Қазақстан Республикасының Президентi және Ресей Федерациясының Президентi,
екi жақты гуманитарлық ынтымақтастықтың кең ауқымды мәселелерi бойынша болған пайдалы пiкiр алмасулар деп бағалай отырып,
бостандық, демократия, заңның үстемдiгi, адам құқығын құрмет тұту, ар-ұждан және дiни сенiм еркiндiгi, ой бiлдiру еркiндiгi құндылықтарына адалдықтарын қуаттай отырып,
жалпы жұрт таныған халықаралық құқық нормаларын, Бiрiккен Ұлттар Ұйымы мен Еуропадағы қауiпсiздiк және ынтымақтастық жөнiндегi ұйымның негiзге алатын құжаттарында баяндалған қағидаттарды басшылыққа ала отырып,
екi ел халықтарының рухани және мәдени туыстығын сақтаудың маңыздылығын тани отырып,
1992 жылғы 25 мамырдағы Қазақстан Республикасы мен Ресей Федерациясының арасындағы Достық, ынтымақтастық және өзара көмек туралы шартты, 1998 жылғы 6 шiлдедегi Қазақстан Республикасы мен Ресей Федерациясының арасындағы ХХI ғасырға бағдарланған мәңгiлiк достық пен одақтастық туралы декларацияны, 2000 жылғы 19 маусымдағы Қазақстан Республикасы мен Ресей Федерациясы Президенттерiнiң Бiрлескен мәлiмдемелерiн, сондай-ақ басқа да екi жақты құжаттарды негiзге ала отырып,
Қазақстан Республикасы мен Ресей Федерациясы халықтарының арасындағы олардың жақындасу мен ынтымақтастыққа өзара ұмтылысына негiзделген өзара түсiнiстiк пен достықты одан әрi нығайтуға қатысты өздерiне мiндеттеме қабылдай отырып,
мәлiмдейдi:
- Қазақстан Республикасы мен Ресей Федерациясы алдағы уақытта да өз қатынастарын өзара сенiм бiлдiру, тәуелсiздiктi құрмет тұту, ашықтық, егемендiк, аумақтық тұтастық, бiр-бiрiнiң ішкi істерiне араласпау қағидаттары негiзiнде құратын болады.
- Қазақстан мен Ресей өзiне алған жан-жақты интеграцияны және стратегиялық әрiптестiктi тереңдету бағыты өзiн толық ақтады. Екi мемлекет арасында қалыптасқан достық және одақтастық қатынас халықаралық бейбiтшiлiктiң, еуразиялық кеңістiктегi қауiпсiздiк пен тұрақтылықтың маңызды факторы болып табылады.
- Ең бiрiншi маңызды мiндет Қазақстанның және Ресейдiң көп ұлтты халықтарының арасындағы ғасырлар бойы жинақталған достық, тату көршiлiк байланыстарды ұқыптылықпен сақтау болып табылады. Оларды нығайту және одан әрi қарқынды дамыту екi елдiң де түбегейлi мүдделерiне жауап бередi, бейбiтшiлiктi, аймақтық қауiпсiздiк пен тұрақтылықты нығайтуға жәрдемдеседi.
- Тараптар Қазақстан және Ресей халықтарының ортақ мәдени мұраларын, сондай-ақ олардың ұлттық мәдениеттерiнiң өзiндiк ерекшелiктерiн сақтауға жәрдемдесетiн болады.
- Гуманитарлық саладағы ынтымақтастықты дамытуға, оның iшiнде екi мемлекеттiң азаматтары арасындағы байланыстар мен қоғамдық ұйымдардың өзара iс-қимылын көтермелеуге, ортақ мәдени, бiлiм беру және ақпараттық кеңiстiктi ұлғайтуға жан-жақты қолдау көрсетiлетiн болады. Мәдениет, бiлiм беру, денсаулық сақтау, ұлтаралық қатынас тiлi ретiнде орыс тiлi пайдаланылатын бiрлескен ғылыми зерттеулер гуманитарлық саладағы негiзге алынатын рөлдi орындауға қызмет етедi. Тараптар Тәуелсiз Мемлекеттер Достастығы шеңберiнде Орыс тiлiн дамыту қорын құруға барынша жәрдемдесетiн болады.
- Өзара құрмет тұту негiзiнде консулдық мекемелердiң санын көбейту, Қазақстан Республикасының және Ресей Федерациясының Президенттерi жанындағы адам құқығы жөнiндегi комиссиялардың тұрақты бiрлескен жұмыстарының табиғи жалғасы ретiнде адам құқығы жөнiндегi Қазақстан-Ресей екi жақты комиссиясын құру сенiм бiлдiру мен өзара түсiнiстiктi нығайтуға, Қазақстан мен Ресей аумақтарында тұрып жатқан екi ел азаматтарына қажеттi көмек көрсету жөнiндегi мүмкiндiктердi кеңейтуге жәрдемдесетiн болады. Бұл орайда, бұрынғысынша, Қазақстан мен Ресей азаматтарының, олардың этникалық тегiне қарамастан, қандай да болсын кемсiтушiлiксiз және шектеулерсiз тең құқықтары мен бостандығын қамтамасыз етуге басымдықты назар аударылатын болады.
- Қазақстан Республикасы мен Ресей Федерациясының Президенттерi Қазақстан Республикасы мен Ресей Федерациясының арасындағы Ынтымақтастық жөнiндегi үкiметаралық комиссияның шеңберiнде дайындалған Қазақстан Республикасы мен Ресей Федерациясының арасындағы 2000-2002 жылдарға арналған гуманитарлық саладағы ынтымақтастық бағдарламасын қарады және Комиссияға оны кезектi мәжiлiсiнде бекiтудi, ал екi елдiң тиiстi министрлiктерi мен ведомстволарына Бағдарламаны бұлжытпай орындау жөнiнде шаралар қабылдауды тапсырды. Бағдарламада баяндалған мәдениет, ақпарат, бiлiм беру, гуманитарлық ғылымдар, жастар саясаты, спорт және туризм, денсаулық сақтау, адам құқығы мен негiзгi бостандықтарын қорғау, сондай-ақ әлеуметтiк қорғау және жұмыспен қамту салаларындағы нақты iс-шараларды жүзеге асыру Қазақстан мен Ресейдiң өзара iс-қимылын жандандыруға, олардың көп ұлтты халықтарының жақындасуларына жаңа серпiн беруге қызмет етедi.
(Қолдары)
Мамандар:
Қасымбеков Б.А.
Багарова Ж.А.
