«2014 – 2016 жылдарға арналған республикалық бюджет туралы» 2013 жылғы 3 желтоқсандағы Қазақстан Республикасының Заңына, «Бюджеттің атқарылуы және оған кассалық қызмет көрсету ережесін бекіту туралы» Қазақстан Республикасы Үкіметінің 2009 жылғы 26 ақпандағы № 220 қаулысына сәйкес Қазақстан Республикасының Үкіметі ҚАУЛЫ ЕТЕДІ:
1. Қазақстан Республикасы Инвестициялар және даму министрлігіне 2014 жылға арналған республикалық бюджетте көзделген Қазақстан Республикасы Үкіметінің шұғыл шығындарға арналған резервінен жалпы құны 6488273300 (алты миллиард төрт жүз сексен сегіз миллион екі жүз жетпіс үш мың үш жүз) теңге болатын «Орал қаласындағы әуежайдың жасанды ұшу-қону жолағын, рульдеу жолын және перронды реконструкциялау, 1-кезек» жобасы бойынша ұшу-қону жолағын реконструкциялауға 3816870570 (үш миллиард сегіз жүз он алты миллион сегіз жүз жетпіс мың бес жүз жетпіс) теңге сомасында ақшалай қаражат бөлінсін.
Ескерту. 1-тармақ жаңа редакцияда - ҚР Үкіметінің 2014.12.10 № 1294 қаулысымен.
2. Қазақстан Республикасы Қаржы министрлігі заңнамада белгіленген тәртіппен бөлінген қаражаттың пайдаланылуын бақылауды қамтамасыз етсін.
3. Осы қаулы қол қойылған күнінен бастап қолданысқа енгізіледі.
Қазақстан Республикасының
Премьер-Министрі К. Мәсімов
