Қазақстан Республикасының мемлекеттiк Экспорт-импорт банкiн (Қазақстан Эксимбанкi) туралы

Күшін жойған

Қазақстан Республикасы Министрлер Кабинетiнiң Қаулысы 1994 жылғы 12 қыркүйек N 1017. Күшi жойылды - Қазақстан Республикасы Министрлер Кабинетiнiң 1996.02.15. N 208 қаулысымен.

"Қазақстан Республикасының Экспорт-импорт банкiн құру туралы" Қазақстан Республикасы Президентiнiң 1994 жылғы 16 маусымдағы N 1815 Жарлығын орындау үшiн Қазақстан Республикасының Министрлер Кабинетi қаулы етедi:
1. Қазақстан Республикасының Қаржы министрлiгi 1995-1997 жылдарға арналған бюджет жобаларында Қазақстан Эксимбанкiнiң жарғылық және мiндеттi резерв қорын толықтыруға шығыстарды көздесiн, оның iшiнде жылдар бойынша:
1995 жылы - 20 млн. АҚШ доллары, 1996 жылы - 20 млн. АҚШ доллары және 1997 жылы - 20 млн. АҚШ доллары.
2. Қазақстан Республикасының Қаржы министрлiгi Alem Bank Каzакhstаn-мен бiрлесе отырып үстiмiздегi жылдың 1 қазанына дейiнгi мерзiмде Alem Bank Kazakhstan активi мен пассивiндегi мемлекеттiк үлестi Қазақстан Эксимбанкiне кезең-кезеңмен өткiзу туралы Келiсiмге қол қоятын болсын.
3. Қазақстан Эксимбанкi Қазақстан Республикасы Үкiметiнiң атынан және (немесе) оның тапсыруы бойынша Alem Bank Kazakhstan және Қазақстан Республикасының екiншi деңгейдегi басқа банктерi қол қойған, сондай-ақ Қазақстан Республикасы кепiлдiк беретiн кредиттiк келiсiмдерден туындайтын барлық халықаралық мiндеттемелер бойынша аталған банктердiң құқықтық мұрагерi болады және оларды пайдалану мен қызмет көрсетудi жалғастыра бередi деп белгiленсiн.
Қазақстан Эксимбанкi Қазақстан Республикасының Қаржы министрлiгiмен, Әдiлет министрлiгiмен және банктерiмен бiрге Қазақстан Республикасы Үкiметiнiң атынан және оның тапсыру бойынша қол қойылған үкiмет кепiлдiктерi мен кредиттiк келiсiмдерiн қайта ресiмдеуге кiрiссiн.
4. Шетел инвестициялары жөнiндегi ұлттық агенттiк Қазақстан Эксимбанкiн қатыстыра отырып, бiр апта мерзiм iшiнде Қазақстан Республикасының Министрлер Кабинетiне Қазақстан Республикасының Экономика министрлiгi жанындағы Шетел инвестициялары жөнiндегi ұлттық агенттiктiң кейбiр қызметiн беру жөнiндегi ұсыныс енгiзсiн.
5. Қазақстан Эксимбанкiнiң Басқармасы 7 адам құрамында бекiтiлсiн: Басқарма төрағасы, Басқарма төрағасының екi орынбасары, сондай-ақ Қазақстан Республикасы Министрлер Кабинетiнiң өкiлi Қазақстан Республикасы Қаржы министрiнiң орынбасары, Экономика министрiнiң орынбасары және Ұлттық Банкiнiң Басқарма төрағасының орынбасары. <*>
Қазақстан Эксимбанкi Басқармасының төрағасы бiр ай мерзiм iшiнде Министрлер Кабинетiне Қазақстан Эксимбанкi Басқармасының жеке құрамы жөнiнде ұсыныс енгiзсiн.
Қазақстан Эксимбанк Басқармасының төрағасы Қазақстан Республикасы Президентiнiң Жарлықтарымен тағайындалады және орнынан босатылады. Қазақстан Эксимбанкi Басқармасы төрағасының орынбасарлары Қазақстан Эксимбанкi Басқармасы төрағасының ұсынуы бойынша Қазақстан Республикасы Министрлер Кабинетiнiң қаулыларымен тағайындалады және орнынан босатылады. <*>
Ескерту. 5-тармақ жаңа абзацпен толықтырылған - Қ.Р.К.М.
27 қазан 1994 ж. N 1185 қаулысымен.
5-тармақтың бiрiншi абзацында сөздер алмастырылған
және толықтырылған - ҚРМК-нiң 2.01.1995 ж. N 109
қаулысымен.
6. Қазақстан Эксимбанкi Қазақстан Республикасының Қаржы, Экономика және Әдiлет министрлiктерiмен бiрге Ұлттық Банкiнiң келiсуiмен Қазақстан Республикасының Министрлер Кабинетiне Қазақстан Республикасы Президентiнiң 1994 жылғы 20 наурыздағы N 1607 қаулысымен бекiтiлген Қазақстан Республикасына немесе Қазақстан Республикасының кепiлдiгiне берiлетiн шетел инвестицияларын тарту, пайдалану және есепке алу жұмыстарын ұйымдастыру жөнiндегi Ережеге өзгертулер енгiзу туралы ұсыныс енгiзсiн.
7. Қазақстан Эксимбанкiне:
а) жобаларды сараптауды ұйымдастыру үшiн арнаулы бөлiмшелер құруға және оған қатысуға;
ә) ақы төлеу және т.б. жөнiнде шетел мамандарын келiсiм негiзiнде жұмысқа немесе жұмысты ұйымдастыруға жалдауға;
б) республикада және шетелде белгiленген тәртiппен өкiлдiктер ашуға;
в) банк мамандарының еңбегiне ақы төлеу жүйесi мен мөлшерiн және материалдық ынталандыру мен әлеуметтiк қамтамасыз етудiң басқа да түрлерiн дербес белгiлеуге;
г) кiрiстердi шетел валютасымен және теңгемен халықаралық ұйымдарға жарна төлеу, өкiлдiктердi ұстау, техникалық жабдықтау, күрделi және басқа шығыстарды қоса алғанда ағымдағы шығыстарды өтеуге жұмсауға;
д) шығыстардың iшiнде шетел валютасымен өкiлдiк шығыстарды көздеуге рұқсат етiлсiн.
8. Қазақстан Эксимбанкiне Басқарма төрағасының төрт орынбасарын, оның iшiнде бiр бiрiншi орынбасарын ұстауға рұқсат берiлсiн.
9. Қазақстан Эксимбанкi төрағасының лауазымы медициналық және тұрмыстық қызмет көрсету шарттары бойынша министр лауазымына, ал Басқарма төрағасының орынбасарларының лауазымы - министр орынбасарларының лауазымына теңестiрiлсiн.
10. Қазақстан Республикасының көлiк және коммуникациялар министрлiгi Қазақстан Эксимбанкi Басқармасының төрағасын және оның орынбасарларын үкiметтiк байланыс арналарымен, сондай-ақ қажеттi мөлшерде халықаралық факс, телекс, телефон байланыстарымен бiрiншi кезекте қамтамасыз етсiн.
11. Қазақстан Эксимбанкiнiң Алматы қаласындағы мекенжайы белгiленсiн. Қазақстан Республикасының Мемлекеттiк мүлiк жөнiндегi мемлекеттiк комитетi бiр ай мерзiм iшiнде Қазақстан Эксимбанкiне банк қызметiнiң ерекшелiгiне сай қызмет үйiн бөлсiн.
12. Қазақстан Республикасының Әдiлет министрлiгi бiр ай мерзiм iшiнде Қазақстан Республикасы Министрлер Кабинетiнiң шешiмдерiн Қазақстан Республикасы Президентiнiң 1994 жылғы 16 шiлдедегi N 1815 Жарлығымен және осы қаулымен сәйкестендiру жөнiнде ұсыныс енгiзсiн.
Қазақстан Республикасының
Премьер-министрi