындауға мемлекеттік органдардың қызметкерлерін тарту;
дін саласындағы, адам құқықтарын сақтау мәселелері және Басқарманың құзыретіне кіретін өзге де мәселелер бойынша мемлекеттік органдардың лауазымды тұлғаларына ұйымдастырушылық-әдістемелік, ақпараттық және өзге де көмек көрсету;
2) міндеттері:
Қазақстан Республикасының қолданыстағы заңнамасының нормаларын сақтау;
Қазақстан Республикасы Президентінің, Қазақстан Республикасы Үкіметінің және өзге де орталық атқарушы органдардың, сондай-ақ қала әкімі мен әкімдігінің актілері мен тапсырмаларын сапалы және уақытылы орындау.
15. Функциялар:
1) өңірдегі діни ахуалды зерделеп, оған талдау жүргізеді;
1-1) өңірде жұмыс істеп тұрған діни бірлестіктердің, миссионерлердің, рухани (діни) білім беру ұйымдарының қызметін зерделеуді және талдауды жүргізеді;
2) уәкілетті органға Қазақстан Республикасының діни қызмет және діни бірлестіктер туралы заңнамасын жетілдіру жөнінде ұсыныстар енгізеді;
3) діни қызмет саласындағы мемлекеттік саясатты іске асырады;
4) құқық қорғау органдарына Қазақстан Республикасының діни қызмет және дiни бiрлестiктер туралы заңнамасын бұзатын жеке және заңды тұлғалардың қызметiне тыйым салу жөнiнде ұсыныстар енгiзедi;
5) Қазақстан Республикасының дiни қызмет және діни бірлестіктер туралы заңнамасын бұзушылықтарға қатысты жеке және заңды тұлғалардың өтініштерін қарайды;
6) өз құзыретіне жататын мәселелер бойынша жергілікті деңгейде түсiндiру жұмыстарын жүргiзедi;
7) діни әдебиетті және діни мазмұндағы өзге де ақпараттық материалдарды, діни мақсаттағы заттарды тарату үшін арнайы тұрақты үй-жайлардың орналастырылуын келіседі, сондай-ақ ғибадат үйлерінен (ғимараттарынан) тыс жерлерде діни іс-шаралар өткізу туралы діни бірлестіктер берген хабарламаларды қарайды;
8) ғибадат үйлерін (ғимараттарын) салу, олардың орналасатын жерін айқындау, сондай-ақ үйлерді (ғимараттарды) ғибадат үйлері (ғимараттары) етіп қайта бейіндеу (функционалдық мақсатын өзгерту) туралы шешім қабылдайды;
9) діни бірлестіктерді құруға бастамашы азаматтардың тізімдеріне тексеру жүргізуді қамтамасыз етедi;
10) миссионерлiк қызметті жүзеге асыратын адамдарды тіркеуді жүргізеді;
11) Басқарма мүддесінде Қазақстан Республикасы заңнамасында жергілікті атқарушы органдарға жүктелетін "Діни қызмет және діни бірлестіктер туралы" Қазақстан Республикасы заңы 5-бабына, "Терроризмге қарсы іс-қимыл туралы" Қазақстан Республикасы заңы 7-бабының 21-тармағына, "Мемлекеттік сатып алу туралы" Қазақстан Республикасы Заңының 16-бабы 3-тармағы 7) тармақшасына сәйкес өкілеттіктерді жүзеге асырады;
12) "Әкімшілік құқық бұзушылық туралы" Қазақстан Республикасы кодексінің 804-бабының 50-тармағына сәйкес, көрсетілген кодекстің 453, 490-баптарында көзделген әкімшілік құқық бұзушылық туралы хаттамалар толтырады;
13) терроризм мен экстремизмге қарсы іс-қимыл бойынша шаралар қабылдайды;
14) діни экстремизмге жол бермеу мақсатында мынадай профилактикалық іс-шаралар жүргізеді: қоғамдық бірлестіктермен өзара іс-қимылды, тиісті аумақта діни бірлестіктер мен миссионерлік қызметті зерттеуді жүзеге асырады, олар туралы мәліметтер банкін қалыптастырады, өңірлік деңгейде ақпараттық-насихаттау іс-шараларын жүзеге асырады, діни ахуалды зерттеу және мониторингтеуді жүзеге асырады;
15) Шымкент қаласының аумағында конфессияаралық келісім мен төзімділікті нығайту жөніндегі іс-шараларды ұйымдастыру және өткізу;
16) Қазақстан Республикасы Үкіметі айқындайтын тәртіппен мемлекеттік әлеуметтік тапсырысты қалыптастыруды және іске асыруды жүзеге асырады;
17) дін саласындағы бюджеттік бағдарламалар әкімшісінің функцияларын жүзеге асырады;
3 тарау. Мемлекеттік орган басшысының мәртебесі, өкілеттіктері
16. Басқарманы басқаруды басқарма басшысы жүзеге асырады, ол Басқармаға жүктелген міндеттердің орындалуына және оның өз өкілеттіктерін жүзеге асыруына дербес жауапты болады.
17. Басқарма басшысы Қазақстан Республикасының заңнамасына сәйкес лауазымына Шымкент қаласының әкімі қызметке тағайындайды және қызметтен босатады.
18. Басқарма басшысының штаттық кестеге сәйкес орынбасарлары жоқ.
19. Басқарма басшысының өкілеттіктері:
1) Қазақстан Республикасының заңнамасына сәйкес басқарма қызметкерлерін, "Дін мәселелерін зерттеу орталығы" коммуналдық мемлекеттік мекемесінің басшысын қызметке тағайындайды және қызметтен босатады;
2) құрылымды, құрылымдық бөлімшелер туралы ережелерді және басқарма қызметкерлерінің лауазымдық нұсқаулықтарын бекітеді;
3) міндеттемелер мен төлемдер бойынша қаржыландыру жоспарын бекітеді;
4) Қазақстан Республикасының қолданыстағы заңнамасына сәйкес мемлекеттік органдарда, өзге де ұйымдарда Басқарманың атынан өкілдік етеді;
5) бірінші қол қою құқығына ие;
6) сыбайлас жемқорлыққа қарсы іс-қимыл бойынша шаралар қабылдамағаны үшін дербес жауапты болады;
7) басқарма қызметкерлерінің орындауы үшін міндетті бұйрықтар шығарады және нұсқаулар береді;
8) басқарма қызметкерлеріне, ведомстволық бағынысты ұйымның басшысы мен орынбасарына көтермелеу, материалдық көмек көрсету шараларын қабылдайды және тәртіптік жаза қолданады;
9) Қазақстан Республикасының қолданыстағы заңнамасына сәйкес өкілеттіктерді жүзеге асырады.
Басқарма басшысы болмаған кезеңде оның өкілеттіктерін қолданыстағы заңнамаға сәйкес оны алмастыратын тұлға жүзеге асырады.
4 тарау. Мемлекеттік органның мүлкі
20. Басқарманың заңнамада көзделген жағдайларда жедел басқару құқығында оқшауланған мүлкі болуы мүмкін.
Басқарманың мүлкі оған меншік иесі берген мүлік, сондай-ақ өз қызметі нәтижесінде сатып алынған мүлік (ақшалай кірістерді қоса алғанда) және Қазақстан Республикасының заңнамасында тыйым салынбаған өзге де көздер есебінен қалыптастырылады.
21. Басқармаға бекітілген мүлік коммуналдық меншікке жатады.
22. Егер заңнамада өзгеше көзделмесе, Басқарма өзіне бекітілген мүлікті және қаржыландыру жоспары бойынша өзіне бөлінген қаражат есебінен сатып алынған мүлікті өз бетімен иеліктен шығаруға немесе оған өзгедей тәсілмен билік етуге құқығы жоқ.
5 тарау. Мемлекеттік органды қайта ұйымдастыру және тарату
23. Басқарманы қайта ұйымдастыру және тарату Қазақстан Республикасының заңнамасына сәйкес жүзеге асырылады.
Басқарманың қарамағындағы ұйымдардың тізбесі:
Шымкент қаласы дін істері басқармасының "Дін мәселелерін зерттеу орталығы" коммуналдық мемлекеттік мекемесі.
