ЗҚАИ-ның ескертпесі!
Осы бұйрықтың қолданысқа енгізілу тәртібін 4 т. қараңыз
Қазақстан Республикасы Президентінің "Әлеуметтік-экономикалық тұрақтылықты қамтамасыз ету жөніндегі шаралар туралы" 2020 жылғы 16 наурыздағы Жарлығының 1-тармағының 4) тармақшасына, "Төтенше жағдай туралы" 2003 жылғы 8 ақпандағы Қазақстан Республикасы Заңының 12-1-бабы 2-тармағының 2-бөлігіне, Қазақстан Республикасы Президентінің жанындағы Төтенше жағдай режимін қамтамасыз ету жөніндегі мемлекеттік комиссия отырысының 2020 жылғы 18 наурыздағы № 3 хаттамасының 11-тармағына, Қазақстан Республикасы Президентінің Қазақстан Республикасы Президентінің жанындағы Төтенше жағдай режимін қамтамасыз ету жөніндегі мемлекеттік комиссияның 2020 жылғы 23 наурыздағы отырысында берген тапсырмасына сәйкес БҰЙЫРАМЫН:
1. "Төтенше жағдай кезеңінде әлеуметтік-еңбек саласында мемлекеттік қызметтер көрсетудің және халықтың жекелеген санаттарын азық-түлік және тұрмыстық жиынтығымен қамтамасыз етудің кейбір мәселелері туралы" Қазақстан Республикасы Еңбек және халықты әлеуметтік қорғау министрінің 2020 жылғы 25 наурыздағы № 109 бұйрығына (Нормативтік құқықтық актілерді мемлекеттік тіркеу тізілімінде № 20164 болып тіркелген, Қазақстан Республикасы нормативтік құқықтық актілерінің эталондық бақылау банкінде электрондық түрде 2020 жылғы 26 наурызда жарияланған) мынадай өзгерістер енгiзілсін:
көрсетілген бұйрықпен бекітілген Төтенше жағдай кезеңінде әлеуметтік-еңбек саласындағы кейбір мемлекеттік қызметтерді көрсету және халықтың жекелеген санаттарын азық-түлік және тұрмыстық жиынтығымен қамтамасыз ету қағидаларында:
2-2-тармақ мынадай редакцияда жазылсын:
"2-2. Егер жасына байланысты зейнетақы төлемдерін, мемлекеттік базалық зейнетақы төлемін, мемлекеттік әлеуметтік жәрдемақыларды, мемлекеттік арнайы жәрдемақыларды, Мемлекеттік әлеуметтік сақтандыру қорынан төленетін әлеуметтік төлемдерді тағайындауға негіздер төтенше жағдай енгізілгенге дейін бір айдан аспайтын мерзімде немесе төтенше жағдай кезеңінде басталған жағдайда көрсетілген мерзім ішінде өтініш бермеген өтініш беруші төтенше жағдай режимі аяқталғаннан кейін үш ай ішінде аталған төлемдерді тағайындауға қажетті құжаттарды қоса бере отырып өтініш бере алады.
Бұл ретте, аталған төлемдерді тағайындау төтенше жағдай енгізілгенге дейін бір айдан аспайтын мерзімде немесе төтенше жағдай кезеңінде тағайындау негіздері туындаған күннен бастап жүзеге асырылады.";
12-тармақ мынадай редакцияда жазылсын:
"12. Көрсетілетін қызметті алушы 2020 жылғы 31 наурыздағы жағдай бойынша мемлекеттік атаулы әлеуметтік көмек (бұдан әрі - атаулы әлеуметтік көмек) алушы болып табылған жағдайда тікелей байланысты болдырмау мақсатында көрсетілетін қызметті алушыға келесі тоқсанға атаулы әлеуметтік көмек өтінішсіз, бірінші тоқсанда атаулы әлеуметтік көмек мөлшерін есептеген кезде ескерілген 2019 жылғы 4 тоқсандағы барлық табыстарын ескере отырып автоматты түрде ұзартылады.
Бұл ретте келесі тоқсанға атаулы әлеуметтік көмек төлемінің мөлшері автоматты түрде ұзартылған тоқсанның алдындағы тоқсанға Қазақстан Республикасы Денсаулық сақтау және әлеуметтік даму министрінің 2015 жылғы 5 мамырдағы № 320 бұйрығымен (Нормативтік құқықтық актілерді мемлекеттік тіркеу тізілімінде № 11426 болып тіркелген) бекітілген Мемлекеттік атаулы әлеуметтік көмек тағайындау және төлеу және кепілдік берілген әлеуметтік топтаманы ұсыну қағидаларына (бұдан әрі - № 320 бұйрық) сәйкес тағайындалған атаулы әлеуметтік көмек мөлшерінен бес пайызға ұлғайтылады.
Бір жастан алты жасқа дейінгі балаларға кепілдендірілген әлеуметтік топтаманы беру атаулы әлеуметтік көмек тағайындау мерзімінің ұзартылуымен бір мезгілде ұзартылады. Азық-түлік жиынтығының түрі баланың жасын ескере отырып, атаулы әлеуметтік көмек тағайындау кезіндегі баланың жасына негізделе айқындалады және оның ұзартылу мерзіміне ұсынылады. Бұл ретте алты жасқа дейінгі кепілдендірілген әлеуметтік топтама алушы балаларға осы бұйрықтың 25-тармағында көзделген төтенше жағдай кезеңінде ұсынылатын азық-түлік-тұрмыстық жиынтық берілмейді.
2020 жылғы 31 наурыздағы жағдай бойынша атаулы әлеуметтік көмек алушылардың отбасы құрамы және/немесе кірісі өзгерген жағдайда, тағайындалған атаулы әлеуметтік көмектің мөлшері келесі тоқсанда олар жүгінген күннен бастап қайта есептеледі.
Атаулы әлеуметтік көмек алушылардың бастамасымен қайта есептеу нәтижесінде оларға 2020 жылғы 31 наурыздағы жағдай бойынша атаулы әлеуметтік көмек тағайындаудан бас тартылған жағдайда, бұдан бұрын алынған атаулы әлеуметтік көмек есепті кезеңде қайтаруға жатпайды.
Тікелей байланысты болдырмау мақсатында Халықты жұмыспен қамту орталығы мен өтініш беруші арасында шартты ақшалай көмек тағайындауға әлеуметтік келісімшарт жасасу, сондай-ақ отбасының (адамның) өмірлік қиын жағдайдан шығуы үшін жеке жоспар жасау уәкілетті органның интернет-ресурстарында орналастырылған № 320 бұйрыққа 6, 7-қосымшаларға, әлеуметтік келісімшартқа қосымшаға сәйкес жүзеге асырылады.
2020 жылғы 31 наурыздағы жағдай бойынша атаулы әлеуметтік көмек алушыларға әлеуметтік келісімшарт қол қоймай автоматты түрде ұзартылады.";
17-тармақ мынадай редакцияда жазылсын:
"17. Қайта куәландыру мерзімі төтенше жағдай енгізілгенге дейін бір айдан аспайтын мерзім ішінде және төтенше жағдай уақытында келген және көрсетілген мерзімде қайта куәландырудан өтпеген адамдарға мүгедектіктің, жалпы еңбек ету қабілетінен айырылу дәрежесінің, кәсіптік еңбек ету қабілетінен айырылу дәрежесінің және мүгедекті оңалтудың жеке бағдарламасының мерзімдері қайта куәландырудың бұрын белгіленген күнінен бастап үш айға автоматты түрде ұзартылады. Төтенше жағдай режимі аяқталған ай толық есепке алынады.";
24-тармақ мынадай редакцияда жазылсын:
"24. Осы Қағидалардың 17-тармағында көрсетілген мүгедектігі бойынша мемлекеттік әлеуметтік жәрдемақы және (немесе) еңбек ету қабілетінен айырылу жағдайына әлеуметтік төлем алушылар болып табылатын адамдарға төлемдер мүгедектіктің және (немесе) жалпы еңбек ету қабілетінен айырылу дәрежесінің ұзартылған мерзіміне сәйкес жүзеге асырылады.";
25-тармақ мынадай редакцияда жазылсын:
"25. Төтенше жағдай кезеңінде азық-түлік-тұрмыстық жиынтық:
атаулы әлеуметтік көмек алушылар қатарындағы алты жастан он сегіз жасқа дейінгі балаларға;
мемлекеттік бюджет есебінен тұрақты негізде медициналық-әлеуметтік мекемелерде тұратын мүгедектерді және бас бостандығынан айыру орындарындағы мүгедектерді қоспағанда, он алты жасқа дейінгі мүгедек балаларға;
мемлекеттік бюджет есебінен тұрақты негізде медициналық-әлеуметтік мекемелерде тұратын мүгедектерді және бас бостандығынан айыру орындарындағы мүгедектерді қоспағанда, барлық жастағы бірінші, екінші және үшінші топтағы мүгедектерге;
мүгедек бала тәрбиелеп отырған адамдарға;
халықты жұмыспен қамту мәселелері жөніндегі жергілікті органда тiркелген жұмыссыздарға ұсынылады.
Осы тармақтың бірінші бөлігінде көрсетілген бірнеше санатқа жататын әрбір адамға тек бір негіз бойынша ғана азық-түлік-тұрмыстық жиынтық беріледі немесе ақшалай қаражат аударылады.".
2. Қазақстан Республикасы Еңбек және халықты әлеуметтік қорғау министрлігінің Мемлекеттік қызметтерді талдау және дамыту департаменті заңнамада белгіленген тәртіппен:
1) осы бұйрықты Қазақстан Республикасының Әділет министрлігінде мемлекеттік тіркеуді;
2) осы бұйрық ресми жарияланғаннан кейін оны Қазақстан Республикасы Еңбек және халықты әлеуметтік қорғау министрлігінің ресми интернет-ресурсында орналастыруды;
3) осы бұйрық Қазақстан Республикасының Әділет министрлігінде мемлекеттік тіркелгеннен кейін он жұмыс күні ішінде Қазақстан Республикасы Еңбек және халықты әлеуметтік қоғау министрлігінің Заң қызметі департаментіне осы тармақтың 1) және 2) тармақшаларында көзделген іс-шаралардың орындалуы туралы мәліметтер ұсынуды қамтамасыз етсін;
4) осы бұйрықты облыстық, Нұр-Сұлтан, Алматы және Шымкент қалаларының жұмыспен қамтуды үйлестіру және әлеуметтік бағдарламалар басқармаларына, Қазақстан Республикасы Еңбек және халықты әлеуметтік қорғау министрлігі Еңбек, әлеуметтік қорғау және көші-қон комитетінің аумақтық бөлімшелеріне, "Азаматтарға арналған үкімет" мемлекеттік корпорациясы" коммерциялық емес акционерлік қоғамына, "Еңбек ресурстарын дамыту орталығы" акционерлік қоғамына және "Мемлекеттік әлеуметтік сақтандыру қоры" акционерлік қоғамына жеткізуді қамтамасыз етсін.
3. Осы бұйрықтың орындалуын бақылау Қазақстан Республикасының Еңбек және халықты әлеуметтік қорғау вице-министрі Н.Н. Мұқышевқа жүктелсін.
4. Осы бұйрық алғашқы ресми жарияланған күнінен бастап қолданысқа енгізіледі және Қағидалардың 2020 жылғы 1 сәуірден бастап күшіне енетін 1-тармақтың алтыншы, жетінші, сегізінші, тоғызыншы, оныншы, он бірінші, он екінші, он үшінші, он сегізінші, он тоғызыншы, жиырмасыншы, жиырма бірінші, жиырма екінші, жиырма үшінші, жиырма төртінші, жиырма бесінші абзацтарын қоспағанда, 2020 жылғы 27 сәуірден бастап туындаған құқықтық қатынастарға қолданылады.
|
Қазақстан Республикасының Еңбек және халықты әлеуметтік қорғау министрі |
Б. Нурымбетов |
