"Мемлекеттік сатып алу туралы" Қазақстан Республикасы Заңының жобасы туралы

Қазақстан Республикасы Үкіметінің 2014 жылғы 31 желтоқсандағы № 1412 қаулысы

Қазақстан Республикасының Үкіметі ҚАУЛЫ ЕТЕДІ:
«Мемлекеттік сатып алу туралы» Қазақстан Республикасы Заңының жобасы Қазақстан Республикасының Парламенті Мәжілісінің қарауына енгізілсін.

Қазақстан Республикасының
Премьер-Министрі К. Мәсімов

ҚАЗАҚСТАН РЕСПУБЛИКАСЫНЫҢ ЗАҢЫ Мемлекеттiк сатып алу туралы

Осы Заң мемлекеттiк сатып алуды жүзеге асыру процесінде туындайтын қоғамдық қатынастарды реттейдi.

1-тарау. Жалпы ережелер

1-бап. Осы Заңның қолданылу саласы

Осы Заң, мыналарды:
1) жеке тұлғалардан еңбек шарттары бойынша сатып алынатын көрсетілетін қызметтерді;
2) кәсіпкерлік қызмет субъектілері болып табылмайтын жеке тұлғалардан өтелетін қызмет көрсету шарттары бойынша сатып алынатын көрсетілетін қызметтерді;
3) іссапар шығыстарын жүзеге асыруға байланысты көрсетiлетiн қызметтерді;
4) мемлекеттік тапсырысты және Қазақстан Республикасының бюджет заңнамасына сәйкес оны орындау шеңберінде сатып алынатын тауарларды, жұмыстарды көрсетілетін қызметтерді;
5) жарналарды (салымдарды), оның ішінде заңды тұлғалардың жарғылық капиталына енгізуді;
6) ұлттық басқарушы холдингтер, ұлттық холдингтер, ұлттық басқарушы компаниялар, ұлттық компаниялар және олармен үлестес заңды тұлғалар, Қазақстан Республикасының Ұлттық Банкі және оларға қатысты өзі құрылтайшы (уәкілетті орган), акционер не сенімгер басқарушы болып табылатын заңды тұлғалар сатып алатын тауарларды, жұмыстарды, көрсетiлетiн қызметтерді;
7) білім беру саласындағы мемлекеттік мекемелер сатып алатын орта білім беру ұйымдарында оқитындардың тамақтануын ұйымдастыру бойынша көрсетілетін қызметтерді, сондай-ақ мемлекеттік кәсіпорын ұйымдық-құқықтық нысанындағы мектепке дейінгі білім беру ұйымдарында тәрбиеленетін және оқитын балалардың тамақтануын қамтамасыз етумен байланысты тауарларды сатып алу;
8) тегін медициналық көмектің кепілдендірілген көлемін көрсету шеңберінде Қазақстан Республикасының Үкіметі айқындайтын тәртіппен сатып алынатын дәрілік заттарды, профилактикалық (иммунобиологиялық, диагностикалық, дезинфекциялаушы) препараттарды, медициналық мақсаттағы бұйымдар мен медициналық техниканы, фармацевтикалық көрсетілетін қызметтерді;
9) Қазақстан Республикасының заңнамасына сәйкес гранттық, бағдарламалық-нысаналы қаржыландыру қаражатынан жүзеге асырылатын ғылыми зерттеулерді жүргізу үшін сатып алынатын тауарларды, жұмыстарды, көрсетілетін қызметтерді;
10) отандық тауар өндірушілерден және жұмыстарды, көрсетілетін қызметтерді отандық берушілерден және (немесе) Қазақстан Республикасының Үкіметі айқындаған уәкілетті ұйымнан сатып алынатын мемлекеттік қорғаныс тапсырысының құрамына кіретін әскери және қосарлас мақсаттағы (қолданыстағы) тауарларды, жұмыстарды және көрсетілетін қызметтерді қоспағанда, тапсырыс берушінің жұмыс істеуін, сондай-ақ мемлекеттік функцияларды не жарғылық қызметін орындауын қамтамасыз етуге байланысты қатынастарға қолданылады.

2-бап. Осы Заңда пайдаланылатын негiзгi ұғымдар

Осы Заңда мынадай негізгі ұғымдар пайдаланылады:
1) аукцион адымы – аукцион нысанасының бағасы төмендетілетін ақшалай аралық;
2) конкурстық (аукциондық) комиссия – осы Заңда көзделген конкурс (аукцион) тәсілімен мемлекеттік сатып алуды өткізу рәсімін орындау үшін мемлекеттік сатып алуды ұйымдастырушы, мемлекеттік сатып алуды бірыңғай ұйымдастырушы құратын алқалы орган. Конкурстық (аукциондық) комиссия тақ саннан, бірақ кемінде үш адамнан құралуы тиіс;
3) конкурстық (аукциондық) құжаттама – конкурсқа (аукционға) қатысуға өтінімді дайындау үшін әлеуетті өнім берушіге берілетін құжаттама, онда конкурсқа (аукционға) қатысуға өтінімге қойылатын талаптар, конкурс (аукцион) тәсілімен мемлекеттік сатып алуды өткізудің шарттары мен тәртібі қамтылады;
4) әлеуетті өнім беруші – кәсiпкерлiк қызметтi жүзеге асыратын жеке тұлға, мемлекеттiк сатып алу туралы шарт жасасуға үмiткер заңды тұлға (егер Қазақстан Республикасының заңдарында олар үшiн өзгеше белгiленбесе, мемлекеттiк мекемелердi қоспағанда), заңды тұлғалардың уақытша бiрлестiгi (консорциум). Кәсiпкерлiк қызмет субъектiсi болып табылмайтын жеке тұлға осы Заңның 36-бабы 1-тармағының 2) тармақшасында көзделген жағдайда әлеуеттi өнiм берушi болуы мүмкiн;
5) әлеуетті өнім берушінiң үлестес тұлғасы – аталған әлеуеттi өнiм берушiнiң шешiмдерiн айқындауға және (немесе) ол қабылдайтын шешiмдерге, оның iшiнде жазбаша нысанда жасалған мәмiленiң күшiне орай ықпал етуге құқығы бар кез келген жеке немесе заңды тұлға, сондай-ақ өзiне қатысты аталған әлеуеттi өнiм берушiнiң осындай құқығы болатын кез келген жеке немесе заңды тұлға;
6) бiртектi тауарлар, жұмыстар, көрсетілетін қызметтер – бiрдей болмаса да, белгiлi бiр функцияларды орындауына және өзара алмастырушы болуына мүмкiндiк беретiн ұқсас сипаттамалары бар және ұқсас құрамбөлiктерден тұратын тауарлар, жұмыстар, көрсетiлетiн қызметтер;
7) дауыс беретiн акцияларының (жарғылық капиталға қатысу үлестерінің) елу және одан астам пайызы мемлекетке тиесiлi мемлекеттік кәсіпорындардың, заңды тұлғалардың үлестес тұлғалары – дауыс беретiн акцияларының (жарғылық капиталға қатысу үлестерінің) елу және одан астам пайызы мемлекетке тиесiлi заңды тұлғаларға дауыс беретiн акцияларының (жарғылық капиталға қатысу үлестерінің) елу және одан астам пайызы тікелей не жанама түрде тиесілі болатын мемлекеттік кәсіпорындар, заңды тұлғалар. Жанама тиесілілік әрбір келесі үлестес тұлғаға өзге заңды тұлғаның дауыс беретін акцияларының (жарғылық капиталға қатысу үлестерінің) елу және одан астам пайызының тиесілі болатынын білдіреді;
8) демпингтiк баға – конкурсқа қатысушының жұмыстарға, көрсетiлетiн қызметтерге ұсынған бағасы, ол Қазақстан Республикасының заңнамасына сәйкес сараптамадан өткен жобалау-сметалық құжаттамада, техникалық-экономикалық негіздемеде көрсетiлген бағалармен салыстырғанда төмен баға болып табылады. Техникалық-экономикалық негіздемені және жобалау-сметалық құжаттаманы әзірлеу жөніндегі жұмыстарға баға, егер баға Қазақстан Республикасының заңнамасына сәйкес есептелген бағамен салыстырғанда төмен болып табылған жағдайда демпингтік деп танылады;
9) жұмыстар – заттық нәтижесi бар қызмет, сондай-ақ Қазақстан Республикасының заңдарына сәйкес жұмыстарға жатқызылған өзге қызмет;
10) жұмыстарды, көрсетілетін қызметтердi отандық берушілер – кәсіпкерлік қызметті жүзеге асыратын жеке тұлғалар және (немесе) онымен жасалған мемлекеттік сатып алу туралы шартта тапсырыс берушінің контрагенті ретінде әрекет ететін, жұмыстарды орындау, қызметтер көрсету бойынша Қазақстан Республикасының жергiлiктi еңбек ресурстарының кемiнде тоқсан бес пайызын пайдаланатын, Қазақстан Республикасының резиденттерi болып табылатын заңды тұлғалар;
11) көрсетілетін қызметтер – тапсырыс берушінің қажеттерiн қанағаттандыруға бағытталған заттық нәтижесi жоқ қызмет;
12) Қазақстан Республикасының резиденттерi – шет мемлекетте тұрақты тұру құқығына сол мемлекеттiң заңнамасына сәйкес берiлген құжаты бар азаматтарды қоспағанда, Қазақстан Республикасының азаматтары, оның iшiнде шетелде уақытша жүрген немесе оның шегiнен тыс жерлерде мемлекеттiк қызметте жүрген азаматтары;
Қазақстан Республикасында тұрақты тұру құқығына құжаты бар шетелдiктер және азаматтығы жоқ тұлғалар;
Қазақстан Республикасының заңнамасына сәйкес құрылған, оның аумағында орналасқан заңды тұлғалар, сондай-ақ олардың Қазақстан Республикасында және оның шегiнен тыс жерлерде орналасқан филиалдары мен өкiлдiктерi;
Қазақстан Республикасының өз шегiнен тыс жерлердегi дипломатиялық, сауда және өзге де ресми өкiлдiктерi;
13) мемлекеттік сатып алу - осы Заңда және Қазақстан Республикасының азаматтық заңнамасында белгіленген тәртіппен тауарларды, жұмыстарды, көрсетілетін қызметтерді тапсырыс берушілердің ақылы негізде сатып алуы;
14) мемлекеттiк сатып алу веб-порталы – мемлекеттiк сатып алудың электрондық қызмет көрсетулеріне қол жеткiзудiң бірыңғай нүктесiн ұсынатын мемлекеттiк ақпараттық жүйе;
15) мемлекеттік сатып алуды бірыңғай ұйымдастырушы – Қазақстан Республикасының Үкіметі немесе облыстың, республикалық маңызы бар қаланың және астананың әкімі айқындаған мемлекеттік сатып алуды ұйымдастыру және өткізу рәсімдерін орындауды жүзеге асыратын заңды тұлға;
16) мемлекеттік сатып алуды ұйымдастыру және өткізу рәсімі – әлеуетті өнім берушімен мемлекеттік сатып алу туралы шарт жасасу мақсатында мемлекеттік сатып алуды ұйымдастырушы, тиісті комиссия осы Заңға сәйкес жүзеге асыратын өзара байланысты дәйекті іс-шаралар кешені;
17) мемлекеттiк сатып алу саласындағы уәкiлеттi орган (бұдан әрi – уәкiлеттi орган) – мемлекеттiк сатып алу саласында басшылықты, сондай-ақ осы Заң талаптарының сақталуын бақылауды жүзеге асыратын мемлекеттiк орган;
18) мемлекеттiк сатып алу туралы шарт – осы Заңда көзделген жағдайларды қоспағанда, тапсырыс беруші мен өнім беруші арасында электрондық нысанда веб-портал арқылы жасалған, электрондық-цифрлық қолтаңбалармен куәландырылған азаматтық-құқықтық шарт;
19) отандық тауар өндiрушiлер – Қазақстан Республикасының резиденттерi болып табылатын және:
Еуразиялық экономикалық одақтың және (немесе) Қазақстан Республикасының заңнамасына сәйкес толығымен Қазақстан Республикасында өндiрiлген тауарларды;
Еуразиялық экономикалық одақтың және (немесе) Қазақстан Республикасының заңнамасына сәйкес жеткiлiктi қайта өңдеу өлшемшарттарына сәйкес Қазақстан Республикасында жеткiлiктi қайта өңдеуге ұшыраған тауарларды өндіретін жеке және (немесе) заңды тұлғалар;
20) өнім беруші – кәсiпкерлiк қызметтi жүзеге асыратын жеке тұлға, тапсырыс берушiмен мемлекеттiк сатып алу туралы жасасқан шартта оның контрагенті ретiнде әрекет ететiн заңды тұлға (егер Қазақстан Республикасының заңдарында өзгеше белгiленбесе, мемлекеттiк мекемелердi қоспағанда), заңды тұлғалардың уақытша бiрлестiгi (консорциум). Кәсiпкерлiк қызмет субъектiсi болып табылмайтын жеке тұлға осы Заңның 34-бабы 1-тармағының 2) тармақшасында көзделген жағдайда өнiм берушi болуы мүмкiн;
21) сараптау комиссиясы – сатып алынатын тауарлардың, жұмыстардың, көрсетілетін қызметтердің техникалық тапсырмасын және (немесе) техникалық ерекшелігін әзірлеуге қатысу және (немесе) әлеуетті өнім берушілер ұсыныстарының сатып алынатын тауарлардың, жұмыстардың, көрсетілетін қызметтердің техникалық ерекшелігіне сәйкестігіне қатысты сараптамалық қорытынды дайындау үшін сарапшыларды тарта отырып мемлекеттік сатып алуды ұйымдастырушы не тапсырыс беруші құратын алқалы орган;
22) сарапшы – сатып алынатын тауарлардың, жұмыстардың, көрсетілетін қызметтердің техникалық тапсырмасын және (немесе) техникалық ерекшелігін әзірлеуге қатысу және (немесе) әлеуетті өнім берушілер ұсыныстарының сатып алынатын тауарлардың, жұмыстардың, көрсетілетін қызметтердің техникалық ерекшелігіне сәйкестігіне қатысты сараптамалық қорытынды дайындау үшін мемлекеттік сатып алуды ұйымдастырушы не тапсырыс беруші тартатын, өткізілетін мемлекеттік сатып алу саласында тиісті құжаттармен (дипломдармен, сертификаттармен, куәліктермен және басқа да құжаттармен) расталатын арнайы және (немесе) техникалық білімі, тәжірибесі мен біліктілігі бар жеке тұлға;
23) тапсырыс берушілер – ұлттық басқарушы холдингтерді, ұлттық холдингтерді, ұлттық басқарушы компанияларды, ұлттық компанияларды және олармен үлестес заңды тұлғаларды және Қазақстан Республикасының Ұлттық Банкі оларға қатысты құрылтайшы (уәкілетті орган), акционер не сенімді басқарушы болып табылатын заңды тұлғаларды қоспағанда, мемлекеттік органдар, мемлекеттiк мекемелер, сондай-ақ дауыс беретін акцияларының (жарғылық капиталға қатысу үлестерінің) елу және одан да көп пайызы мемлекетке тиесiлi мемлекеттiк кәсiпорындар, заңды тұлғалар және олармен үлестес заңды тұлғалар;
24) тауарлар – нәрселер (заттар), оның iшiнде жартылай фабрикаттар немесе қатты, сұйық немесе газ тәрiздес күйдегi шикiзат, электр және жылу энергиясы, шығармашылық зияткерлiк қызметтiң объектiленген нәтижелерi, сондай-ақ Қазақстан Республикасының заңдарына сәйкес сатып алу-сату мәмiлелерiн жасасуға болатын заттық құқықтар;
25) тауарларға, жұмыстарға, көрсетілетін қызметтерге бағалардың дерекқоры – мемлекеттік сатып алу веб-порталының бір бөлігі болып табылатын, мемлекеттік сатып алу қорытындылары бойынша тауарларға, жұмыстарға, көрсетілетін қызметтерге қалыптасқан ең төменгі, орташа және ең жоғарғы бағалар туралы мәліметтерді қамтитын ақпараттық кіші жүйе;
26) тауарлардың, жұмыстардың, көрсетілетін қызметтердің анықтамалығы (бұдан әрі – анықтамалық) – өзінің бірегей коды бар, мемлекеттік сатып алудың мәні болып табылатын тауарлардың, жұмыстардың, көрсетілетін қызметтердің жүйеленген тізбесі;
27) ұлттық режим – егер мұндай режимді ұсыну туралы талап Қазақстан Республикасы ратификациялаған халықаралық шарттарда белгіленсе, шетелде шығарылатын тауарлардың, жұмыстардың, көрсетілетін қызметтердің және осындай тауарларды, жұмыстарды, көрсетілетін қызметтерді ұсынатын әлеуетті өнім берушілердің отанымызда шығарылатын тауарлармен, жұмыстармен, көрсетілетін қызметтермен және осындай тауарларды, жұмыстарды, көрсетілетін қызметтерді ұсынатын әлеуетті өнім берушілермен тең жағдайларда мемлекеттік сатып алуға қатысуға рұқсат беруді көздейтін режим;
28) шартты баға – конкурсқа қатысушының конкурстық баға ұсынысына конкурстық құжаттамада көзделген критерийлердің салыстырмалы мәнiн қолдануды ескере отырып есептелген және конкурстың жеңiмпазын айқындау мақсатында конкурстық баға ұсыныстарын бағалау және салыстыру кезiнде ғана пайдаланылатын баға;
29) мемлекеттiк сатып алу саласындағы бірыңғай оператор – уәкілетті орган айқындаған, акцияларының (жарғылық капиталға қатысу үлестерінің) жалғыз меншiк иесi мемлекет болып табылатын, мемлекеттiк сатып алу саласында бірыңғай техникалық саясатты iске асыруды жүзеге асыратын заңды тұлға;
30) конкурстық баға ұсынысы - конкурс тәсілімен мемлекеттік сатып алуға қатысу үшін конкурсқа қатысуға өтінімге қоса берілетін, әлеуетті өнім беруші ұсынған баға;
31) бастапқы баға - әлеуетті өнім беруші аукцион өткізілгенге дейін ұсынған, аукционға қатысуға өтінімге қоса берілетін баға;
32) мемлекеттік сатып алудың сәйкестендіру коды – мемлекеттік сатып алудың барлық кезеңдері туралы ақпарат қамтылған әрбір мемлекеттік сатып алуға (лотқа) берілетін сәйкестендіру нөмірі.

3-бап. Қазақстан Республикасының мемлекеттік сатып алу
туралы заңнамасы

1. Қазақстан Республикасының мемлекеттік сатып алу туралы заңнамасы Қазақстан Республикасының Конституциясына негізделеді және Қазақстан Республикасы Азаматтық кодексінің нормаларынан, осы Заңнан және Қазақстан Республикасының өзге де нормативтік құқықтық актілерінен тұрады.
2. Егер Қазақстан Республикасы ратификациялаған халықаралық шартта осы Заңда көзделгеннен өзгеше қағидалар белгіленсе, онда халықаралық шарттың қағидалары қолданылады.

4-бап. Мемлекеттік сатып алуды жүзеге асыру қағидаттары

Қазақстан Республикасының мемлекеттік сатып алу туралы заңнамасы:
1) мемлекеттік сатып алу үшін пайдаланылатын ақшаны оңтайлы және тиімді жұмсау;
2) осы Заңда көзделген жағдайлардан басқа, әлеуетті өнім берушілерге мемлекеттік сатып алуды өткізу рәсіміне қатысу үшін тең мүмкіндіктер беру;
3) әлеуетті өнім берушілер арасындағы адал бәсекелестік;
4) мемлекеттік сатып алу процесінің ашықтығы мен айқындығы;
5) отандық тауар өндірушілерге, жұмыстар мен көрсетілетін қызметтерді берушілерге қолдау көрсету;
6) мемлекеттік сатып алуға қатысушылардың жауапкершілігі;
7) сыбайлас жемқорлық көріністеріне жол бермеу;
8) инновациялық және жоғары технологиялық тауарларды, жұмыстарды, көрсетілетін қызметтерді сатып алуды ынталандыру қағидаттарына негізделеді.

5-бап. Мемлекеттік сатып алу процесі

1. Мемлекеттік сатып алу процесі өзіне:
1) мемлекеттік сатып алудың жылдық жоспарын әзірлеуді және бекітуді;
2) өнім берушіні таңдауды және онымен мемлекеттік сатып алу туралы шарт жасасуды;
3) мемлекеттік сатып алу туралы шарттың орындалуын қамтиды.
Осы тармақтың ережесі жүзеге асырылуы осы Заңның 33-бабында көзделген мемлекеттік сатып алуға қолданылмайды.
2. Тапсырыс беруші тиісті бюджеттің (даму жоспарының, жеке қаржыландыру жоспарының) негізінде мемлекеттік сатып алуды жүргізу қағидаларында айқындалған тәртіппен және нысанда мемлекеттік сатып алудың жылдық жоспарын әзірлейді және бекітеді.
Мемлекеттік сатып алудың жылдық жоспарын тапсырыс беруші тиісті бюджет (даму жоспары, жеке қаржыландыру жоспары) бекітілген (нақтыланған) күннен бастап он жұмыс күні ішінде бекітеді (нақтылайды) және онда мынадай мәліметтер:
1) мемлекеттік сатып алудың сәйкестендіру коды;
2) анықтамалыққа сәйкес, қосылған құн салығын есепке алмай мемлекеттік сатып алуды жүзеге асыру үшін бөлінген соманы қоса алғанда, тауарлардың, жұмыстардың, көрсетілетін қызметтердің номенклатурасы;
3) мемлекеттік сатып алуды жүзеге асыру тәсілі мен мерзімдері;
4) тауарларды берудің, жұмыстарды орындаудың, қызметтер көрсетудің жоспарланған мерзімдері мен орны;
5) осы Заңның 49-бабында көзделген жағдайларда, әрбір қаржы жылына бөлінген және көзделген сома шегінде кестеге және жылдар бойынша бөлуге сәйкес тауарларды берудің, жұмыстарды орындаудың, қызметтерді көрсетудің жоспарланған мерзімдері қамтылуға тиіс.
Қазақстан Республикасы Бюджет кодексінің 79-бабы 2-тармағы екінші бөлігінің 2-1) тармақшасында көзделген жағдайларда, осы тармақтың 1), 2), 3), 4) және 5) тармақшаларында көрсетілген мемлекеттік сатып алу туралы мәліметтерді тапсырыс беруші мемлекеттік сатып алудың жылдық жоспарында бекітеді. Тапсырыс беруші мемлекеттік сатып алудың жылдық жоспарын Қазақстан Республикасы Бюджет кодексінің 153-бабының 7-тармағы орындалған күннен бастап он жұмыс күні ішінде бекітеді.
Тапсырыс берушілер мемлекеттік сатып алуды жоспарлау және жүзеге асыру кезінде инновациялық және жоғары технологиялық тауарларды, жұмыстарды, көрсетілетін қызметтерді сатып алу басымдығына сүйенуі тиіс.
3. Тапсырыс беруші мемлекеттiк сатып алудың жылдық жоспарын бекiткен күннен бастап бес жұмыс күнi iшiнде уәкілетті органға мемлекеттік сатып алу веб-порталын пайдаланбай табыс етілетін, Қазақстан Республикасының мемлекеттік құпиялар туралы заңнамасына сәйкес мемлекеттік құпияларды құрайтын мәліметтерді және (немесе) Қазақстан Республикасының Үкіметі айқындаған таратылуы шектеулі қызметтік ақпаратты қамтитын мәліметтерді қоспағанда, жылдық жоспарды мемлекеттік сатып алу веб-порталында орналастыруға міндетті.
4. Тапсырыс берушілер тоқсанына бір реттен асырмай мемлекеттік сатып алуды жүргізу қағидаларында айқындалатын тәртіппен мемлекеттік сатып алудың жылдық жоспарына өзгерістер және (немесе) толықтырулар енгізуге құқылы.
Тапсырыс беруші мемлекеттік сатып алудың жылдық жоспарына өзгерістер және (немесе) толықтырулар енгізу туралы шешім қабылданған күннен бастап бес жұмыс күні ішінде уәкілетті органға мемлекеттік сатып алу веб-порталын пайдаланбай табыс етілетін Қазақстан Республикасының мемлекеттік құпиялар туралы заңнамасына сәйкес мемлекеттік құпияларды құрайтын мәліметтерді және (немесе) Қазақстан Республикасының Үкіметі айқындаған таратылуы шектеулі қызметтік ақпаратты қамтитын мәліметтерді қоспағанда, енгізілген өзгерістерді және (немесе) толықтыруларды мемлекеттік сатып алу веб-порталында орналастыруға міндетті.
5. Осы Заңның 33-бабына, 42-бабы 3-тармағының 5), 10) және 40) тармақшаларына сәйкес жүзеге асырылатын мемлекеттiк сатып алу туралы мәлiметтер мемлекеттiк сатып алудың жылдық жоспарына енгiзуге жатпайды.
6. Тапсырыс беруші мемлекеттік сатып алуды жүзеге асыру туралы шешімді мемлекеттік сатып алудың бекітілген не нақтыланған жылдық жоспары негізінде қабылдайды.
Тапсырыс берушілер мемлекеттік сатып алуды жүзеге асыру туралы шешімді тиісті бюджет бекітілгенге дейін екі кезеңдік рәсімдер пайдаланылатын конкурс тәсілімен мемлекеттік сатып алуды өткізетін жағдайда ғана қабылдауға құқылы.
7. Тауарларды, жұмыстарды, көрсетілетін қызметтердi осы Заңның 33-бабына, 42-бабы 3-тармағының 5), 10) және 40) тармақшаларына сәйкес сатып алуды қоспағанда, мемлекеттiк сатып алудың бекiтiлген (нақтыланған) жылдық жоспарында көзделмеген тауарларды, жұмыстарды, көрсетілетін қызметтердi сатып алуға жол берiлмейдi.
8. Осы Заңның 42-бабының 3-тармағында көзделген жағдайларды қоспағанда, тауарларды, жұмыстарды, көрсетілетін қызметтерді берушіні таңдау осы Заңдa айқындалған тәртіппен жүзеге асырылады.
9. Мемлекеттік сатып алуды өткізу кезінде бірыңғай оператор мемлекеттік сатып алу қорытындылары шыққанға дейін әлеуетті өнім берушілердің құпиялылығын қамтамасыз етеді.
10. Тапсырыс беруші мемлекеттік сатып алу туралы шарт жасасқанға дейін:
1) Қазақстан Республикасының заңнамасына сәйкес тиісті бюджетті нақтылау (түзету) кезінде мемлекеттік сатып алудың бекітілген (нақтыланған) жылдық жоспарында көзделген тауарларды, жұмыстарды, көрсетілетін қызметтерді сатып алуға арналған шығыстар қысқартылған;
2) Қазақстан Республикасының заңнамасына сәйкес мемлекеттік органның стратегиялық жоспарына, тапсырыс берушінің бюджетіне (даму жоспарының, жеке қаржыландыру жоспарының) мемлекеттік сатып алудың бекітілген (нақтыланған) жылдық жоспарында көзделген тауарларды, жұмыстарды, көрсетілетін қызметтерді сатып алу қажеттігін жоққа шығаратын өзгерістер мен толықтырулар енгізілген жағдайларда мемлекеттік сатып алуды жүзеге асырудан бас тартуға құқылы.
Осы тармақтың 1) және 2) тармақшаларында көзделген жағдайларда мемлекеттік сатып алудың жылдық жоспарына ағымдағы жылы осындай тауарларды, жұмыстарды, көрсетілетін қызметтерді сатып алуға бағытталған өзгерістер мен толықтырулар енгізуге жол берілмейді.
11. Тапсырыс беруші не мемлекеттік сатып алуды ұйымдастырушы осы баптың 10-тармағында көрсетілген шешім қабылдаған күннен бастап бес жұмыс күні ішінде:
1) өткізілетін мемлекеттік сатып алуға қатысатын тұлғаларды қабылданған шешім туралы хабардар етуге;
2) конкурсқа қатысуға енгізілген өтінімдерді қамтамасыз етуді қайтаруға міндетті.

6-бап. Мемлекеттік сатып алуға қатысуға байланысты шектеулер

1. Әлеуетті өнім беруші, егер:
1) осы әлеуетті өнім берушінің басшыларының және (немесе) осы әлеуетті өнім берушінің уәкілетті өкілінің жақын туыстары, жұбайы (зайыбы) немесе жекжаттары өнім берушіні таңдау туралы шешім қабылдау құқығына ие болса не өткізілетін мемлекеттік сатып алуда тапсырыс берушінің немесе ұйымдастырушының өкілі болып табылса;
2) әлеуетті өнім беруші және (немесе) оның қызметкері тапсырыс берушіге не мемлекеттік сатып алуды ұйымдастырушыға өткізілетін мемлекеттік сатып алуды дайындау жөнінде сараптамалық, консультациялық және (немесе) өзге де қызметтер көрсетсе, техникалық-экономикалық негіздемені әзірлеушінің жобалау (жобалау-сметалық) құжаттаманы әзірлеу жөніндегі мемлекеттік сатып алуға қатысуын қоспағанда, өткізілетін мемлекеттік сатып алудың мәні болып табылатын объектінің құрылысына арналған техникалық-экономикалық негіздемені және (немесе) жобалау (жобалау-сметалық) құжаттаманы әзірлеуге бас жобалаушы не қосалқы жобалаушы ретінде қатысса;
3) мемлекеттiк сатып алуға қатысуға үмiткер әлеуеттi өнiм берушi басшысының мемлекеттiк сатып алуға жосықсыз қатысушылардың тiзiлiмiне енгiзiлген заңды тұлғаларды басқаруға, құруға, олардың жарғылық капиталына қатысуға байланысты қатынастары бар болса;
4) мемлекеттiк сатып алуға қатысуға үмiткер әлеуеттi өнiм берушiнің басшысы кәсіпкерлік қызметті жүзеге асыратын, мемлекеттiк сатып алуға жосықсыз қатысушылардың тiзiлiмiне енгiзiлген жеке тұлға болса;
5) мемлекеттiк сатып алуға қатысуға үмiткер, кәсіпкерлік қызметті жүзеге асыратын жеке тұлға болып табылатын әлеуетті өнім беруші мемлекеттiк сатып алуға жосықсыз қатысушылардың тiзiлiмiне енгiзiлген әлеуеттi өнiм берушiнің басшысы болса;
6) әлеуетті өнім беруші мемлекеттік сатып алуға жосықсыз қатысушылардың тізілімінде тұрса;
7) баланстық құны тиісті негізгі құрал-жабдықтар құнының он пайызынан асатын әлеуетті өнім берушінің және (немесе) ол тартқан қосалқы мердігердің (бірлесіп орындаушының) мүлкіне тыйым салынса;
8) әлеуетті өнім берушінің және (немесе) ол тартқан қосалқы мердігердің (бірлесіп орындаушының) атқарушылық құжаттар бойынша орындалмаған міндеттемелері болса және атқарушылық құжаттардың орындалуын қамтамасыз ету саласындағы уәкілетті орган оларды тиісті борышкерлер тізіліміне енгізсе;
9) әлеуетті өнім берушінің және (немесе) ол тартқан қосалқы мердігердің (бірлесіп орындаушының) қаржы-шаруашылық қызметі Қазақстан Республикасының заңнамасына не Қазақстан Республикасының резиденті емес әлеуетті өнім беруші мемлекеттің заңнамасына сәйкес тоқтатыла тұрса;
10) әлеуетті өнім беруші және (немесе) ол тартатын қосалқы мердігер (бірлескен орындаушы) және (немесе) олардың басшысы, құрылтайшылары (акционерлері) терроризм мен экстремизмді қаржыландырумен байланысты ұйымдар мен тұлғалар тізбесіне Қазақстан Республикасының заңнамасында белгіленген тәртіппен енгізілсе, өткiзiлетiн мемлекеттiк сатып алуға қатысуға құқылы емес.
2. Әлеуетті өнім беруші мен әлеуетті өнім берушінің үлестес тұлғасының бір конкурсқа (лотқа) қатысуға құқығы жоқ.
3. Мемлекеттік сатып алу тапсырыс берушінің мүддесіне орай жүзеге асырылатын болса, оның осындай сатып алуға әлеуетті өнім беруші ретінде қатысуға құқығы жоқ.
4. Осы баптың талаптарының бұзылуына жол берген әлеуетті өнім беруші не өнім беруші осы Заңда белгіленген тәртіппен мемлекеттік сатып алуға жосықсыз қатысушылардың тізіліміне енгізілуге тиіс.
5. Осы баптың 1 және 2-тармақтарының талаптары бұзылғанын анықтаған адамдар осы фактілерді растаушы құжаттардың көшірмелерін хабарламаға қоса бере отырып, оны анықтаған күннен бастап бес жұмыс күнінен кешіктірмей тапсырыс берушіні және уәкілетті органды бұл туралы жазбаша хабардар етуге міндетті.

7-бап. Мемлекеттік сатып алуды ұйымдастырушыны айқындау
тәртібі

1. Тапсырыс беруші мен мемлекеттік сатып алуды ұйымдастырушы бір тұлға болатын жағдайларды қоспағанда, мемлекеттік сатып алуды ұйымдастыру және өткізу рәсімдерін орындау үшін тапсырыс беруші мемлекеттік сатып алуды ұйымдастырушыны, сондай-ақ тапсырыс берушінің алда болатын мемлекеттік сатып алуда мүддесін білдіретін оның лауазымды тұлғасын айқындайды.
2. Тапсырыс беруші өзі тікелей не мемлекеттік сатып алуды ұйымдастыру және өткізу рәсімін орындауға жауапты өз құрылымдық бөлімшесінің атынан мемлекеттік сатып алуды ұйымдастырушы бола алады.
Тапсырыс беруші мемлекеттік сатып алуды ұйымдастырушы етіп тапсырыс берушінің ведомстволық бағынысындағы мемлекеттік мекемесін айқындауға құқылы.
3. Тапсырыс берушіге ведомстволық бағынысты бірнеше мемлекеттік мекеме үшін тапсырыс беруші мемлекеттік сатып алуды ұйымдастырушы ретінде әрекет етуге құқылы;
4. Тапсырыс берушіге ведомстволық бағынысты бірнеше мемлекеттік мекеме үшін тапсырыс беруші олардың арасынан мемлекеттік сатып алуды ұйымдастырушыны айқындауға құқылы.
5. Бюджеттік бағдарламаның әкімшісі өзінің ведомстволық бағынысындағы мемлекеттік мекеме, оған қатысты өзі мемлекеттік басқару органы болып табылатын заңды тұлға не оған қатысты бюджеттік бағдарламаның әкімшісі мемлекеттік басқару органы болып табылатын заңды тұлғамен үлестес тұлға үшін мемлекеттік сатып алуды ұйымдастырушы ретінде әрекет етуге құқылы.
Мемлекеттік кәсіпорын өзімен үлестес тұлғалар үшін мемлекеттік сатып алуды ұйымдастырушы ретінде әрекет етуге құқылы.
Дауыс беретін акцияларының (жарғылық капиталға қатысу үлестерінің) елу және одан да көп пайызы мемлекетке тиесілі заңды тұлға өзімен үлестес тұлғалар үшін мемлекеттік сатып алуды ұйымдастырушы болуға құқылы.
6. Тапсырыс беруші мен мемлекеттік сатып алуды ұйымдастырушы бір тұлға болған жағдайларды қоспағанда, мемлекеттік сатып алуды ұйымдастырушы тапсырыс берушімен, әлеуетті өнім берушілермен, тиісті комиссиялармен және сарапшымен өзара қарым-қатынастарда өзінің атынан өкілдік ететін лауазымды адамды айқындауға міндетті. Мемлекеттік сатып алуды ұйымдастырушының өкілі мемлекеттік сатып алуды ұйымдастыру және өткізу рәсімдерін орындауға жауапты құрылымдық бөлімшенің қызметкерлері қатарынан айқындалуға тиіс.

8-бап. Мемлекеттік сатып алуды бірыңғай ұйымдастырушының
мемлекеттік сатып алуды жүзеге асыру тәртібі

1. Бірыңғай мемлекеттік сатып алуды өткізу мақсатында:
1) Қазақстан Республикасының Үкіметі тапсырыс берушілер үшін мемлекеттік сатып алуды бірыңғай ұйымдастырушыны айқындайды.
Мемлекеттік сатып алуды бірыңғай ұйымдастырушы тауарларды, жұмыстарды, көрсетілетін қызметтерді мемлекеттік сатып алуды ұйымдастыруды және өткізуді уәкілетті орган айқындайтын бюджеттік бағдарламалардың және (немесе) тауарлардың, жұмыстардың, көрсетілетін қызметтердің тізбесі бойынша орындайды.
2) облыстың, республикалық маңызы бар қаланың және астананың әкімі тапсырыс берушілер үшін мемлекеттік сатып алуды бірыңғай ұйымдастырушыны айқындайды.
Мемлекеттік сатып алуды бірыңғай ұйымдастырушы тауарларды, жұмыстарды, көрсетілетін қызметтерді мемлекеттік сатып алуды ұйымдастыруды және өткізуді тиісті облыстың, республикалық маңызы бар қаланың және астананың әкімдері айқындайтын бюджеттік бағдарламалар және (немесе) тауарлар, жұмыстар, көрсетілетін қызметтер бойынша орындайды.
2. Мемлекеттік сатып алуды бірыңғай ұйымдастырушы мемлекеттік сатып алуды мынадай дәйекті кезеңдерді:
1) тапсырыс берушінің мемлекеттік сатып алуды бірыңғай ұйымдастырушыға мемлекеттік сатып алуды өткізу қағидаларында белгіленген құжаттарды қамтитын мемлекеттік сатып алуды ұйымдастыруға және өткізуге тапсырманы ұсынуын;
2) мемлекеттік сатып алуды бірыңғай ұйымдастырушының тапсырыс беруші ұсынған, мемлекеттік сатып алуды өткізу қағидаларында белгіленген құжаттарды қамтитын тапсырма негізінде конкурстық немесе аукциондық құжаттаманы әзірлеуін және бекітуін;
3) мемлекеттік сатып алуды бірыңғай ұйымдастырушының конкурстық не аукциондық комиссияның құрамын айқындауын және бекітуін сақтай отырып өткізеді.
Мемлекеттік сатып алуды бірыңғай ұйымдастырушы айқындайтын және бекітетін конкурстық не аукциондық комиссияның құрамына тапсырыс берушінің өкілдері де кіреді, бұл ретте:
осы баптың 1-тармағының 1) тармақшасына сәйкес айқындалған мемлекеттік сатып алуды бірыңғай ұйымдастырушы мемлекеттік сатып алуды ұйымдастыраған және өткізген жағдайда, конкурстық не аукциондық комиссияның төрағасы болып тапсырыс берушінің бірінші басшысы айқындалуға тиіс;
орталық атқарушы органдар үшін мемлекеттік сатып алудың бірыңғай ұйымдастырушысы орталық атқарушы органдардың қызметін материалдық-техникалық қамтамасыз ету жөніндегі мемлекеттік сатып алуды ұйымдастырған және өткізген жағдайда, конкурстық (аукциондық) комиссияның төрағасы болып тапсырыс берушінің жауапты хатшысы айқындалуға тиіс;
осы баптың 1-тармағының 2) тармақшасына сәйкес айқындалған мемлекеттік сатып алуды бірыңғай ұйымдастырушы мемлекеттік сатып алуды ұйымдастырған және өткізген жағдайда, конкурстық не аукциондық комиссияның төрағасы болып тиісті облыс, республикалық маңызы бар қала және астана әкімі айқындалуға тиіс;
4) қажет болған жағдайда мемлекеттік сатып алуды бірыңғай ұйымдастырушының конкурстық немесе аукциондық құжаттамаға өзгерістер және (немесе) толықтырулар енгізуін;
5) мемлекеттік сатып алуды бірыңғай ұйымдастырушының мемлекеттік сатып алуды өткізу туралы хабарландыруды орналастыруын;
6) мемлекеттік сатып алуды бірыңғай ұйымдастырушының тапсырыс берушіге мәліметтері мемлекеттік сатып алу туралы шарт жобасына конкурстық немесе аукциондық құжаттаманы және (немесе) конкурстық немесе аукциондық құжаттаманың техникалық ерекшелігін алған тұлғаларды тіркеу журналына енгізілген, мемлекеттік сатып алу веб-порталында автоматты түрде тіркелген тұлғалар тарапынан ұсыныстар мен ескертулерді жіберуін;
7) конкурс немесе аукцион тәсілімен мемлекеттік сатып алудың жеңімпазын айқындауды;
8) тапсырыс берушінің жеңімпазбен мемлекеттік сатып алу туралы шартты осы Заңда және мемлекеттік сатып алуды өткізу қағидаларында белгіленген тәртіппен мемлекеттік сатып алудың қорытындылары туралы хаттама негізінде жасасуын сақтай отырып өткізеді.
3. Тапсырыс беруші мемлекеттік сатып алудың жылдық жоспары бекітілген не мемлекеттік сатып алудың жылдық жоспарына өзгерістер және (немесе) толықтырулар енгізілген күннен бастап он жұмыс күнінен кешіктірмей мемлекеттік сатып алуды бірыңғай ұйымдастырушыға жоспарланып отырған тауарларды, жұмыстарды, көрсетілетін қызметтерді мемлекеттік сатып алу туралы ақпаратты ұсынады.
4. Мемлекеттік сатып алуды бірыңғай ұйымдастырушының мемлекеттік сатып алуды ұйымдастыруы және өткізуі осы Заңда және мемлекеттік сатып алуды өткізу қағидаларында белгіленген тәртіппен жүзеге асырылады.

9-бап. Әлеуетті өнім берушіге қойылатын біліктілік
талаптары

1. Әлеуетті өнім берушілерге мынадай біліктілік талаптары қойылады:
1) құқық қабілеттілігінің (заңды тұлғалар үшін), азаматтық әрекетке қабілеттілігінің (жеке тұлғалар үшін) болуы;
2) төлем қабілеттілігінің болуы, салық берешегінің болмауы;
3) банкроттық не таратылу рәсіміне жатқызылмауы;
4) тиісті еңбек ресурстарының болуы.
Осы тармақтың 4) тармақшасының талаптары көрсетілетін қызметтерге қолданылады.
2. Әлеуетті өнім беруші өзінің осы бапта белгіленген біліктілік талаптарына сәйкестігін растау үшін мемлекеттік сатып алуды ұйымдастырушыға мемлекеттік сатып алуды өткізу қағидаларында көзделген тиісті құжаттарды ұсынады.
3. Қазақстан Республикасының резиденті емес әлеуетті өнім беруші өзінің осы бапта белгіленген біліктілік талаптарына сәйкестігін растау үшін Қазақстан Республикасының резиденттері ұсынатын нақ сондай құжаттарды не Қазақстан Республикасының резиденті емес әлеуетті өнім берушінің біліктілігі туралы осыған ұқсас мәліметтерді қамтитын құжаттарды ұсынады.
4. Айналысуы үшін рұқсат алу қажет болатын қызмет түрлерін жүзеге асыратын әлеуетті өнім берушінің құқық қабілеттілігі Қазақстан Республикасының ақпараттандыру туралы заңнамасына сәйкес мемлекеттік ақпараттық жүйе арқылы расталады.
Мемлекеттік ақпараттық жүйеде мәліметтер болмаған жағдайда әлеуетті өнім беруші Қазақстан Республикасының заңнамасына сәйкес берілген тиісті рұқсаттың нотариатта куәландырылған көшірмесін ұсынады.
5. Осы баптың 1-тармағында белгіленген біліктілік талаптары әлеуетті өнім беруші жүргізілетін мемлекеттік сатып алудың нысанасы болып табылатын жұмыстарды орындау бойынша қосалқы мердігер не қызметтер көрсету бойынша бірлесіп орындаушы ретінде тартуды көздейтін кәсіпкерлік қызметті жүзеге асыратын жеке тұлғаларға да және заңды тұлғаларға да қолданылады.
Жұмыстардың не көрсетілетін қызметтердің қосалқы мердігерлерін (бірлесіп орындаушыларын) тартуды көздейтін әлеуетті өнім беруші жұмыстарға не көрсетілетін қызметтерге тартылатын қосалқы мердігерлердің (бірлесіп орындаушылардың) осы баптың 1-тармағында белгіленген біліктілік талаптарына сәйкестігін растайтын құжаттарды мемлекеттік сатып алуды ұйымдастырушыға ұсынуға тиіс.
Қосалқы мердігерлерге (бірлесіп орындаушыларға) жұмыстарды орындау не қызметтерді көрсету үшін берілуі мүмкін жұмыстар мен көрсетілетін қызметтердің шекті көлемі «Қазақстан Республикасындағы сәулет, қала құрылысы және құрылыс қызметі туралы» Қазақстан Республикасының Заңына сәйкес белгіленеді.
Бұл ретте қосалқы мердігерлерге (бірлесіп орындаушыларға) өткізілетін мемлекеттік сатып алудың нысанасы болып табылатын жұмыстарды орындау не қызметтерді көрсету көлемдерін өзге қосалқы мердігерлерге (бірлесіп орындаушыларға) беруге тыйым салынады.
6. Осы баптың 1-тармағында белгіленген біліктілік талаптары осы Заңның 42-бабының 3-тармағында және 45, 46-баптарында көзделген мемлекеттік сатып алуды жүзеге асыру жағдайларына қолданылмайды.
Осы Заңның 40, 41-баптарында, 42-бабы 2-тармағының 2) тармақшасында көзделген мемлекеттік сатып алуды жүзеге асыру кезінде осы баптың 1-тармағының 1) тармақшасын қоспағанда, біліктілік талаптары қолданылмайды.
7. Осы Заңның 33 және 34-баптарында көзделген жағдайларды қоспағанда, осы баптың 1-тармағында көзделмеген біліктілік талаптарын белгілеуге жол берілмейді.

10-бап. Әлеуетті өнім берушіні біліктілік талаптарына
сәйкес келмейді деп танудың негіздері

1. Әлеуетті өнім беруші мынадай негіздердің бірі:
1) әлеуетті өнім берушінің және (немесе) ол тартатын жұмыстардың не көрсетілетін қызметтердің қосалқы мердігерінің (бірлесіп орындаушының) біліктілік талаптарына сәйкестігін растау үшін құжат (құжаттар) ұсынбауы;
2) әлеуетті өнім беруші біліктілік талаптарына өзінің сәйкестігін, сондай-ақ ол тартатын жұмыстардың не көрсетілетін қызметтердің қосалқы мердігерінің (бірлесіп орындаушының) сәйкес келмеуін растау үшін ұсынған құжаттарында қамтылған ақпараттың негізінде біліктілік талаптарына сәйкес келмеу фактісінің анықталуы;
3) біліктілік талаптары бойынша дәйексіз ақпарат беру фактісінің анықталуы бойынша біліктілік талаптарына сәйкес келмейді деп танылуға тиіс.
2. Әлеуетті өнім берушіні және (немесе) ол тартатын жұмыстардың не көрсетілетін қызметтердің қосалқы мердігерін (бірлесіп орындаушысын) осы баптың 1-тармағында көзделмеген негіздер бойынша біліктілік талаптарына сәйкес келмейді деп тануға жол берілмейді.

11-бап. Әлеуетті өнім берушінің мемлекеттік сатып алу
қорытындыларына әсер еткен дәйексіз ақпарат
беруінің салдары

1. Мемлекеттік сатып алу қорытындыларына әсер еткен дәйексіз ақпарат берген әлеуетті өнім берушілер осы Заңда белгіленген тәртіппен мемлекеттік сатып алуға жосықсыз қатысушылардың тізіліміне енгізіледі.
2. Әлеуетті өнім беруші ұсынатын ақпараттың дәйектілігін тапсырыс беруші, мемлекеттік сатып алуды ұйымдастырушы, мемлекеттік сатып алуды бірыңғай ұйымдастырушы, уәкілетті орган не мемлекеттік қаржылық бақылау органдары мемлекеттік сатып алуды жүзеге асырудың кез келген сатысында анықтауы мүмкін.
3. Әлеуетті өнім берушінің мемлекеттік сатып алудың қорытындыларына әсер еткен дәйексіз ақпаратты беру фактісін анықтаған тұлғалар осындай факті анықталған күннен бастап бес жұмыс күнінен кешіктірмей, хабарламаға осы фактілерді растайтын құжаттардың көшірмесін қоса бере отырып, тапсырыс берушіні және уәкілетті органды жазбаша түрде хабардар етуге міндетті.
4. Әлеуетті өнім берушінің дәйексіз ақпаратты беру фактісі анықталған не осындай фактіні белгілеу туралы жазбаша хабарлама алған күннен бастап тапсырыс берушілер күнтізбелік отыз күннен кешіктірмей әлеуетті өнім берушіні мемлекеттік сатып алуға жосықсыз қатысушы деп тану туралы сотқа талап қоюға міндетті.

12-бап. Мемлекеттік сатып алу саласында қалыптастырылатын
тізілімдер

1. Уәкілетті орган мынадай:
1) тапсырыс берушілердің;
2) мемлекеттік сатып алу туралы шарттардың;
3) мемлекеттік сатып алуға жосықсыз қатысушылардың;
4) білікті әлеуетті өнім берушілердің мемлекеттік сатып алу саласындағы республикалық тізілімдерін (бұдан әрі – тізілімдер) қалыптастыруды және жүргізуді жүзеге асырады.
2. Тапсырыс берушілердің тізілімі жұмыс істеуін, сондай-ақ мемлекеттік функцияларды, сондай-ақ жарғылық қызметті орындауын қамтамасыз ету үшін өздеріне қажетті тауарларды, жұмыстарды, көрсетілетін қызметтерді сатып алуды осы Заңға сәйкес жүзеге асыруға міндетті заңды тұлғалардың тізбесін білдіреді.
3. Мемлекеттік сатып алу туралы шарттардың тізілімі тапсырыс берушілер тиісті қаржы жылында жасасқан, мемлекеттік сатып алу туралы шарттың нысанасы, сандық және құндық көрсеткіштері туралы, тараптардың шарттық міндеттемелерді орындау нәтижелері туралы мәліметтерді қамтитын мемлекеттік сатып алу туралы шарттардың тізбесін білдіреді.
Құқықтық тәртіп пен ұлттық қауіпсіздік мұқтажын қамтамасыз ету үшін тауарларды, жұмыстарды, көрсетілетін қызметтерді мемлекеттік сатып алу туралы шарттар, егер мәліметтер Қазақстан Республикасының Үкіметі айқындаған мемлекеттік құпияларды, таратылуы шектеулі қызметтік ақпаратты құрайтын болса, мемлекеттік сатып алу туралы шарттардың тізіліміне енгізілмейді.
Осы Заңның 42-бабы 3-тармағының 3) және 10) тармақшаларында көзделген мемлекеттік сатып алудың нәтижелері бойынша жасалған шарттар туралы мәліметтер мемлекеттік сатып алу туралы шарттардың тізіліміне енгізуге жатпайды.
4. Мемлекеттік сатып алуға жосықсыз қатысушылардың тізілімі:
1) мемлекеттік сатып алудың қорытындыларына әсер еткен дәйексіз ақпаратты ұсынған өнім берушілердің;
2) осы Заңның 6-бабы талаптарының бұзылуына жол берген өнім берушілердің;
3) жеңімпаздар деп айқындалған, мемлекеттік сатып алу туралы шарт жасасудан жалтарған әлеуетті өнім берушілердің (екінші орын алған әлеуетті өнім берушілердің);
4) өздерімен жасалған мемлекеттік сатып алу туралы шарттар бойынша өз міндеттемелерін орындамауына не тиісінше орындамауына байланысты олармен мемлекеттік сатып алу туралы шарт бұзылған өнім берушілердің тізбесін білдіреді.
Осы тармақтың 1), 2), 4) тармақшаларында көрсетілген жағдайларда тапсырыс беруші, мемлекеттік сатып алуды ұйымдастырушы, мемлекеттік сатып алуды бірыңғай ұйымдастырушы әлеуетті өнім берушінің немесе өнім берушінің Қазақстан Республикасының мемлекеттік сатып алу туралы заңнамасын бұзу фактісі туралы өзіне белгілі болған күннен бастап күнтізбелік отыз күннен кешіктірмей, осындай әлеуетті өнім берушіні немесе өнім берушіні мемлекеттік сатып алушыға жосықсыз қатысушы деп тану туралы талаппен сотқа жүгінуге міндетті.
5. Осы баптың 4-тармағының 1), 2), 4) тармақшаларында көзделген мемлекеттік сатып алуға жосықсыз қатысушылардың тізілімі заңды күшіне енген сот шешімдерінің негізінде қалыптастырылады.
Осы баптың 4-тармағының 3) тармақшасында көзделген мемлекеттік сатып алуға жосықсыз қатысушылардың тізілімі уәкілетті орган шешімінің негізінде қалыптастырылады.
6. Осы баптың 4-тармағының 1), 2), 4) тармақшаларында көзделген негіздер бойынша мемлекеттік сатып алуға жосықсыз қатысушылардың тізіліміне енгізілген әлеуетті өнім берушілер немесе өнім берушілер соттың оларды мемлекеттік сатып алуға жосықсыз қатысушылар деп тану туралы шешімі заңды күшіне енген күннен бастап жиырма төрт ай ішінде мемлекеттік сатып алуға қатысуға жіберілмейді.
Осы баптың 4-тармағының 3) тармақшасында көзделген негіз бойынша мемлекеттік сатып алуға жосықсыз қатысушылар тізіліміне енгізілген әлеуетті өнім берушілер уәкілетті орган оларды мемлекеттік сатып алуға жосықсыз қатысушылар деп тану туралы шешім қабылдаған күннен бастап жиырма төрт ай ішінде мемлекеттік сатып алуға қатысуға жіберілмейді.
Мемлекеттік сатып алуға жосықсыз қатысушылар тізілімінде қамтылған мәліметтер осы тармақтың бірінші және екінші бөліктерінде белгіленген мерзім аяқталған күннен бастап бір жұмыс күнінен кешіктірілмей көрсетілген тізілімнен шығарып тасталады.
7. Әлеуетті өнім берушіні немесе өнім берушіні мемлекеттік сатып алуға жосықсыз қатысушылардың тізіліміне енгізу туралы шешімге олар сот тәртібімен шағым жасауы мүмкін.
8. Қазақстан Республикасының Үкіметі айқындаған мемлекеттік құпияларды құрайтын мәліметтерді, таратылуы шектеулі қызметтік ақпаратты қоспағанда, тізілімдерде қамтылған мәліметтер мемлекеттік сатып алу веб-порталында орналастырылады және олар төлем алынбастан танысу үшін мүдделі тұлғаларға қолжетімді болуға тиіс.
9. Білікті әлеуетті өнім берушілердің тізілімі мемлекеттік сатып алуды өткізу қағидаларында көзделген біліктілік талаптарына сәйкес келетін әлеуетті өнім берушілердің тізбесін білдіреді.
10. Жосықсыз өнім берушілер тізіліміне әлеуетті өнім берушілер және Заңның 42-бабы 3-тармағының 1), 2), 3), 34), 46) тармақшаларында көзделген жағдайларда айқындалған өнім берушілер енгізілмейді.

13-бап. Мемлекеттік сатып алуды жүзеге асыру тәсілдері

1. Мемлекеттік сатып алу мынадай тәсілдердің бірі арқылы жүзеге асырылады:
1) конкурс (ашық конкурс, алдын ала біліктілік іріктеуі арқылы конкурс, екі кезеңдік рәсімдер пайдаланылатын конкурс, жабық конкурс, қатысуы шектеулі конкурс);
2) аукциондарда;
3) баға ұсыныстарын сұрату;
4) электрондық дүкен арқылы;
5) бір көзден алу;
6) тауар биржалары арқылы.
2. Тапсырыс беруші мемлекеттік сатып алуды жүзеге асыру тәсілін осы Заңға сәйкес айқындайды.
3. Мемлекеттік сатып алу осы Заңда көзделген жағдайларды қоспағанда, электрондық түрде жүзеге асырылады.
4. Өзінің филиалының (өкілдігінің) қызметін қамтамасыз етуге қажетті тауарлардың, жұмыстардың, көрсетілетін қызметтердің жылдық көлемін негізге ала отырып, тапсырыс берушінің атынан осындай мемлекеттік сатып алуды тапсырыс берушінің филиалы (өкілдігі) тікелей жүзеге асырған жағдайда, мемлекеттік сатып алуды жүзеге асырудың тәсілін тапсырыс беруші айқындауға құқылы.
5. Жаңарту тәртібімен шығарылатын мемлекеттік материалдық резервтің материалдық құндылықтар тізбесінде тапсырыс берушінің талаптарына сәйкес келетін тауарлар болған жағдайда тапсырыс беруші алдымен Қазақстан Республикасының Үкіметі айқындайтын тәртіппен осы Заңның 42-бабы 3-тармағының 9) тармақшасына сәйкес жаңарту тәртібімен шығарылатын мемлекеттік материалдық резервтің материалдық құндылықтарын сатып алуды жүзеге асыруға міндетті. Бұл ретте көлік шығыстары, оның ішінде тауарды тиеуге-түсіруге байланысты шығыстар тапсырыс берушіге жүктеледі.
Жаңарту тәртібімен шығарылатын мемлекеттік материалдық резервтің материалдық құндылықтарының тізбесін мемлекеттік материалдық резерв саласындағы уәкілетті орган қалыптастырады және ол мемлекеттік сатып алу веб-порталында орналастырылады.

14-бап. Мемлекеттік сатып алуды жүзеге асыру кезінде
ұлттық режимді қолдану

1. Мемлекеттік сатып алуды жүзеге асыру кезінде шет мемлекеттерден шығарылатын тауарларға, тиісінше шетелдік әлеуетті өнім берушілер орындайтын, жұмыстарға, көрсететін қызметтерге Қазақстан Республикасы ратификациялаған халықаралық шарттарда көзделген жағдайларда және шарттарда Қазақстанда шығарылған тауарлармен, тиісінше қазақстандық әлеуетті өнім берушілер орындайтын, жұмыстармен, көрсететін қызметтермен тең жағдайларда ұлттық режим қолданылады.
2. Елдің конституциялық құрылысының негіздерін қорғау, құқықтық тәртібін, ұлттық қауіпсіздігін және қорғаныс қабілетін қамтамасыз ету, Қазақстан Республикасының ішкі нарығын қорғау, ұлттық экономиканы дамыту, отандық тауар өндірушілерді, отандық жұмыс берушілерді, қызмет көрсетушілерді қолдау мақсатында Қазақстан Республикасының Үкіметі мемлекеттік сатып алуды жүзеге асырған кезде шет мемлекеттерден шығарылатын тауарларға, тиісінше шетелдік әлеуетті өнім берушілер орындайтын жұмыстарға, көрсететін қызметтерге берілетін рұқсатқа тыйым салуға және аталған тауарларға, жұмыстарға, көрсетілетін қызметтерге берілетін рұқсатқа шектеу белгілеуге құқылы.
Көрсетілген тауарлардың шығарылған елін айқындау Қазақстан Республикасының заңнамасына сәйкес жүзеге асырылады.
3. Қазақстан Республикасының Үкіметі осы баптың 2-тармағына сәйкес оларға қатысты тыйым салу, шектеу белгіленген тауарларды, жұмыстарды, көрсетілетін қызметтерді қоспағанда, Қазақстан Республикасының Үкіметі мемлекеттік сатып алуды жүзеге асырған кезде шет мемлекеттерден шығарылатын тауарларға, тиісінше шетелдік әлеуетті өнім берушілер орындайтын жұмыстарға, көрсететін қызметтерге рұқсат беру шарттарын белгілеуге құқылы.

2-тарау. Мемлекеттік сатып алуды жүзеге асыруды мемлекеттік реттеу

15-бап. Қазақстан Республикасы Үкіметінің мемлекеттік
сатып алу саласындағы құзыреті

Қазақстан Республикасының Үкіметі:
1) мемлекеттік сатып алу саласындағы мемлекеттік саясаттың негізгі бағыттарын әзірлейді;
2) Қазақстан Республикасының халықаралық шарттарына сәйкес сатып алынатын тауарлардың, жұмыстардың, көрсетілетін қызметтердің тізбесін бекітеді;
3) осы Заңда айқындалған отандық әлеуетті өнім берушілер санаттарын мемлекеттік қолдау шараларын айқындайды;
4) отандық тауар өндірушілер өндіретін және олардан сатып алынатын тауарлардың жекелеген түрлерінің тізбесін бекітеді;
5) тауарларды өндіретін және (немесе) жеткізетін, жұмыстарды орындайтын, қызметтерді көрсететін Қазақстан Республикасы мүгедектерінің қоғамдық бірлестіктерінен және Қазақстан Республикасы мүгедектерінің қоғамдық бірлестіктері құрған ұйымдардан сатып алынатын тауарлардың, жұмыстардың, көрсетілетін қызметтердің жекелеген түрлерінің тізбесін бекітеді;
6) сатып алу және тауар интервенцияларын, сондай-ақ азық-түлік тауарларын сақтау, қайта өңдеу, тасымалдау бойынша көрсетілетін қызметтерді сатып алуды жүзеге асыратын мамандандырылған ұйымдардың (агенттіктердің) тізбесін бекітеді;
7) түзету мекемелері мемлекеттік кәсіпорындарының тізбесін, осы Заңның 42-бабы 3-тармағының 37) тармақшасына сәйкес олардан тапсырыс берушілер сатып алатын, сол кәсіпорындар өндіретін тауарлардың, орындайтын жұмыстардың, көрсететін қызметтердің тізбесі мен көлемдерін бекітеді;
8) Қазақстан Республикасының сайлау туралы заңнамасында көзделген тауарлардың және көрсетілетін қызметтердің тізбесін бекітеді;
9) арнайы қорғау дәрежесі талап етілетін баспа өнімдерін берушілерді айқындайды, сондай-ақ осы Заңның 42-бабы 3-тармағының 21) тармақшасына сәйкес олардан сатып алынатын осындай өнімнің тізбесін бекітеді;
10) мемлекеттік сатып алуды жабық конкурс тәсілімен жүзеге асыру тәртібін айқындайды;
11) өзіне Конституциямен, осы Заңмен, Қазақстан Республикасының өзге де заңдарымен және Қазақстан Республикасы Президентінің актілерімен жүктелген өзге де функцияларды орындайды.

16-бап. Уәкілетті органның құзыреті

Уәкілетті орган:
1) мемлекеттік сатып алу қағидаларын әзірлейді және бекітеді;
2) мемлекеттік сатып алу саласындағы тізілімдерді қалыптастыруды және жүргізуді жүзеге асырады;
3) Қазақстан Республикасының индустриялық-инновациялық қызметті мемлекеттік қолдау туралы заңнамасында көзделген, тауарлардың, жұмыстардың, көрсетілетін қызметтердің және оларды берушілердің мемлекеттік сатып алу веб-порталымен интеграцияланған дерекқорына енгізілген отандық тауар өндірушілерден сатып алу туралы ақпаратты ескере отырып, есептілікті жинау, қорыту және талдау тәртібін айқындайды;
4) мемлекеттік сатып алуды қатысуы шектеулі конкурс тәсілімен жүзеге асыру тәртібін айқындайды;
5) мемлекеттік сатып алу веб-порталын пайдалану тәртібін айқындайды;
6) мемлекеттік сатып алу веб-порталы жұмысында техникалық іркілістер туындаған жағдайда мемлекеттік сатып алу веб-порталының жұмыс істеу тәртібін айқындайды;
7) Қазақстан Республикасының мемлекеттік сатып алу туралы заңнамасының сақталуын бақылауды жүзеге асырады;
қажет болған кезде мемлекеттік сатып алуға қатысушылар ұсынған есептік деректердің, материалдар мен ақпараттың шынайылығын тексереді;
8) мемлекеттік сатып алу туралы шартты жасасқанға дейін, мемлекеттік сатып алуды ұйымдастырушының, мемлекеттік сатып алуды бірыңғай ұйымдастырушының Қазақстан Республикасының мемлекеттік сатып алу туралы заңнамасын бұза отырып қабылданған шешімдерінің күшін жою туралы шешім қабылдайды;
9) осы Заңда көзделген жағдайда әлеуетті өнім берушілерді мемлекеттік сатып алуға жосықсыз қатысушылар деп тану туралы шешім қабылдайды;
10) жыл сайын 1 маусымнан кешіктірмей Қазақстан Республикасы Президентінің Әкімшілігіне және Қазақстан Республикасының Үкіметіне мемлекеттік сатып алу туралы жылдық есепті жібереді;
11) мемлекеттік сатып алу туралы жыл сайынғы есептің мазмұнына және тәртібіне қойылатын талаптарды айқындайды;
12) мемлекеттік кәсіпорындар, дауыс беретін акцияларының (жарғылық капиталға қатысу үлестерінің) елу және одан астам пайызы мемлекетке тиесілі заңды тұлғалар және олармен үлестес заңды тұлғалар оларды кейіннен өңдеу мақсатында сатып алатын тауарлардың тізбесін бекітеді;
13) алдын ала біліктілік іріктеуді қолдана отырып, конкурс тәсілімен жүзеге асырылатын мемлекеттік сатып алудың нысанасы болып табылатын тауарлардың, жұмыстардың, көрсетілетін қызметтердің тізбесін бекітеді;
14) стратегиялық маңызы бар өндірістер үшін шикізат ресурсы болып табылатын, Қазақстан Республикасының аумағында өндірілмейтін және шетелден сатып алынатын тауарлардың тізбесін бекітеді;
15) тауарларды мемлекеттік сатып алудың үлгілік шартын, жұмыстарды мемлекеттік сатып алудың үлгілік шартын және көрсетілетін қызметтерді мемлекеттік сатып алудың үлгілік шартын бекітеді;
16) мемлекеттік сатып алу саласындағы мамандарды қайта даярлау және олардың біліктілігін арттыру тәртібін бекітеді;
17) мемлекеттік сатып алу саласында бірыңғай операторды айқындайды;
18) аукцион тәсілімен жүзеге асырылатын мемлекеттік сатып алудың нысанасы болып табылатын тауарлардың, жұмыстардың, көрсетілетін қызметтердің тізбесін бекітеді;
19) конкурстың не аукционның қорытындылары шығарылғанға және мемлекеттік сатып алу туралы шарт күшіне енгенге дейінгі кезеңге тапсырыс берушілер сатып алатын күнделікті немесе апта сайынғы қажетті тауарлардың, жұмыстардың, көрсетілетін қызметтердің тізбесін бекітеді;
20) олар бойынша мемлекеттік сатып алуды ұйымдастыру мен өткізуді бірыңғай ұйымдастырушы жүзеге асыратын бюджеттік бағдарламалардың және (немесе) тауарлардың, жұмыстардың, көрсетілетін қызметтердің тізбесін бекітеді;
21) мемлекеттік сатып алуға қатысушылардан мемлекеттік сатып алуды жүргізу қағидаларында айқындалған тәртіппен қажетті ақпарат пен материалдарды сұратады;
22) сараптамалар мен консультациялар жүргізу үшін мемлекеттік органдар мен өзге ұйымдардың мамандарын тартады;
23) осы Заңда, Қазақстан Республикасының өзге заңдарында, Қазақстан Республикасы Президентінің және Қазақстан Республикасы Үкіметінің актілерінде көзделген өзге де өкілеттіктерді жүзеге асырады.

17-бап. Мемлекеттік сатып алу саласындағы бірыңғай
оператордың өкілеттіктері

Мемлекеттік сатып алу саласындағы бірыңғай оператор:
1) мемлекеттік сатып алу саласында мемлекеттік ақпараттық жүйелерді әзірлеуді, енгізуді, ақпараттық-техникалық сүйемелдеуді және пайдалануды жүзеге асырады;
2) мемлекеттік сатып алу саласында тізілімдерді техникалық сүйемелдеуді қамтамасыз етеді;
3) мемлекеттік сатып алу веб-порталының құрылуын, жұмыс істеуін және оны техникалық сүйемелдеуді қамтамасыз етеді;
4) осы Заңға сәйкес өтеусіз негізде міндетті түрде жариялануға жататын мемлекеттік сатып алу туралы мәліметтерді мемлекеттік сатып алу веб-порталында орналастырады;
5) Қазақстан Республикасының ақпараттандыру туралы заңнамасына сәйкес өтеусіз негізде ақпараттық жүйелерді қолдана отырып, мемлекеттік сатып алу жүйесінің субъектілеріне және басқа да мүдделі тұлғаларға электрондық қызметтер көрсетеді;
6) мемлекеттік сатып алу саласындағы мемлекеттік сатып алу жүйесінің субъектілеріне өтеусіз негізде консультациялық және практикалық көмек көрсетеді;
7) мемлекеттік ақпараттық жүйелер арқылы мемлекеттік сатып алу жобаларын басқаруды және оны техникалық сүйемелдеу функцияларын жүзеге асырады;
8) мемлекеттік сатып алу саласындағы есептілікті техникалық сүйемелдеуді қамтамасыз етеді;
9) мемлекеттік ақпараттық жүйелер мен мемлекеттік электрондық ақпараттық ресурстар интеграциясын және олардың қауіпсіздігін қамтамасыз ету мәселелері бойынша ақпараттандыру саласындағы ұлттық оператормен өзара іс-қимыл жасайды;
10) анықтамалықты енгізе отырып, тауарларға, жұмыстарға, көрсетілетін қызметтерге бағалардың дерекқорын енгізуді және сүйемелдеуді жүзеге асырады;
11) уәкілетті орган айқындайтын өзге де өкілеттіктерді жүзеге асырады.

3-тарау. Мемлекеттік сатып алуды өткізуді бақылау және оның мониторингі

18-бап. Қазақстан Республикасының мемлекеттік сатып алу
туралы заңнамасының сақталуын бақылау

1. Қазақстан Республикасының мемлекеттік сатып алу туралы заңнамасының сақталуын бақылауды уәкілетті орган жүзеге асырады.
Мемлекеттік қаржылық бақылау органдары Бюджет кодексінде белгіленген өкілеттіктер шеңберінде Қазақстан Республикасының мемлекеттік сатып алу туралы заңнамасының сақталуын бақылауды жүзеге асырады.
2. Бақылау объектілерінің тексерулері арқылы Қазақстан Республикасының мемлекеттік сатып алу туралы заңнамасының сақталуын бақылау жүзеге асырылады.
3. Мыналар:
1) тапсырыс беруші, мемлекеттік сатып алуды ұйымдастырушы, мемлекеттік сатып алуды бірыңғай ұйымдастырушы, конкурстық (аукциондық) комиссия, сараптау комиссиясы, сарапшы;
2) әлеуетті өнім беруші, өнім беруші, сондай-ақ олар жұмыстарды орындау үшін қосалқы мердігерлер не қызметтер көрсету үшін бірлескен атқарушылар ретінде тартатын тұлғалар;
3) тауар биржалары арқылы мемлекеттік сатып алуға, белгіленген тәртіппен мемлекеттік сатып алуға қатысты тауар биржасының қызметіне қатысатын мемлекеттік сатып алу жүйесінің субъектілері;
4) мемлекеттік сатып алу саласындағы бірыңғай оператор бақылау объектілері болып табылады.
4. Мемлекеттік қаржылық бақылау органдары жүзеге асыратын Қазақстан Республикасының мемлекеттік сатып алу туралы заңнамасының сақталуын бақылау объектілеріне бір мезгілде мемлекеттік қаржылық бақылау объектілері болып табылатын, осы баптың 3-тармағында көрсетілген тұлғалар жатады.
5. Уәкілетті орган тексерулерді мынадай жағдайлардың бірі туындаған кезде:
1) осы Заңның 51-бабында белгіленген мерзімде келіп түскен тапсырыс берушінің, мемлекеттік сатып алуды ұйымдастырушының, мемлекеттік сатып алуды бірыңғай ұйымдастырушының не конкурстық комиссияның, аукциондық комиссияның, сараптау комиссиясының, сарапшының, мемлекеттік сатып алу саласындағы бірыңғай оператордың әрекеттеріне (әрекетсіздігіне), шешімдеріне әлеуетті өнім беруші, конкурсқа не аукционға қатысушы, өнім беруші не олардың уәкілетті өкілі жазбаша шағым бергенде жүзеге асырады. Мұндай шағымды қарау осы Заңның 52-бабында көзделген шарттар сақталған кезде жүзеге асырылады;
2) бақылау объектілерінің әкімшілік құқық бұзушылық белгілері бар іс-әрекет (әрекетсіздік) жасағаны туралы ақпарат келіп түскенде;
3) құқық қорғау органдарының қаулылары келіп түскен кезде;
4) тәуекелдерді басқару жүйесі арқылы алынған ақпаратты талдау нәтижелері бойынша жүзеге асырылады.
6. Уәкілетті орган бақылау іс-шараларын жүргізу нәтижесінде бақылау объектісінің Қазақстан Республикасының мемлекеттік сатып алу туралы заңнамасын бұзғанын анықтаған жағдайда мынадай шаралар қолданады:
1) бақылау объектісіне орындауға міндетті нұсқама жібереді;
2) міндеттемелері толық көлемде және тиісінше орындалған мемлекеттік сатып алу туралы шарттарды қоспағанда, Қазақстан Республикасының мемлекеттік сатып алу туралы заңнамасын бұза отырып жасалған, күшіне енген мемлекеттік сатып алу туралы шарттарды жарамсыз деп тану туралы талап қоюмен сотқа жүгінеді.
7. Мемлекеттік қаржылық бақылау органдары бақылау іс-шараларын жүргізу нәтижесінде тиісті бақылау объектілерінің Қазақстан Республикасының мемлекеттік сатып алу туралы заңнамасын бұзғанын анықтаған жағдайда бақылау объектілеріне орындауға міндетті қаулылар, нұсқамалар жібереді.
8. Бақылау іс-шараларын жүргізу нәтижесінде бақылау объектісінің құрамында қылмыстық құқық бұзушылық белгілері бар іс-әрекетті (әрекетсіздікті) жасау фактісі анықталған жағдайда мемлекеттік қаржылық бақылау органдары осындай факті анықталған күннен бастап бес жұмыс күні ішінде аталған іс-әрекеттің (әрекетсіздіктің) жасалғаны туралы ақпаратты және осындай фактіні растайтын құжаттарды құқық қорғау органдарына беруге міндетті.
9. Мемлекеттік қаржылық бақылау органдарының іс-әрекетіне (әрекетсіздігіне), сондай-ақ шешіміне Қазақстан Республикасының заңнамасында белгіленген тәртіппен шағымдануға болады.

19-бап. Конкурстық (аукциондық) құжаттама жобасын алдын
ала талқылау

1. Конкурстық (аукциондық) құжаттаманы бекітудің міндетті шарты оны әлеуетті өнім берушілердің алдын ала талқылауы болып табылады.
Конкурстық (аукциондық) құжаттама жобасына ескертулер, сондай-ақ конкурстық (аукциондық) құжаттаманың ережелерін түсіндіру туралы сұрау салулар тапсырыс берушіге, мемлекеттік сатып алуды ұйымдастырушыға, бірыңғай ұйымдастырушыға мемлекеттік сатып алу туралы хабарландыру жарияланған күннен бастап күнтізбелік бес жұмыс күнінен кешіктірілмей берілуі мүмкін.
Конкурстық (аукциондық) құжаттама жобасына ескертулер болмаған кезде конкурстық (аукциондық) құжаттаманы бекіту туралы шешім қабылданады.
2. Тапсырыс беруші, мемлекеттік сатып алуды ұйымдастырушы, бірыңғай ұйымдастырушы конкурстық (аукциондық) құжаттаманы алдын ала талқылау мерзімі аяқталған күннен бастап бес жұмыс күні ішінде қарау нәтижелерін қарауға және жариялауға міндетті.
3. Тапсырыс беруші қарау нәтижелері бойынша мынадай шешімдердің бірін қабылдайды:
1) конкурстық (аукциондық) құжаттама жобасына өзгерістер және (немесе) толықтырулар енгізеді;
2) конкурстық (аукциондық) құжаттама жобасына ескертулердің қабылданбағаны туралы уәжді жауап береді;
3) конкурстық (аукциондық) құжаттама ережелеріне түсініктеме береді.
Көрсетілген шешімдер қабылданған күннен бастап конкурстық (аукциондық) құжаттама бекітілді деп есептеледі.
4. Тапсырыс беруші осы баптың 3-тармағында көрсетілген шешімдердің бірі қабылданған күннен бастап бір жұмыс күнінен кешіктірмей қабылданған шешімнің мәтінін мемлекеттік сатып алу веб-порталында жариялауға міндетті.
Осы баптың 3-тармағының 1) тармақшасында көзделген жағдайларда, тапсырыс беруші қабылданған шешіммен бірге мемлекеттік сатып алу веб-порталында конкурстық (аукциондық) құжаттамаға енгізілген өзгерістердің және (немесе) толықтырулардың мәтінін орналастыруға міндетті.
5. Әлеуетті өнім берушілердің өтінімдерді ұсыну күнінің соңғы мерзімі конкурстық (аукциондық) құжаттама бекіту туралы шешім жарияланған күннен бастап кемінде он жұмыс күні болуға тиіс.
6. Тапсырыс берушінің алдын ала талқылау нәтижелері бойынша шешіміне осы Заңда айқындалған тәртіппен шағым берілуі мүмкін.
7. Осы баптың талаптары:
1) Қазақстан Республикасының мемлекеттік құпиялар туралы заңнамасына сәйкес олар туралы мәліметтер мемлекеттік құпияларды құрайтын және (немесе) Қазақстан Республикасының Үкіметі айқындаған таратылуы шектеулі қызметтік ақпаратты қамтитын мәліметтері бар мемлекеттік сатып алуға;
2) жобалау-сметалық құжаттаманы талап ететін жұмыстарды мемлекеттік сатып алуға қолданылмайды, мұнда техникалық ерекшеліктің орнына конкурстық құжаттама Қазақстан Республикасының заңнамасына сәйкес сараптамадан өткен жобалау-сметалық құжаттаманы қамтиды.

20-бап. Мемлекеттік сатып алу мониторингі

1. Мемлекеттік сатып алу мониторингі мемлекеттік сатып алуды жүзеге асыру туралы ақпаратты жинау, қорыту, жүйелендіру және бағалау негізінде жүзеге асырылады.
2. Мемлекеттік сатып алу мониторингін уәкілетті орган веб-портал арқылы және онда қамтылған ақпарат негізінде жүзеге асырады.
3. Мемлекеттік сатып алу мониторингінің нәтижелері бойынша уәкілетті орган Қазақстан Республикасы Президентінің Әкімшілігіне және Қазақстан Республикасының Үкіметіне мемлекеттік сатып алу туралы жыл сайынғы есепті жібереді.
4. Мемлекеттік сатып алу туралы жыл сайынғы есептің мазмұнына және дайындау тәртібіне қойылатын талаптарды уәкілетті орган айқындайды.

4-тарау. Конкурс тәсілімен мемлекеттік сатып алуды жүзеге асыру

21-бап. Конкурс тәсілімен мемлекеттік сатып алуды жүзеге
асыру

1. Біртекті болып табылмайтын тауарларды, жұмыстарды, көрсетілетін қызметтерді конкурс тәсілімен мемлекеттік сатып алуды жүзеге асыру кезінде мемлекеттік сатып алуды ұйымдастырушы мұндай тауарларды конкурстық құжаттамада лоттарға міндетті түрде бөле отырып, аталған тәсілмен бірыңғай мемлекеттік сатып алуды ұйымдастыруға және өткізуге құқылы.
Біртекті тауарларды, жұмыстарды, көрсетілетін қызметтерді конкурс тәсілімен мемлекеттік сатып алуды жүзеге асыру кезінде мемлекеттік сатып алуды ұйымдастырушы осы баптың 2-тармағында көзделген жағдайларды қоспағанда, конкурстық құжаттамада біртекті тауарларды, жұмыстарды, көрсетілетін қызметтерді беру (орындау, көрсету) орны бойынша лоттарға бөлуге міндетті.
2. Тауарды (жұмысты, көрсетілетін қызметті) беретін (орындайтын, көрсететін) кемінде бес орын болған жағдайда, конкурс тәсілімен өткізілетін лотта тауарды (жұмысты, көрсетілетін қызметті) беретін (орындайтын, көрсететін) бірнеше орынды көрсетуге жол беріледі.
3. Біртекті тауарлардың, жұмыстардың, көрсетілетін қызметтердің бірнеше түрлерін конкурс тәсілімен мемлекеттік сатып алуды жүзеге асыру кезінде мемлекеттік сатып алуды ұйымдастырушы осы баптың 2-тармағының талаптарын есепке ала отырып, конкурстық құжаттамада тауарларды, жұмыстарды, көрсетілетін қызметтерді олардың біртекті түрлері және (немесе) беру (орындау, көрсету) орны бойынша лоттарға бөлуге міндетті.
4. Конкурсқа қатысуға өтінімдерді қарау, конкурсқа қатысушылардың конкурстық баға ұсыныстарын бағалау және салыстыру, сондай-ақ конкурс жеңімпазын айқындау конкурстық құжаттамада көзделген әрбір лот бойынша жүзеге асырылады.
5. Конкурсқа қатысуға өтінімдерді қарау қорытындылары бойынша біліктілік талаптарына және конкурстық құжаттаманың талаптарына сәйкес келеді деп айқындалған және конкурстық комиссия конкурсқа қатысушылар деп таныған әлеуетті өнім берушілер конкурсқа қатысады.
Конкурсқа алдын ала біліктілік іріктеуді қолдана отырып, білікті әлеуетті өнім берушілер тізіліміне енгізілген әлеуетті өнім берушілер қатысады.

22-бап. Конкурстық құжаттама

1. Мемлекеттік сатып алуды ұйымдастырушы конкурстық құжаттаманы Қазақстан Республикасының мемлекеттік құпиялар туралы заңнамасының талаптарын есепке ала отырып, мемлекеттік сатып алуды өткізу қағидаларында айқындалған конкурстық құжаттаманың электрондық нысаны негізінде мемлекеттік және орыс тілдерінде әзірлейді.
2. Конкурстық құжаттамада осы Заңның 9-бабында белгіленген біліктілік талаптарынан басқа, мыналар:
1) мемлекеттік сатып алуды ұйымдастырушының атауы мен орналасқан жері;
2) сатып алынатын тауарлардың, жұмыстардың, көрсетілетін қызметтердің функционалдық, техникалық, сапалық және пайдалану сипаттамаларын көрсете отырып, сондай-ақ ұлттық стандарт немесе Қазақстан Республикасы өндірушілерінің коммерциялық емес ұйымдары бекіткен үкіметтік емес стандарт болған кезде оны көрсете отырып, ал қажет болған кезде нормативтік-техникалық құжаттаманы көрсете отырып, талап етілетін техникалық ерекшелік қамтылуға тиіс.
Жобалау-сметалық құжаттаманы талап ететін жұмыстарды мемлекеттік сатып алуды жүзеге асыру кезінде техникалық ерекшеліктің орнына конкурстық құжаттамада белгіленген тәртіппен бекітілген жобалау-сметалық құжаттама қамтылуға тиіс;
3) өткізілетін мемлекеттік сатып алудың нысанасы болып табылатын тауардың саны, орындалатын жұмыстардың, көрсетілетін қызметтердің көлемі;
4) тауарды беру, жұмыстарды орындау, қызметтер көрсету орны;
5) тауарды берудің, жұмыстарды орындаудың, қызметтер көрсетудің талап етілетін мерзімдері, ұсынылатын тауарлардың, жұмыстардың, көрсетілетін қызметтердің сапасына кепілдік беру;
6) төлем жасау шарттары және мемлекеттік сатып алу туралы шарттың жобасы;
7) бағадан басқа критерийлер, олардың негізінде конкурс жеңімпазы, оның ішінде әрбір осындай критерийлердің салыстырмалы мәні және шартты бағаны есептеу айқындалады;
8) конкурстық баға ұсынысының мазмұнына қойылатын талаптар, оның ішінде сатып алынатын тауарлардың, жұмыстардың, көрсетілетін қызметтердің бағаларынан басқа, қосылған құн салығының сомасы шегеріле отырып, оларды тасымалдау мен сақтандыру шығыстарын, кедендік баждарды, салықтар мен алымдарды, сондай-ақ тауарларды беру, жұмыстарды орындау, қызметтерді көрсету шарттарында көзделген өзге де шығыстарды төлеуді көрсету;
9) конкурсқа қатысушының конкурстық баға ұсынысы көрінетін валюта немесе валюталар және оларды салыстыру мен бағалау мақсатында шартты бағаны бірыңғай валютаға сәйкес келтіру үшін қолданылатын бағам;
10) конкурсқа қатысуға өтінімдер, мемлекеттік сатып алу туралы шарт Қазақстан Республикасының тіл туралы заңнамасына сәйкес жасалатын және табыс етілетін тілге қойылатын талаптар;
11) конкурсқа қатысуға өтінімді енгізудің талаптары, өтінімді қамтамасыз етудің мазмұны мен түрлері;
12) әлеуетті өнім берушінің конкурсқа қатысуға өз өтінімін оны берудің соңғы мерзімі өткенге дейін өзгерту немесе кері қайтарып алу құқығына тиісті сілтеме жасау;
13) конкурсқа қатысуға өтінімдерді ұсынудың тәртібі, тәсілі мен соңғы мерзімі және конкурсқа қатысуға өтінімдердің талап етілетін қолданылу мерзімі;
14) конкурстық құжаттаманы алдын ала талқылау тәртібі;
15) конкурсқа қатысуға өтінімдерді ашу күні және уақыты;
16) конкурсқа қатысуға өтінімдерді ашу, конкурсқа қатысуға өтінімдерді қарау, конкурстық баға ұсыныстарын бағалау мен салыстыру рәсімдерінің сипаты;
17) алда болатын конкурс тәсілімен мемлекеттік сатып алуда тапсырыс берушінің және мемлекеттік сатып алуды ұйымдастырушының атынан олардың уәкілетті өкілдері туралы мәліметтер;
18) мемлекеттік сатып алу туралы шарттың орындалуын қамтамасыз етудің талаптары, түрлері, көлемі және оны енгізудің тәсілі;
19) конкурс тәсілімен өткізілетін мемлекеттік сатып алудың нысанасы болып табылатын тауарларды, жұмыстарды, көрсетілетін қызметтерді сатып алуға бөлінген сомалар туралы мәліметтер қамтылуға тиіс.
Конкурстық құжаттамада әлеуетті өнім берушілерге өткізілетін мемлекеттік сатып алудың шарттары туралы неғұрлым толық ақпарат алуға мүмкіндік беретін басқа да қосымша мәліметтер қамтылуы мүмкін.
3. Конкурстық құжаттамада тауар таңбаларына, қызмет көрсету белгілеріне, фирмалық атауларына, патенттерге, пайдалы модельдерге, өндірістік үлгілерге, тауардың шығарылған жерінің атауына және өндірушінің атауына, сондай-ақ сатып алынатын тауардың, жұмыстың, көрсетілетін қызметтің жекелеген әлеуетті өнім берушіге тиесілілігін айқындайтын өзге де сипаттамаларға сілтемелердің болуына:
1) негізгі (белгіленген) жабдықтарды, сондай-ақ белгіленген бағдарламалық қамтамасыз етуді (лицензиялық бағдарламалық қамтамасыз етуді) қосымша жинақтау, жаңғырту және қосымша жарақтау үшін;
2) тауарды лизингке беру жөнінде қызметтер көрсетушіні айқындау және лизинг нысанасын толық сипаттау қажеттігінің туындауы үшін;
3) тапсырыс берушінің қолындағы бар тауарды жөндеу және (немесе) техникалық қызмет көрсету үшін мемлекеттік сатып алуды жүзеге асыру жағдайларын қоспағанда, жол берілмейді.
4. Неғұрлым сапалы тауарды, жұмысты, көрсетілетін қызметті ұсынатын конкурсқа қатысушыны айқындау үшін мемлекеттік сатып алуды ұйымдастырушы немесе мемлекеттік сатып алуды бірыңғай ұйымдастырушы конкурстық құжаттамада конкурсқа қатысушылардың конкурстық баға ұсынысына әсер ететін мынадай критерийлерді:
1) әлеуетті өнім берушіде:
өткізілетін мемлекеттік сатып алудың нысанасы болып табылатын тауарлар, жұмыстар, көрсетілетін қызметтер нарығында жұмыс тәжірибесінің;
Қазақстан Республикасының техникалық реттеу туралы заңнамасына сәйкес ұсынылатын тауарларға ерікті сертификаттау жүргізілгенін растайтын құжаттың;
ұлттық стандарттардың талаптарына сәйкес сапа менеджментінің сертификатталған жүйесінің (сертификатталған жүйелерінің);
ұлттық стандарттардың талаптарына сәйкес қоршаған ортаны басқару менеджментінің сертификатталған жүйесінің (сертификатталған жүйелерінің) және (немесе) Қазақстан Республикасының техникалық реттеу туралы заңнамасына сәйкес экологиялық таза өнім стандартына сәйкестікті растаудың болуын;
2) тауарлардың, көрсетілетін қызметтердің функционалдық, техникалық, сапалық және пайдалану сипаттамаларын және (немесе) сатып алынатын тауарларды пайдалануға, оларға техникалық қызмет көрсетуге және оларды жөндеуге арналған шығыстарды көздеуге міндетті.
Конкурстық баға ұсынысына әсер ететін критерийлердің мәніне қатысты есеп айырысу мемлекеттік сатып алуды жүргізу қағидаларымен айқындалады.
5. Конкурстық құжаттаманың жобасын тапсырыс берушінің бірінші басшысы не жауапты хатшысы немесе Қазақстан Республикасының Президенті айқындайтын жауапты хатшы өкілеттігін жүзеге асыратын өзге де лауазымды адам не оның міндетін атқаратын адам бекітеді.
Мемлекеттік сатып алудың бірыңғай ұйымдастырушысы әзірлеген конкурстық құжаттаманың жобасын тапсырыс берушілердің бірінші басшылары не жауапты хатшылар немесе Қазақстан Республикасының Президенті айқындайтын жауапты хатшының өкілеттігін жүзеге асыратын өзге де лауазымды адамдар не оның міндетін атқаратын адамдар бекітеді.

23-бап. Конкурс тәсілімен мемлекеттік сатып алуды жүзеге
асыру туралы хабарлама

1. Мемлекеттік сатып алуды ұйымдастырушы конкурстық құжаттама жобасы бекітілген күннен бастап үш жұмыс күнінен кешіктірмей, конкурс тәсілімен мемлекеттік сатып алуды жүзеге асыру туралы хабарландыру мәтінін мемлекеттік сатып алу веб-порталында жариялауға міндетті.
2. Конкурс тәсілімен мемлекеттік сатып алу қайтадан жүзеге асырылған жағдайда мемлекеттік сатып алуды ұйымдастырушы, өтпеген конкурстың конкурстық құжаттамасының өзгермеу шарты жағдайларында конкурсқа қатысуға өтінімдер ұсынудың соңғы күніне дейін кемінде күнтізбелік он күн бұрын конкурс тәсілімен мемлекеттік сатып алуды қайтадан жүзеге асыру туралы хабарландырудың мәтінін мемлекеттік сатып алу веб-порталында жариялауға міндетті.
3. Конкурс тәсілімен мемлекеттік сатып алуды қайтадан жүзеге асырған және конкурстық құжаттамаға өзгерістер және (немесе) толықтырулар енгізілген жағдайда, мемлекеттік сатып алу осы Заңның 22-бабының талаптарын есепке ала отырып, осы баптың 1-тармағына сәйкес жүргізіледі.

24-бап. Конкурстық құжаттаманың жобасын ұсыну

1. Мемлекеттік сатып алуды ұйымдастырушы бекітілген конкурстық құжаттаманың жобасын мемлекеттік сатып алу веб-порталында жариялау арқылы мүдделі тұлғаларға конкурстық құжаттаманың жобасын ұсынады.
2. Конкурс тәсілімен мемлекеттік сатып алуға қатысуға ниет білдірген мемлекеттік сатып алу веб-порталында конкурстық құжаттама жобасының көшірмесін алған адамдар туралы мәліметтер мемлекеттік сатып алу веб-порталында автоматты түрде тіркеледі.
3. Конкурстық құжаттама жобасын алдын ала талқылау және оның ережелерін түсіндіру осы Заңның 19-бабында белгіленген тәртіппен жүзеге асырылады.

25-бап. Конкурсқа қатысуға өтінім

1. Конкурсқа қатысуға өтінім әлеуетті өнім берушінің конкурстық құжаттамада белгіленген талаптарға және шарттарға келісім білдіру нысаны, сондай-ақ, осы Заңның 6-бабында белгіленген біліктілік талаптары мен шектеулерге сәйкестігін растайтын ол туралы мәліметтер алуға әлеуетті өнім берушінің келісім беру нысаны болып табылады.
2. Әлеуетті өнім беруші конкурсқа қатысуға өтінімді мемлекеттік сатып алуды ұйымдастырушыға оны ұсынудың конкурстық құжаттамада көрсетілген соңғы мерзімі өткенге дейін мемлекеттік сатып алу веб-порталы арқылы электрондық құжат нысанында ұсынады.
3. Конкурсқа қатысуға өтінім әлеуетті өнім берушінің:
1) осы Заңның 6-бабында көзделген шектеулерді бұзушылықтың болмағандығы туралы;
2) өзінің және тапсырыс берушінің не мемлекеттік сатып алуды ұйымдастырушының арасында осы Заңда тыйым салынған қарым-қатынастардың болмағандығы туралы;
3) Қазақстан Республикасының заңдарында белгіленген тәртіппен осы Заңның 47-бабының 15-тармағында көрсетілген фактілер анықталған жағдайда мемлекеттік сатып алу туралы шартты бұзуға келісімі туралы растауды қамтуға тиіс.
Конкурстық баға ұсынысы, сондай-ақ конкурсқа қатысуға өтінімде қамтылуға тиіс құжаттар мемлекеттік сатып алуды өткізу қағидаларында айқындалады.
4. Әлеуетті өнім берушінің конкурсқа қатысуға өтінімі:
1) әлеуетті өнім беруші осы конкурсқа қатысуға бұрын өтінім берген;
2) конкурсқа қатысуға өтінім мемлекеттік сатып алу веб-порталына осы конкурсқа қатысуға өтінімдерді қабылдаудың соңғы мерзімі өткеннен кейін келіп түскен;
3) конкурсқа қатысушы бұрын осы конкурс бойынша баға ұсынысын берген;
4) конкурстық баға ұсынысы осы тауарларды, жұмыстарды, көрсетілетін қызметтерді сатып алу үшін бөлінген сомадан асып түскен;
5) осы Заңның 6-бабы 1-тармағының 3), 4), 5), 6) және 8) тармақшаларында көзделген жағдайларда, мемлекеттік сатып алу веб-порталы оны автоматты түрде қабыдамауға тиіс.
5. Әлеуетті өнім беруші конкурсқа қатысуға өтінімдер ұсыну мерзімінің аяқталуынан кешіктірмей:
1) конкурсқа қатысуға енгізілген өтінімді өзгертуге және (немесе) толықтыруға;
2) конкурсқа қатысуға өзі енгізген өтінімді қамтамасыз етуді қайтарып алу құқығын жоғалтпастан, өзінің конкурсқа қатысуға өтінімін кері қайтарып алуға құқылы.
Конкурсқа қатысуға өтінімге өзгерістер және (немесе) толықтырулар енгізуге, сол сияқты оны қайтарып алуға конкурсқа қатысуға өтінімді ұсынудың соңғы мерзімі өткеннен кейін жол берілмейді.
6. Конкурсқа қатысуға өтінімнің қолданылу мерзімі конкурстық құжаттамада белгіленген талап етілетін мерзімге сәйкес келуге тиіс.

26-бап. Конкурс тәсілімен мемлекеттік сатып алуға
қатысуға өтінімді қамтамасыз ету

1. Әлеуетті өнім беруші конкурс тәсілімен мемлекеттік сатып алуға қатысуға өтінімді қамтамасыз етуді:
1) өзін конкурстың жеңімпазы деп анықтаған жағдайда, мемлекеттік сатып алу туралы шартты жасайтындығының;
2) конкурстық құжаттамада белгіленген мемлекеттік сатып алу туралы шартты жасайтындығының, мемлекеттік сатып алу туралы шарттың орындалуын қамтамасыз етуді енгізу және (немесе) оны енгізу мерзімдері туралы талаптарды уақтылы және тиісті түрде орындайтындығының кепілі ретінде енгізеді.
2. Конкурс тәсілімен мемлекеттік сатып алуға қатысуға өтінімді қамтамасыз ету мемлекеттік сатып алуды өткізу қағидаларында айқындалған тәртіппен тауарларды, жұмыстарды, көрсетілетін қызметтерді сатып алу үшін бөлінген соманың бір пайызы мөлшерінде енгізіледі.
3. Әлеуетті өнім беруші конкурс тәсілімен мемлекеттік сатып алуға қатысуға өтінімді қамтамасыз етудің мынадай түрлерінің біреуін:
1) мемлекеттік сатып алуды ұйымдастырушының банктік шотына не мемлекеттік органдар және мемлекеттік мекемелер болып табылатын мемлекеттік сатып алуды ұйымдастырушылар үшін Қазақстан Республикасының бюджет заңнамасында көзделген шотқа енгізілетін кепілдікті ақшалай жарнаны;
2) электрондық құжат түріндегі банктік кепілдікті таңдауға құқылы.
Конкурс тәсілімен мемлекеттік сатып алуға қатысуға өтінімнің қолданылу мерзімі өткенге дейін әлеуетті өнім берушінің енгізілген кепілдікті ақшалай жарнасына тұтастай не оның бір бөлігіне талап ету құқығының үшінші тұлғаларда туындауына әкеп соқтыратын іс-қимылдар жасауына жол берілмейді.
Мемлекеттік сатып алуды ұйымдастырушының, осы баптың 5 және 6-тармақтарында көрсетілген іс-әрекеттерді қоспағанда, әлеуетті өнім беруші енгізген кепілдікті ақшалай жарнаны пайдалануына жол берілмейді.
4. Мемлекеттік сатып алуды ұйымдастырушы мынадай жағдайлардың бірі туындаған кезде:
1) конкурс жеңімпазы не екінші орын алды деп анықталған әлеуетті өнім беруші мемлекеттік сатып алу туралы шарт жасасудан жалтарған;
2) конкурс жеңімпазы не екінші орын алған әлеуетті өнім беруші мемлекеттік сатып алу туралы шарт жасаса отырып, конкурстық құжаттамада белгіленген, мемлекеттік сатып алу туралы шарттың орындалуын қамтамасыз етуді енгізу және (немесе) енгізу мерзімі туралы талаптарды орындамаған не тиісті түрде, оның ішінде уақтылы орындамаған жағдайларда, конкурс тәсілімен мемлекеттік сатып алуға қатысуға өтінімді қамтамасыз етуді әлеуетті өнім берушіге қайтармайды.
5. Осы баптың 4-тармағында көзделген жағдайлардың бірі туындаған кезде, конкурс тәсілімен мемлекеттік сатып алуға қатысуға өтінімді қамтамасыз ету сомасы тиісті бюджет, мемлекеттік кәсіпорын, дауыс беретін акцияларының (жарғылық капиталға қатысу үлестерінің) елу және одан да көп пайызы мемлекетке тиесілі заңды тұлға немесе олармен үлестес заңды тұлғалар табысының есебіне жатқызылады.
6. Мемлекеттік сатып алуды ұйымдастырушы мынадай жағдайлардың бірі туындаған күннен бастап:
1) осы әлеуетті өнім беруші конкурсқа қатысуға өтінімдер табыс етудің соңғы мерзімі өткенге дейін өзінің конкурсқа қатысуға өтінімін кері қайтарып алған жағдайда;
2) конкурс тәсілімен мемлекеттік сатып алу қорытындылары туралы хаттамаға қол қойылған жағдайда. Аталған жағдай конкурс жеңімпазы деп айқындалған конкурсқа қатысушыға қолданылмайды;
3) мемлекеттік сатып алу туралы шарт күшіне енген және конкурс жеңімпазы конкурстық құжаттамада көзделген мемлекеттік сатып алу туралы шарттың орындалуын қамтамасыз етуді енгізген жағдайда үш жұмыс күні ішінде әлеуетті өнім берушіге ол енгізген конкурс тәсілімен мемлекеттік сатып алуға қатысуға өтінімді қамтамасыз етуді қайтарады.

27-бап. Конкурс тәсілімен мемлекеттік сатып алуды жүзеге
асыру кезіндегі демпингке қарсы шаралар

1. Конкурс тәсілімен мемлекеттік сатып алуды жүргізу кезінде әлеуетті өнім беруші шарттың орындалуын қамтамасыз етуге қосымша демпингттік деп тануға рұқсат берілетін бағаның төмендетілген сомасына тең мөлшердегі соманы енгізген жағдайда демпингтік баға ұсынуға жол беріледі.
2. Демпингтік баға ұсыну қорытындылары бойынша жеңімпаз не екінші орын алған деп айқындалған және мемлекеттік сатып алу туралы шарт жасасудан жалтарған әлеуетті өнім беруші осы Заңда белгіленген тәртіппен мемлекеттік сатып алуға жосықсыз қатысушылардың тізіліміне енгізіледі.

28-бап. Конкурсқа қатысуға өтінімдерді қарау

1. Конкурстық комиссия конкурсқа қатысуға өтінімдерді қарауды біліктілік талаптарына және конкурстық құжаттаманың талаптарына сай келетін әлеуетті өнім берушілерді айқындау мақсатында жүзеге асырады.
2. Мемлекеттік сатып алуды ұйымдастырушы әлеуетті өнім берушілер ұсынатын тауарлардың, жұмыстардың, көрсетілетін қызметтердің конкурстық құжаттаманың ажырамас бөлігі болып табылатын техникалық ерекшелікке сәйкестігіне қатысты сараптамалық қорытынды дайындау үшін сараптама комиссиясын құруға не сарапшыны айқындауға құқылы.
Мемлекеттік сатып алуды бірыңғай ұйымдастырушы мемлекеттік сатып алуды ұйымдастыру және өткізу кезінде тапсырыс беруші әлеуетті өнім берушілер ұсынатын тауарлардың, жұмыстардың, көрсетілетін қызметтердің конкурстық құжаттаманың ажырамас бөлігі болып табылатын техникалық ерекшелікке сәйкестігіне қатысты сараптамалық қорытынды дайындау үшін сараптау комиссиясын құрады не сарапшыны айқындайды.
Мыналар:
1) мемлекеттік сатып алу рәсімдерінің нәтижелеріне мүдделі;
2) тапсырыс берушімен, мемлекеттік сатып алуды ұйымдастырушымен, мемлекеттік сатып алуды бірыңғай ұйымдастырушымен не олардың ведомстволық бағынысты, еншілес және тәуелді ұйымдарымен не әлеуетті өнім берушілермен еңбек қатынастары болмаған;
3) тапсырыс берушінің, мемлекеттік сатып алуды ұйымдастырушының, мемлекеттік сатып алуды бірыңғай ұйымдастырушының не олардың ведомстволық бағынысты, еншілес және тәуелді ұйымдарының басшыларының жақын туысы болып табылатын адам сарапшы бола алмайды. Осы тармақтың үшінші бөлігінде белгіленген талаптарға сай келетін сарапшылар болмаған жағдайда, мемлекеттік сатып алуды ұйымдастырушы не тапсырыс беруші сарапшы ретінде жұмыс істеу үшін тиісті бейіндегі мемлекеттік қызметшілерді не сатып алынатын тауарларға, жұмыстарға, көрсетілетін қызметтерге мамандығы сәйкес келетін өзге мамандарды тартады. Мемлекеттік қызметшілер сарапшылар ретінде өтеусіз негізде тартылады, ал өзге мамандар тараптардың уағдаластығы бойынша ақылы да, өтеусіз де негізде тартылады.
Сарапшылар ретінде тартылатын мемлекеттік қызметшілер осы тармақтың үшінші бөлігінде белгіленген талаптарға сәйкес келуге тиіс.
Конкурстық комиссия шешім қабылдаған кезде сарапшылардың дауыс беруге құқығы жоқ.
Ақылы негізде сарапшылар ретінде тартылатын адамдарды таңдау осы Заңға сәйкес жүзеге асырылады.
3. Әлеуетті өнім берушілердің біліктілік талаптарына және конкурстық құжаттаманың талаптарына сәйкес келуі нысанасына конкурсқа қатысуға өтінімдерді қарау нәтижелері бойынша конкурсқа қатысуға алдын ала рұқсат беру хаттамасы ресімделеді, оған конкурстық комиссияның төрағасы және оның барлық мүшелері, сондай-ақ конкурстық комиссияның хатшысы конкурсқа қатысуға өтінімдерді алдын ала қарау туралы шешім қабылданған күні қол қояды.
Конкурсқа қатысуға алдын ала рұқсат беру хаттамасы әлеуетті өнім берушілердің біліктілік талаптарына және конкурстық құжаттаманың талаптарына сәйкес келмеуі туралы себептерінің егжей-тегжейлі сипаттамасы бар ақпаратты қамтуы тиіс.
Әлеуетті өнім берушілер біліктілік талаптарына және конкурстық құжаттаманың талаптарына сай келген жағдайда, конкурсқа қатысуға алдын ала рұқсат беру хаттамасы ресімделмейді.
4. Конкурстық комиссия біліктілік талаптарына және конкурстық құжаттаманың талаптарына сай келмейтін әлеуетті өнім берушілерді анықтаған жағдайда, мұндай әлеуетті өнім берушілерге конкурсқа қатысуға алдын ала рұқсат беру хаттамасы жарияланған күннен бастап үш жұмыс күні ішінде конкурсқа қатысуға өтінімдерді біліктілік талаптарына және конкурстық құжаттаманың талаптарына сәйкес келтіру құқығын береді.
Осы Заңның 6-бабын бұзған өнім берушілерге конкурсқа қатысуға өтінімдерді біліктілік талаптарына және конкурстық құжаттама талаптарына сәйкес келтіру үшін құқық берілмейді.
5. Осы баптың 4-тармағына сәйкес біліктілік талаптарына және конкурстық құжаттаманың талаптарына сәйкес келтірілген конкурсқа қатысуға өтінімдерді қайтадан қарау кезінде конкурстық комиссия:
1) конкурсқа қатысуға өтінімдерді қарауды, бағалауды және салыстыруды жеңілдету үшін әлеуетті өнім берушілерден олардың өтінімдеріне байланысты материалдар мен түсіндірулерді жазбаша нысанда және (немесе) электрондық құжат нысанында сұратуға;
2) конкурсқа қатысуға өтінімдерде қамтылған мәліметтерді нақтылау мақсатында тиісті жеке немесе заңды тұлғалардан, мемлекеттік органдардан қажетті ақпаратты жазбаша нысанда және (немесе) электрондық құжат нысанында сұратуға құқылы.
Конкурсқа қатысуға өтінімдерді біліктілік талаптарына және конкурстық құжаттаманың талаптарына сәйкес келтірудің осы баптың 4-тармағында көзделген мерзімі өткеннен кейін конкурсқа қатысуға өтінімде жеткіліксіз құжаттармен толықтырудан, конкурсқа қатысуға өтінімді ұсынылған құжаттарды ауыстырудан, тиісті түрде ресімделмеген құжаттарды сәйкес кептіруден көрінетін конкурсқа қатысуға өтінімді конкурстық құжаттаманың талаптарына сәйкес келтіруге байланысты конкурстық комиссияның сауал жіберуіне және өзге де әрекеттеріне жол берілмейді.
Конкурстық комиссия конкурсқа қатысуға өтінімді, егер онда ұсынылған өтінім мәнін қозғамай түзетуге болатын грамматикалық немесе арифметикалық қателер болса, конкурстық құжаттаманың талаптарына сай келеді деп қарайды.
Конкурстық комиссия конкурсқа қатысуға өтінімді қайта қараған кезде алдын ала рұқсат беру хаттамасында көзделмеген негіздер бойынша әлеуетті өнім берушілерден бас тартуға жол бермейді.
6. Әлеуетті өнім берушіге осы баптың 4-тармағына сәйкес конкурсқа қатысуға өтінімдерді біліктілік талаптарына және конкурстық құжаттаманың талаптарына сәйкес келтіргеннен кейін, егер:
1) ол және (немесе) оның қоса орындаушысы осы Заңда және мемлекеттік сатып алуды өткізу қағидаларында айқындалған негіздер бойынша біліктілік талаптарына сай келмейді деп айқындалса;
2) ол осы Заңның 6-бабының талаптарын бұзса;
3) оның конкурсқа қатысуға өтінімі осы Заңда және мемлекеттік сатып алуды өткізу қағидаларында айқындалған негіздер бойынша конкурстық құжаттаманың талаптары мен шарттарына сәйкес келмейді деп айқындалса, конкурсқа қатысуға рұқсат берілмейді.
7. Егер әлеуетті өнім берушіге осы баптың 6-тармағының 2) тармақшасында көзделген негіздер бойынша конкурсқа қатысуға рұқсат берілмесе, онда:
1) конкурс тәсілімен мемлекеттік сатып алудың қорытындылары туралы хаттамада мұндай әлеуетті өнім берушінің конкурсқа қатысуға өтінімін қабылдамаудың негіздемелері көрсетіледі;
2) осы Заңның 6-бабының талаптарын бұзған әлеуетті өнім беруші туралы мәліметтер мемлекеттік сатып алуға жосықсыз қатысушылардың тізіліміне енгізілуге жатады.
8. Конкурстық комиссия конкурсқа қатысуға өтінімдерді қайтадан қарау нәтижелері бойынша:
1) біліктілік талаптарына және конкурстық құжаттаманың талаптарына сай келетін әлеуетті өнім берушілерді айқындайды және конкурсқа қатысушылар деп таниды;
2) конкурсқа қатысушыларға осы Заңның 22-бабының 4-тармағында көзделген критерийлердің салыстырмалы мәндерін қолданады;
9. Біліктілік талаптарына және конкурстық құжаттама талаптарына сәйкестік мәніне конкурсқа қатысуға өтінімді қарау қорытындылары бойынша конкурстық баға ұсынысы өтінімді қарау қорытындылары бойынша веб-порталда автоматты түрде ашылады;
10. Мемлекеттік сатып алу веб-порталы конкурсқа қатысушылардың шартты бағаларын автоматты түрде салыстырады және ең төменгі шартты баға негiзiнде конкурс жеңiмпазын айқындайды.
Конкурстық баға ұсыныстарын бағалау және салыстыру қорытындылары бойынша екінші орын алған конкурсқа қатысушы ең төменгі шартты бағадан кейінгі келесі баға негізінде айқындалады.
Конкурстық баға ұсыныстарының шартты бағалары тең болған кезде конкурс нысанасы болып табылатын сатып алынатын тауарлар, жұмыстар, қызметтер нарығында мол жұмыс тәжірибесі бар әлеуетті өнім беруші жеңімпаз (конкурстық баға ұсыныстарын бағалау және салыстыру қорытындылары бойынша екінші орын алған конкурсқа қатысушы) деп танылады. Шартты бағалары тең бірнеше әлеуетті өнім берушінің жұмыс тәжірибесі тең болған кезде конкурстық баға ұсынысы басқа әлеуетті өнім берушілердің конкурстық баға ұсыныстарынан бұрынырақ келіп түскен әлеуетті өнім беруші жеңімпаз (конкурстық баға ұсыныстарын бағалау және салыстыру қорытындылары бойынша екінші орын алған конкурсқа қатысушы) деп танылады.

29-бап. Конкурс тәсілімен мемлекеттік сатып алудың
қорытындылары туралы хаттама

1. Конкурс тәсілімен мемлекеттік сатып алудың қорытындылары туралы хаттама конкурстық комиссияның барлық мүшелерін және өздері туралы мәліметтер конкурстық баға ұсыныстарын тіркеу журналына енгізілген барлық әлеуетті өнім берушілерді электрондық пошта арқылы бір мезгілде хабардар ете отырып, мемлекеттік сатып алу веб-порталында автоматты түрде қалыптастырылады және жарияланады.
2. Конкурс тәсілімен мемлекеттік сатып алу қорытындыларының хаттамасына конкурсқа қатысушы Заңда белгіленген тәртіппен шағым жасалуы мүмкін.

30-бап. Конкурс тәсілімен мемлекеттік сатып алуды өтпеді
деп тану негіздері мен салдарлары

1. Конкурс тәсілімен мемлекеттік сатып алу мынадай жағдайлардың бірі болған кезде:
1) конкурсқа қатысуға ұсынылған өтінімдер болмағанда;
2) конкурсқа қатысуға екі өтінімнен аз ұсынылғанда;
3) конкурсқа қатысуға бір де бір әлеуетті өнім беруші жіберілмегенде;
4) конкурсқа қатысуға бір әлеуетті өнім беруші жіберілгенде конкурс өтпеді деп танылады.
2. Егер конкурс тәсілімен мемлекеттік сатып алу өтпеді деп танылса, тапсырыс беруші, мынадай:
1) конкурс тәсілімен мемлекеттік сатып алуды қайта өткізу туралы;
2) конкурстық құжаттаманың өзгеруі және конкурс тәсілімен мемлекеттік сатып алуды қайта өткізу туралы;
3) мемлекеттік сатып алуды бір көзден алу тәсілімен жүзеге асыру туралы шешімдердің бірін қабылдауға құқылы.
3. Егер конкурс тәсілімен мемлекеттік сатып алу өтпеді деп танылса, тапсырыс беруші бір көзден сатып алуды:
1) конкурсқа қатысуға ұсынылған өтінім болмаған жағдайда жүзеге асырады. Бұл ретте бір көзден алу тәсілімен мемлекеттік сатып алу туралы шарт жасалатын әлеуетті өнім берушіні тапсырыс беруші анықтайды;
2) конкурсқа қатысуға екеуден кем өтінім түскен жағдайда жүзеге асырады. Бұл ретте мемлекеттік сатып алу туралы шарт конкурсқа қатысуға өтінім берген әлеуетті өнім берушімен жасалады. Жасалған шарттың бағасы конкурсқа қатысуға берілген өтінімде көрсетілген әлеуетті өнім берушінің конкурстық баға ұсынысынан аспауы тиіс;
3) егер конкурсқа қатысуға бірде бір әлеуетті өнім беруші жіберілмесе. Бұл ретте шарт осы Заңның 6-бабының талаптарын бұзған тұлғаны қоспағанда, шартты жеңілдікті ескере отырып, ең төмен бағамен конкурстық өтінім ұсынған әлеуетті өнім берушімен жасалады;
4) егер конкурсқа қатысуға бір ғана әлеуетті өнім беруші жіберілсе. Бұл ретте мемлекеттік сатып алу туралы шарт әлеуетті өнім берушімен оның өтінімінде көзделген шарттарда конкурсқа қатысуға жіберілген әлеуетті өнім берушімен жасалады және жасалған шарттың бағасы оның конкурстық баға ұсынысынан аспауы тиіс.

31-бап. Екі кезеңді рәсімдерді пайдалана отырып, конкурс
тәсілімен мемлекеттік сатып алуды өткізудің
ерекшеліктері

1. Екі кезеңді рәсімдерді пайдалана отырып, конкурс тәсілімен мемлекеттік сатып алу:
1) тауарлардың, жұмыстардың, көрсетілетін қызметтердің егжей-тегжейлі өзіндік ерекшелігін толық тұжырымдау әрі олардың техникалық және өзге де сипаттамаларын айқындау қиын және (немесе) әлеуетті өнім берушілердің ұсыныстарын сұрату не туындаған мәселелер бойынша олармен келіссөз жүргізу қажет болған;
2) зерттеулер, эксперименттер, іздестірулер жүргізу немесе әзірлемелер жасау қажет болған жағдайларда өткізілуі мүмкін.
3) инновациялық және жоғары технологиялық тауарлар, жұмыстар, көрсетілетін қызметтер сатып алынады;
2. Екі кезеңді рәсімдерді пайдалана отырып, конкурс тәсілімен мемлекеттік сатып алу мынадай дәйекті кезеңдердің жиынтығын білдіреді:
1) бірінші кезеңде мынадай іс-шаралар жүзеге асырылады:
тапсырыс берушінің мемлекеттік сатып алуды ұйымдастырушыны айқындауы;
мемлекеттік сатып алуды ұйымдастырушының сараптау комиссиясын құруы не сарапшыны айқындауы;
сараптау комиссиясының не сарапшының тапсырыс берушінің қажеттілігі негізінде сатып алынатын тауарларға, жұмыстарға, көрсетілетін қызметтерге техникалық тапсырманы қалыптастыруы;
екі кезеңді рәсімдерді пайдалана отырып, конкурс тәсілімен мемлекеттік сатып алуды өткізу туралы хабарландыруды мемлекеттік сатып алу веб-порталында жариялауы;
мемлекеттік сатып алуды ұйымдастырушының екі кезеңді рәсімдерді пайдалана отырып, конкурс тәсілімен мемлекеттік сатып алудың бірінші кезеңіне қатысуға мүдделі тұлғаларға техникалық тапсырма беруі;
әлеуетті өнім берушілердің техникалық тапсырмаға сәйкес әзірленген техникалық ұсыныстарды ұсынуы;
сараптау комиссиясының не сарапшының әлеуетті өнім берушілердің техникалық ұсыныстарын қарауы және олармен сатып алынатын тауарлардың, жұмыстардың, көрсетілетін қызметтердің техникалық, сапалық және (немесе) өзге де сипаттамаларына, оларды жеткізудің (орындаудың, көрсетудің) шарттық талаптарына қатысты мәселелерді талқылауы;
сараптау комиссиясының не сарапшының сатып алынатын тауарлардың, жұмыстардың, көрсетілетін қызметтердің техникалық өзіндік ерекшеліктерін әзірлеуі;
мемлекеттік сатып алуды ұйымдастырушының конкурстық құжаттаманы әзірлеуі және оны тапсырыс берушінің бірінші басшысының не жауапты хатшының немесе Қазақстан Республикасының Президенті айқындайтын жауапты хатшының өкілеттігін жүзеге асыратын өзге де лауазымды тұлғаның не оның міндетін атқаратын тұлғаның бекітуі;
мемлекеттік сатып алуды ұйымдастырушының бірінші кезеңде техникалық ұсыныстарды табыс еткен әлеуетті өнім берушілерге екі кезеңді рәсімдерді пайдалана отырып, конкурс тәсілімен мемлекеттік сатып алудың екінші кезеңіне қатысуға шақыру жіберуі;
2) екінші кезеңде конкурс тәсілімен мемлекеттік сатып алуды өткізу үшін көзделген іс-шаралар жүзеге асырылады.
3. Егер әлеуетті өнім беруші екі кезеңдік рәсімдер пайдаланылатын конкурс тәсілімен мемлекеттік сатып алудың бірінші кезеңіне қатысса, ол конкурсқа қатысуға өтінімді қамтамасыз етуді енгізбейді.
4. Екі кезеңдік рәсімдер пайдаланылатын конкурсты өткізу тәртібі мемлекеттік сатып алуды жүзеге асыру қағидаларында айқындалады.

32-бап. Алдын ала біліктік іріктеуі қолданыла отырып,
конкурс тәсілімен мемлекеттік сатып алуды өткізу
ерекшеліктері

1. Алдын ала біліктік іріктеуі қолданыла отырып, конкурс тәсілімен мемлекеттік сатып алу уәкілетті орган айқындайтын тауарлардың, жұмыстардың, көрсетілетін қызметтердің тізбесі бойынша жүзеге асырылады.
2. Алдын ала біліктік іріктеуі қолданыла отырып, конкурс тәсілімен мемлекеттік сатып алу мынадай реттілікте жүзеге асырылады:
1) бірінші кезеңде мемлекеттік сатып алудың бірыңғай ұйымдастырушысы Ұлттық палата кәсіпкерлерінің және өзге де коммерциялық емес ұйымдар өкілдерінің қатысуымен білікті әлеуетті өнім берушілердің тізілімі қалыптастырылады;
2) екінші кезеңде тапсырыс беруші білікті әлеуетті өнім берушілердің тізіліміне енгізілген әлеуетті өнім берушілер арасында конкурс тәсілімен мемлекеттік сатып алуды жүзеге асырады.
3. Конкурстық құжаттамаға, конкурстық құжаттаманың хабарламасына, оның ұсынылуына, конкурсқа қатысуға өтінімге, конкурсқа қатысуға өтінімді қамтамасыз етуге, конкурсқа қатысуға өтінімді қарауға, конкурс тәсілімен мемлекеттік сатып алу қорытындылары туралы хаттамаға қойылатын талаптар осы бапта айқындалған ерекшеліктер ескеріле отырып, конкурс тәсілімен мемлекеттік сатып алуға сәйкес келеді.
4. Алдын ала біліктік іріктеуі қолданыла отырып, конкурс тәсілімен мемлекеттік сатып алуды өткізу тәртібі мемлекеттік сатып алуды жүргізу қағидаларына сәйкес жүзеге асырылады.

33-бап. Мемлекеттік сатып алуды жабық конкурс тәсілімен
өткізу ерекшеліктері

1. Мемлекеттік сатып алуды жабық конкурс тәсілімен өткізу ерекшеліктері:
1) егер мәліметтер Қазақстан Республикасының Үкіметі айқындаған таратылуы шектеулі қызметтік ақпаратты, мемлекеттік құпияны қамтитын болса, құқықтық тәртіп пен ұлттық қауіпсіздіктің қажеттігін қамтамасыз ету үшін тауарларды, жұмыстарды, көрсетілетін қызметтерді;
2) мемлекеттік құпияны және (немесе) Қазақстан Республикасының Үкіметі айқындаған таратылуы шектеулі қызметтік ақпаратты құрайтын тауарларды, жұмыстарды, көрсетілетін қызметтерді сатып алу жағдайларында өткізіледі.
2. Мемлекеттік сатып алуды жабық конкурс тәсілімен өткізу тәртібін Қазақстан Республикасының Үкіметі айқындайды.

34-бап. Қатысуы шектеулі конкурс тәсілімен мемлекеттік
сатып алуды өткізудің ерекшеліктері

Қатысуы шектеулі мемлекеттік сатып алу:
1) мемлекеттік әлеуметтік тапсырыста көзделген қызмет көрсетулерді;
2) кәсіпкерлік қызметтің субъектісі болып табылмайтын жеке тұлғаның жеке меншік құқығында тұрғын үйді;
3) арнаулы әлеуметтік қызмет көрсетудің кепілдік берілген көлемінде көзделген арнаулы әлеуметтік қызметтерді көрсетуді және арнаулы әлеуметтік қызметтерге қажеттілікті бағалау мен айқындау жөніндегі көрсетілетін қызметтерді сатып алған жағдайда жүзеге асырылады.
2. Қатысуы шектеулі конкурс тәсілімен мемлекеттік сатып алуды өткізу тәртібін уәкілетті орган айқындайды.

5-тарау. Аукцион тәсілімен мемлекеттік сатып алуды жүзеге асыру

35-бап. Аукцион тәсілімен мемлекеттік сатып алуды жүзеге
асыру

1. Аукцион тәсілімен мемлекеттік сатып алу нақты уақыт режимiнде мемлекеттiк сатып алу веб-порталында жүзеге асырылады, оның өткізілуін электрондық мемлекеттiк сатып алу саласындағы бірыңғай оператор қамтамасыз етеді.
2. Аукцион бір лотқа өткізіледі, бұл ретте аукционның мәні тауар болып табылады.
Тауарды беретін бірнеше орын болған жағдайда, аукцион тәсілімен өткізілетін лотта тауарды беретін бірнеше орынды көрсетуге жол беріледі.
3. Аукционға қатысуға өтiнiмдерді қарастыру қорытындысы бойынша айқындалған, аукциондық құжаттаманың талаптарына сәйкес келетiн және аукциондық комиссия аукционға қатысушы деп таныған әлеуетті өнім берушілер аукционға қатысады.
4. Аукциондық құжатқа, хабарламаға, аукциондық құжатты ұсынуға, аукционға қатысуға өтінімге, аукционға қатысуға өтінімді қамтамасыз етуге, аукционға қатысуға өтінімдерді қарауға қойылатын талаптар конкурс тәсілімен мемлекеттік сатып алуға сәйкес келеді.

36-бап. Аукционға қатысуға өтінімдерді қарау, аукционға
қатысуға рұқсат беру

1. Аукциондық комиссия аукционға қатысуға өтінімдерді қарауды біліктілік талаптарына, аукциондық құжаттаманың талаптарына сәйкес келетін әлеуетті өнім берушілерді айқындау мақсатында жүзеге асырады.
2. Мемлекеттік сатып алуды ұйымдастырушы әлеуетті өнім берушілер ұсынатын тауарлардың аукциондық құжаттамасының ажырамас бөлігі болып табылатын техникалық ерекшелікке сәйкес келуіне қатысты сараптамалық қорытынды дайындау үшін сараптау комиссиясын құруға не сарапшыны айқындауға құқылы.
Мемлекеттік сатып алуды бірыңғай ұйымдастырушы мемлекеттік сатып алуды ұйымдастыру және өткізу кезінде тапсырыс беруші әлеуетті өнім берушілер ұсынатын тауарлардың аукциондық құжаттамасының ажырамас бөлігі болып табылатын техникалық ерекшелікке сәйкестігіне қатысты сараптамалық қорытынды дайындау үшін сараптау комиссиясын құрады не сарапшыны айқындайды.
Мынадай адам:
1) мемлекеттік сатып алу рәсімдерінің нәтижелеріне мүдделі;
2) тапсырыс берушімен, мемлекеттік сатып алуды ұйымдастырушымен, мемлекеттік сатып алуды бірыңғай ұйымдастырушымен не олардың ведомстволық бағынысты, еншілес және тәуелді ұйымдарымен не әлеуетті өнім берушілермен еңбек қатынастармен байланысты;
3) тапсырыс берушінің, мемлекеттік сатып алуды ұйымдастырушының, мемлекеттік сатып алуды бірыңғай ұйымдастырушының не олардың ведомстволық бағынысты, еншілес және тәуелді ұйымдарының бірінші басшыларының жақын туысы болып табылатын сарапшы бола алмайды. Осы тармақтың үшінші бөлігінде белгіленген талаптарға сәйкес келетін сарапшылар болмаған жағдайда, мемлекеттік сатып алуды ұйымдастырушы не тапсырыс беруші сарапшы ретінде жұмыс істеу үшін тиісті бейіндегі мемлекеттік қызметшілерді не мамандығы сатып алынатын тауарларға сәйкес келетін өзге мамандарды тартады. Мемлекеттік қызметшілер сарапшылар ретінде өтеусіз негізде тартылады, ал өзге мамандар тараптардың уағдаластығы бойынша ақылы да, өтеусіз де негізде тартылады.
Сарапшылар ретінде тартылатын мемлекеттік қызметшілер осы тармақтың үшінші бөлігінде белгіленген талаптарға сәйкес келуі тиіс.
Аукциондық комиссия шешім қабылдаған кезде сарапшылардың дауыс беру құқығы жоқ.
Ақылы негізде сарапшылар ретінде тартылатын адамдарды таңдау осы Заңға сәйкес жүзеге асырылады.
3. Әлеуетті өнім берушілердің біліктілік талаптарына және аукциондық құжаттаманың талаптарына сәйкестігі тұрғысынан аукционға қатысуға өтінімдерді қарау нәтижелері бойынша конкурсқа қатысуға алдын ала рұқсат беру хаттамасы ресімделеді, оған аукциондық комиссияның төрағасы және барлық мүшелері, сондай-ақ аукциондық комиссияның хатшысы аукционға қатысуға әлеуетті өнім берушілерге алдын ала рұқсат беру туралы шешім қабылданған күні қол қояды.
Аукционға қатысуға алдын ала рұқсат беру хаттамасында әлеуетті өнім берушілердің біліктілік талаптарына және аукциондық құжаттаманың талаптарына сәйкес келмеуі туралы себептер көрсетілген ақпарат қамтылуға тиіс.
Әлеуетті өнім берушілер біліктілік талаптарына және аукциондық құжаттаманың талаптарына сәйкес келген жағдайда, аукционға қатысуға алдын ала рұқсат беру хаттамасы ресімделмейді.
4. Аукциондық комиссия біліктілік талаптарына және аукциондық құжаттаманың талаптарына сәйкес келмейтін әлеуетті өнім берушілерді анықтаған жағдайда, мұндай әлеуетті өнім берушілерге аукционға қатысуға алдын ала рұқсат беру хаттамасы жарияланған күннен бастап үш жұмыс күні ішінде аукционға қатысуға өтінімдерді біліктілік талаптарына және аукциондық құжаттаманың талаптарына сәйкес келтіру құқығын береді.
5. Осы баптың 4-тармағына сәйкес біліктілік талаптарына және аукциондық құжаттаманың талаптарына сәйкес келтірілген конкурсқа қатысуға өтінімдерді қайтадан қарау кезінде аукциондық комиссия:
1) аукционға қатысуға өтінімдерді қарауды, бағалауды және салыстыруды жеңілдету үшін әлеуетті өнім берушілерден олардың өтінімдеріне байланысты материалдар мен түсіндірулерді жазбаша нысанда және (немесе) электрондық құжат нысанында сұратуға;
2) аукционға қатысуға өтінімдерде қамтылған мәліметтерді нақтылау мақсатында тиісті жеке немесе заңды тұлғалардан, мемлекеттік органдардан қажетті ақпаратты жазбаша нысанда және (немесе) электрондық құжат нысанында сұратуға құқылы.
Аукционға қатысуға өтінімдерді біліктілік талаптарына және аукциондық құжаттаманың талаптарына сәйкес келтірудің осы баптың 4-тармағында көзделген мерзімі өткеннен кейін аукционға қатысуға өтінімді жеткіліксіз құжаттармен толықтырудан, аукционға қатысуға өтінімде ұсынылған құжаттарды ауыстырудан, тиісті түрде ресімделмеген құжаттарды сәйкес келтіруден көрінетін аукционға қатысуға өтінімді аукциондық құжаттаманың талаптарына сәйкес келтіруге байланысты аукциондық комиссияның сауал жіберуіне және өзге де әрекеттеріне жол берілмейді.
Аукциондық комиссия конкурсқа қатысуға өтінімді, егер онда ұсынылған өтінім мәнін қозғамай түзетуге болатын грамматикалық немесе арифметикалық қателер болса, конкурстық құжаттаманың талаптарына жауап беретін ретінде қарайды.
6. Әлеуетті өнім берушіге осы баптың 4-тармағына сәйкес аукционға қатысуға өтінімдерді біліктілік талаптарына және аукциондық құжаттаманың талаптарына сәйкес келтіргеннен кейін, егер:
1) ол және (немесе) оның қосалқы мердігері осы Заңда және электрондық мемлекеттік сатып алуды өткізу қағидаларында айқындалған негіздер бойынша біліктілік талаптарына сай келмейді деп айқындалса;
2) ол осы Заңның 6-бабының талаптарын бұзса;
3) оның конкурсқа қатысуға өтінімі осы Заңда және мемлекеттік сатып алуды өткізу қағидаларында айқындалған негіздер бойынша конкурстық құжаттаманың талаптары мен шарттарына сәйкес келмейді деп айқындалса, аукционға қатысуға рұқсат берілмейді (конкурсқа қатысушы деп танылмайды).
7. Егер әлеуетті өнім берушіге осы баптың 6-тармағының 2) тармақшасында көзделген негіздер бойынша аукционға қатысуға рұқсат берілмесе, онда:
1) аукционға қатысуға рұқсат беру туралы хаттамада мұндай әлеуетті өнім берушінің аукционға қатысуға өтінімін қабылдамаудың негіздемелері көрсетіледі;
2) осы Заңның 6-бабының талаптарын бұзған әлеуетті өнім беруші туралы мәліметтер мемлекеттік сатып алуға жосықсыз қатысушылардың тізіліміне енгізілуге жатады.
8. Аукциондық комиссия конкурсқа қатысуға өтінімдерді қайтадан қарау нәтижелері бойынша:
1) біліктілік талаптарына және аукциондық құжаттаманың талаптарына сәйкес келетін әлеуетті өнім берушілерді айқындайды және аукционға қатысушылар деп таниды;
2) аукционға қатысуға рұқсат беру туралы хаттаманы ресімдейді.
9. Аукционға қатысуға рұқсат беру туралы хаттамаға аукциондық комиссияның төрағасы және отырысқа қатысқан барлық мүшелері, сондай-ақ аукциондық комиссияның хатшысы аукционға қатысуға әлеуетті өнім берушілерге рұқсат беру (конкурсқа қатысушылар деп тану) туралы шешім қабылданған күні қол қояды.
Аукциондық комиссияның хатшысы конкурсқа қатысуға рұқсат беру туралы хаттаманы өтінімдері тіркеу журналында автоматты түрде тіркелген барлық әлеуетті өнім берушілерді электрондық почта арқылы автоматты түрде хабардар ете отырып, оған қол қойылған күні мемлекеттік сатып алу веб-порталында жариялайды.
10. Конкурсқа қатысуға рұқсат туралы аукциондық комиссияның шешіміне осы Заңның 51-бабында белгіленген тәртіпте шағымдануы мүмкін.

37-бап. Аукцион өткізу

1. Аукцион мемлекеттік сатып алу веб-порталында рұқсат хаттамасында көрсетілген күні және мерзімде өткізіледі.
Аукционды өткізу күні аукционға қатысуға өтінімдерді қарау мерзімі аяқталатын күннен бастап екі жұмыс күні өткеннен кейінгі келесі жұмыс күні болып табылады.
2. Аукционға қатысушылар деп танылған әлеуетті өнім берушілер аукционға қатысады.
3. Аукцион өткізілетін аукционның нысанасы болып табылатын тауарды сатып алу үшін аукционға қатысушының ең төменгі бастапқы бағасынан бастап баға туралы ағымдағы ұсынысты аукцион адымына төмендету жолымен жүргізіледі.
Аукцион адымы өткізілетін аукционның нысанасы болып табылатын тауарды сатып алу үшін аукционға қатысушының ең төменгі бастапқы бағасынан бастап бөлінген соманың жарты (0,5) пайызынан бес пайызына дейінгіні құрайды.
4. Аукционды өткізу кезінде аукционға қатысушылар өткізілетін аукционның нысанасы болып табылатын тауардың бағасы туралы ұсыныстар береді, ол баға туралы ағымдағы ең төменгі ұсынысты аукцион адымы шегіндегі шамаға төмендетуді көздейді.
5. Аукционды өткізу кезінде аукционның кез келген қатысушысы ағымдағы ең төмен ұсыныс болмаған жағдайда, аукцион адымына қарамастан, өткізілетін аукционның нысанасы болып табылатын тауарды сатып алу үшін аукционға қатысушының ең төменгі бастапқы сомасынан төмендетілген, өткізілетін аукционның нысанасы болып табылатын тауардың бағасы туралы ұсыныс беруге құқылы.
6. Егер аукционның осы қатысушысы өткізілетін аукционның нысанасы болып табылатын тауардың бағасы туралы ағымдағы ең төмен ұсынысты берген болса, аукционға қатысушының аукционның нысанасы болып табылатын тауардың бағасы туралы осындай ұсыныстан төмен болатын, өткізілетін аукционның нысанасы болып табылатын тауардың бағасы туралы ұсыныс беруге құқығы жоқ.
7. Аукционға қатысушылардың өткізілетін аукционның нысанасы болып табылатын тауардың бағасы туралы ұсыныстарын қабылдау уақыты аукционды өткізу басталғаннан бастап отыз минутты, сондай-ақ өткізілетін аукционның нысанасы болып табылатын тауардың бағасы туралы соңғы ұсыныс келіп түскеннен кейінгі он минутты құрайды. Егер көрсетілген уақыт ішінде өткізілетін аукционның нысанасы болып табылатын тауардың неғұрлым төмен бағасы туралы бір де бір ұсыныс келіп түспесе, аукцион аяқталады.
8. Мемлекеттік сатып алу веб-порталында аукцион жеңімпазын ең төмен баға негізінде автоматты түрде айқындайды.
Екінші орын алған аукционға қатысушы ең төмен бағадан кейінгі баға негізінде айқындалады.
9. Егер өткізілетін аукционның нысанасы болып табылатын тауардың аукционның басқа бір қатысушысы ұсынған бағасына тең бағасы ұсынылса, аукционның нысанасы болып табылатын ұсыныстарға қарағанда бұрынырақ келіп түскен басқа тауардың бағасы туралы ұсыныс артық болып танылады.
10. Егер аукционды өткізу басталғаннан кейінгі отыз минут ішінде аукционға қатысушылардың бір де біреуі өткізілетін аукционның нысанасы болып табылатын тауардың бағасы туралы ұсыныс бермеген болса, бастапқы бағасы ең төмен болып табылатын әлеуетті өнім беруші жеңімпаз боп танылады.

38-бап Аукцион тәсілімен мемлекеттік сатып алу
қорытындылары туралы хаттама

1. Аукцион тәсілімен мемлекеттік сатып алу қорытындылары туралы хаттама автоматты түрде қалыптастырылады және аукционды өткізу аяқталған күні мемлекеттік сатып алу веб-порталына орналастырылады.
2. Мемлекеттік сатып алу қорытындылары туралы хаттамаға осы Заңда белгіленген тәртіппен аукционға қатысушы шағымдануға болады.

39-бап. Аукцион тәсiлiмен мемлекеттiк сатып алуды өтпеді
деп танудың негіздері мен салдары

1. Аукцион:
1) аукцион тәсiлiмен мемлекеттiк сатып алуға қатысуға өтінімдер берілмесе;
2) аукцион тәсiлiмен мемлекеттiк сатып алуға қатысуға екеуден аз өтінім берілсе;
3) егер аукционға қатысуға бірде бір әлеуетті өнім беруші жіберілмеген жағдайда;
4) егер аукционға қатысуға бір әлеуетті өнім беруші жіберілмеген жағдайда өтпеді деп танылады.
2. Егер аукцион тәсiлiмен мемлекеттiк сатып алуды өтпеді деп танылса тапсырыс беруші:
1) аукцион тәсілімен мемлекеттік сатып алуды қайтадан өткізу туралы;
2) аукциондық құжаттаманы өзгерту және аукцион тәсілімен мемлекеттік сатып алудың қайтадан өткізіу туралы;
3) мемлекеттік сатып алуды бір көзден алу тәсілімен жүзеге асыру туралы шешімдердің бірін қабылдайды.
3. Егер аукцион тәсілімен мемлекеттік сатып алу өткізілмеді деп танылса, тапсырыс беруші мынадай:
1) аукционға қатысуға ұсынылған өтінімдері болмаған. Бұл ретте бір көзден сатып алу тәсілімен мемлекеттік сатып алу туралы шарт жасасатын әлеуетті өнім берушіні тапсырыс беруші айқындайды;
2) аукционға қатысуға екеуден кем өтінім берілген. Бұл ретте мемлекеттік сатып алу туралы шарт аукционға қатысуға өтінім берген әлеуетті өнім берушімен жасалады. Жасалған шарттың бағасы әлеуетті өнім берушінің бастапқы бағасынан аспауы тиіс;
3) егер аукционға қатысуға бірде бір әлеуетті өнім беруші жіберілмеген. Бұл ретте шарт осы Заңның 6-бабының талаптарын бұзған адамды қоспағанда, аукционға қатысуға берілген өтінімде көрсетілген ең төмен бастапқы баға ұсынған әлеуетті өнім берушімен жасалады.Мемлекеттік сатып алу туралы жасалған шарттың бағасы аукционға қатысуға берілген өтінімде көрсетілген әлеуетті өнім берушінің бастапқы бағасынан аспауы тиіс;
4) егер конкурсқа қатысуға бір ғана әлеуетті өнім беруші жіберілген жағдайларда бір көзден сатып алуды жүзеге асырады. Бұл ретте мемлекеттік сатып алу туралы шарт аукционға қатысуға жіберілген әлеуетті өнім берушімен жасалады және жасалған шарттың бағасы аукционға қатысуға өтінімде көрсетілген бастапқы бағадан аспауы тиіс.

6-тарау. Баға ұсыныстарын сұрату тәсілімен мемлекеттік сатып алу

40-бап. Баға ұсыныстарын сұрату тәсілімен мемлекеттік
сатып алуды жүзеге асырудың негіздері

1. Егер осындай біртекті тауарлардың, жұмыстардың, көрсетілетін қызметтердің құндық мәндегі жылдық көлемі тиісті қаржы жылына республикалық бюджет туралы заңмен белгіленген айлық есептік көрсеткіштің төрт мың еселенген мөлшерінен аспаса, біртекті тауарларға, жұмыстарға, көрсетілетін қызметтерге баға ұсыныстарын сұрату тәсiлiмен мемлекеттiк сатып алу жүргізіледі, бұл ретте баға шешуші шарт болып табылады.
2. Баға ұсыныстарын сұрату тәсiлiмен бiртектi тауарлардың, жұмыстардың, көрсетілетін қызметтердiң бiрнеше түрлерiн мемлекеттiк сатып алуды жүзеге асыру кезiнде мемлекеттiк сатып алуды ұйымдастырушы тауарларды, жұмыстарды, көрсетілетін қызметтердi олардың бiртектi түрлері бойынша және (немесе) тауарларды беру (жұмыстарды орындау, қызметтер көрсету) орны бойынша лоттарға бөлуге мiндеттi.
Баға ұсыныстарын сұрату тәсiлiмен бiртектi тауарларды, жұмыстарды, көрсетілетін қызметтердi мемлекеттiк сатып алуды жүзеге асыру кезiнде мемлекеттiк сатып алуды ұйымдастырушы тауарларды, жұмыстарды, көрсетілетін қызметтердi оларды беру (орындау, көрсету) орны бойынша лоттарға бөлуге мiндеттi.
Осы тармақта көзделген жағдайларда баға ұсыныстарын сұрату тәсiлiмен мемлекеттiк сатып алудың жеңiмпазын айқындау әрбiр лот бойынша жүзеге асырылады.
3. Баға ұсыныстарын сұрату тәсілін қолдану мақсатында біртекті тауарларды, жұмыстарды, көрсетілетін қызметтерді мемлекеттік сатып алудың жылдық көлемін қаржылық жыл ішінде олардың бірінің мөлшері осы баптың 1-тармағында көзделгеннен кем болатын бөлікке бөлшектеуге жол берілмейді.

41-бап. Баға ұсыныстарын сұрату тәсілімен мемлекеттік
сатып алуды ұйымдастыру және өткізу

1. Мемлекеттiк сатып алуды ұйымдастырушы баға ұсыныстарын табыс ету мерзiмi аяқталғанға дейiн бес жұмыс күнiнен кешiктiрмей, мемлекеттік сатып алу веб-порталында мынадай:
1) мемлекеттiк сатып алу үшiн бөлiнген сомаларды көрсете отырып, өткізiлетiн мемлекеттiк сатып алудың нысанасы болып табылатын тауарлардың саны, орындалатын жұмыстардың, көрсетілетін қызметтердiң көлемi туралы ақпаратты;
2) ұлттық стандарт немесе Қазақстан Республикасы өндірушілерінің коммерциялық емес ұйымдары бекіткен үкіметтік емес стандарт болған кезде оны көрсете отырып, сатып алынатын тауарлардың, жұмыстардың, қызметтердің қысқаша сипаты. Рұқсаттардың болуын талап ететін тауарларды, жұмыстарды, көрсетілетін қызметтерді сатып алған жағдайда олардың болуы туралы талаптары көрсетіледі;
3) тауарды беру, жұмыстарды орындау, қызметтердi көрсету орнын;
4) тауарды берудiң, жұмыстарды орындаудың, қызметтердi көрсетудiң талап етiлетiн мерзiмдерiн;
5) әлеуетті өнім берушілердiң баға ұсыныстарын табыс етуді бастау және аяқтау мерзiмi туралы ақпаратты;
6) техникалық ерекшеліктерін көрсете отырып, мемлекеттiк сатып алу туралы шарт жобасын мемлекеттік және орыс тілдерінде орналастыруға міндетті.
2. Осы баптың 1-тармағында көзделген, орналастырылатын ақпаратта мемлекеттік сатып алуды мынадай:
1) негізгі (орнатылған) жабдықтарды толық жасақтау, жаңғырту және толық жарақтандыру үшін;
2) тауарды лизингке беру жөніндегі қызмет көрсетулерді берушіні айқындау үшін және лизингтің нысанасын егжей-тегжейлі сипаттау қажеттігі туындағанда;
3) тапсырыс берушіде бар тауарды жөндеу және (немесе) оған техникалық қызмет көрсету үшін жүзеге асыру жағдайларын қоспағанда, тауар таңбаларына, қызмет көрсету белгілеріне, фирмалық атауларына, патенттерге, пайдалы модельдерге, өнеркәсіптік үлгілерге, тауардың шығарылған жерінің атауына және өндірушінің атауына, сондай-ақ сатып алынатын тауардың, жұмыстың, көрсетілетін қызметтің жекелеген әлеуетті өнім берушіге тиесiлiгiн айқындайтын өзге де сипаттамаларға арналған сілтемелердің болуына жол берілмейді.
3. Әлеуетті өнім беруші өзгерістер және (немсе) толықтырулар енгізуде жол берілмейтін, электрондық, мемлекеттік сатып алуды өткізу қағидаларында көзделген мәліметтерді қамтитын бір ғана баға ұсынысын беруге құқылы.
4. Әлеуетті өнім берушінiң баға ұсынысын беруі оның мемлекеттiк сатып алу туралы шарт жобасында көзделген талаптарды сақтай отырып, тауарды берудi, жұмыстарды орындауды, қызметтер көрсетудi жүзеге асыруға келiсiм бiлдiру нысаны болып табылады.
5. Баға ұсыныстарын табыс ету мерзімі аяқталғаннан кейін мемлекеттік сатып алу веб-порталы баға ұсыныстарын сұрату тәсілімен мемлекеттік сатып алу қорытындыларын автоматты шығаруды жүргізеді.
Ең төмен баға ұсынысын берген әлеуетті өнім беруші жеңімпаз деп танылады.
Мемлекеттік сатып алу веб-порталы баға ұсыныстарын салыстыруды автоматты түрде жүргізеді.
Екінші орын алған әлеуетті өнім беруші ең аз баға ұсынысынан кейінгі баға негізінде айқындалады.
6. Осы Заңның 49-бабында көзделген жағдайларды қоспағанда, мемлекеттік сатып алуды ұйымдастырушы мен әлеуетті өнім берушінің арасында мемлекеттік сатып алу веб-порталы арқылы не мемлекеттік сатып алу веб-порталын қолданбай, өзге тәсілдермен оның баға ұсынысына қатысты келіссөздер жүргізілуіне жол берілмейді.
7. Егер баға ұсыныстарын табыс ету мерзімі ішінде әлеуетті өнім берушінің бір ғана баға ұсынысы табыс етілген болса, мемлекеттік сатып алу веб-порталы автоматты түрде мұндай мемлекеттік сатып алуды өтпеді деп таниды және мемлекеттік сатып алуды ұйымдастырушы осы әлеуетті өнім берушіден сатып алуды жүзеге асырады. Бұл ретте жасалған мемлекеттік сатып алу туралы шарттың бағасы әлеуетті өнім берушінің баға ұсынысынан аспауы тиіс.
8. Егер баға ұсыныстарын табыс ету мерзімі ішінде әлеуетті өнім берушілердің бірде-бір баға ұсынысы табыс етілмесе, мемлекеттік сатып алу веб-порталы автоматты түрде мұндай мемлекеттік сатып алуды өтпеді деп таниды және мемлекеттік сатып алуды ұйымдастырушы баға ұсыныстарын сұрату тәсілімен қайталама мемлекеттік сатып алуды жүзеге асырады.
9. Әлеуетті өнім берушінің баға ұсынысы:
1) егер ол осы тауарларды, жұмыстарды, көрсетілетін қызметтерді сатып алу үшін бөлінген сомадан асып түскен;
2) осы Заңның 6-бабы 1-тармағының 3), 4), 5) және 6) тармақшаларында көзделген жағдайларда мемлекеттік сатып алу веб-порталының одан автоматты түрде бас тартуына жатады.
Өзге негіздер бойынша баға ұсыныстарынан бас тартуға жол берілмейді.
10. Егер баға ұсыныстары осы баптың 6-тармағында көзделген негіздер бойынша мемлекеттік сатып алудың веб-порталында одан автоматты түрде бас тартылғаннан кейін әлеуетті өнім берушілердің екіден аз баға ұсынысы қалған болса, онда мұндай мемлекеттік сатып алу өтпеді деп танылады және мемлекеттік сатып алуды ұйымдастырушы баға ұсыныстарын сұрату тәсілімен мемлекеттік сатып алуды қайтадан жүзеге асырады.
11. Баға ұсыныстарын сұрату тәсілімен мемлекеттік сатып алу қорытындылары оларды шығарғаннан кейін мемлекеттік сатып алу веб-порталында автоматты түрде жарияланады.

7-тарау. Бір көзден алу тәсілімен мемлекеттік сатып алу

42-бап. Бір көзден алу тәсілімен мемлекеттік сатып алуды
жүзеге асыру негіздері

1. Бір көзден алу тәсілімен мемлекеттік сатып алу осы баптың 2 және 3-тармақтарында көзделген жағдайларда жүзеге асырылады.
2. Өткізілмеген мемлекеттік сатып алу бойынша бiр көзден алу тәсiлiмен мемлекеттiк сатып алу, егер:
1) осы Заңда көзделген жағдайларда конкурс (аукцион) тәсілімен мемлекеттік сатып алу өткізілмеген деп танылған жағдайда жүзеге асырылады. Осы ереже конкурс тәсілімен өткізілген мемлекеттік сатып алу Қазақстан Республикасының заңдарына сәйкес жарамсыз деп танылған жағдайларға қолданылмайды;
2) осы Заңның 41-бабының 8 және 10-тармақтарында көзделген мемлекеттік сатып алуды ұйымдастырушы қолданған шаралар мемлекеттік сатып алу туралы шартты жасасуға әкелмеген жағдайларда жүзеге асырылады.
3. Бір көзден алу тәсілімен мемлекеттік сатып алу тікелей мемлекеттік сатып алу туралы шарт жасасу арқылы мынадай:
1) табиғи монополия субъектілерінен реттелетін тауарларды, жұмыстарды, көрсетілетін қызметтерді сатып алу;
2) мемлекеттік монополия субъектісінен мемлекеттік монополияға жатқызылған қызмет бойынша тауарларды, жұмыстарды, көрсетілетін қызметтерді сатып алу;
3) Қазақстан Республикасының заңнамасында белгіленген бағалар, тарифтер, алымдар және төлемдер бойынша тауарларды, жұмыстарды, көрсетілетін қызметтерді сатып алу;
4) сатып алынатын тауарларға, көрсетілетін қызметтерге қатысты ерекше құқықтарға ие тұлғадан зияткерлік меншік объектілері болып табылатын тауарларды, көрсетілетін қызметтерді сатып алу;
5) еңсерілмейтін күштің туындауы салдарынан, оның ішінде төтенше жағдайлардың салдарын оқшаулау және (немесе) жою үшiн электр энергетикасы объектiлерiндегi, тiршiлiктi қамтамасыз ететiн коммуникациялық жүйелердегi, темiржол, әуе, автомобиль, cу көлiгi объектiлерiндегi, тазарту құрылыстарындағы, мұнай құбыржолдарындағы, газ құбыржолдарындағы аварияларды жою үшiн және жедел медициналық араласу қажеттілігі үшін, сондай-ақ коммуникациялардың, тетiктердiң, агрегаттардың, қосалқы бөлшектердiң және материалдардың тасымал жолында тез арада қалпына келтiрудi талап ететiн сынуы, iстен шығуы туындаған кезде тауарларды, жұмыстарды, көрсетілетін қызметтердi сатып алу;
6) Қазақстан Республикасының саяси, экономикалық және әлеуметтік тұрақтылығына немесе оның әкімшілік-аумақтық бірлігіне қауіп төндіретін ахуал туындаған жағдайларда Қазақстан Республикасы Үкіметінің резервінен бөлінген ақша есебінен тауарларды, жұмыстарды, көрсетілетін қызметтерді сатып алу;
7) нарыққа реттеушілік әсер ету үшін мемлекеттік материалдық резервке тауарлар сатып алу;
8) жұмылдыру тапсырыстарын орындайтын ұйымдардан жұмылдыру резервінің материалдық құндылықтарын сақтау жөнінде көрсетілетін қызметтерді сатып алу;
9) мемлекеттік материалдық резервтің жаңарту тәртібімен шығарылатын материалдық құндылықтарын бірінші кезектегі тәртіппен сатып алу;
10) жедел-іздестіру қызметін, сондай-ақ тергеу іс-қимылдарын жүзеге асыру үшін Қазақстан Республикасының заңнамасына сәйкес оларды жүзеге асыруға уәкілеттік берілген органдардың:
жедел-іздестіру қызметін жүзеге асыратын органдарға құпия түрде жәрдем көрсетуге келісім берген адамдар көрсететін қызметтерді;
қызметтік үй-жайларды, көліктік және өзге де техникалық құралдарды, мүліктерді;
жасырын ұйымдар құру үшін тауарларды, жұмыстарды, көрсетілетін қызметтерді;
қажетті ғылыми-техникалық немесе өзге де арнайы білімі бар лауазымды адамдар мен мамандар көрсететін қызметтерді сатып алу;
11) табиғат пайдалану құқығын сатып алу;
12) стратегиялық маңызы бар өндірістер үшін шикізат ресурсы болып табылатын, Қазақстан Республикасының аумағында өндірілмейтін және уәкілетті орган бекіткен тауарлар тізбесі бойынша шетелден сатып алынатын тауарларды сатып алу;
13) рейтингтiк агенттiктер көрсететiн қызметтердi, егер жеке тұлға екінші деңгейлі банкті өзі айқындаса, алушылардың (жеке тұлғалардың) шоттарына жалақыны есептеу жөніндегі қызмет көрсету бөлігінде, сондай-ақ жеке тұлғалардың қолма-қол ақшаны қабылдау және беру бойынша қызмет көрсету бөлігінде қаржылық көрсетілетін қызметтерді сатып алу;
14) банк қызметімен байланысты қаржылық көрсетілетін қызметтерді сатып алу;
15) зағип және көзі нашар көретін азаматтар үшін мамандандырылған кiтапханалардың қызмет көрсетулерін сатып алу;
16) лизинг қызметін жүзеге асыру кезінде тауарларды кейіннен лизингке беру үшін сатып алу;
17) заңды тұлғалардың жарғылық капиталындағы бағалы қағаздарды, үлестерді сатып алу;
18) монетарлық қызметті, сондай-ақ Қазақстан Республикасының Ұлттық қорын және бірыңғай жинақтаушы зейнетақы қорының зейнетақы активтерін басқару жөніндегі қызметті жүзеге асыру үшін қажетті тауарларды, жұмыстарды, көрсетілетін қызметтерді сатып алу;
19) шетелдік депозитарийлердің және өзге де қаржы ұйымдарының көрсетілетін қызметтерін сатып алуды қоса алғанда, депозитарлық қызметті жүзеге асыру үшін қажетті тауарларды, жұмыстарды, көрсетілетін қызметтерді сатып алу;
20) Қазақстан Республикасының сайлау туралы заңнамасында көзделген тауарлар мен көрсетілетін қызметтерді Қазақстан Республикасының Үкіметі бекіткен тізбе бойынша сатып алу;
21) мемлекеттік және ведомстволық наградаларды және олардың құжаттарын, Қазақстан Республикасы Парламенті депутатының төсбелгісін және оның құжатын, мемлекеттік сенім таңбаларын, Қазақстан Республикасы азаматтарының паспорттарын (оның ішінде қызметтік және дипломатиялық), жеке куәліктерін, шетелдіктің Қазақстан Республикасында тұруға ықтиярхатын, азаматтығы жоқ адамның куәлігін, азаматтық хал актілерін тіркеу туралы куәліктерді дайындау жөніндегі көрсетілетін қызметтерді сатып алу, сондай-ақ Қазақстан Республикасының Үкіметі айқындаған өнім берушілерден Қазақстан Республикасының Үкіметі бекіткен тізбе бойынша арнайы дәрежеде қорғауды талап ететін баспа өнімдерін сатып алу;
22) Қазақстан Республикасының Үкіметі бекіткен тізбе бойынша Қазақстан Республикасының халықаралық шарттарына сәйкес, сондай-ақ Қазақстан Республикасы мүшесі болып табылатын халықаралық ұйымдар қаржыландыратын инвестициялық жобаларды іске асыру шеңберінде жүзеге асырылатын тауарларды, жұмыстарды, көрсетілетін қызметтерді сатып алу;
23) мемлекеттер, мемлекеттердiң үкiметтерi, халықаралық және мемлекеттiк ұйымдар, қызметi қайырымдылық және халықаралық сипаттағы шетелдiк үкiметтiк емес қоғамдық ұйымдар мен қорлар өтеусiз негiзде Қазақстан Республикасының Үкiметiне беретін грант ақшаларын, сондай-ақ оларды беру туралы келiсiмдерде тауарларды, жұмыстарды, көрсетілетін қызметтердi сатып алудың өзгеде рәсiмдерi көзделген жағдайларда, осы гранттарды бiрлесіп қаржыландыруға бөлiнген ақшаны пайдаланумен байланысты тауарларды, жұмыстарды, көрсетілетін қызметтердi сатып алу;
24) жеке тұлғалар үшін мемлекеттiк бiлiм беру тапсырысына байланысты көрсетілетін қызметтердi сатып алу (егер жеке тұлға білім беру ұйымын өзі таңдаса);
25) қызметкерлерді шетелде даярлау, қайта даярлау және олардың біліктілігін арттыру жөнінде көрсетілетін қызметтерді сатып алу;
26) Қазақстан Республикасының азаматтарын шетелде емдеу, сондай-ақ оларды тасымалдау әрі олармен бірге жүру жөніндегі көрсетілетін қызметтерді сатып алу;
27) адвокаттардың Қазақстан Республикасының заңдарына сәйкес оған ақы төлеуден босатылған адамдарға көрсететін қызметтерін сатып алу;
28) спорт түрлері бойынша спортшыларды ұстауға, қамтамасыз етуге, даярлауға және олардың спорттық іс-шараларға қатысуына, оның ішінде спорттық іс-шараларды ұйымдастыруға және өткізуге байланысты көрсетілетін қызметтерді сатып алу оларға қатысты дене шынықтыру және спорт саласындағы уәкілетті орган немесе жергілікті атқарушы орган Қазақстан Республикасының мемлекеттік мүлік туралы заңнамасына сәйкес басқаруды жүзеге асыратын мемлекеттік кәсіпорындардан жүзеге асырылады;
29) Қазақстан Республикасының шетелдегі мекемелерінің, сондай-ақ олардың атынан әрекет ететін тапсырыс берушілердің оқшауланған бөлімшелерінің шет мемлекеттің аумағында өз қызметін қамтамасыз ету үшін тауарларды, жұмыстарды, көрсетілетін қызметтерді сатып алуы;
30) өкілдік шығыстарына байланысты тауарларды, көрсетілетін қызметтерді сатып алу;
31) дамуға көмек көрсету шеңберінде шет мемлекеттердің аумағында тауарларды, жұмыстарды және көрсетілетін қызметтерді сатып алу;
32) қағаз және (немесе) электрондық жеткізгіштердегі мерзiмдi баспа басылымдарын сатып алу;
33) халықаралық ақпарат ұйымдарының ақпарат ұсыну жөніндегі көрсетілетін қызметтерін сатып алу;
34) мемлекеттік органның тауарларды, жұмыстарды, көрсетілетін қызметтерді;
дауыс беретін акцияларының (жарғылық капиталға қатысу үлестерінің) жүз пайызы мемлекетке тиесілі, тиісті өкілеттіктері Қазақстан Республикасының заңдарында, Қазақстан Республикасы Президентінің жарлықтарында белгіленген акционерлік қоғамдардан және шаруашылық серіктестіктерінен;
Қазақстан Республикасының мемлекеттік мүлік туралы заңнамасына сәйкес оларға қатысты басқаруды жүзеге асыратын, тиісті өкілеттіктері Қазақстан Республикасының заңдарында, Қазақстан Республикасы Президентінің жарлықтарында белгіленген мемлекеттік кәсіпорындардан сатып алуы;
35) егер қандай да бiр өнім берушіден тауарларды, жұмыстарды, көрсетілетін қызметтердi сатып алған мемлекеттік кәсіпорында, дауыс беретін акцияларының (жарғылық капиталға қатысу үлестерінің) елу және одан жоғары пайызы мемлекетке тиесілі заңды тұлғада және олармен үлестес заңды тұлғада қолда бар тауарлармен, жабдықпен, технологиямен, жұмыстармен немесе көрсетілетін қызметтермен бiрiздендiру, стандарттау немесе үйлесiмдiлiгiн қамтамасыз ету мақсатында нақ сол өнім берушіден басқа да сатып алуды жүргiзу қажеттiгi туындаса жүзеге асырылады.
36) мемлекеттік кәсіпорындардың, дауыс беретін акцияларының (жарғылық капиталға қатысу үлестерінің) елу және одан жоғары пайызы мемлекетке тиесілі заңды тұлғалардың және ұзақ мерзімдік бес жылдық шарт бойынша олармен үлестес заңды тұлғалардың, егер соңғы үш жыл ішінде мұндай тауарларды сатып алу Қазақстан Республикасының шегінен тыс жүргізілген болса, тапсырыс берушінің техникалық шарттары бойынша Қазақстан Республикасында тәжірибелік өнеркәсіптік үлгіні өндіруді және тауарларды сериялық өндіруді ұйымдастыруды көздейтін отандық тауар өндірушілерден тауарларды сатып алуы;
37) түзеу мекемелерiнiң мемлекеттiк кәсiпорындары өндiретiн, орындайтын, көрсететiн тауарларды, жұмыстарды, қызметтердi сатып алу. Тауарлардың, жұмыстардың, көрсетілетін қызметтердiң тiзбесi мен көлемiн, сондай-ақ осындай тауарлар, жұмыстар, көрсетілетін қызметтер сатып алынатын түзеу мекемелерi мемлекеттік кәсiпорындарының тiзбесiн Қазақстан Республикасының Үкiметi бекiтедi.
Түзеу мекемелерiнiң мемлекеттiк кәсiпорындарының заңды тұлғалармен жасасқан шарттар негізінде сотталғандарды жұмысқа тұрғызу мақсатында тауарларды, жұмыстарды, көрсетiлетiн қызметтердi өндіру үшін шикізатты, материалдарды және қосалқы бұйымдарды аталған кәсіпорынның осындай шикізатты, материалдарды, қосалқы бұйымдарды сатып алуы осы шарттарда көзделген қаражат есебінен жүзеге асырылады деген шартпен сатып алуы.
38) дауыс беретін акцияларының (жарғылық капиталға қатысу үлестерінің) елу және одан жоғары пайызы мемлекетке тиесілі заңды тұлғалардың және олармен үлестес заңды тұлғалардың табиғи газды, уранды және оның қоспаларын сатып алуы;
39) Қазақстан Республикасы Президентінің, Қазақстан Республикасы Парламентінің, Қазақстан Республикасы Үкіметінің қызметін қамтамасыз ететін мемлекеттік органның тауарларды, жұмыстарды, көрсетілетін қызметтерді Қазақстан Республикасының мемлекеттік мүлік туралы заңнамасына сәйкес өзі оларға қатысты басқаруды жүзеге асыратын мемлекеттік кәсіпорындардан мұндай мемлекеттік кәсіпорындар қызметінің негізгі нысанасы бойынша сатып алуы;
40) Қазақстан Республикасы Президентін, өзге де қорғалатын тұлғаларды және қорғалатын тұлғалардың келуіне арналған объектілерді күзетуді және олардың қауіпсіздігін қамтамасыз етуге қажетті тауарларды, жұмыстарды және көрсетілетін қызметтерді сатып алу (тұрмыстық, қонақүй, көліктік қызмет көрсету, компьютерлік жабдықты пайдалану, санитариялық-эпидемиологиялық салауаттылығын қамтамасыз ету, қауіпсіз тамақ беру), сондай-ақ Қазақстан Республикасы Президентінің бейнемұрағатын қалыптастыру және ақпараттық қызмет көрсету жөніндегі көрсетілетін қызметтерді сатып алу;
41) Қазақстан Республикасы Президентін, Қазақстан Республикасы Парламентінің, Қазақстан Республикасы Үкіметінің қызметін қамтамасыз ететін мемлекеттік орган не оның ведомстволары Қазақстан Республикасының мемлекеттік мүлік туралы заңнамасына сәйкес басқаруды жүзеге асыратын мемлекеттік кәсіпорындардың, дауыс беретін акцияларының (жарғылық капиталға қатысу үлестерінің) елу және одан жоғары пайызы мемлекетке тиесілі заңды тұлғалардың тауарларды, жұмыстарды, көрсетілетін қызметтерді сатып алуы;
42) тауарды, жұмысты, көрсетілетін қызметті Қазақстан Республикасы Президентінің шешімі (тапсырмасы) бойынша Қазақстан Республикасының Үкіметі айқындаған тұлғадан сатып алу;
43) халықаралық төрелікте немесе халықаралық коммерциялық төрелікте, шетелдік мемлекеттік және сот органдарында мемлекеттің не тапсырыс берушілердің мүдделерін қорғау және білдіру жөніндегі консультациялық және заң қызметтерін сатып алу;
44) капиталдың сыртқы нарықтарында мемлекеттік бағалы қағаздарды шығаруды ұйымдастыру бойынша консультациялық (андеррайтингтік) және заң қызметтерін сатып алуы;
45) шетелдік бұқаралық ақпарат құралдарында ақпаратты орналастыру бойынша көрсетілетін қызметтерді, сондай-ақ интернет-ресурстарда орналастырылған ақпаратты беру бойынша көрсетілетін қызметтерді сатып алу;
46) Қазақстан Республикасының заңдарында айқындалған тұлғадан тауарларды, жұмыстарды, көрсетілетін қызметтерді сатып алу;
47) Қазақстан Республикасының заңнамасында айқындалған тұлғадан мүлікті сенімгерлік басқару жөніндегі көрсетілетін қызметтерді сатып алу;
48) мамандандырылған ұйымының (агенттің) отандық өнім өндірушілерден азық-түлік тауарларын, сондай-ақ оларды сақтау, өңдеу және тасымалдау жөніндегі көрсетілетін қызметтерді сатып алу. Мамандандырылған ұйымдардың (агенттердің) тізбесін Қазақстан Республикасының Үкіметі бекітеді;
49) статистикалық бақылау деректерін өңдеу жөніндегі көрсетілетін қызметтерді сатып алу;
50) мыналарды:
Қазақстан Республикасының атқарушылық іс жүргізу және сот орындаушыларының мәртебесі туралы заңнамасына сәйкес сот орындаушылары өткізетін;
Қазақстан Республикасының оңалту және банкроттық туралы заңнамасына сәйкес өткізілетін;
Қазақстан Республикасының жер заңнамасына сәйкес өткізілетін;
мемлекеттік мүлікті жекешелендіру кезінде сауда-саттықта (аукциондарда) сатылатын мүліктерді (активтерді) сатып алу;
51) электр энергиясын сатып алу;
52) ғарышкерлерді даярлау және ғарышкерлердің ғарышқа ұшуын жүзеге асыруды ұйымдастыру жөнінде көрсетілетін қызметтерді сатып алу;
53) мамандандырылған авиажөндеу кәсіпорындарында авиациялық техниканы жөндеу қызметін көрсетуді сатып алу;
54) егер мұндай біртекті тауарлардың, жұмыстардың, көрсетілетiн қызметтердің құндық мәндегі жылдық көлемі тиісті қаржы жылына республикалық бюджет туралы заңмен белгіленген жүз еселенген айлық есептік көрсеткіш мөлшерінен аспаса, біртекті тауарларды, жұмыстарды, көрсетілетін қызметтерді сатып алу;
55) тарих және мәдениет ескерткіштері ретінде мемлекет қорғауына алған және мемлекеттік мұражай, кітапхана, мұрағат қорларын, кино-, фото қорын және өзге де осыған ұқсас қорларды толықтыруға арналған тарихи, көркемдік немесе өзге де мәдени маңызы бар мәдени құндылықтар болып табылатын тауарларды, оның ішінде, мұражай заттары мен мұражай коллекцияларын, сондай-ақ, көшірмелерін қоса алғанда, сирек кездесетін және құнды басылымдарды, қолжазбаларды, мұрағат құжаттарын сатып алу;
56) көрмелердің, семинарлардың, конференциялардың, кеңестердің, форумдардың, симпозиумдардың, тренингтердің материалдарын сатып алу, сондай-ақ, аталған іс-шараларға қатысқаны үшін ақы төлеу;
57) театрдың, филармонияның, мұражайдың және мәдени-демалыс ұйымының сахналық көрсетілімдерді жүзеге асыру және көпшілік алдында өнер туындыларын орындау үшін тауарлар мен көрсетілетін қызметтерді сатып алуы;
58) хайуанттар бағына, театрға, кинотеатрға, концертке, циркке, мұражайға, көрмеге және спорттық іс-шараға баруға тапсырыс орналастыру;
59) тиісті авторлардың күрделі құрылыс объектілерінің жобалау құжаттамасын әзірлеуді авторлық қадағалау, күрделі құрылыс объектілерінің құрылысын, олардың реконструкциясы мен күрделі жөндеуін авторлық қадағалау жөніндегі қызмет көрсетулерін сатып алу;
60) Қазақстан Республикасы халқының мәдени мұра объектісін (тарих және мәдениет ескерткішін) сақтау жөніндегі жұмыстардың жүргізілуіне техникалық және авторлық қадағалау жүргізу бойынша көрсетілетін қызметтерді сатып алу;
61) егер осындай мемлекеттік сатып алу тапсырыс берушінің мемлекеттік сатып алуды өткізу, бірақ үш айдан аспайтын мерзім ішіндегі тұтынысын қамтамасыз етуге қажетті осындай тауарларды, жұмыстарды, көрсетілетін қызметтерді мемлекеттік сатып алу көлемінен аспайтын көлемде, Қазақстан Республикасының Үкіметі бекіткен тізбе бойынша жылдың бірінші айы ішінде жүзеге асырылған жағдайда, конкурс не аукцион тәсілімен мемлекеттік сатып алу қорытындылары шығарылғанға және мемлекеттік сатып алу туралы шарт күшіне енгенге дейінгі кезеңге күнделікті және (немесе) апта сайынғы тұтынысты мемлекеттік сатып алуды жүзеге асыруға қажеттілік болса;
62) «Мемлекеттік қорғаныстық тапсырыс туралы» Қазақстан Республикасының Заңында айқындалған мемлекеттік қорғаныс тапсырысы құрамына кірген өнімді өндіру үшін отандық тауар өндірушілерге – мемлекеттік қорғаныс тапсырмасын орындаушыларға тауарларды, жұмыстарды, көрсетілетін қызметтерді сатып алу;
63) Қазақстан Республикасының Үкіметі айқындаған уәкілетті ұйымның мемлекеттің әскери қауіпсіздігін қамтамасыз ету үшін қажетті, әскери және қосарланған мақсаттағы (қолданылатын) тауарларды (өнімдерді), жұмыстарды және көрсетілетін қызметтерді сатып алуы;
64) мемлекеттің әскери қауіпсіздігі және әскери өнер саласындағы зерттеулерді жүргізу бойынша көрсетілетін қызметтерді сатып алу жағдайларында жүзеге асырылады.
4. Осы баптың 3-тармағының 12), 14), 16), 38), 41), 46), 48), 57), 63) тармақшаларының ережелері мемлекеттік органдар мен мемлекеттік мекемелер жүзеге асыратын мемлекеттік сатып алуға қолданылмайды.

43-бап. Өтпеген мемлекеттік сатып алу бойынша бір көзден
алу тәсілімен мемлекеттік сатып алуды жүзеге
асыру

1. Осы Заңның 42-бабының 2-тармағында көзделген жағдайларда бір көзден алу тәсілімен мемлекеттік сатып алуды жүзеге асыру кезінде мемлекеттік сатып алуды ұйымдастырушы әлеуетті өнім берушіге мемлекеттік сатып алу веб-порталы арқылы мемлекеттік сатып алуға қатысуға шақыру жібереді, онда мынадай мәліметтер:
1) мемлекеттік сатып алуды ұйымдастырушының атауы және орналасқан жері;
2) ұлттық стандарт немесе Қазақстан Республикасы өндірушілерінің коммерциялық емес ұйымдары бекіткен үкіметтік емес стандарт болған кезде оны көрсете отырып, сатып алынатын тауарлардың, жұмыстардың, көрсетілетін қызметтердің сипаты мен талап етілетін функционалдық, техникалық, сапалық және пайдалану сипаттамалары қамтылуға тиіс.
Жобалау-сметалық құжаттаманы талап ететін жұмыстарды мемлекеттік сатып алуды жүзеге асыру кезінде шақыруда сатып алынатын жұмыстардың сипаты мен талап етілетін функционалдық, техникалық, сапалық және пайдалану сипаттамаларының орнына белгіленген тәртіппен бекітілген жобалау-сметалық құжаттама қамтылуға тиіс;
3) мемлекеттік сатып алуды өткізудің нысанасы болып табылатын тауардың саны, орындалатын жұмыстардың, көрсетілетін қызметтердің көлемі;
4) тауарларды жеткізудің, жұмыстарды орындаудың, қызметтер көрсетудің орны;
5) тауарларды жеткізудің, жұмыстарды орындаудың, қызметтер көрсетудің талап етілетін мерзімдері, ұсынылатын тауарлардың, жұмыстардың, көрсетілетін қызметтердің сапасына кепілдеме беру;
6) төлем шарттары және мемлекеттік сатып алу туралы шарттың жобасы;
7) мемлекеттік сатып алуды жүзеге асыру қағидаларында көзделген жағдайларда мемлекеттік сатып алу туралы шарттың орындалуын қамтамасыз етуді енгізу талаптары, нысаны, көлемі және тәсілі;
8) бір көзден алу тәсілімен өткізілетін мемлекеттік сатып алудың нысанасы болып табылатын тауарларды, жұмыстарды, көрсетілетін қызметтерді сатып алуға бөлінген сома туралы мәлімет;
9) осы Заңның 9-бабында көзделген жалпы және арнайы бiлiктiлiк талаптарының тiзбесi, сондай-ақ бір көзден алу тәсілімен мемлекеттік сатып алу осы Заңның 42-бабы 2-тармағының 2) тармақшасы негізінде жүзеге асырылатын мемлекеттік сатып алуды қоспағанда, әлеуетті өнім берушінің қойылған бiлiктiлiк талаптарына сәйкес келетiнiн растау үшiн табыс етуге тиiс құжаттарының тiзбесi;
10) бір көзден алу тәсілімен мемлекеттік сатып алу осы Заңның 42-бабы 2-тармағының 2) тармақшасы негізінде жүзеге асырылатындығын қоспағанда, әлеуетті өнім берушінiң қойылған бiлiктiлiк талаптарына өзінің сәйкес келетiнiн растайтын құжаттарды, сондай-ақ осы баптың 2-тармағында көзделген ақпаратты ұсынатын орны мен мерзiмi қамтылуға тиiс.
2. Бір көзден алу тәсілімен өткізілетін мемлекеттік сатып алудың нысанасы болып табылатын тауарды беруді, жұмыстарды орындауды, қызметтер көрсетуді жүзеге асыруға ниет білдірген әлеуетті өнім беруші белгіленген мерзімде мемлекеттік сатып алуды ұйымдастырушыға мемлекеттік сатып алу веб-порталы арқылы мынадай ақпаратты:
1) әлеуетті өнім берушінің жұмыстардың не көрсетілетін қызметтердің қосалқы мердігері (бірлескен орындаушысы) ретінде тартуды көздейтін тұлғаларын көрсете отырып, әлеуетті өнім беруші ұсынған тауарлардың, жұмыстардың, көрсетілетін қызметтердің сипаттамасын;
2) бір көзден алу тәсілімен мемлекеттік сатып алу осы Заңның 42-бабы 2-тармағының 2) тармақшасы негізінде жүзеге асырылатын жағдайды қоспағанда, әлеуетті өнім берушінiң және ол жұмыстардың не көрсетілетін қызметтердiң қосалқы мердiгерлерi (бiрлескен орындаушылары) ретiнде тартуды көздейтiн тұлғалардың бiлiктiлiк талаптарына сәйкестiгiн растайтын құжаттарын;
3) ұсынылып отырған тауарларға, жұмыстарға, көрсетілетін қызметтерге ұсынылатын бағаның негіздемесін ұсынуға тиіс.
3. Осы Заңның 42-бабы 2-тармағының 1) тармақшасында көзделген жағдайда бір көзден сатып алу тәсілімен мемлекеттік сатып алуды жүзеге асыру кезінде бір көзден алу тәсілімен мемлекеттік сатып алуға қатысу үшін мемлекеттік сатып алуды ұйымдастырушы шақырған, өтпеді деп танылған конкурсқа (аукционға) қатысушы, осы конкурсқа (аукционға) қатысушының біліктілік талаптарына сәйкестігін растайтын құжаттарды нақ сол мемлекеттік сатып алуды ұйымдастырушыға қайтадан ұсынбауға құқылы.
4. Мемлекеттiк сатып алуды ұйымдастырушы, бір көзден алу тәсілімен мемлекеттік сатып алу осы Заңның 42-бабы 2-тармағының 2) тармақшасы негізінде жүзеге асырылатын жағдайды қоспағанда, әлеуетті өнім беруші табыс еткен құжаттарды олардың бiлiктiлiк талаптарына, сондай-ақ мемлекеттiк сатып алуды жүзеге асыру қағидаларында не мемлекеттік сатып алуды жүргізу қағидаларында белгiленген талаптарға сәйкестiгi тұрғысынан қарайды.
5. Мемлекеттік сатып алуды ұйымдастырушы әлеуетті өнім беруші сұратылған ақпарат ұсынылған күннен бастап үш жұмыс күні ішінде бір көзден сатып алу тәсілімен мемлекеттік сатып алу қорытындылары туралы хаттаманы мемлекеттік сатып алудың веб-порталында қалыптастырады және орналастырады.
Әлеуетті өнім берушіге шақыру жіберу, оның қажетті ақпаратты веб-портал арқылы беруі және сатып алуды ұйымдастырушының қорытындылар туралы хаттаманы веб-порталда орналастыруы туралы талаптар Қазақстан Республикасының Үкіметі айқындаған, олар туралы мәліметтер мемлекеттік құпияларды, таратылуы шектеулі қызметтік ақпаратты құрайтын бір көзден алу тәсілімен мемлекеттік сатып алуға қолданылмайды.

44-бап. Бір көзден алу тәсілімен тікелей шарт жасасу
арқылы мемлекеттік сатып алуды жүзеге асыру

1. Бір көзден сатып алу тәсілімен мемлекеттік сатып алуды жүзеге асыру кезінде тапсырыс беруші тікелей шарт жасасу арқылы өнім берушіні анықтайды және онымен веб-портал арқылы мемлекеттік сатып алу туралы шарт жасасады.
2. Тапсырыс беруші мемлекеттік сатып алудың веб-порталында мемлекеттік сатып алуды жүргізу қағидаларында анықталған нысан бойынша шартты тікелей жасау арқылы бір көзден мемлекеттік сатып алу туралы есепті он жұмыс күнінен кешіктірмей орналастыруға міндетті.
Есеп өнім берушіні таңдау негізін, жасалған шарт бағасын, сондай-ақ шарттың өзге де талаптарын қамтуы тиіс.
3. Шартты тікелей жасасу арқылы бір көзден алу тәсілімен мемлекеттік сатып алу осы Заңның 4-бабының 1) тармақшасында көзделген мемлекеттік сатып алуды жүзеге асыру қағидаттарын сақтай отырып, жүзеге асырылады.
4. Осы баптың 1 және 2-тармақтарының талаптары Қазақстан Республикасының Үкіметі айқындаған, мәліметтері мемлекеттік құпияларды, таратылуы шектеулі қызметтік ақпаратты құрайтын, тікелей шарт жасасу арқылы бір көзден алу тәсілімен мемлекеттік сатып алуға қолданылмайды.

8-тарау. Тауарларды электрондық дүкен және тауар биржалары арқылы мемлекеттік сатып алу

45-бап. Электрондық дүкен арқылы мемлекеттік сатып алуды
жүзеге асыру

1. Егер осындай біртекті тауарлардың құндық мәндегі жылдық көлемі тиісті қаржы жылына республикалық бюджет туралы заңмен белгіленген айлық есептік көрсеткіштің екі мың еселенген мөлшерінен аспаса, біртекті тауарларға электрондық дүкен арқылы мемлекеттік сатып алу жүргізіледі.
2. Электрондық дүкен мемлекеттік сатып алудың веб-порталында ақпараттар нысанын толтыру арқылы мемлекеттік сатып алудың веб-порталында тіркелген әлеуметтік өнім берушілердің ерікті негізінде қалыптастырылады.
3. Тапсырыс беруші веб-порталда тауарды сатып алуға арналған өтінімді қалыптастырады. Тауарды сатып алуға арналған өтінімде мынадай мәліметтер:
1) тауарлардың функционалдық, техникалық, сапалық және пайдалану сипаттамалары;
2) оның елеулі шарттарын көрсете отырып, шарттың жобасы қамтылады.
4. Веб-портал тауарлары тапсырыс берушінің өтініміне сәйкес келетін әлеуетті өнім берушілерді автоматты түрде анықтайды және оларға тапсырыс берушінің өтінімі бар хабарламаны бір мезгілде жібереді.
5. Тауарды сатып алу туралы хабарлама келіп түскен әлеуетті өнім беруші екі жұмыс күні ішінде қатысу туралы шешім қабылдайды және расталған жағдайда баға ұсынысын береді. Әлеуетті өнім берушінің баға ұсынысын беруі өтінім талаптары мен шарттарына сәйкес тауарларды жеткізуді жүзеге асыруға келісім білдіру нысаны болып табылады.
6. Электрондық дүкен арқылы мемлекеттік сатып алу тәсілімен қатысуды растаған әлеуетті өнім берушілер болмаған жағдайда мұндай сатып алу өтпеген болып танылады және мемлекеттік сатып алуды ұйымдастырушы осы Заңға сәйкес өзге тәсілмен мемлекеттік сатып алуды жүзеге асыру туралы шешім қабылдайды.
7. Веб-портал тауардың ең төменгі шартты бағасы негiзiнде мемлекеттік сатып алу жеңiмпазын автоматты түрде айқындайды. Екінші орын алған әлеуетті өнім беруші ең төменгі баға ұсынысынан кейінгі баға негізінде айқындалады.
Баға ұсыныстары тең болған кезде бағасы басқа әлеуетті өнім берушілерден бұрын түскен әлеуетті өнім беруші жеңімпаз (екінші орын алған әлеуетті өнім беруші) болып табылады.

46-бап. Тауарларды тауар биржалары арқылы мемлекеттік
сатып алуды жүзеге асыру

1. Тауарларды тауар биржалары арқылы мемлекеттік сатып алу биржалық тауарлар тізбесі бойынша Қазақстан Республикасының тауар биржалары туралы заңнамасына сәйкес жүзеге асырылады.
2. Егер биржалық тауарлар тізбесіне енгізілген тауарларды мемлекеттік сатып алудың жылдық көлемі биржалық тауарлар тізбесінде көзделген партияның ең аз мөлшерінен аспаған жағдайда, тапсырыс беруші тауарларды мемлекеттік сатып алуды жүзеге асырудың өзге тәсілін таңдауға құқылы.

9-тарау. Мемлекеттік сатып алу туралы шарт

47-бап. Мемлекеттік сатып алу туралы шартты жасасу

1. Тапсырыс беруші жеңімпазға үлгілік шартқа сәйкес жасалған, электрондық-цифрлық қолтаңба қойылған мемлекеттік сатып алу туралы шарт жобасын жеңімпазға:
1) конкурс, аукцион тәсілімен мемлекеттік сатып алу қорытындылары туралы хаттаманы шағымдану мерзімі өткен күннен бастап бес жұмыс күні ішінде;
2) баға ұсыныстарын сұрату тәсілімен мемлекеттік сатып алу жеңімпазы айқындалған күннен бастап бес жұмыс күні ішінде;
3) электрондық дүкен арқылы мемлекеттік сатып алу жеңімпазы айқындалған күннен бастап екі жұмыс күні ішінде веб-портал арқылы жібереді.
2. Мемлекеттік сатып алу туралы шарттың жобасына жеңімпаз электрондық-цифрлық қолтаңба арқылы:
1) конкурс, аукцион, баға ұсыныстарын сұрату тәсілімен мемлекеттік сатып алу бойынша – мемлекеттік сатып алу туралы шарт жобасы қоса беріле отырып, хабарлама веб-порталға түскен күннен бастап үш жұмыс күні ішінде;
2) электрондық дүкен арқылы мемлекеттік сатып алу бойынша - мемлекеттік сатып алу туралы шарт жобасы қоса беріле отырып, хабарлама веб-порталға түскен күннен бастап екі жұмыс күні ішінде қол қоюға тиіс.
Веб-портал арқылы электрондық-цифрлық қолтаңбаны пайдалана отырып, мемлекеттік сатып алу туралы шарт жасасу бойынша талаптар осы Заңның 33-бабы 1-тармағында, 42-бабы 3-тармағының 10), 40) 62), 63, 64) тармақшаларында көзделген жағдайларға қолданылмайды.
3. Егер жеңімпаз болып айқындалған әлеуетті өнім беруші мемлекеттік сатып алу туралы шарттың жобасына белгіленген мерзімде қол қоймаса, тапсырыс беруші жеңімпаздың шарт жасасудан жалтарған күнінен бастап бес жұмыс күні ішінде электрондық-цифрлық қолтаңба қойылған мемлекеттік сатып алу туралы шарттың жобасын екінші орын алған әлеуетті өнім берушіге веб-портал арқылы жібереді. Мемлекеттік сатып алу туралы шарттың жобасына екінші орын алған әлеуетті өнім беруші өзіне мемлекеттік сатып алу туралы шарттың жобасы берілген табыс етілген күннен бастап бес жұмыс күні ішінде электрондық-цифрлық қолтаңба арқылы қол қоюға тиіс.
4. Егер екінші орын алған әлеуетті өнім беруші белгіленген мерзімде тапсырыс беруші қол қойған мемлекеттік сатып алу туралы шартқа қол қоймаса, тапсырыс беруші мемлекеттік сатып алуды қайтадан жүзеге асырады.
5. Өнім беруші мемлекеттік сатып алу туралы шарт жасалған күннен бастап он жұмыс күні ішінде мемлекеттік сатып алу туралы шарттың орындалуын қамтамасыз етуге, сондай-ақ осы Заңның 27-бабына сәйкес соманы (болған жағдайда) енгізуге міндетті.
Өнім беруші мемлекеттік сатып алу туралы шартты орындауды қамтамасыз етуді, сондай-ақ осы Заңның 27-бабына сәйкес соманы (болған жағдайда) өзімен жасалған мемлекеттік сатып алу туралы шарт бойынша өзінің міндеттемелерін уақытылы, толық және тиісінше орындайтынының кепілі ретінде енгізеді.
6. Шартты орындауды қамтамасыз ету мөлшерін ұйымдастырушы мемлекеттік сатып алу туралы шартта авансты төлеу көзделген жағдайды қоспағанда, мемлекеттік сатып алу туралы шарттың жалпы сомасының үш пайызы мөлшерінде белгілейді.
Егер мемлекеттік сатып алу туралы шартта аванс төлеу көзделген жағдайда, шарттың орындалуын қамтамасыз етуді ұйымдастырушы мемлекеттік сатып алу туралы шарттың жалпы сомасының кемінде үш пайызына тең болуға тиіс аванс мөлшерінде белгілейді.
Бұл ретте өнім беруші аванстан бас тартуға құқылы. Аванстан бас тартқан жағдайда, өнім беруші мемлекеттік сатып алу туралы шарттың жалпы сомасының үш пайызы мөлшерінде мемлекеттік сатып алу туралы шарттың орындалуын қамтамасыз етуді енгізуге міндетті.
7. Қолданысы бір қаржы жылынан асатын мерзімге мемлекеттік сатып алу туралы шарт жасалған жағдайда, ағымдағы қаржы жылына мемлекеттік сатып алу туралы шарттың орындалуын қамтамасыз ету мөлшері шартта тиісті қаржы жылында көзделген жылдық сома негізге алына отырып есептеледі.
Өнім беруші мемлекеттiк сатып алу туралы шарттың орындалуын қамтамасыз етудiң мынадай түрлерiнiң бiрiн:
1) тапсырыс берушінiң банк шотына не мемлекеттiк органдар және мемлекеттiк мекемелер болып табылатын тапсырыс берушілер үшiн Қазақстан Республикасының бюджет заңнамасында көзделген шотқа енгiзiлетiн кепiлдiкті ақшалай жарнаны;
2) электрондық құжат түріндегі банк кепiлдiгін таңдауға құқылы.
Шарт бойынша мiндеттемелері толық орындалғанға дейiн өнім берушінің енгiзiлген кепiлдiкті ақшалай жарнасына тұтастай не оның бөлiгiн талап ету құқығының үшiншi тұлғаларда туындауына алып келетін әрекет жасауына жол берiлмейдi.
Тапсырыс берушінiң өнім беруші енгiзген кепiлдiкті ақшалай жарнаны осы Заңда көзделмеген мақсатқа пайдалануына жол берiлмейдi.
Мемлекеттік сатып алу туралы шарттың орындалуын қамтамасыз етуді енгізу туралы талап осы Заңның 42-бабы 2-тармағының 2) тармақшасы және 3-тармағының негізінде жүзеге асырылған баға ұсыныстарын сұрату, электрондық дүкен арқылы, тауар биржалары арқылы, бір көзден алу тәсілімен мемлекеттік сатып алу қорытындылары бойынша айқындалған өнім берушілерге, сондай-ақ оны осы Заңның 9-бабының 6-тармағында көзделген жағдайда берген өнім берушілерге, осы Заңның 34-бабы 1-тармағының 1) және 2) тармақшаларында көзделген жағдайда кәсіпкерлік қызмет субъектілері болып табылмайтын өнім берушілерге қолданылмайды.
8. Мемлекеттік сатып алу туралы шарттың орындалуын қамтамасыз ету, сондай-ақ осы Заңның 27-бабына сәйкес өнім беруші енгізген соманы (болған кезде) мемлекеттік сатып алуды ұйымдастырушы өнім берушінің шарттық міндеттемелерді орындамауына байланысты мемлекеттік сатып алу туралы шартты бұзған жағдайда өнім берушіге қайтармайды.
Мемлекеттік сатып алу туралы шарттың орындалуын қамтамасыз ету, сондай-ақ осы Заңның 27-бабына сәйкес өнім беруші енгізген сома (болған кезде) тиiстi бюджет, мемлекеттiк кәсiпорын, дауыс беретiн акцияларының (жарғылық капиталға қатысу үлестерінің) елу және одан да көп пайызы мемлекетке тиесiлi заңды тұлға немесе олармен үлестес заңды тұлғалар табысының есебіне жатқызылады.
9. Мемлекеттік сатып алу туралы шартта тепе-тең тәртіпте осы мемлекеттік сатып алу туралы шарт бойынша міндеттемелерді орындамағаны не тиісінше орындамағаны үшін тұрақсыздық айыбын (айыппұл, өсімпұл), сондай-ақ мемлекеттік сатып алу туралы шарттың толық сомасынан тұрақсыздық айыбын ұстау бойынша тапсырыс берушінің міндеті көзделуге тиіс.
10. Мемлекеттiк органдар, мемлекеттiк мекемелер және оралымды басқару құқығындағы мемлекеттiк кәсiпорындар:
1) жобалау-сметалық құжаттамада келесi (кейiнгi) қаржы жылында (жылдарда) аяқтау мерзiмi көзделген жұмыстарды;
2) дайындаудың технологиялық мерзiмiнiң ұзақтығы оларды келесi (кейiнгi) қаржы жылында (жылдарында) беруге негіз болатын активтер мен басқа да тауарларды;
3) Қазақстан Республикасы Қарулы Күштерiнің, басқа да әскерлері мен әскери құралымдарының жеке құрамын тамақтандыруды ұйымдастыру бойынша көрсетілетін қызметтердi сатып алған жағдайда бiр қаржы жылынан асатын мерзiмге мемлекеттiк сатып алу туралы шарт жасасуы мүмкін. Мұндай мемлекеттік сатып алу туралы шарттың қолданылу мерзiмi үш жылдан аспауға тиiс;
4) бiр қаржы жылынан асатын мерзiмге көрсетілетін қызметтердi;
5) тиiстi бюджетте, даму жоспарында, қаржыландырудың жеке жоспарында белгiленген, орындалу (көрсетілу, берілу) мерзiмi орындау ұзақтығына байланысты келесi (кейiнгi) қаржы жылына (жылдарына) белгіленген тауарларды, жұмыстарды, көрсетілетін қызметтердi, сондай-ақ облыстық және аудандық маңызы бар автомобиль жолдарын ағымдағы жөндеу және күтiп ұстау жөнiндегi жұмыстар мен көрсетілетін қызметтердi сатып алған жағдайда бiр қаржы жылынан асатын мерзiмге мемлекеттiк сатып алу туралы шарт жасасуы мүмкiн. Мұндай мемлекеттiк сатып алу туралы шарттың қолданылу мерзiмi үш жылдан аспауға тиiс.
11. Шаруашылық жүргiзу құқығындағы мемлекеттiк кәсiпорындар, сондай-ақ дауыс беретiн акцияларының (жарғылық капиталға қатысу үлестерінің) елу және одан астам пайызы мемлекетке тиесiлi заңды тұлғалар және олармен үлестес заңды тұлғалар басқару органы немесе аталған тұлғалардың жоғары органы бекiткен даму жоспарында белгiленген келесi (кейiнгi) қаржы жылында (жылдарында) аяқтау мерзiмiмен iс-шараларды орындау үшiн қажеттi тауарларды, жұмыстарды, көрсетілетін қызметтердi мемлекеттiк сатып алу туралы ұзақ мерзiмдi шарт жасасуы мүмкiн.
12. Жылдық қаржы есептiлiгiнiң аудитi бойынша көрсетілетін қызметтердi мемлекеттiк сатып алу туралы шарт үш жылдан аспайтын мерзiмге жасалуы мүмкiн.
13. Осы баптың 10 және 11-тармақтарында көзделген жағдайларда, бәсекелестiк негiзде өткiзiлген мемлекеттiк сатып алу қорытындылары бойынша айқындалған өнім берушілермен ғана қолданыс мерзiмі бiр қаржы жылынан асатын мемлекеттiк сатып алу туралы шарт жасасуға жол берiледi.
14. Тапсырыс берушінiң үздіксіз қызметiн қамтамасыз ету мақсатында тапсырыс беруші конкурс не аукцион тәсілімен мемлекеттiк сатып алу қорытындыларын жасағанға және мемлекеттік сатып алу туралы шарт күшіне енгенге дейінгі кезеңге, уәкілетті орган бекiткен тiзбе бойынша күн сайынғы немесе апта сайынғы тұтынылатын тауарларды, жұмыстарды, көрсетілетін қызметтердi мемлекеттiк сатып алу туралы шарттың қолданысын ұзартуға құқылы.
Бұл ретте осындай мемлекеттік сатып алу тапсырыс берушінің қажеттіліктерін қамтамасыз ету үшін қажет осындай тауарларды, жұмыстарды, көрсетілетін қызметтердi мемлекеттiк сатып алу көлемінен аспайтын көлемде бірінші, бірақ үш айдан аспайтын ай ішінде жүзеге асырылады.
15. Мемлекеттiк сатып алу туралы шартта мынадай:
1) осы Заңның 6-бабында көзделген шектеулердi бұзу;
2) мемлекеттiк сатып алуды ұйымдастырушының әлеуетті өнім берушіге осы Заңда көзделмеген көмек көрсету;
3) уәкілетті орган, міндеттемелері толық көлемде және тиісінше орындалған мемлекеттік сатып алу туралы шарттарды қоспағанда, Қазақстан Республикасының мемлекеттік сатып алу туралы заңнамасын бұза отырып, мемлекеттік сатып алу туралы шарт жасасу фактiлерiнiң бiрiн анықтаған жағдайда, оны кез келген кезеңде бұзу туралы талап қамтылуға тиiс.
16. Мемлекеттік сатып алу туралы шартта осы шарт бойынша міндеттемелердің орындалған күнінен бастап күнтізбелік отыз күннен аспайтын мерзімде тауарларды бергені, жұмыстарды орындағаны не қызмет көрсеткені үшін толық төлем туралы талап қамтылуға тиіс.
17. Мемлекеттік сатып алу туралы шартта Қазақстан Республикасы салық заңнамасының, Кеден одағының кеден заңнамасының және (немесе) Қазақстан Республикасы кеден заңнамасының талаптарына сәйкес қосылған құн салығын және акциздерді төлеу талаптары қамтылуға тиіс.
18. Мемлекеттік сатып алу туралы шарт бойынша тауарларды берудің, жұмыстарды орындаудың, қызметтерді көрсетудің ең аз мерзімі күнтізбелік он бес күннен кем болмауға тиіс.
19. Мемлекеттік сатып алу туралы шарт көрсетілген шарт бойынша қабылданған міндеттемелерді тапсырыс беруші мен өнім беруші толық орындаған жағдайда орындалды деп есептеледі.
20. Мемлекеттік сатып алу туралы шарт бойынша өнім беруші қабылдаған міндеттемелерді орындамаған не тиісінше орындамаған жағдайда тапсырыс беруші тиiстi бюджет, мемлекеттiк кәсiпорын, дауыс беретiн акцияларының (жарғылық капиталға қатысу үлестерінің) елу және одан да көп пайызы мемлекетке тиесiлi заңды тұлға немесе олармен үлестес заңды тұлғалар табысына тұрақсыздық айыбын ұстап қалады.
21. Мемлекеттік сатып алу туралы шарт осы Заңның 51-бабына сәйкес шығарылған уәкілетті органның шешіміне шағымдану кезеңінде жасалмайды.
22. Мемлекеттік сатып алу туралы шарттың орындалғаны туралы құжаттар (тауарларды беру туралы жүкқұжат (акт) немесе орындалған жұмыстардың, көрсетілген қызметтердің актісі) веб-портал арқылы электрондық түрде ресімделеді.
Мемлекеттік сатып алу туралы шартты орындау кезінде тауарларды берудің (жұмыстарды орындаудың, қызметтерді көрсетудің) атауы, саны, сапасы, техникалық ерекшелігі, құны, орны мен мерзімі мемлекеттік сатып алу туралы шарттың мазмұнына сәйкес келуге тиіс.

48-бап. Мемлекеттік сатып алу туралы шарт жасасудан
жалтару

1. Егер жеңімпаз не екінші орын алған деп танылған әлеуетті өнім беруші осы Заңда белгіленген мерзімде қол қойылған мемлекеттік сатып алу туралы шартты тапсырыс берушіге табыс етпесе немесе мемлекеттік сатып алу туралы шарт жасасып, мемлекеттік сатып алу туралы шарттың орындалуын қамтамасыз етуді және (немесе) осы Заңның 27-бабына сәйкес соманы енгізбесе, онда мұндай әлеуетті өнім беруші мемлекеттік сатып алу туралы шарт жасасудан жалтарды деп танылады.
2. Мемлекеттiк сатып алудың жеңімпазы (екінші орын алған әлеуетті өнім беруші) деп айқындалған әлеуетті өнім беруші мемлекеттiк сатып алу туралы шарт жасасудан жалтарды деп танылған жағдайда, тапсырыс беруші:
1) ол енгiзген конкурсқа не аукционға қатысуға өтінімді қамтамасыз етудi ұстап қалады;
2) мұндай әлеуетті өнім берушінi мемлекеттiк сатып алу туралы шарт жасасуға мәжбүрлеу туралы, сондай-ақ мемлекеттiк сатып алу туралы шарт жасасудан жалтарудан келтiрiлген залалды өтеу туралы талап арызбен сотқа жүгiнуге құқылы.

49-бап. Мемлекеттік сатып алу туралы шарт жобасына
не жасалған шартқа өзгерістер енгізу негіздері

1. Мемлекеттiк сатып алу туралы шарт жобасына өнiм берушiнi таңдауға негiз болған сапаның және басқа да жағдайлардың өзгермеуі талабымен өзгерiстер енгiзуге мынадай өзара байланысты талаптар сақталған жағдайда:
1) тараптардың бірі конкурс тәсілімен мемлекеттік сатып алу қорытындылары туралы хаттамаға қол қойылған күннен бастап бес жұмыс күнінен кешіктірмей шарт жобасына өзгеріс енгізуге бастамашылық жасаса;
2) шарт жобасының сомасын азайту бөлігінде өзгеріс енгізуге жол берілсе;
3) шарт сомасын азайту бөлігінде өзгеріс енгізу туралы шешім тараптардың өзара келісуі бойынша қабылданса жол беріледі.
Осы тармақта көзделген талаптарды сақтамай мемлекеттік сатып алу туралы шарт жобасына өзгеріс енгізуге жол берілмейді.
2. Өнім берушіні таңдауға негіз болған сапаның және басқа да жағдайлардың өзгермеуі талабы жағдайында мемлекеттік сатып алу туралы жасалған шарт жобасына өзгеріс енгізуге:
1) тауарларға, жұмыстарға, көрсетілетін қызметтерге бағаны және тиiсiнше шарттың сомасын азайту бөлiгiнде тараптардың өзара келiсімі бойынша;
2) егер мемлекеттік сараптамадан өткен жобалау-сметалық құжаттамаға өзгерістер енгізілсе және Қазақстан Республикасының заңнамасында айқындалған тәртіппен қабылданған осындай өзгерістің сомасына қосымша ақша бөлу туралы шешім қабылданса, шарттың сомасын ұлғайту бөлігінде;
3) осы тармақтың 2) тармақшасында көрсетілген жұмыстарды қоспағанда, осы тауарларды, жұмыстарды, көрсетілетін қызметтерді мемлекеттік сатып алу туралы жасалған шартта көрсетілген тауарлар, жұмыстар, көрсетілетін қызметтер бірлігі үшін бағаның өзгермейтін талабы жағдайында сатып алынатын тауарлардың, көрсетілген қызметтердің көлеміндегі қажеттіліктің азаюына не артуына байланысты шарттың сомасын азайту не арттыру бөлігінде жол беріледі. Тауарларды, жұмыстарды, көрсетілетін қызметтерді мемлекеттік сатып алу туралы жасалған шартты осындай өзгертуге осы тауарларды, жұмыстарды, көрсетілетін қызметтерді сатып алу үшін мемлекеттік сатып алудың жылдық жоспарында көзделген соманың шегінде жол беріледі;
4) егер өнім беруші онымен жасалған тауарды, жұмысты, көрсетілетін қызметті мемлекеттік сатып алу туралы шартты орындау процесінде тауар, жұмыс, көрсетілетін қызмет бірлігіне берілетін бағаның өзгермейтін талабы жағдайында, онымен жасалған тауарды мемлекеттік сатып алу туралы шарттың нысанасы болып табылатын тауарды берудің неғұрлым үздік сапалық және (немесе) техникалық сипаттамаларын не мерзімін және (немесе) шарттарын ұсынған жағдайда;
5) Қазақстан Республикасының салық, кеден және өзге де заңнамасының өзгеруiнен туындаған аяқталу мерзiмi келесi (кейiнгi) жылдағы (жылдардағы) жұмыстарды орындау шартының сомасын азайту немесе ұлғайту бөлiгiнде;
6) аяқталу мерзiмi келесi (кейiнгi) жылдағы (жылдардағы) жұмыстарды орындау туралы шарттың сомасын азайту бөлiгiнде;
7) мемлекеттік бюджет есебінен жылдар бойынша қаржыландыру жасалынған шарт сомасының өзгермеуі немесе жұмыстардың сметалық құнының азаюы шартымен өзгерген жағдайда және кейіннен мемлекеттiк сараптамадан өткен жобалау-сметалық құжаттамаға тиісті өзгерiстер енгiзілген жағдайда, жұмыстарды орындау туралы шарттың орындалу мерзімін өзгерту бөлiгiнде;
8) тапсырыс берушінің және (немесе) өнім берушінің лауазымды адамына қатысты шартты орындаумен байланысты қылмыстық іс қозғалған жағдайда, жұмыстар бойынша шарттың орындалу мерзімін өзгерту бөлігінде;
9) егер өнім беруші берілетін тауардың тауар өндірушісі болып табылған жағдайда, тауарды беру туралы шарттың орындалу мерзімін өзгерту бөлігінде өзгерістер енгізуге жол беріледі. Тауарларды мемлекеттік сатып алу туралы жасасылған шартты осылай өзгертуге өнім берушінің хабарламасы бойынша ағымдағы қаржы жылы шегінде он жұмыс күнінен аспайтын мерзімге жол беріледі.
3. Мемлекеттік сатып алу туралы шарттың жобасына не жасалған шартқа өткізілетін (өткізілген) мемлекеттік сатып алу шарттарының мазмұнын өзгертетін өзгерістер және (немесе) осы баптың 1 және 2-тармақтарында көзделмеген өзге де негіздер бойынша өнім берушіні таңдауға негіз болған ұсыныстар енгізуге жол берілмейді.

50-бап. Мемлекеттік сатып алу туралы шарттың күшіне енуі

1. Мемлекеттік сатып алу туралы шарт оған тапсырыс беруші мен өнім беруші қол қойғаннан кейін не конкурстық (аукциондық) құжаттамада көзделген шарттың орындалуын қамтамасыз етуді өнім беруші толық енгізгеннен кейін күшіне енеді. Егер мемлекеттік сатып алу туралы шарт тіркелуге жататын болса, онда ол Қазақстан Республикасының заңнамасына сәйкес тіркелгеннен кейін күшіне енеді.
2. Қазақстан Республикасының заңнамасына сәйкес тiркелуге жататын мемлекеттiк сатып алу туралы шартты тапсырыс беруші оны жасағаннан кейiн не өнім беруші конкурстық құжаттамада не аукциондық құжаттамада көзделген шарттың орындалуын қамтамасыз етудi толық енгiзгеннен кейiн бес жұмыс күнiнен кешiктiрмей мемлекеттiк сатып алу туралы шарттарды тiркеу жөнiндегi уәкiлеттi органға ұсынады.

10-тарау. Шағым жасау

51-бап. Тапсырыс берушінің, мемлекеттік сатып алуды
ұйымдастырушының, мемлекеттік сатып алуды
бірыңғай ұйымдастырушының, комиссиялардың,
сарапшының, мемлекеттік сатып алу саласындағы
бірыңғай оператордың әрекеттеріне
(әрекетсіздігіне), шешімдеріне шағым жасау

1. Әлеуетті өнім беруші тапсырыс берушінің, мемлекеттік сатып алуды ұйымдастырушының, мемлекеттік сатып алуды бірыңғай ұйымдастырушының, комиссиялардың, сарапшының, мемлекеттік сатып алу саласындағы бірыңғай оператордың әрекеттеріне (әрекетсіздігіне), шешімдеріне, егер олардың әрекеттері (әрекетсіздігі), шешімдері әлеуетті өнім берушінің құқықтары мен заңды мүдделерін бұзса, мемлекеттік сатып алу өткізудің кез келген кезеңінде, бірақ мемлекеттік сатып алу қорытындылары туралы хаттама жарияланған күнінен бастап бес жұмыс күнінен кешіктірмей уәкілетті органға шағым жасауға құқылы.
Уәкілетті органға тапсырыс берушінің, мемлекеттік сатып алуды ұйымдастырушының, мемлекеттік сатып алуды бірыңғай ұйымдастырушының, комиссиялардың, сарапшының, мемлекеттік сатып алу саласындағы бірыңғай оператордың әрекеттеріне (әрекетсіздігіне), шешімдеріне шағым жасаудың көрсетілген мерзімі өткеннен кейін осындай әрекеттерге шағым жасау сот тәртібінде жүзеге асырылады.
2. Тапсырыс берушінің, мемлекеттік сатып алуды ұйымдастырушының, мемлекеттік сатып алуды бірыңғай ұйымдастырушының, комиссиялардың, сарапшының, мемлекеттік сатып алу саласындағы бірыңғай оператордың әрекеттеріне (әрекетсіздігіне), шешімдеріне осы баптың 1-тармағында белгіленген мерзімдерде шағым жасалған жағдайда мемлекеттік сатып алу туралы шартты жасасу мерзімі шағым қаралғанға дейін тоқтатыла тұрады.
Әлеуетті өнім берушінің шағымы электрондық-цифрлық қолтаңбаны пайдалана отырып, веб-портал арқылы уәкілетті органға берілуі мүмкін.
3. Уәкілетті орган шағым түскен күннен бастап он жұмыс күні ішінде шағымды қарауға міндетті.
Уәкілетті орган шағым түскен күннен бастап тапсырыс берушіге мемлекеттік сатып алуды тоқтата тұру туралы хабарлама жібереді.
4. Шағымды қарау нәтижелері бойынша уәкілетті орган шағымды негізді немесе негізсіз деп тану туралы шешім қабылдайды.
5. Шағымды қарау нәтижелері бойынша уәкілетті орган қабылдаған шешіміне Қазақстан Республикасының заңнамасына сәйкес сот тәртібінде шағым жасалуы мүмкін.

52-бап. Шағым беру тәртібі

1. Уәкілетті органға тапсырыс берушінің, мемлекеттік сатып алуды ұйымдастырушының, мемлекеттік сатып алуды бірыңғай ұйымдастырушының, комиссиялардың, сарапшының, мемлекеттік сатып алу саласындағы бірыңғай оператордың әрекеттеріне (әрекетсіздігіне), шешімдеріне шағым мыналарды:
1) әрекеттеріне шағым жасалатын заңды тұлғаның атауын, орналасқан жерін;
2) шағым берген тұлғаның атауын, орналасқан жерін;
3) мемлекеттік сатып алу шеңберінде бұзушылықтар жасалған мемлекеттік сатып алу туралы мәліметтерді;
4) тапсырыс берушінің шағым жасалған әрекеттерін (әрекетсіздігін) қамтуға тиіс.
Қажет болған жағдайда шағымға оның негізділігін растайтын құжаттар қоса беріледі.
2. Шағымға оны берген тұлға немесе оның өкілі қол қояды. Өкіл берген шағымға сенімхат немесе өкілдің өкілеттіктерін куәландыратын өзге де құжат қоса берілуге тиіс.
3. Егер:
1) шағым осы бапта белгіленген талаптарға сәйкес келмесе;
2) шағымға қол қойылмаса не оған қол қоюға өкілеттігі жоқ адам қол қойса;
3) шағым осы Заңда белгіленген мерзім өткеннен кейін берілсе, шағым түскен күннен бастап екі жұмыс күні ішінде оны берген адамға қайтарылады.

53-бап. Қазақстан Республикасының мемлекеттік сатып алу
туралы заңнамасын бұзғаны үшін жауаптылық

Қазақстан Республикасының мемлекеттік сатып алу туралы заңнамасын бұзу Қазақстан Республикасының заңдарына сәйкес жауаптылыққа әкеп соғады.

11-тарау. Арнайы және өтпелі ережелер

54-бап. Әлеуетті өнім берушілердің жекелеген санаттарының
мемлекеттік сатып алуға қатысуы

1. Әлеуетті өнім берушілердің жекелеген санаттарының мемлекеттік сатып алуға қатысуы осы Заңда көзделген жағдайларда айқындалады.
2. Мемлекеттік сатып алуды ұйымдастырушылар тауарлардың, жұмыстардың, көрсетілетін қызметтердің жекелеген түрлерін мемлекеттік сатып алуды өткізу кезінде:
1) мүгедектердің мұқтаждығына арналған тауарларды (тифлотехникалық құралдар, жүріп-тұруға арналған арнайы құралдар, міндетті гигиеналық құралдар) өндіретін және (немесе) беретін Қазақстан Республикасы мүгедектерінің қоғамдық бірлестіктерінен және Қазақстан Республикасы мүгедектерінің қоғамдық бірлестіктері құрған ұйымдардан осындай тауарларды, ағымдағы жылы осы тауарларды сатып алу үшін бөлінген қаражаттың жалпы көлемінің кемінде елу пайызы көлемінде;
2) тауарларды өндіретін Қазақстан Республикасы мүгедектерінің қоғамдық бірлестіктерінен және Қазақстан Республикасы мүгедектерінің қоғамдық бірлестіктері құрған ұйымдардан осы тармақтың 1) тармақшасында көрсетілмеген өзге де тауарларды ағымдағы жылы осы тауарларды сатып алу үшін бөлінген қаражаттың жалпы көлемінің кемінде елу пайызы көлемінде;
3) орындайтын жұмыстарды, көрсететін қызметтерді Қазақстан Республикасы мүгедектерінің қоғамдық бірлестіктерінен және Қазақстан Республикасы мүгедектерінің қоғамдық бірлестіктері құрған ұйымдардан жұмыстар мен көрсетілетін қызметтерді, ағымдағы жылы осы жұмыстар мен көрсетілетін қызметтерді сатып алу үшін бөлінген қаражаттың жалпы көлемінің жүз пайызы көлемінде сатып алуды жүзеге асырады.
3. Тауарларды өндіретін және (немесе) тауарларды беретін, жұмыстарды орындайтын, қызметтерді көрсететін Қазақстан Республикасы мүгедектерінің қоғамдық бірлестіктері және Қазақстан Республикасы мүгедектерінің қоғамдық бірлестіктері құрған ұйымдардың тізбесін және оларды енгізу тәртібін халықты әлеуметтік қорғау саласындағы уәкілетті орган айқындайды.
Тауарларды өндіретін және (немесе) тауарларды беретін, жұмыстарды орындайтын, қызметтерді көрсететін Қазақстан Республикасы мүгедектерінің қоғамдық бірлестіктерінен және Қазақстан Республикасы мүгедектерінің қоғамдық бірлестіктері құрған ұйымдардан сатып алынатын тауарлардың, жұмыстардың, көрсетілетін қызметтердің жекелеген түрлері тізбесін Қазақстан Республикасының Үкіметі айқындайды.
4. Осы баптың 2-тармағында белгіленген ережелерді іске асыру үшін мемлекеттік сатып алуды ұйымдастырушы осы Заңда көзделген тәсілдермен мемлекеттік сатып алуды жүзеге асырады, оған тауарларды өндіретін және (немесе) тауарларды беретін, жұмыстарды орындайтын, қызметтерді көрсететін Қазақстан Республикасы мүгедектерінің қоғамдық бірлестіктеріне және Қазақстан Республикасы мүгедектерінің қоғамдық бірлестіктері құрған ұйымдарға рұқсат беріледі.
Жұмыстарды орындайтын, қызметтерді көрсететін Қазақстан Республикасы мүгедектерінің қоғамдық бірлестіктеріне және Қазақстан Республикасы мүгедектерінің қоғамдық бірлестіктері құрған ұйымдарға өткізілетін мемлекеттік сатып алудың нысанасы болып табылатын жұмыстарды орындау бойынша қосалқы мердігерлерді және қызметтер көрсету бойынша бірлескен орындаушыларды тартуға жол берілмейді.
Осы баптың 2-тармағына сәйкес мемлекеттік сатып алуды жүзеге асыру кезінде мемлекеттік сатып алуды ұйымдастырушы хабарландыру мәтінінде мемлекеттік сатып алу тек қана тауарларды өндіретін және (немесе) тауарларды беретін, жұмыстарды орындайтын, қызметтерді көрсететін Қазақстан Республикасы мүгедектерінің қоғамдық бірлестіктері және Қазақстан Республикасы мүгедектерінің қоғамдық бірлестіктері құрған ұйымдар арасында жүзеге асырылатынын көрсетеді.
5. Мемлекеттік сатып алу осы Заңның 30-бабының 1-тармағында көзделген негіздер бойынша өтпеді деп танылған жағдайда, тапсырыс беруші тауарларды өндіретін және (немесе) тауарларды беретін, жұмыстарды орындайтын, қызметтерді көрсететін Қазақстан Республикасы мүгедектерінің қоғамдық бірлестіктерінен және Қазақстан Республикасы мүгедектерінің қоғамдық бірлестіктері құрған ұйымдардан бір көзден алу тәсілімен мемлекеттік сатып алуды өткізу туралы шешім қабылдауға құқылы.
Тауарларды өндіретін және (немесе) тауарларды беретін, жұмыстарды орындайтын, қызметтерді көрсететін Қазақстан Республикасы мүгедектерінің қоғамдық бірлестіктерінен және Қазақстан Республикасы мүгедектерінің қоғамдық бірлестіктері құрған ұйымдардан бір көзден алу тәсілімен мемлекеттік сатып алу өтпеді деп танылған жағдайда, тапсырыс беруші Қазақстан Республикасының мемлекеттік сатып алу туралы заңнамасына сәйкес өзге әлеуетті өнім берушілер арасында мемлекеттік сатып алуды қайтадан өткізу туралы шешім қабылдауға құқылы.
6. Мемлекеттік сатып алуды ұйымдастырушы бөліктерге бөлуге рұқсат берілетін тауарларды, жұмыстарды, көрсетілетін қызметтерді осы Заңның 13-бабының 1-тармағында көзделген тәсілдермен мемлекеттік сатып алуды жүзеге асыру кезінде ағымдағы жылы осы тауарларды, жұмыстарды, көрсетілетін қызметтерді сатып алу үшін бөлінген жиынтық мәндегі жалпы көлемнің кемінде он бес пайызы мөлшерінде шағын және орта кәсіпкерлік субъектілерінен мемлекеттік сатып алуды жүзеге асыруға міндетті.
Бұл ретте, бөлуге рұқсат берілетін тауарлардың, жұмыстардың, көрсетілетін қызметтердің көлемі тиісті қаржы жылына республикалық бюджет туралы заңда белгіленген айлық есептік көрсеткіштің алпыс мың еселенген жиынтық мәнінен аспауға тиіс.
7. Осы баптың 6-тармағына сәйкес мемлекеттік сатып алуды жүзеге асыру кезінде мемлекеттік сатып алуды ұйымдастырушы хабарландыру мәтінінде мемлекеттік сатып алу тек қана шағын және орта кәсіпкерлік субъектілері арасында жүзеге асырылатынын көрсетеді.
8. Шағын және орта кәсіпкерлік субъектілері арасында мемлекеттік сатып алу өтпеді деп танылған жағдайда, мемлекеттік сатып алуды ұйымдастырушы Қазақстан Республикасының мемлекеттік сатып алу туралы заңнамасында көзделген тәртіппен жалпы негіздерде мемлекеттік сатып алуды жүзеге асыруға құқылы.
Бұл ретте, сатып алу объектісі болып табылатын тауарлардың, жұмыстардың, көрсетілетін қызметтердің көлемі ағымдағы жылы осы тауарларды сатып алу үшін бөлінген жиынтық жалпы жылдық мәнде ескеріледі.
9. Мемлекеттік сатып алуды ұйымдастырушы жұмыстарды, көрсетілетін қызметтерді мемлекеттік сатып алуды жүзеге асыру кезінде конкурстық немесе аукциондық құжаттамада шағын және орта кәсіпкерлік субъектісі болып табылмайтын әлеуетті өнім берушіге мемлекеттік сатып алу туралы шартты орындауға шағын және орта кәсіпкерлік субъектілері арасынан қосалқы мердігерлерді (бірлескен орындаушыларды) тарту туралы талапты белгілеуге құқылы.
Бұл ретте, орындауға, көрсетуге қосалқы мердігерлер (бірлескен орындаушылар) тартылатын жұмыстардың, көрсетілетін қызметтердің көлемі ағымдағы жылы осы жұмыстарды, көрсетілетін қызметтерді сатып алу үшін бөлінген жиынтық жалпы жылдық мәнде ескеріледі.

55-бап. Өтпелі ережелер

1. Осы Заңның 42-бабы 3-тармағының 54) тармақшасының ережелері 2016 жылғы 1 шілдеге дейін қолданылады.
2. Осы Заңның 45-бабының ережелері 2016 жылғы 1 шілдеден бастап қолданысқа енгізіледі.

12-тарау. Қорытынды ережелер

58-бап. Осы Заңды қолданысқа енгізу тәртібі

1. Осы Заң 2016 жылғы 1 қаңтардан бастап қолданысқа енгізіледі.
2. «Мемлекеттік сатып алу туралы» 2007 жылғы 21 шілдедегі Қазақстан Республикасы Заңының (Қазақстан Республикасы Парламентінің Жаршысы, 2007 ж., № 17, 135-құжат; 2008 ж., № 13-14, 58-құжат; № 20, 87-құжат; № 21, 97-құжат; № 24, 128-құжат; 2009 ж., № 2-3, 21-құжат; № 9-10, 47, 49-құжаттар; № 15-16, 74-құжат; № 17, 78, 82-құжаттар; № 24, 129, 133-құжаттар; 2010 ж., № 5, 23-құжат; № 7, 28, 29-құжаттар; № 15, 71-құжат; № 17-18, 108-құжат; № 24, 146-құжат; 2011 ж., № 2, 26-құжат; № 4, 37-құжат; № 6, 49-құжат; № 11, 102-құжат; № 13, 115-құжат; № 20, 151-құжат; № 21, 161, 171-құжаттар; 2012 ж., № 2, 11-құжат; № 3, 22-құжат; № 6, 43-құжат; № 8, 64-құжат; № 12, 83-құжат; № 13, 91-құжат; № 14, 92, 94-құжаттар; № 15,97-құжат; № 23-24, 125-құжаттар; 2013 ж., № 1, 2-құжат; № 10-11, 56-құжат; № 14, 75-құжат; № 15, 76-құжат; 2014 ж., № 1, 4, 6,9-құжаттар; № 4-5, 24-құжат; № 10, 52-құжат; № 14, 84, 86-құжаттар; № 16, 90-құжат; № 19-ІІ, 96-құжат) күші жойылды деп танылсын.

Қазақстан Республикасының
Президенті