Қазақстан Республикасының Үкіметі
ҚАУЛЫ ЕТЕДІ:
1. 2006 жылғы 19 мамырда Минск қаласында жасалған Еуразия экономикалық қоғамдастығына мүше мемлекеттердің кеден органдары арасында тауарларды кедендік бақылаумен өткізу кезінде кеден органының шотына ақша қаражатын енгізу жолымен немесе банктердің кепілдіктерін пайдалану жолымен кедендік төлемдердің төленуін қамтамасыз ету туралы келісім бекітілсін.
2. Осы қаулы қол қойылған күнінен бастап қолданысқа енгізіледі.
Қазақстан Республикасының
Премьер-Министрі
Қазақстан Республикасы
Үкіметінің
2007 жылғы 19 желтоқсандағы
N 1240 қаулысымен
бекітілген
Еуразия экономикалық қоғамдастығына мүше мемлекеттердің кеден органдары арасында тауарларды кедендік бақылаумен өткізу кезінде кеден органының шотына ақша қаражатын енгізу жолымен немесе банктердің кепілдіктерін пайдалану жолымен кедендік төлемдердің төленуін қамтамасыз ету туралы келісім
Бұдан әрі Тараптар деп аталатын, Еуразия экономикалық қоғамдастығына (бұдан әрі - ЕурАзЭҚ) мүше мемлекеттердің Үкіметтері,
2000 жылғы 10 қазандағы Еуразиялық экономикалық қоғамдастық құру туралы шартты негізге ала отырып,
Еуразия экономикалық қоғамдастығына (ЕурАзЭҚ) мүше мемлекеттердің арасында да, ЕурАзЭҚ-қа мүше мемлекеттер мен үшінші мемлекеттер арасында да тауарлар тасымалдарын дамытуға ұмтыла отырып,
кедендік төлемдердің төленуін қамтамасыз ету, бірыңғай экономикалық кеңістік қалыптастырудың негізгі шарттарының бірі ретінде кеден рәсімдерін біріздендіру мен оңайлату қажеттігін негізге ала отырып,
төмендегілер туралы келісті:
Осы Келісімнің мақсаттары үшін мынадай ұғымдар пайдаланылады:
"кепілгер" - ЕурАзЭҚ-қа мүше мемлекеттің аумағында тіркелген, өз мемлекеті заңнамасының талаптарын ескере отырып банк кепілдігін берген банк;
"банк кепілдігі" - принципал ЕурАзЭҚ-қа мүше мемлекеттердің бірінің кеден органы алдындағы кедендік төлемдерді төлеу жөніндегі міндеттемесін орындамаған немесе тиісті дәрежеде орындамаған жағдайда кепілгердің ақшалай соманы төлеуге жазбаша міндеттемесі;
"бенефициар" - банк кепілдігін қабылдаған ЕурАзЭҚ-қа мүше мемлекеттің кеден органы;
"принципал" - оның тапсырмасы бойынша және есебінен кепілгер ЕурАзЭҚ-қа мүше мемлекеттердің кеден органдары арасында тауарларды кедендік бақылаумен өткізу кезінде принципал міндеттемелерді бұзған жағдайда кедендік төлемдердің сомаларын төлеу жөнінде банк кепілдігін беретін, белгіленген тәртіппен ЕурАзЭҚ-қа мүше мемлекеттің аумағында тіркелген заңды немесе жеке тұлға;
"межелі мемлекет" - тауарлар мен көлік құралдарын кедендік бақылаумен өткізу аяқталатын ЕурАзЭҚ-қа мүше мемлекет;
"жөнелтетін мемлекет" - тауарлар мен көлік құралдарын кедендік бақылаумен өткізу басталатын ЕурАзЭҚ-қа мүше мемлекет;
"кедендік төлемдер" - ЕурАзЭҚ-қа мүше мемлекеттердің әрқайсысының салық және кеден заңнамасына сәйкес кеден органдары белгіленген тәртіппен өндіріп алатын кедендік баж, салықтар, кедендік алымдар.
Осы Келісім ЕурАзЭҚ-қа мүше мемлекеттердің кеден органдары арасында тауарларды кедендік бақылаумен өткізу кезінде жөнелтетін мемлекеттің немесе межелі мемлекеттің кеден органының шотына ақша қаражатын енгізу, сондай-ақ банк кепілдіктерін пайдалану жолымен кедендік төлемдердің төленуін қамтамасыз етудің құқықтық негіздерін белгілейді.
Тауарларды ЕурАзЭҚ-қа мүше мемлекеттердің аумақтары бойынша өткізу кезінде кедендік төлемдердің төленуін қамтамасыз етудің осы Келісімде көзделген түрлері де, сондай-ақ аумағы арқылы тауар өткізілетін ЕурАзЭҚ-қа мүше мемлекеттің заңнамасына сәйкес кедендік төлемдердің төленуін қамтамасыз етудің өзге түрлері де қолданылуы мүмкін.
Осы Келісім тауарларды:
ЕурАзЭҚ-қа мүше мемлекеттер арасында, оның ішінде үшінші мемлекеттердің аумағы арқылы өткізу кезінде де;
егер, тауарларды өткізу ең болмағанда ЕурАзЭҚ-қа мүше мемлекеттердің бірінің аумағы бойынша транзитпен жүзеге асырылса, ЕурАзЭҚ-қа мүше мемлекет пен үшінші мемлекеттер арасында өткізу кезінде қолданылады.
1. Тараптар оларды кедендік бақылаумен өткізу кезінде оларға қатысты кедендік төлемдердің төленуін қамтамасыз етуді қоса алғанда, өз мемлекетінің заңнамасында белгіленген заңнаманың сақталуын қамтамасыз ету жөніндегі шаралар қолданылатын тауарлардың жекелеген санаттарын белгілеуі мүмкін.
2. Тараптар бір-бірін тауарлардың тізбесі және кедендік төлемдердің төленуін қамтамасыз етуді қоса алғанда, оларды кедендік бақылаумен өткізу кезінде өз мемлекеті заңнамасының сақталуын қамтамасыз ету жөніндегі оларға қатысты қолданылатын шаралар туралы хабардар етеді.
3. Тараптар өз мемлекетінің кедендік төлемдерінің төленуін қамтамасыз ету шарттарын айқындайтын заңнамасын біріздендіруді жүргізеді.
Тауарларды ЕурАзЭҚ-қа мүше мемлекеттердің аумақтары бойынша кедендік бақылаумен өткізу, сондай-ақ ақша қаражатын кеден органдарының шотына енгізу және кеден органдарының банк кепілдігін қабылдауы осы мемлекеттердің әрқайсысының заңнамасында және осы Келісімде көзделген тәртіппен жүргізіледі.
ЕурАзЭҚ-қа мүше мемлекеттердің кеден органдары өз мемлекетінің заңнамасына сәйкес кедендік төлемдердің төленуін қамтамасыз етпестен өз мемлекетінің аумағы бойынша тауарларды кедендік бақылаумен өткізуге ЕурАзЭҚ-қа мүше мемлекеттердің бірінің кеден органының кедендік төлемдердің төленуін қамтамасыз ету ретінде осы кеден органының шотына ақша қаражатын енгізгені туралы немесе кеден органы белгілеген орынға және мерзімде тауарларды жеткізбеген кезде кедендік төлемдердің төленуін қамтамасыз ететін банк кепілдігін қабылдағаны туралы растауы болған кезде рұқсат етеді.
Кеден органының шотына ақша қаражатын енгізу немесе банк кепілдігін пайдалану түрінде кедендік төлемдердің төленуін қамтамасыз ету берілген ЕурАзЭҚ-қа мүше мемлекеттердің кеден органдары кедендік төлемдер бойынша берешектерді өндіріп алуды олардың шотындағы ақша қаражаты есебінен не олар банк кепілдігі бойынша алатын қаражат есебінен қамтамасыз етеді және осы Келісімнің 8-бабына сәйкес аумағында тауарларды толық жеткізбеу анықталған ЕурАзЭҚ-қа мүше мемлекеттің кеден органының шотына аударады.
1. Осы Келісімге сәйкес ЕурАзЭҚ-қа мүше мемлекеттердің бірінің кеден органының шотына енгізілген ақша қаражатын олардың аумағы бойынша тауарларды кедендік бақылаумен өткізу жүзеге асырылатын ЕурАзЭҚ-қа мүше басқа мемлекеттердің кеден органдары кедендік төлемдердің төленуін қамтамасыз ету ретінде таниды.
Кеден органының шотына енгізілген ақша қаражатының сомасы, егер тиісті тауарлар еркін айналыс үшін шығарылған болса, оның аумағы бойынша тауарларды кедендік бақылаумен өткізу жүзеге асырылатын ЕурАзЭҚ-қа мүше мемлекетте төлеуге жататын кедендік төлемдердің сомасынан кем болмайды.
2. Кеден органының шотына ақша қаражаты АҚШ долларымен, евромен не аумағында қамтамасыз ету енгізілетін ЕурАзЭҚ-қа мүше мемлекеттің ұлттық валютасымен енгізілуі мүмкін.
3. Ақша қаражаты жөнелтетін мемлекеттің немесе межелі мемлекеттің кеден органының шотына енгізіледі.
Егер, тауарлар ЕурАзЭҚ-тың шегінен тысқары жерлерге әкетілген жағдайда, ақша қаражаты оның қызмет өңірінде заңды немесе жеке тұлға ЕурАзЭҚ-қа мүше мемлекеттің заңнамасында белгіленген тәртіппен тіркелген кеден органының шотына енгізіледі.
4. Тауарлар оның аумағы бойынша тауарларды өткізу жүзеге асырылатын ЕурАзЭҚ-қа мүше мемлекеттің кеден органы белгілеген орынға және мерзімде жеткізілмеген кезде осы баптың 3-тармағында көрсетілген кеден органдарының шотындағы ақша қаражаты аумағында тауарлардың жеткізілмеуі анықталған ЕурАзЭҚ-қа мүше мемлекеттің кеден органының шотына аударылуға тиіс.
1.
ЕурАзЭҚ-қа мүше мемлекеттердің кеден органдары өз мемлекетінің банктері берген банк кепілдіктерін қабылдайды.
2. Банк кепілдігі аумағында тауарлардың жеткізілмеуі анықталған ЕурАзЭҚ-қа мүше мемлекеттердің бірінің кеден органының алдындағы принципалдың міндеттемесі орындалмаған немесе тиісті дәрежеде орындалмаған жағдайда оның кедендік төлемдердің төленуін қамтамасыз етуі болып табылады.
3. Кепілгер бенефициарға ақша қаражатын бенефициардың оны төлеу туралы жазбаша талабын ұсынуы бойынша осы баптың 13-тармағында белгіленген мөлшерде төлеуге кепілдік береді.
4. Банк кепілдігін кепілгер қайтарып ала алмайды.
5. Бенефициардың банк кепілдігі жөніндегі кепілгерге талап қою құқығы басқа тұлғаға берілмейді.
6. Банк кепілдігі берілген күнінен бастап күшіне енеді.
7. Бенефициардың банк кепілдігі бойынша ақша қаражатын төлеу туралы талабы кепілгерге кепілдікте көрсетілген құжаттар қоса беріле отырып жазбаша нысанда берілуі тиіс. Бенефициар талапта немесе оған қосымшада принципалдың оны орындау үшін кепілдік берілген міндеттемені бұзуы неден тұратындығын көрсетуге тиіс.
8. Бенефициардың талабы кепілгерге ол берілген кепілдікте белгіленген мерзім аяқталғанға дейін ұсынылуға тиіс.
Бенефициар банк кепілдігінде белгіленген мерзімде ұсынған банк кепілдігі бенефициардың алдындағы өз міндеттемелерін кепілгер толық орындағанға дейін қолданыста болады.
9. Кепілгер бенефициардың талабын оған қоса берілген құжаттармен бірге оны алғаннан кейін он күннен аспайтын мерзімде, принципалды бенефициардың талабы туралы хабардар ете отырып қарауға тиіс.
10. Кепілгер бенефициарға егер, бұл талап не оған қоса берілген құжаттар кепілдіктің шарттарына сәйкес келмесе, оның талабын қанағаттандырудан бас тартады.
Кепілгер бенефициарды оның талабын қанағаттандырудан бас тартатындығы туралы хабардар етуге тиіс.
11. Банк кепілдігінде көзделген кепілгердің бенефициар алдындағы міндеттемесі кепілдік берілген соманы төлеумен шектеледі.
12. Кепілгердің кепілдік бойынша бенефициар алдындағы міндеттемесі мынадай:
кепілгер аударған кепілдіктің барлық сомасы бенефициардың шотына түскен;
бенефициар кепілдік бойынша өз құқықтарынан оны кепілгерге қайтару жолымен не кепілгерді оның міндеттемелерінен босату туралы бенефициардың жазбаша өтініш жасауы жолымен бас тартқан жағдайларда тоқтатылады.
13. Банк кепілдігінің сомасы, егер тиісті тауарлар еркін айналыс үшін шығарылған болса, аумағы бойынша тауарларды кедендік бақылаумен өткізу жүзеге асырылатын ЕурАзЭҚ-қа мүше мемлекетте төленуге жататын кедендік төлемдердің сомасынан кем болмайды.
14. Банк кепілдігінің сомасы АҚШ долларымен не евромен көрсетіледі. Кепілгердің ақша қаражатын төлеуі банк кепілдігінің валютасымен не, егер оның ұлттық заңнамасында өзгеше көзделмесе, банк кепілдігінің ЕурАзЭҚ-қа мүше мемлекетте төлем күнінде қолданылатын валюта бағамы ескеріле отырып, ЕурАзЭҚ-қа мүше мемлекеттің ұлттық валютасымен жүзеге асырылады.
15. ЕурАзЭҚ-қа мүше мемлекеттердің кеден органдары өз мемлекеті заңнамасының талаптарын ескере отырып және осы Келісімге сәйкес банк-кепілгер берген банк кепілдігін қабылдайды.
Банк кепілдігінің сомасы жеткіліксіз болған немесе оның қолданылу мерзімі аяқталған кезде банк кепілдігі қабылданбайды.
16. Тауарларды ЕурАзЭҚ-қа мүше мемлекеттің кеден органы белгілеген орынға және мерзімде жеткізбеген кезде бенефициар кепілгерге өзінің шотына ақша қаражатын төлеу және аудару туралы талап қояды. Кепілгер талапты оны алған күнінен бастап отыз күннен кешіктірмейтін мерзімде қанағаттандыруы тиіс.
Банк кепілдігі бойынша төленген ақша қаражаты аумағында тауарлардың жеткізілмеуі анықталған ЕурАзЭҚ-қа мүше мемлекеттің кеден органының шотына аударылады.
ЕурАзЭҚ-қа мүше мемлекеттердің кеден органдарының арасындағы ұсынылған кедендік төлемдердің төленуін қамтамасыз ету туралы, тауарлар тасымалын бұзу жағдайлары туралы, осы Келісімді орындау үшін қажетті өзге де ақпаратпен алмасу тәртібі, сондай-ақ ЕурАзЭҚ-қа мүше мемлекеттердің бірінің кеден органының шотына енгізілген не төленген немесе кепілдерден кеден органдарының бірі аумағында тауарлардың жеткізілмеуі анықталған ЕурАзЭҚ-ка мүше мемлекеттің кеден органының шотына өндіріп алған ақша қаражатын аударудың тәртібі және мерзімі, кепілгер міндеттемелерінің көлемі, кедендік төлемдердің төленуін қамтамасыз ету мөлшері мен дауларды шешу тәртібі Тараптардың жеке көпжақты келісімдерімен айқындалады.
Осы Келісім Тараптар мемлекеттері қатысушылары болып табылатын басқа халықаралық шарттар бойынша Тараптардың міндеттемелерін қозғамайды.
Осы Келісімді түсіндіру мен қолдануға қатысты кез келген даулар мен келіспеушіліктер Тараптар арасында келіссөздер және консультациялар жолымен шешіледі.
Осы Келісімге Тараптардың өзара келісуі бойынша жекелеген хаттамалармен ресімделетін және осы Келісімнің 12-бабына сәйкес күшіне енетін өзгерістер енгізілуі мүмкін.
Осы Келісім ЕурАзЭҚ-тың Интеграциялық комитеті болып табылатын депозитарий Тараптардың осы Келісімнің 8-бабында көзделген жеке көпжақты келісімдер жасасқаны туралы және осы Келісімге қол қойылған күнінен бастап күшіне енетін 8-бапты қоспағанда, осы Келісімнің күшіне енуі үшін қажетті мемлекетішілік рәсімдерді Тараптардың орындағаны туралы соңғы жазбаша хабарламаны алған күнінен бастап күшіне енеді.
Осы Келісім күшіне енгеннен кейін ЕурАзЭҚ-тың мүшелігіне қабылданған кез келген мемлекеттің оған қосылуы үшін ашық.
Осы Келісімге қосылу туралы құжаттар депозитарийге тапсырылады.
Осы Келісім қосылатын мемлекеттер үшін осы Келісімнің Тараптарымен осы Келісімнің 8-бабында көзделген жекелеген көпжақты келісімдерді жасасу туралы хабарламаны депозитарий алған күнінен бастап күшіне енеді.
Тараптардың кез келгені депозитарийге осы Келісімнен өзінің шығу ниеті туралы болжалды шығу күніне дейін кемінде үш ай бұрын жазбаша хабарламаны жібере отырып, өзінің осы Келісімге сәйкес қабылданған міндеттемелерін алдын ала реттей отырып, осы Келісімнен шыға алады.
2006 жылғы 19 мамырда Минск қаласында орыс тілінде бір түпнұсқа данада жасалды. Түпнұсқа дананы әрбір Тарапқа оның куәландырылған көшірмесін жіберетін депозитарий сақтайды.
Беларусь Республикасының
Үкіметі үшін
Қазақстан Республикасының
Үкіметі үшін
Қырғыз Республикасының
Үкіметі үшін
Ресей Федерациясының
Үкіметі үшін
Тәжікстан Республикасының
Үкіметі үшін
Өзбекстан Республикасының
Үкіметі үшін
