РҚАО-ның ескертпесі!
Осы бұйрық 29.06.2018 бастап қолданысқа енгізіледі.
"Жер қойнауы және жер қойнауын пайдалану туралы" 2017 жылғы 27 желтоқсандағы Қазақстан Республикасы Кодексінің 273-бабының 2-тармағына сәйкес БҰЙЫРАМЫН:
1. Қоса беріліп отырған Кен іздеушілік жоспарын жасау жөніндегі нұсқаулығы бекітілсін.
2. Қазақстан Республикасы Инвестициялар және даму министрлігінің Геология және жер қойнауын пайдалану комитеті заңнамамен белгіленген тәртіпте:
1) осы бұйрықты Қазақстан Республикасы Әділет министрлігінде мемлекеттік тіркеуді;
2) осы бұйрық мемлекеттік тіркелген күнінен бастап күнтізбелік он күн ішінде оның қазақ және орыс тілдеріндегі қағаз тасығыштағы және электрондық нысандағы көшірмелерін Қазақстан Республикасы Нормативтік құқықтық актілерінің эталондық бақылау банкіне ресми жариялау және енгізу үшін "Республикалық құқықтық ақпарат орталығы" шаруашылық жүргізу құқығындағы республикалық мемлекеттік кәсіпорнына жіберуді;
3) осы бұйрықты Қазақстан Республикасы Инвестициялар және даму министрлігінің интернет-ресурсында орналастыруды;
4) осы бұйрық Қазақстан Республикасы Әділет министрлігінде мемлекеттік тіркелгеннен кейін он жұмыс күні ішінде осы тармақтың 1), 2) және 3) тармақшаларына сәйкес іс-шаралардың орындалуы туралы мәліметтерді Қазақстан Республикасы Инвестициялар және даму министрлігінің Заң департаментіне ұсынуды қамтамасыз етсін.
3. Осы бұйрықтың орындалуын бақылау жетекшілік ететін Қазақстан Республикасының Инвестициялар және даму вице-министріне жүктелсін.
4. Осы бұйрық 2018 жылғы 29 маусымнан бастап қолданысқа енгізіледі және ресми жариялануға жатады.
|
Қазақстан Республикасының Инвестициялар және даму министрі |
Ж. Қасымбек |
"КЕЛІСІЛДІ"
Қазақстан Республикасының
Энергетика министрі
______________Қ. Бозымбаев
2018 жылғы 21 мамыр
| Қазақстан Республикасы Инвестициялар және даму министрінің 2018 жылғы 17 мамырдағы № 340 бұйрығымен бекітілген |
Кен іздеушілік жоспарын жасау жөніндегі нұсқаулық
1-тарау. Жалпы ережелер
1. Осы Кен іздеушілік жоспарын жасау жөніндегі нұсқаулық "Жер қойнауы және жер қойнауын пайдалану туралы" (бұдан әрі – Кодекс) 2017 жылғы 27 желтоқсандағы Қазақстан Республикасы Кодексінің 273-бабының 2-тармағына сәйкес әзірленген және кен іздеушілік жөніндегі операцияларды жүзеге асыратын жер қойнауын пайдаланушыларға арналған.
2. Кен іздеушілік жоспарын жер қойнауын пайдаланушы әзірлейді және бекітеді.
2-тарау. Кен іздеушілік жоспарын жасау
3. Механикаландыру құралдарын пайдаланатын жер қойнауын пайдаланушы кен іздеушілік жоспары болған кезде ғана кен іздеушілік жөніндегі операцияларды жүргізеді.
4. Кен іздеушілік жоспары мемлекеттік экологиялық сараптамаға жатады. Жер қойнауын пайдаланушы кен іздеушілік жоспарына мемлекеттік экологиялық сараптаманың оң қорытытындысын алған жағдайда ғана механикаландыру құралдарын пайдалана отырып, кен іздеушілік жөніндегі операцияларды жүргізеді.
5. Кен іздеушілік жоспары өтініште көрсетілген Кодекстің 29-бабының 4-тармағымен айқындалған нысан бойынша учаскеге жасалады.
6. Кен іздеушілік жоспары мыналарды қамтиды:
1) кен іздеушілік бойынша жұмыстардың түрлері, әдістері және тәсілдері, шамамен көлемі және жұмыстарды жүргізудің мерзімдері және пайдаланатын механикаландыру және қуаттылығы аз өзге де жабдықтау құралдарын;
2) жер қойнауын пайдалану объектісі туралы жалпы мәліметті, оның орналасқан жерін, жұмыс аймағының климаттық жағдайларын, инфрақұрылымын;
3) ауданның геологиялық және гидрогеологиялық сипаттамасын;
4) кен іздеушілік жұмыстарын ашу, технология және ұйымдастыру әдістерін;
5) жұмыстың жоспарланған режимі (жұмыстың маусымдылығы, жұмыс ауысымының түрлері);
6) бағалы металдар мен (немесе) асыл тастарды кен іздеушілікпен өндірудің тау-кен массасының күтілетін көлемін;
7) кен іздеушілік қызметі бойынша зиянды жұмыс әсерінен жер қойнауын және қоршаған ортаны қорғауды;
8) қауіпсіздік техникасы, еңбекті қорғау, өндірістік санитария бойынша іс-шараларын;
9) су ресурстары кен іздеушілік мақсатында пайдаланылатын су айдындары мен өзендер жағалауларының табиғи рельефі мен түбінің бүлінуін болдырмау бойынша іс-шараларын;
10) кен іздеушілік барысында бүлінген жерді рекультивациялау іс-шараларын;
11) жоспарланған кен іздеушілік жұмыстарын негіздейтін графикалық материалдарды.
