Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған Зияткерлік меншік объектілеріне құқықтарды қорғау жөніндегі іс-қимылды үйлестіру туралы шарттың жобасы мақұлдансын.
2. Қазақстан Республикасы Премьер-Министрінің бірінші орынбасары Бақытжан Әбдірұлы Сағынтаевқа Зияткерлік меншік объектілеріне құқықтарды қорғау жөніндегі іс-қимылды үйлестіру туралы шартқа қағидаттық сипаты жоқ өзгерістер мен толықтырулар енгізуге рұқсат бере отырып, Қазақстан Республикасының Үкіметі атынан қол қоюға өкілеттік берілсін.
3. Осы қаулы қол қойылған күнінен бастап қолданысқа енгізіледі.
Қазақстан Республикасының
Премьер-Министрі К.Мәсімов
Қазақстан Республикасы
Үкіметінің
2014 жылғы 29 желтоқсандағы
№ 1388 қаулысымен
мақұлданған
Жоба
Зияткерлік меншік объектілеріне құқықтарды қорғау жөніндегі
іс-қимылды үйлестіру туралы
ШАРТ
Бұдан әрі мүше мемлекеттер деп аталатын Еуразиялық экономикалық одаққа мүше мемлекеттердің атынан олардың үкіметтері
Зияткерлік меншік объектілеріне құқықтарды қорғау және сақтау туралы хаттаманы іске асыру мақсатында (2014 жылғы 29 мамырдағы Еуразиялық экономикалық одақ туралы шартқа № 26 қосымша),
Еуразиялық экономикалық одақ шеңберінде мүше мемлекеттердің зияткерлік меншік объектілеріне құқықтарды қорғау саласындағы ынтымақтастығын дамытуға ниет білдіре отырып,
төмендегілер туралы уағдаласты:
1-бап
Осы Шарттың мақсаттары үшін мынаны білдіретін ұғымдар пайдаланылады:
«іс-қимылды үйлестіру» – мүше мемлекеттердің зияткерлік меншік объектілеріне құқықтарды қорғау саласындағы өзара мүдделерін қамтамасыз ету мақсатында уәкілетті органдардың өздерінің арасында және Еуразиялық экономикалық комиссиямен өзара іс-қимылы;
«зияткерлік меншік объектілеріне құқықтарды бұзу» – зияткерлік меншік объектілерін қамтитын тауарларды жасау, тарату немесе өзгеше пайдалану, сондай-ақ осы мақсаттар үшін әкелу, тасымалдау немесе сақтау, егер мұндай әрекеттер құқық иеленушінің мүше мемлекеттер заңнамасына сәйкес қорғалатын құқықтарын бұзуға әкеп соғатын болса, зияткерлік меншік объектілерін рұқсатсыз пайдалану, оның ішінде Интернеттің ақпараттық-телекоммуникациялық желісінде пайдалану;
«бірлескен іс-шаралар» – екі немесе одан да көп мүше мемлекеттердің уәкілетті органдары зияткерлік меншік объектілеріне құқықтардың бұзылуының алдын алу, анықтау, жолын кесу және тергеп-тексеру бойынша жүргізетін келісілген іс-шаралар;
«уәкілетті орган» – мүше мемлекеттің нормативтік құқықтық актілеріне сәйкес зияткерлік меншік объектілеріне құқықтарды қорғау саласында өкілеттіктер берілген атқарушы билік органы, сондай-ақ өзге де орган.
2-бап
1. Мүше мемлекеттер зияткерлік меншік объектілеріне құқықтарды қорғаудың бірыңғай жүйесін қалыптастыру қажеттілігін негізге ала отырып, ынтымақтастықты жүзеге асырады және уәкілетті органдардың өзара тиімді іс-қимылын қамтамасыз етеді.
2. Зияткерлік меншік объектілеріне құқықтарды қорғау, оның ішінде Еуразиялық экономикалық одақтың (бұдан әрі – Одақ) кедендік аумағында зияткерлік меншік объектілеріне құқықтарды бұзудың тиімді түрде жолын кесуді қамтамасыз ету мақсатында:
а) зияткерлік меншік объектілеріне құқықтарды бұзудың алдын алу, анықтау, жолын кесу және тергеп-тексеру, сондай-ақ осы саладағы уәкілетті органдардың қызметін жетілдіру жөніндегі іс-қимылды үйлестіру;
б) мүше мемлекеттердің Одақтың бірыңғай кедендік аумағында зияткерлік меншік объектілеріне құқықтарды қорғау саласындағы заңнамасын үйлестіру және жетілдіру;
в) өзге де іс-қимылдар (қажет болған кезде) жүзеге асырылады.
3-бап
Іс-қимылды үйлестіру мақсатында уәкілетті органдардың өкілдері Еуразиялық экономикалық комиссияның алқасы жанындағы тиісті консультациялық органның отырыстарында осы Шартты іске асыру шеңберінде туындайтын мәселелерді мынадай:
а) іс-қимылды үйлестіру шеңберінде міндеттер қою және іс-шараларды өткізу кезінде уәкілетті органдардың теңдігі;
б) мүше мемлекеттің заңнамасына сәйкес әрбір уәкілетті органның өзіне берілген өкілеттіктер шегіндегі дербестігі;
в) мүше мемлекеттердің адамның және азаматтың құқықтары мен бостандықтарын қорғау, мемлекеттік және заңмен қорғалатын өзге де құпия туралы заңнамасының талаптарына қайшы келмейтіндей шамадағы жариялылық қағидаттарын негізге ала отырып қарайды.
4-бап
Осы Шарт шеңберінде Еуразиялық экономикалық комиссия уәкілетті органдармен бірлесіп:
а) мүше мемлекеттердің аумағында зияткерлік меншік объектілеріне құқықтарды бұзудың жолын кесу жөніндегі қызмет тәжірибесін талдауды және қорытуды, сондай-ақ осы саладағы құқық бұзудың алдын алу, анықтау, жолын кесу және тергеп-тексеру саласындағы үрдістерді болжауды жүзеге асырады;
б) мүше мемлекеттердің зияткерлік меншік объектілеріне құқықтарды қорғау саласындағы құқық қолдану практикасына, оның ішінде осы саладағы халықаралық шарттардың орындалуына талдау жасайды;
в) зияткерлік меншік объектілеріне құқықтарды қорғау тиімділігін арттыру, оның ішінде Одақтың кедендік аумағында зияткерлік меншік объектілеріне құқықтарды бұзудың алдын алу бойынша ұсыныстарды әзірлейді;
г) зияткерлік меншік объектілеріне құқықтарды қорғау саласында уәкілетті органдар мен Еуразиялық экономикалық комиссия қызметкерлерінің біліктілігін арттыруға бағытталған бірлескен семинарлар, конференциялар, өзге де іс-шаралар ұйымдастыруға және өткізуге қатысады.
5-бап
Іс-қимылды үйлестіруді қамтамасыз ету мақсатында уәкілетті органдар:
а) Еуразиялық экономикалық комиссияның алқасы жанындағы консультациялық органның қызметі шеңберінде өзара іс-қимыл жасау;
б) зияткерлік меншік объектілеріне құқықтарды қорғау мәселелері, оның ішінде Одақтың кедендік аумағында зияткерлік меншік объектілеріне құқықтарды бұзудың алдын алу бойынша ақпарат алмасу;
в) уәкілетті органдар өкілдерінің кеңестерін өткізу;
г) іс-қимылдарды үйлестіру бойынша келісілген жоспарларды әзірлеу және іске асыру;
д) бірлескен іс-шараларды, оның ішінде осы баптың «г» тармағында көзделген келісілген жоспарларды іске асыру шеңберінде өткізу;
е) тәжірибе алмасу мақсатында тағылымдамалар, семинарлар, конференциялар, сондай-ақ өзге де іс-шаралар өткізу;
ж) бюллетеньдер (жинақтар) және басқа да ақпараттық басылымдар шығару нысандарында;
з) мүше мемлекеттердің өзара уағдаласуы бойынша өзге де нысандарда ынтымақтастықты жүзеге асырады.
6-бап
1. Уәкілетті органдар өз бастамалары бойынша немесе өзге де уәкілетті органдардың сұрау салуы бойынша мынадай:
а) зияткерлік меншік объектілеріне құқықтардың бұзылуына байланысты нақты фактілер мен оқиғалар;
б) зияткерлік меншік объектілеріне құқықтардың бұзылуына қатысы бар тұлғалар;
в) бір мүше мемлекеттің аумағынан екінші мүше мемлекеттің аумағына өткізу салдарынан зияткерлік меншік объектілеріне құқықтар бұзылатын тауарларды өткізу, сондай-ақ тауарлар және осы тауарларды өткізу кезінде пайдаланылатын көлік құралдары;
г) егер үшінші мемлекеттер аумағынан Одақтың кедендік аумағына әкелінетін (әкелінген) тауарларды әкелу зияткерлік меншік объектілеріне құқықтардың бұзылуына әкеп соқса, осындай тауарлар туралы ақпарат;
д) өзге де ақпарат (қажет болған кезде) алмасады.
2. Осы баптың 1-тармағында көрсетілген ақпаратты уәкілетті органның үшінші тұлғаларға беруі осындай ақпаратты ұсынған уәкілетті органның жазбаша келісімімен ғана жүзеге асырылуы мүмкін.
Осындай ақпаратты алған уәкілетті орган оны ұсынған уәкілетті органның осындай ақпаратқа қолданылатын қорғау деңгейіне барабар қорғау деңгейін қамтамасыз етеді.
3. Ақпаратты алған уәкілетті орган және оның қызметкерлері осы баптың 2-тармағында көзделген талаптарды бұзғаны үшін осы уәкілетті органның мемлекетінің заңнамасында көзделген жауаптылықта болады.
7-бап
1. Бірлескен іс-шараларды жүзеге асыру не оларды өткізуге жәрдем көрсету үшін уәкілетті органдар бір-біріне тиісті сұрау салумен жүгінуге құқылы.
2. Уәкілетті органдардың қылмыстардың және зияткерлік меншік объектілеріне құқықтарды бұзудың жолын кесуде жәрдем көрсету, сондай-ақ ақпаратты ұсыну және онымен жұмыс істеу туралы сұрау салуларын орындау бөлігіндегі өзара іс-қимылы қатысушылары мүше мемлекеттер болып табылатын халықаралық шарттар негізінде және мүше мемлекеттердің заңнамасына сәйкес жүзеге асырылады.
8-бап
Мүше мемлекеттер осы Шартты іске асыруға байланысты шығыстарды дербес көтереді. Бұл ретте осы Шарттың 5-бабында көзделген іс-шараларды өткізу кезінде көлік шығыстарын, тұруға арналған шығыстарды жіберуші мүше мемлекет көтереді.
9-бап
1. Осы Шартты іске асыруды уәкілетті органдар жүзеге асырады, олар тиісті мүше мемлекеттің заңнамасын және Одақтың құқықтарын сақтай отырып, өз құзыреті шегінде өзара іс-қимыл жасайды.
2. Осы Шартты іске асыру мақсатында Еуразиялық экономикалық комиссия уәкілетті органдарға Одақ шеңберінде зияткерлік меншік объектілеріне құқықтарды қорғау саласында олардың өзара іс-қимыл жасауына жәрдем көрсетеді.
3. Мүше мемлекеттер уәкілетті органдарды айқындайды және осы Шарт күшіне енген күннен бастап 3 ай ішінде олар туралы депозитарийді хабардар етеді, ол осындай уәкілетті органдар туралы басқа мүше мемлекеттерді хабардар етеді.
Мүше мемлекеттер уәкілетті органдардың өзгергені туралы бір ай мерзімде депозитарийді хабардар етеді.
10-бап
1. Осы Шарт шеңберінде уәкілетті органдардың Еуразиялық экономикалық комиссиямен ақпараттық өзара іс-қимыл жасауы, сондай-ақ сұрау салуларды орындауы уәкілетті органдар мен Еуразиялық экономикалық комиссиясының өзара іс-қимылы регламентінде көзделген тәртіппен жүзеге асырылады.
2. Осы баптың 1-тармағында көрсетілген Регламентті Еуразиялық экономикалық комиссия осы Шарт күшіне енген күннен бастап 3 ай ішінде бекітеді.
11-бап
1. Осы Шартқа өзгерістер енгізілуі мүмкін, олар жекелеген хаттамалармен ресімделеді.
2. Осы Шартты түсіндіруге және (немесе) қолдануға байланысты мүше мемлекеттер арасындағы даулар 2014 жылғы 29 мамырдағы Еуразиялық экономикалық одақ туралы шартта белгіленген тәртіппен шешіледі.
12-бап
1. Осы Шарт Одақ шеңберінде жасалған халықаралық шарт болып табылады және Одақтың құқығына кіреді.
2. Осы Шарт мүше мемлекеттердің осы Шарттың күшіне енуі үшін қажетті мемлекетішілік рәсімдерді орындағаны туралы соңғы жазбаша хабарламаны депозитарий дипломатиялық арналар арқылы алған күнінен бастап күшіне енеді.
20___ жылғы «____» _____________ _________________ қаласында бір төлнұсқа данада орыс тілінде жасалды.
Осы Шарттың төлнұсқа данасы Еуразиялық экономикалық комиссияда сақталады, ол осы Шарттың депозитарийі бола отырып, әрбір мүше мемлекетке оның куәландырылған көшірмесін жібереді.
Беларусь Қазақстан Ресей
Республикасының Республикасының Федерациясының
Үкіметі үшін Үкіметі үшін Үкіметі үшін
