Ауыл шаруашылығын қаржылай қолдау туралы

Қазақстан Республикасы Премьер-Министрiнiң өкiмi 1996 жылғы 26 қараша N 534-ө

1. Ерте көктемгi және күзгi үсiк шалудың, бұршақ соғу мен құрғақшылықтың нәтижесiнде үстiмiздегi жылы Алматы облысының Кеген және Райымбек аудандарындағы көптеген шаруашылықтарда дәндi дақылдар мен басқа да ауыл шаруашылығы өнiмдерi астығының төмен болуы ауыр экономикалық жағдай туғызды. Туындаған қиындықтарды жою мен зиян шеккен ауыл шаруашылығы өнiмдерi тауарларын өндiрушiлерге көмек көрсету мақсатында Қазақстан Республикасының Ауыл шаруашылығы министрлiгi, Ауыл шаруашылығын қаржылай қолдау Мемлекеттiк қоры Алматы облысына 1996 жылы бөлiнуге тиiстi қаражатты осы қордан қаржы төлеудiң қолданылып жүрген тәртiбiне сәйкес құрғақшылықтан айрықша зиян шеккен Кеген және Райымбек аудандарының шаруашылықтарына бiрiншi кезекте жiберудi қамтамасыз етсiн.
Ауыл шаруашылығын қаржылай қолдау мемлекеттiк қорының Республикалық ведомствоаралық кеңесiне алдағы малды қыстатуды дайындау мен өткiзу жөнiндегi шұғыл шараларды жүзеге асыру үшiн аталған аудандардың шаруашылықтарына өтеусiз 10 (он) млн. теңгеден бөлу мәселесiн қарау ұсынылсын.
2. Мемлекеттiк азық-түлiк контракт корпарациясы Кеген ауданының шаруашылықтарына мемлекеттiк ресурстардан 1-ге 1,1 есебiмен 1997 жылдың астығынан қарызға қайтаратын етiп 2 мың тонна жаздық дәндi дақылдар тұқымын бөлсiн.
Дәндi дақылдар қарызы бойынша борышы бар Кеген және Райымбек аудандарының әкiмдерi оны 1997 жылғы 1 желтоқсанда қайтаруды қамтамасыз етсiн.
3. Алматы облысының әкiмi малды қыстатуды қамтамасыз ету туралы қосымша шаралар қабылдасын, қысқы мерзiмде ауыл мектептерiнiң, ауруханаларының және басқа да әлеуметтiк-мәдени тұрмыстық объектiлердiң жұмыс iстеуiне ерекше көңiл бөлсiн, халықты азық-түлiкпен және күнделiктi қажеттi тауарлармен қамтамасыз етудi бақылауға алсын.

Премьер-Министр