Қазақстан Республикасының Үкіметі қаулы етеді:
1. "Кеңес Социалистік Республикалар Одағы мен Америка Құрама Штаттары
арасындағы ракетаға қарсы қорғаныс жүйелерін шектеу жөніндегі 1972 жылғы
26 мамырдағы шартқа байланысты уағдаластықтар туралы меморандумды бекіту
туралы" Қазақстан Республикасы Заңының жобасы Қазақстан Республикасының
Парламенті Мәжілісінің қарауына енгізілсін.
2. Осы қаулы қол қойылған күнінен бастап күшіне енеді.
Қазақстан Республикасының
Премьер-Министрі
жоба
Қазақстан Республикасының Заңы
Кеңес Социалистік Республикалар Одағы мен Америка Құрама
Штаттары арасындағы ракетаға қарсы қорғаныс жүйелерін шектеу
жөніндегі 1972 жылғы 26 мамырдағы шартқа байланысты
уағдаластықтар туралы меморандумды бекіту туралы
1997 жылғы 26 қыркүйекте Нью-Йорк қаласында жасалған, Кеңес
Социалистік Республикалар Одағы мен Америка Құрама Штаттары арасындағы
ракетаға қарсы қорғаныс жүйелерін шектеу жөніндегі 1972 жылғы 26 мамырдағы
шартқа байланысты уағдаластықтар туралы меморандум бекітілсін.
Қазақстан Республикасының
Президенті
Кеңес Социалистік Республикалар Одағы мен
Америка Құрама Штаттары арасындағы ракетаға қарсы
қорғаныс жүйелерін шектеу жөніндегі 1972 жылғы
26 мамырдағы шартқа байланысты
уағдаластықтар туралы
Меморандум
Осы Меморандумның мақсаттары үшін төменде Кеңес Социалистік Республикалар Одағының (КСРО) құқығын иеленуші - мемлекеттер деп аталып отырған Беларусь Республикасы, Қазақстан Республикасы, Ресей Федерациясы, Украина және Америка Құрама Штаттары,
стратегиялық тұрақтылықты қолдау мақсатында, төменде Шарт деп аталатын Кеңес Социалистік Республикалар Одағы мен Америка Құрама Штаттары арасындағы Ракетаға қарсы қорғаныс жүйелерін шектеу туралы 1972 жылғы 26 мамырдағы шарттың өмірлік қабілетін сақтаудың маңызын тани отырып,
Бұрынғы КСРО аумағында жаңа тәуелсіз мемлекеттердің құрылуы
нәтижесінде саяси ахуалдағы өзгерістерді тани отырып,
Шартқа байланысты төмендегілер туралы келісті:
І бап
Осы Меморандум күшіне енген кезде Беларусь Республикасы, Қазақстан
Республикасы, Ресей Федерациясы, Украина және Америка Құрама Штаттары
Шарттың Тараптары болып табылады.
ІІ бап
КСРО құқығын иеленуші-мемлекеттер өздеріне бұрынғы КСРО-ның Шарт және
соған байланысты құжаттар бойынша құқықтары мен міндеттерін қабылдайды.
ІІІ бап
КСРО құқығын иеленуші-мемлекеттің әрқайсысы өзінің аумағына қатысты және өзінің іс-әрекетіне қатысты, бұл мемлекеттің осындай іс-әрекеті дербес немесе кез келген басқа мемлекетпен бірлесіп қай жерде жүзеге асырғанына қарамастан, Шарт ережелерін орындайды.
ІV бап
Шартты жүзеге асыру мақсаттары үшін:
а) "Кеңес Социалистік Республикалар Одағы" термині КСРО құқығын иеленуші-мемлекеттерді білдіреді;
b) "ұлттық аумақ" және "өз елінің аумағы" терминдері бұрынғы КСРО-ға қатысты КСРО құқығын иеленуші-мемлекеттердің ұлттық аумақтарының жиынтығын, ал "өз ұлттық аумағының шеткі аймақтары" термині бұрынғы КСРО-ға қатысты, аталған мемлекеттердің ұлттық аумақтары жиынтығының шеткі аймақтарын білдіреді; және
с) "астана" термині, ол Шарттың ІІІ бабында және оған 1974 жылғы 3 шілдедегі Хаттамада Кеңес Социалистік Республикалар Одағының астанасына сілтеме үшін пайдаланылған кезінде, Москва қаласын білдіре береді.
V бап
КСРО құқығын иеленуші-мемлекет немесе КСРО иеленуші-мемлекеттер осы Шарт ережелерінің күші жүретін және осы кезде Шарттың Тарабы болып табылмайтын кез келген мемлекеттің аумағында тұрған кез келген объектіні, осындай мемлекеттің келісімімен және бұндай объектіні пайдалану осы Шарттың ережелеріне сәйкес болып қалып отырған жағдайда, бұдан әрі де пайдалана алады.
IV бап
КСРО құқығын иеленуші-мемлекеттер, олардың бәрін бірге алғанда, Шарттың және, 1974 жылғы 3-шілдедегі Хаттамаларды қоса алғанда, оған байланысты құжаттардың ережелеріне сәйкес кез келген осы сәтте ракета шабуылына қарсы қорғаныс (РШҚ) жүйесі орналасқан бір ауданмен және жиынтығында РШҚ сынақ полигондарында он бестен аспайтын ракетаға қарсы іске қосу қондырғыларымен шектеледі.
VII бап
Шарттың ІХ бабындағы және Шартқа байланысты "G" Бірлескен мәлімдемедегі міндеттемелердің КСРО құқығын иеленуші-мемлекеттің біреуінен осындай екінші мемлекетке берулерге және осындай мемлекеттер арасындағы берулерге қатысы жоқ.
VIIІ бап
Төменде Комиссия деп аталатын, Тұрақты консультативтік комиссия Шартпен және 1972 жылғы 21-желтоқсандағы Кеңес Социалистік Республикалар Одағының Үкіметі мен Америка Құрама Штаттары Үкіметінің арасындағы Тұрақты консультативтік комиссияны құруға қатысты Уағдаластықтар туралы меморандуммен, сондай-ақ Шарттың көп жақты сипатын және Комиссияда шешімдер қабылдау кезінде Тараптардың теңдей құқықтық статусын көрсететін Комиссия туралы ережемен көзделген тәртіпте қызмет етеді.
ІХ бап
1. Осы Меморандум оған қол қойған бұл мемлекеттердің конституциялық процедураларына сәйкес ратификацияға немесе бекітілуге жатады.
2. Осы Меморандумның депозитарийі қызметін Америка Құрама Штаттарының Үкіметі атқарады.
3. Осы Меморандум оған қол қойған барлық мемлекеттердің үкіметтері бұл Меморандумның ратификацияланғаны немесе бекітілгені туралы құжаттарды сақтауға тапсырған күні күшіне енеді және Шарт күшінде қалған уақытқа дейін қолданыста болады.
4. Осы Меморандумды ратификациялаған немесе бекіткен мемлекеттердің әрқайсысы 1972 жылғы 26 мамырдағы Кеңес Социалистік Республикалар Одағы мен Америка Құрама Штаттары арасындағы Ракета шабуылына қарсы қорғаныс жүйелерін шектеу туралы шартқа байланысты 1997 жылғы 26 қыркүйектегі Бірінші келісілген мәлімдеменің және 1972 жылғы 26 мамырдағы Кеңес Социалистік Республикалар Одағы мен Америка Құрама Штаттары арасындағы
Ракета шабуылына қарсы қорғаныс жүйелерін шектеу туралы шартқа байланысты
1997 жылғы 26 қыркүйектегі Екінші келісілген мәлімдеменің ережелерімен
байланысты болып табылады.
Нью-Йорк қаласында 1997 жылғы 26 қыркүйекте бес данада, әрқайсысы
орыс және ағылшын тілдерінде жасалды, сондай-ақ екі мәтіннің де күші
бірдей.
Беларусь Республикасы үшін
Қазақстан Республикасы үшін
Ресей Федерациясы үшін
Украина үшін
Америка Құрама Штаттары үшін
Мамандар:
Багарова Ж.А.
Қасымбеков Б.А.
