Қазақстан Республикасы Президентiнiң "Жер қойнауы және жер қойнауын пайдалану туралы" 1996 жылғы 27 қаңтардағы Заң күшi бар N 2828 U962828_ Жарлығын iске асыру үшiн Қазақстан Республикасының Үкiметi қаулы етедi:
1. Қазақстан Республикасында жер қойнауын пайдалану операцияларын жүргiзу үшiн Контракттар жасасу тәртiбi туралы Ереже бекiтiлсiн (қоса берiлiп отыр).
2. Қазақстан Республикасының Құзырлы органдары жер қойнауын пайдаланушылармен Контракттар жасасқан кезде осы Ереженi басшылыққа алатын болсын.
3. Қазақстан Республикасының атқарушы органдары жер қойнауын пайдаланушылармен сараптау жұмысын және Контракттарды келiсудi осы Ережеге сәйкес жүргiзетiн болсын.
4. Қазақстан Республикасының Экономика министрлiгi Қазақстан Республикасының жер қойнауын пайдаланушылармен Контракттар жасасу және атқару жөнiндегi Құзырлы органдарымен бiрлесiп жұмыс iстеп тұрған мұнай-газ өндiрушi және тау-кен ұйымдарының тiзбесiн айқындасын және Қазақстан Республикасының Құзырлы органдары олармен жер қойнауын пайдалануға контракттар жасасуды 1996 жылы қамтамасыз ететiн болсын.
5. Қазақстан Республикасы Президентiнiң "Жер қойнауы және жер
қойнауын пайдалану туралы" 1996 жылғы 27 қаңтардағы Заң күшi бар
N 2828 Жарлығы күшiне енгiзiлгенге дейiн жасасылған Контракттар,
сондай-ақ Қазақстан Республикасының атқарушы органдарының осыған
байланысты актiлерi күшiнде болады.
Қазақстан Республикасының
Премьер-Министрi
Қазақстан Республикасы
Үкiметiнiң
1996 жылғы 6 қыркүйектегi
N 1092 қаулысымен
бекiтiлген
Қазақстан Республикасында жер қойнауын пайдалану
операцияларын жүргiзу үшiн Контракттар жасасу тәртiбi туралы
ЕРЕЖЕ
Ереженiң қолданылатын саласы
1. Осы Ереже Қазақстан Республикасында жер қойнауын пайдалану операцияларын жүргiзу үшiн жасалатын Контракттардың негiзгi принциптерiн белгiлейдi және қатынастарын реттейдi.
2. Пайдалы қазбалардың және Техногендi минералдық құрылымдардың кейбiр түрлерiне сәйкес Жер қойнауын пайдалану үшiн операциялар жүргiзуге Контракттар жасауға байланысты ерекшелiктер Пайдалы қазбалардың және Техногендi минералдық құрылымдардың тиiстi түрлерi туралы заң актiлерiмен белгiленедi.
3. Осы Ережедегi қолданылатын анықтамалар мен терминдер Қазақстан Республикасы Президентiнiң "Жер қойнауы және жер қойнауларын пайдалану туралы" (бұдан әрi - "Жер қойнауы туралы" Жарлық) Заң күшi бар Жарлығында берiлген терминдер мен анықтамаларға сәйкес келедi.
Жер қойнауын пайдалануға операциялар жүргiзу үшiн
жасалатын Контракттардың түрлерi
4. Қазақстан Республикасында жер қойнауын пайдалануға операциялар жүргiзу үшiн Контракттар мынадай жағдайларда:
Жер қойнауын мемлекеттiк геологиялық зерделеу кезiнде;
Барлау кезiнде;
Өндiру кезiнде, оның iшiнде Мемлекеттiк меншiктегi Пайдалы
қазбаларды Техногендi минералдық құрылымдардан өндiру кезiнде;
Барлау және Өндiру кезiнде;
Өндiрумен байланысты емес жер асты ғимараттарын салу мен
пайдалану кезiнде жасалады.
5. Жер қойнауын пайдалану жөнiндегi нақты операциялардың
шарттарына және басқа да жағдайларға байланысты Контракттардың құрама
және басқа түрлерi рұқсат етiледi.
6. Өндiрумен байланысты емес жер асты ғимараттарын салу мен
пайдалануға беру үшiн "Жер қойнауы туралы" Жарлықтың және осы
Ереженiң Өндiруге жасалатын Контракттар үшiн қолданылатын қағидалары
пайдаланылады.
Контрактiнiң тараптары
7. Контрактiнiң тараптары мыналар:
Құзырлы орган - Қазақстан Республикасы Үкiметi немесе облыстық атқарушы орган (Жаппай тараған пайдалы қазбаларға) Контракттар жасау мен орындауға тiкелей байланысты құқықтар берген атқарушы орган;
Жер қойнауын пайдаланушы (Мердiгер) - "Жер қойнауы туралы" Жарлыққа сәйкес жер қойнауын пайдалану операцияларын жүргiзуге құқық алған азамат немесе заңды тұлға, мемлекет немесе халықаралық ұйым болып табылады.
8. Егер Контрактiнiң тарабы ретiнде заңды ұйым мәртебесi жоқ Мердiгерлер бiрлестiгi жұмыс жүргiзетiн болса, мұндай Мердiгерлер ортақ құқыққа ие болады және Контракт бойынша ортақ мiндеттердi орындайды.
Бұл жағдайда Контрактiнiң тараптары:
Қазақстан Республикасы Үкiметiнiң Құзырлы органы;
Мердiгерлер бiрлестiгi болып табылады.
Контракт жасау жөнiнде келiссөздер жүргiзу үшiн Мердiгерлер бiрлестiгi мердiгерлер атынан келiссөз жүргiзетiн өкiлеттi топ құрады.
Мердiгерлер бiрлестiгi атынан Контрактiге осындай Мердiгерлер бiрлестiгiне қатысушының әрқайсысы қол қояды.
9. Құзырлы органның Жұмыс тобы келiссөздер барысында кеңесу үшiн басқа мүдделi мемлекеттiк органдардың мамандарын қатыстыра алады. Бұл жағдайда мемлекеттiк органдар Жұмыс тобына қажеттi кеңестер беруге немесе өздерiнiң мамандарымен қамтамасыз етуге мiндеттi.
10. Егер Контрактiлер бiр Кен орнының түрлi учаскелерiнде Өндiруге Лицензиялары бар бiрнеше Мердiгерлермен бөлек жасалынған болса, мердiгерлер өз араларында Кен орнын бiрлесiп пайдалану жөнiнде жазбаша келiсiм жасай алады. Бұл келiсiм Құзырлы органмен келiсiлуi қажет.
11. Жер қойнауын пайдалануға операциялар жүргiзу үшiн жасалған Контрактiде бiр тарап жағынан Құзырлы орган болмаса, бұл Контракт күшi жоқ деп саналады.
Контракт бойынша келiссөздер бастау негiзi
12. Тараптардың Контракт бойынша келiссөздер бастауына жер
қойнауын пайдаланушының Жер қойнауын пайдалануға операциялар жүргiзу
үшiн Лицензия алуы негiз болып табылады.
13. Тараптардың жер қойнауын Мемлекеттiк геологиялық зерделеу
Контрактiсi келiссөздер бастауына өкiлеттi органның жер қойнауын
пайдалану және қорғау туралы әкiмшiлiк Актiсi (бұдан әрi - Акт) негiз
болып табылады.
14. Өндiру Контрактiсi Кен орындарының қорын мемлекеттiк
сараптық бағалаудан кейiн жасалады. Барлау және Барлау мен Өндiру
Контрактiлерiн (қатар қолданылатын Лицензиямен) жасасу үшiн қорды
мемлекеттiк бағалаудың керегi жоқ.
Контракт жасасу мерзiмi
15. Контракт жасасу мерзiмi Лицензияда немесе Актiде
көрсетiледi. Контракт жасасу мерзiмiн Құзырлы органның ұсынысы
бойынша Лицензия беретiн жұмысшы органның рұқсатымен екi рет ұзартуға
болады, бiрақ 6 айдан көп болмауы керек.
16. Егер тиiстi ұзартуларды ескере отырып белгiленген мерзiм
iшiнде тараптар келiсiмге келмесе, келiссөздер тоқтатылуы, ал
Лицензия қайтарылып алынуы тиiс. Мұнда жер қойнауын пайдаланушының
келiссөздер жүргiзу мен Контрактiнi дайындауға жұмсаған шығындарының
орны толтырылмайды.
Контракт жобасын дайындау үшiн келiссөздер жүргiзу
17. Құзырлы орган Контракт дайындау мақсатында Жер қойнауын пайдаланушымен дербес келiссөздер жүргiзедi, ол үшiн кез келген мемлекеттiк органдардан және мемлекеттiк емес ұйымдардан қажеттi кеңестер алуға құқығы бар Жұмыс тобын құрады.
18. Құзырлы орган мен Мердiгердiң Контрактiнi дайындауы мынадай тәртiппен жүргiзiледi:
Тараптардың бiрiншi кездескен күнi келiссөздердiң басталуы болып саналады, бiрақ Лицензия берiлген уақыттан 30 (отыз) күннен кешiктiрiлмейдi.
Контракт жобасы Лицензия, Модельдi Контракт қолданылатын құқық негiзiнде дайындалады және Лицензияда немесе Актiде белгiленгенiндей Контракт жасасу мерзiмiнiң аяқталуына дейiн 90 күннен кешiктiрiлмей Құзырлы органға берiледi.
Құзырлы орган Контракт жобасын алған күннен бастап 30 күннен кешiктiрмей оны тiкелей келiссөздер арқылы Мердiгермен талқылауы немесе өзiнiң Контракт жобасының шарттарымен келiсетiндiгi немесе келiспейтiндiгi (бас тартатындығы) туралы Мердiгерге хабар беруi тиiс. Кейбiр шарттармен келiспеген жағдайда немесе ұсынылған Контракт жобасынан мүлде бас тартқан жағдайда Құзырлы орган сол мерзiм iшiнде Мердiгер дайындаған Контракт жобасымен келiспеушiлiк хаттамасын ресiмдеп, өзiнiң шарттарын ұсынуға мiндеттi.
Келiспеушiлiк хаттамасын Мердiгер қабылдамаған жағдайда келiссөздер тараптардың Контрактiнiң барлық шарттары бойынша келiсiмге келгенге дейiн жүргiзiлуi тиiс, бiрақ осы Ереженiң 15-тармағына сәйкес белгiленген мерзiмнен аспауы керек.
19. Келiссөздер барысында тараптармен келiсiлген Контракт жобасы мынадай талаптарға сай болуға тиiс:
Жұмыс тобының және Мердiгердiң өкiлеттi өкiлдерi қол қоюы керек;
Лицензия немесе Актiнiң шарттары мен ережелерi Контрактiде өзгертулерсiз ескерiлуi керек;
Моделдi шарттың барлық шарттарының мәнi Контрактiде ешқандай өзгертулерсiз ескертiлуi керек;
Контракт Қазақстан Республикасында қолданылатын iс қағаздарының талаптарына сай болуы тиiс.
20. Контракт жобасының экономикалық моделiн және салық жүйесiн Құзырлы орган Қазақстан Республикасының Экономика министрлiгiмен және Қазақстан Республикасының Қаржы министрлiгiнiң Бас салық инспекциясымен бiрлесе отырып белгiлейдi, ал Жаппай тараған пайдалы қазбалар үшiн - облыстық экономика басқармасы және облыстық салық инспекциясы белгiлейдi.
Контракт жобасын келiсу тәртiбi
21. Тараптардың дайындаған Контракт жобасы қол қойылғанға дейiн мiндеттi түрде арнайы атқарушы органдармен:
айналадағы табиғи ортаны қорғау мәселесi бойынша - Қазақстан Республикасының Экология және биоресурстар министрлiгiмен, Жаппай тараған пайдалы қазбалар бойынша оның аймақтық басқармаларымен;
денсаулық сақтау мәселесi бойынша - Қазақстан Республикасының Денсаулық сақтау министрлiгiмен, Жаппай тараған пайдалы қазбалар бойынша - облыстық денсаулық сақтау бөлiмдерiмен;
жер қойнауын қорғау және пайдалану мәселесi бойынша - Қазақстан Республикасының Геология және жер қойнауын қорғау министрлiгiмен, Жаппай тараған пайдалы қазбалар бойынша - жер қойнауын қорғау және пайдалану жөнiндегi аймақтық басқармалармен;
жұмысты қауiпсiз жүргiзу және тау-кен қадағалауы мәселесi бойынша - Қазақстан Республикасының Өнеркәсiпте жұмысты қауiпсiз жүргiзудi қадағалау және тау-кен қадағалау жөнiндегi мемлекеттiк комитетiмен, Жаппай тараған пайдалы қазбалар бойынша - оның облыстық басқармаларымен келiсiледi.
22. Келiсiм жасау үшiн Лицензияның көшiрмесiн және Контрактiнiң жобасын тапсыру қажет. Келiсiмге келушi органның аталған құжаттардан басқа құжаттар талап етуге құқы жоқ.
23. Келiсiмнiң жалпы мерзiмi тиiстi органның Контракт жобасын
алған күннен бастап 15 күннен аспауы тиiс. Келiсiмнiң жалпы
мерзiмiнен алғашқы 10 (он) күннен кешiктiрмей тиiстi орган
Контрактiнiң шарттарына өздерiнiң ескертулерi мен ұсыныстарын жазбаша
түрде және жалпы мерзiмнiң аяғына дейiн тапсыруға және Контракт
жобасы шарттарының өзгергендiгi туралы мәселелердi келiсуге мiндеттi.
Контракт сарапшылығын өткiзу тәртiбi
24. Контракт қол қойылғанға дейiн Қазақстан Республикасы
Үкiметiнiң өкiлеттi атқарушы органдарында мiндеттi түрде
экономикалық, салықтық, экологиялық және құқықтық сараптаудан өтуге
тиiс.
25. Контракт жобасының сарабын Контракт тараптарының тәуелсiз
сарапшылары жүргiзуiне болады.
Тәуелсiз сарапшылар Қазақстан Республикасының қолданылып жүрген
заңдарына сәйкес өткiзiлген сараптаудың дұрыстығы мен негiзделгенiне
толық жауап бередi.
26. Сараптау өткiзу мерзiмi Контракт құжаттарының жобасын
сараптауға тапсырған күннен бастап 30 (отыз) күннен аспауы тиiс.
27. Контракт жобасына сараптау өткiзiлуiне байланысты барлық
шығындарды Қазақстан Республикасының заңдарына сәйкес Мердiгер өтейдi.
28. Контракттың шарттары Контракттың өзi жасалған нысанда
өзгертiледi. Бұл жағдайда келiсуге және сараптауға Контрактiнiң
өзгертiлген мәтiнi ұсынылуға тиiс.
Контрактiге қол жою және оны тiркеу
29. Келiссөздер мен келiсiмдер және сараптау өткiзiлгеннен кейiн Контракт жобасына Құзырлы органның басшысы және Мердiгердiң өкiлеттi өкiлi қол қояды.
30. Жер қойнауын пайдалануға операциялар жүргiзу үшiн жасалатын Контракттарды тiркеу Жер қойнауын пайдалануға операциялар жүргiзу үшiн жасалатын Контракттарды тiркеу тәртiбi туралы Ережемен реттеледi.
