Жүктердi темiр жол көлiгiмен тасымалдау кезiнде айыппұл мөлшерiн арттыру туралы

Күшін жойған

Қазақстан Республикасы Министрлер Кабинетiнiң Қаулысы 1993 жылғы 30 қыркүйек N 975. Күшi жойылды - Қазақстан Республикасы Министрлер Кабинетiнiң 1995.02.27. N 206 қаулысымен.

Темiр жол тарифi деңгейiнiң көтерiлуiне байланысты және жылжымалы құрам мен контейнерлердi пайдалануды жақсарту, темiр жолдардың, жүк жөнелтушiлер мен жүк алушылардың жүк тасымалдау жоспарын орындауға өзара материалдық жауапкершiлiгiн арттыру мақсатында Қазақстан Республикасының Министрлер Кабинетi қаулы етедi:
1. 1993 жылғы 1 қазаннан бастап темiр жол Жарғысында көзделген, Қазақстан Республикасы Министрлер Кабинетiнiң 1993 жылғы 11 наурыздағы N 196 қаулысымен (Қазақстан Республикасы ПҮАЖ, 1993 ж., N 8, 95-бап) белгiленiп, қолданылып жүрген айыппұл мөлшерi:
50 және 92-баптарға сәйкес темiр жолдың вагондар беру мен алып кетудi кiдiрткенi үшiн;
51 және 161-баптарға сәйкес вагондарды тазартпағаны және цистерналарды сарықпағаны үшiн;
104-бапқа сәйкес тiкелей аралас қатынас тасымалы кезiнде контейнерлердi белгiленген мерзiмнен артық кiдiрткенi үшiн;
118 және 118-1-баптарға сәйкес жүктердi ауыстыру жоспарын орындамағаны және вагондар мен кемелердiң бос тұрғаны үшiн;
144-бапқа сәйкес жүк тасымалдау жоспарын орындамағаны үшiн;
155-бапқа сәйкес жүк атауын дұрыс көрсетпегенi үшiн;
155-1-бапқа сәйкес темiр жолдың рұқсатынсыз жалпы желiлiк парктiң вагондары мен контейнерлерiн жүк жөнелтушiлердiң, жүк алушылардың және кiрме жол иелерiнiң өздерiнiң iшкi тасымалына пайдаланғаны үшiн;
156, 156-1, 156-2, 157 - баптарға сәйкес вагондар мен контейнерлердi белгiленген мерзiмнен артық кiдiрткенi үшiн;
159-1 - бапқа сәйкес вагондар мен контейнерлердiң жүк көтергiштiгi мен сыйымдылығын толық пайдаланбағаны үшiн;
163-бапқа сәйкес кәсiпорындарға, ұйымдар мен мекемелерге қарасты немесе олар жалға алған вагондар мен контейнерлердi темiр жолдың өз бетiмен алып қойғаны үшiн 3 есе арттырылсын. <*>
Ескерту. Осы баптарда көзделген айып мөлшерi 1994 ж. 1 сәуiрден
бастап 3 есе арттырылған - ҚРМК-нiң 1994 ж.
16 наурыздағы N 278 қаулысына сәйкес.
2. Қазақстан Республикасының Көлiк министрлiгi жүк тасымалдау тарифының деңгейiн одан әрi өзгерткен жағдайда осы қаулының 1-тармағында көрсетiлген айыппұл мөлшерiн өзгерту туралы Қазақстан Республикасының Министрлер Кабинетiне тиiстi ұсыныстар енгiзiп отырсын.
Қазақстан Республикасының
Премьер-министрi