"Қазақстан Республикасының Ұлттық қорынан бөлінген қаражаттың жұмсалуын бақылау жөніндегі комиссия туралы" Қазақстан Республикасының Президенті өкімінің жобасы туралы

Қазақстан Республикасы Үкіметінің 2014 жылғы 9 сәуірдегі № 335 Қаулысы

Қазақстан Республикасының Үкіметі ҚАУЛЫ ЕТЕДІ:
«Қазақстан Республикасының Ұлттық қорынан бөлінген қаражаттың жұмсалуын бақылау жөніндегі комиссия туралы» Қазақстан Республикасының Президенті өкімінің жобасы Қазақстан Республикасы Президентінің қарауына енгізілсін.

Қазақстан Республикасының
Премьер-Министрі К. Мәсімов

Қазақстан Республикасының Ұлттық қорынан бөлінген қаражаттың жұмсалуын бақылау жөніндегі комиссия туралы

1. Қазақстан Республикасының Ұлттық қорынан бөлінген қаражаттың жұмсалуын бақылауды жүзеге асыру мақсатында мынадай құрамда Комиссия құрылсын:

Келімбетов Қайрат Нематұлы	-	Қазақстан Республикасы Ұлттық Банкінің төрағасы, басшы
Сұлтанов Бақыт Тұрлыханұлы	-	Қазақстан Республикасы Премьер-Министрінің орынбасары – Қазақстан Республикасының Қаржы министрі
Орынбаев Ербол Тұрмаханұлы	-	Қазақстан Республикасы Президентінің көмекшісі
Әбіқаев Нұртай Әбіқайұлы	-	Қазақстан Республикасы Ұлттық қауіпсіздік комитетінің төрағасы
Дауылбаев Асхат Қайзоллаұлы	-	Қазақстан Республикасының Бас прокуроры
Түсіпбеков Рашид Төлеутайұлы	-	Қазақстан Республикасы Экономикалық қылмысқа және сыбайлас жемқорлыққа қарсы күрес агенттігінің (қаржы полициясының) төрағасы
Жаңбыршин Қозы-Көрпеш Есімұлы	-	Республикалық бюджеттің атқарылуын бақылау жөніндегі есеп комитетінің төрағасы
Досаев Ерболат Асқарбекұлы	-	Қазақстан Республикасының Экономика және бюджеттік жоспарлау министрі

2. Комиссия тұрақты негізде Қазақстан Республикасының Ұлттық қорынан бөлінген қаражаттың мақсатты, заңды және тиімді пайдаланылуын бақылауды жүзеге асырсын, сондай-ақ Қазақстан Республикасы Ұлттық қорының қаражаты есебінен қаржыландырылатын инфрақұрылымдық және индустриялық жобалардың іске асырылуына мониторинг және қаржылық бөлігіне аудит жүргізсін.
3. Комиссияға:
1) мемлекеттік органдардан, мемлекет қатысатын ұйымдардан және лауазымды адамдардан қажеттi ақпаратты, құжаттар мен өзге де материалдарды, оның ішінде тиісті лауазымды адамдардың ауызша және жазбаша түсініктемелерін талап ету;
2) Қазақстан Республикасы Ұлттық қорының қаражаты есебінен қаржыландырылатын инфрақұрылымдық және индустриялық жобалардың іске асырылуына мониторинг және қаржылық бөлігіне аудит жүргізу үшін сыртқы сарапшыларды (аудиторларды) тарту;
3) тиісті мемлекеттік органдардың және мемлекет қатысатын ұйымдардың лауазымды адамдарының тәртіптік және өзге де жауапкершілігі туралы мәселені шешу үшін материалдарды жіберу;
4) заңнамада белгiленген тәртiппен қарау үшін ақпаратты құқық қорғау органдарына және ұлттық қауіпсіздік органдарына жіберу құқығы берілсін.
4. Комиссияның басшысы Қазақстан Республикасының Президентіне Қазақстан Республикасының Ұлттық қорынан бөлінген қаражаттың жұмсалуының жай-күйі туралы тоқсан сайын есеп берсін.
5. Қазақстан Республикасының Ұлттық Банкі Комиссияның жұмыс органы болып белгiленсiн.
6. Осы өкімнің орындалуын бақылау Қазақстан Республикасы Президентінің Әкімшілігіне жүктелсiн.

Қазақстан Республикасының
Президенті Н.Назарбаев