Ескерту. Күші жойылды - ҚР Үкіметінің 15.06.2017 № 370 қаулысымен (алғашқы ресми жарияланған күнінен кейін күнтізбелік он күн өткен соң қолданысқа енгізіледі).
Қазақстан Республикасының 2007 жылғы 9 қаңтардағы Экологиялық кодексінің 16-бабының 9) тармақшасына сәйкес Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған Белгіленген мөлшер резерві мен парниктік газдар шығарындыларына квоталар бөлудің ұлттық жоспарындағы квоталар көлемінің резервін қалыптастыру қағидалары бекітілсін.
2. Осы қаулы алғашқы ресми жарияланғанынан кейін күнтізбелік он күн өткен соң қолданысқа енгізіледі.
Қазақстан Республикасының | |
Премьер-Министрі | К. Мәсімов |
| Қазақстан Республикасы Үкіметінің 2012 жылғы 31 мамырдағы № 716 қаулысымен бекітілген |
Белгіленген мөлшер резерві мен парниктік газдар шығарындыларына
квоталар бөлудің ұлттық жоспарындағы квоталар көлемінің
резервін қалыптастыру қағидалары
1. Жалпы ережелер
1. Осы Белгіленген мөлшер резерві мен парниктік газдар шығарындыларына квоталар бөлудің ұлттық жоспарындағы квоталар көлемінің резервін қалыптастыру қағидалары (бұдан әрі - Қағидалар) Қазақстан Республикасы Экологиялық кодексінің 16-бабының 9) тармақшасына сәйкес әзірленген және белгіленген мөлшер резерві мен парниктік газдар шығарындыларына квоталар бөлудің ұлттық жоспарындағы квоталар көлемінің резервін қалыптастыру тәртібін айқындайды.
2. Осы Қағидаларда мынадай ұғымдар пайдаланылады:
1) белгіленген мөлшер - Қазақстан Республикасының халықаралық шарттары бойынша міндеттемелер шеңберінде айқындалған парниктiк газдар сiңiрулерiн ескере отырып, парниктiк газдар шығарындыларының жалпы көлемі;
2) белгіленген мөлшер бірлігі - Қазақстан Республикасының климаттың өзгеруі саласындағы халықаралық шарттарына сәйкес Қазақстан Республикасы үшін парниктiк газдар шығарындыларының көлемін айқындауға пайдаланылатын көміртегі бірлігі;
3) белгіленген мөлшер резерві - қоршаған ортаны қорғау саласындағы уәкілетті орган қалыптастыратын, экологиялық (жасыл) инвестициялар схемасын іске асыру мақсаты үшін қажетті белгіленген мөлшер бірліктерінің көлемі;
4) көмiртегi бiрлiктерi мемлекеттік тiзiлiмiнiң операторы - Қазақстан Республикасы көмiртегi бiрлiктерiнiң мемлекеттік тiзiлiмiн жүргiзудi жүзеге асыратын ұйым;
5) парниктік газдар шығарындыларына квоталардың жалпы көлемі - парниктік газдар шығарындыларына квоталар бөлудің ұлттық жоспарында белгілеген және оның қолданылу кезеңінде бөлу жоспарланып отырған парниктік газдар шығарындылары квоталарының жалпы көлемін анықтайтын шама;
6) парниктік газдар шығарындыларына квоталар бөлудің ұлттық жоспарындағы квоталар көлемінің резерві - тиісті кезеңге парниктік газдар шығарындыларына квоталар бөлудің ұлттық жоспарын бекіту кезінде қарастырылған қондырғылар мен табиғат пайдаланушыларға бөлінген осындай квоталарға қосымша ретінде парниктік газдар шығарындыларына квоталар бөлуге арналған парниктік газдар шығарындыларына квоталар көлемі.
3. Квота көлемі резервін қалыптастыру табиғат пайдаланушылардың парниктік газдар шығарындыларына квоталарға қажеттілігін жабу үшін жаңа және кеңейтілген қондырғылардың мынадай санаттары бойынша жүзеге асырылады:
1) парниктік газдар шығарындыларына квоталар бөлудің қолданыстағы кезеңінде пайдалануға берілетін, бірақ оны бекіткен сәтте Қазақстан Республикасының Үкіметі анықтайтын экономиканың басым секторларында есепке алынбаған қондырғылар;
2) парниктік газдар шығарындыларына квоталар бөлудің қолданыстағы кезеңінде қуатының артуы мен кеңейтілуі парниктік газдар шығарындылары көлемінің жыл сайынғы артуына әкеліп соқтыратын қондырғылар.
2. Белгіленген мөлшер резервін қалыптастыру тәртібі
4. Қоршаған ортаны қорғау саласындағы уәкілетті орган белгіленген мөлшер резервін қалыптастыру туралы шешім қабылдайды.
5. Қоршаған ортаны қорғау саласындағы уәкілетті органның белгіленген мөлшер резервін қалыптастыру туралы шешімінде оның көлемі (көміртегі бірліктерінің мөлшері), сондай-ақ белгіленген мөлшер резервінің көміртегі бірліктерін шығару туралы көміртегі бірліктерінің мемлекеттік тізілімі операторына қойылатын талаптар көрсетіледі.
6. Белгіленген мөлшер резерві парниктік газдар шығарындыларына квоталар бөлудің ұлттық жоспарының қолданыстағы кезеңіне қалыптастырылады.
7. Қоршаған ортаны қорғау саласындағы уәкілетті орган қалыптастырған белгіленген мөлшер резерві қоршаған ортаны қорғау саласындағы уәкілетті органның ведомстволық бағынысты ұйымының басқаруына беріледі.
3. Парниктік газдар шығарындыларына квоталар бөлудің ұлттық жоспарындағы квоталар көлемінің резервін қалыптастыру тәртібі
8. Қоршаған ортаны қорғау саласындағы уәкілетті орган квоталар көлемінің резервін парниктік газдар шығарындыларына квоталар бөлудің ұлттық жоспарының қолдану мерзімі басталғанға дейін төрт айдан кешіктірмей анықтайды.
9. Парниктік газдар шығарындыларына квоталар бөлудің ұлттық жоспарындағы квоталар көлемінің резервін есептеуді қоршаған ортаны қорғау саласындағы уәкілетті орган тиісті кезеңге арналған ішкі жалпы өнімнің болжанатын жыл сайынғы өсу қарқынының орташа көрсеткіші бойынша парниктік газдар шығарындыларына квоталардың жалпы көлемінде жаңа және кеңейтілген қондырғылардың үлесін айқындау негізінде жүргізді.
10. Қоршаған ортаны қорғау саласындағы уәкілетті орган парниктік газдар шығарындыларына квоталар бөлудің ұлттық жоспарының қолданылу кезеңінің барлық жылдары бойынша жалпы ішкі өнімнің жыл сайынғы өсу қарқынының көрсеткішін алуға Қазақстан Республикасының Ұлттық экономика министрлігіне сұраныс жібереді.
Ескерту. 10-тармақ жаңа редакцияда - ҚР Үкіметінің 15.04.2016 № 221 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) қаулысымен.11. Қоршаған ортаны қорғау саласындағы уәкілетті орган парниктік газдар шығарындыларына квоталар бөлудің ұлттық жоспарының жобасын дайындаған және кейіннен Қазақстан Республикасының Үкіметіне бекітуге ұсынған кезде квота көлемінің резерві парниктік газдар шығарындыларына квоталардың жалпы көлемінен бөлінеді және оны айқындау үшін қолданылған негізгі тәсілдер сипаттала отырып көрсетіледі.
12. Көміртегі бірліктерінің мемлекеттік тізілімінің операторы парниктік газдар шығарындыларына квоталар бөлудің ұлттық жоспары бекітілгеннен кейін күнтізбелік 30 күн өткен соң арнайы шотқа парниктік газдар шығарындыларына квоталар бөлудің ұлттық жоспарының квоталар көлемі резервінен квоталар бірліктерінің санын шығаруды жүзеге асырады.
13. Пайдаланудан толық шығарылған қондырғылар бойынша квоталарды жою есебінен парниктік газдар шығарындыларына квоталар бөлудің ұлттық жоспарындағы квоталар көлемінің резервін толықтыру Қазақстан Республикасының қолданыстағы заңнамасында көзделген парниктік газдар шығарындыларына квоталарды өзгерту және парниктік газдар шығарындыларына сертификатты қайта ресімдеу тәртібіне сәйкес табиғат пайдаланушы квоталарды жою рәсімінен өткеннен кейін қоршаған ортаны қорғау саласындағы уәкілетті органның шешімі бойынша жүзеге асырылады.
14. Көміртегі бірліктерінің мемлекеттік тізілімінің операторы осы Қағидалардың 13-тармағында көрсетілген квоталар бірліктерін қоршаған ортаны қорғау саласындағы уәкілетті органның тиісті шешімі қабылданған күнінен бастап күнтізбелік 30 күн ішінде көміртегі бірліктерінің мемлекеттік тізілімінде квоталар көлемі резервінің шотына, егер осы мерзім ішінде табиғат пайдаланушы шағым жасамаса аударады.
