ЗҚАИ-ның ескертпесі!
Осы қаулы 21.12.2024 бастап қолданысқа енгізіледі
"Микроқаржылық қызмет туралы" Қазақстан Республикасының Заңы 29-1-бабының 4-тармағына сәйкес Қазақстан Республикасы Қаржы нарығын реттеу және дамыту агенттігінің Басқармасы ҚАУЛЫ ЕТЕДІ:
1. Қоса беріліп отырған Микроқаржы омбудсманын сайлау, оның қызметін мерзімінен бұрын тоқтату және жүзеге асыру қағидалары бекітілсін.
2. Қаржылық қызметтерді тұтынушылардың құқықтарын қорғау департаменті Қазақстан Республикасының заңнамасында белгіленген тәртіппен:
1) Заң департаментімен бірлесіп осы қаулыны Қазақстан Республикасының Әділет министрлігінде мемлекеттік тіркеуді;
2) осы қаулыны ресми жарияланғаннан кейін Қазақстан Республикасы Қаржы нарығын реттеу және дамыту агенттігінің ресми интернет-ресурсына орналастыруды;
3) осы қаулы мемлекеттік тіркелгеннен кейін он жұмыс күні ішінде Заң департаментіне осы тармақтың 2) тармақшасында көзделген іс-шараның орындалуы туралы мәліметтерді ұсынуды қамтамасыз етсін.
3. Осы қаулының орындалуын бақылау Қазақстан Республикасының Қаржы нарығын реттеу және дамыту агенттігі Төрағасының жетекшілік ететін орынбасарына жүктелсін.
4. Осы қаулы 2024 жылғы 21 желтоқсаннан бастап қолданысқа енгізіледі және ресми жариялануға тиіс.
|
Қазақстан Республикасының Қаржы нарығын реттеу және дамыту Агенттігінің Төрағасы |
М. Абылкасымова |
| Қазақстан Республикасының Қаржы нарығын реттеу Агенттігінің Басқармасының 2024 жылғы 16 тамыздағы № 54 Қаулымен бекітілген |
Микроқаржы омбудсманын сайлау, оның қызметін мерзімінен бұрын тоқтату және жүзеге асыру қағидалары
Осы Микроқаржы омбудсманын сайлау, оның қызметін мерзімінен бұрын тоқтату және жүзеге асыру қағидалары (бұдан әрі – Қағидалар) "Микроқаржылық қызмет туралы" Қазақстан Республикасының Заңы (бұдан әрі – Заң) 29-1-бабының 4-тармағына сәйкес әзірленді және микроқаржы омбудсманын сайлау, оның қызметін мерзімінен бұрын тоқтату және жүзеге асыру тәртібін айқындайды.
1-тарау. Микроқаржы омбудсманын сайлау тәртібі
1. Микроқаржы омбудсманын Заңның 29-2-бабының 1-тармағында белгіленген талаптарға сәйкестігі тұрғысынан қаржы нарығы мен қаржы ұйымдарын бақылау және қадағалау жөніндегі уәкілетті органмен (бұдан әрі – уәкілетті орган) келісілген кандидаттар қатарынан Заңның 29-1-бабының 3-тармағына сәйкес қалыптастырылған микроқаржы омбудсманы өкілдерінің кеңесі (бұдан әрі – Өкілдер кеңесі) үш жылға сайлайды.
2. Микроқаржы омбудсманы етіп сайлау үшін кандидатуралар ұсынуды Өкілдер кеңесі Заңның 29-1-бабы 5-тармағының 1) тармақшасы негізінде жүзеге асырады.
3. Микроқаржы омбудсманын сайлау Өкілдер кеңесі микроқаржы омбудсманын сайлау үшін екі және одан астам кандидатты ұсынған кезде өткізіледі.
4. Әрбір кандидат бойынша микроқаржы омбудсманы болып сайлау үшін мынадай мәліметтер мен құжаттар қалыптастырылады:
Қағидаларға қосымшаға сәйкес нысан бойынша микроқаржы омбудсманы лауазымына кандидат туралы мәліметтер;
кандидаттың Заңның 29-2-бабының 1-тармағында белгіленген талаптарға сәйкестігін растайтын құжаттардың көшірмелері;
кандидаттың микроқаржы омбудсманы лауазымына кандидатурасын ұсынуға келісімі туралы өтініші.
5. Өкілдер кеңесіне қатысып отырған Өкілдер кеңесінің мүшелері жиынтығында жалпы дауыс санының елу және одан да көп пайызына ие болса, Өкілдер кеңесінің отырысы заңды деп, ал кворумның талаптары сақталды деп танылады.
6. Микроқаржы омбудсманы Өкілдер кеңесінің отырысына қатысқан Өкілдер кеңесі мүшелерінің көпшілік даусымен сайланады. Дауыс беру кезінде Өкілдер кеңесінің әрбір мүшесінің бір дауысы болады. Дауыстар тең болған кезде уәкілетті орган өкілінің дауысы шешуші болып табылады.
Микроқаржы омбудсманын сайлау мәселесі бойынша дауыс беру құпия тәсілмен жүзеге асырылады, оны өткізу тәртібін Заңның 29-1-бабы 5-тармағының 1) тармақшасы негізінде Өкілдер кеңесі айқындайды.
7. Микроқаржы омбудсманын сайлау туралы ақпарат уәкілетті органның интернет-ресурсында оның қызметке кіріскен күнін көрсете отырып, Өкілдер кеңесі сайлағаннан кейін 2 (екі) жұмыс күні ішінде орналастырылады.
2-тарау. Өкілеттіктері аяқталғаннан кейін микроқаржы омбудсманын сайлау тәртібі
8. Микроқаржы омбудсманының офисі микроқаржы омбудсманы өкілеттіктерінің аяқталуынан күнтізбелік 1 (бір) ай бұрын микроқаржы омбудсманы етіп тағайындау үшін ұсынылатын кандидаттар бойынша Қағидалардың 4-тармағында көрсетілген мәліметтер мен құжаттарды қоса бере отырып, уәкілетті органға Өкілдер кеңесі бекіткен микроқаржы омбудсманы лауазымына кандидаттар тізімін береді.
9. Уәкілетті орган Қағидалардың 8-тармағында көрсетілген мәліметтер мен құжаттар келіп түскен күннен бастап күнтізбелік 15 (он бес) күн ішінде микроқаржы омбудсманын сайлау үшін кандидатты келісу не келісуден бас тарту туралы шешім қабылдайды.
Уәкілетті орган микроқаржы омбудсманын сайлау үшін кандидатты Заңның 29-2-бабының 1-тармағында белгіленген бір немесе бірнеше талаптарға сәйкес келмеген жағдайда келісуден бас тартады.
10. Микроқаржы омбудсманын сайлау туралы Өкілдер кеңесінің отырысы микроқаржы омбудсманының офисі микроқаржы омбудсманын сайлау үшін кандидаттардың уәкілетті орган келіскен тізімін алған күннен бастап 10 (он) жұмыс күні ішінде өткізіледі.
3-тарау. Микроқаржы омбудсманы қызметін мерзімінен бұрын тоқтату және қызметі мерзімінен бұрын тоқтатылған кезде оны сайлау тәртібі
11. Микроқаржы омбудсманының өкілеттігі Заңның 29-1-бабының 7-тармағында көзделген негіздер бойынша тоқтатылады.
1-параграф. Өкілдер кеңесінің бастамасы бойынша микроқаржы омбудсманының қызметі мерзімінен бұрын тоқтатылған кезде оны сайлау тәртібі
12. Өкілдер кеңесінің мүшесі Заңның 29-1-бабының 7-тармағы бірінші бөлігінің 1), 2) және 3) тармақшаларында көзделген негіздер анықталған жағдайда Өкілдер кеңесінің басқа мүшелеріне Өкілдер кеңесінің кезектен тыс отырысы өткізілгенге дейін 5 (бес) жұмыс күнінен кешіктірмей микроқаржы омбудсманының өкілеттігін тоқтату мәселесі бойынша Өкілдер кеңесінің кезектен тыс отырысын шақыру туралы хабарлайды. Хабарламада өкілдер кеңесінің отырысын өткізу орны мен уақыты көрсетілуге тиіс.
13. Өкілдер кеңесі Өкілдер кеңесі мүшесінің микроқаржы омбудсманының өкілеттігін мерзімінен бұрын тоқтату туралы өтінішін қарағаннан кейін және Заңның 29-1-бабының 7-тармағы бірінші бөлігінің 1), 2) және 3) тармақшаларында көзделген бір немесе бірнеше негіздердің болу фактісі расталғаннан кейін микроқаржы омбудсманының өкілеттігін мерзімінен бұрын тоқтату, микроқаржы омбудсманының өкілеттігін тоқтату күні және микроқаржы омбудсманын сайлау кезеңінде микроқаржы омбудсманының міндетін атқарушы тұлға туралы шешім қабылдайды.
14. Микроқаржы омбудсманының офисі Өкілдер кеңесі микроқаржы омбудсманының өкілеттігін мерзімінен бұрын тоқтату туралы шешім қабылданғаннан кейін күнтізбелік 10 (он) күн ішінде микроқаржы омбудсманын сайлау үшін ұсынылатын кандидаттар бойынша Қағидалардың 4-тармағында көрсетілген мәліметтер мен құжаттарды қоса бере отырып, микроқаржы омбудсманы лауазымына кандидаттардың Өкілдер кеңесі бекіткен тізімін жібереді.
15. Уәкілетті орган Қағидалардың 14-тармағында көрсетілген мәліметтер мен құжаттар келіп түскен күннен бастап күнтізбелік 10 (он) күн ішінде микроқаржы омбудсманының сайлауы үшін кандидаттарды келісу не келісуден бас тарту туралы шешім қабылдайды.
Уәкілетті орган кандидатты Заңның 29-2-бабының 1-тармағында белгіленген бір немесе бірнеше талаптарға сәйкес келмеген жағдайда, оны микроқаржы омбудсманы етіп сайлау үшін келісуден бас тартады;
16. Микроқаржы омбудсманын сайлау туралы Өкілдер кеңесінің отырысы микроқаржы омбудсманының офисі микроқаржы омбудсманын сайлау үшін кандидаттардың уәкілетті орган келіскен тізімін алған күннен бастап күнтізбелік 10 (он) күннен кешіктірмей өткізіледі.
2-параграф. Микроқаржы омбудсманының бастамасы бойынша микроқаржы омбудсманының қызметі мерзімінен бұрын тоқтатылған кезде оны сайлау тәртібі
17. Микроқаржы омбудсманы өкілеттігі тоқтатылғанға дейін бір ай бұрын өзінің бастамасымен Өкілдер кеңесінің мүшелеріне өзінің өкілеттігін мерзімінен бұрын тоқтату шешімі туралы жазбаша хабарлама жібереді.
18. Микроқаржы омбудсманының офисі микроқаржы омбудсманының өкілеттіктерін тоқтатудан күнтізбелік 20 (жиырма) күн бұрын микроқаржы омбудсманын сайлау үшін ұсынылатын кандидаттар бойынша Қағидалардың 4-тармағында көрсетілген мәліметтер мен құжаттарды қоса бере отырып, микроқаржы омбудсманы лауазымына кандидаттардың Өкілдер кеңесі бекіткен тізімін жібереді.
19. Уәкілетті орган Қағидалардың 18-тармағында көрсетілген ақпарат пен құжаттар келіп түскен күннен бастап күнтізбелік 10 (он) күн ішінде микроқаржы омбудсманын сайлау үшін кандидатты келісу не келісуден бас тарту туралы шешім қабылдайды.
Уәкілетті орган микроқаржы омбудсманын сайлау үшін кандидатты Заңның 29-2-бабының 1-тармағында белгіленген бір немесе бірнеше талаптарға сәйкес келмеген жағдайда келісуден бас тартады.
20. Микроқаржы омбудсманын сайлау туралы Өкілдер кеңесінің отырысы микроқаржы омбудсманының офисі микроқаржы омбудсманын сайлау үшін кандидаттардың уәкілетті орган келіскен тізімін алған күннен бастап күнтізбелік 10 (он) күннен кешіктірмей өткізіледі.
4-тарау. Микроқаржы омбудсманының қызметін жүзеге асыру тәртібі
21. Микроқаржы омбудсманы жеке тұлғаның және микроқаржылық қызметті жүзеге асыратын ұйымның құқықтары мен заңмен қорғалатын мүдделерін қанағаттандыру туралы келісімге қол жеткізу мақсатында, сондай-ақ Заңның 29-1-бабының 2-тармағында көзделген жағдайларда микроқаржылық қызметті жүзеге асыратын ұйым мен оның өтініші бойынша жеке тұлға арасында жасалған микрокредит беру туралы шарттан туындайтын келіспеушіліктерді реттеуді өтеусіз негізде жүзеге асырады.
22. Микроқаржы омбудсманының қызметі, оның ішінде дуларды шешу және шешімдер қабылдау бойынша өтініштерді қарау тәртібі мен мерзімдері микроқаржы омбудсманының ішкі қағидалары негізінде жүзеге асырылады.
23. Микроқаржы омбудсманы уәкілетті органның сұратуы бойынша жеке тұлғалардың дауларын шешу бойынша келіп түскен және қаралған өтініштер, микроқаржылық қызметті жүзеге асыратын ұйымдар мен коллекторлық агенттіктер қабылдаған шешімдер және олардың орындалуы туралы ақпарат береді.
| Микроқаржы омбудсманын сайлау, оның қызметін мерзімінен бұрын тоқтату және жүзеге асыру қағидаларына қосымша |
|
| Нысан |
Микроқаржы омбудсманының лауазымына кандидат туралы мәліметтер ______________________________________________________________ (тегі, аты, әкесінің аты (егер ол жеке басын куәландыратын құжатта көрсетілген болса), лауазымы)
1. Жалпы мәліметтер:
Туған күні және туған орны | |
Азаматтығы | |
Жеке басын куәландыратын құжаттың деректері, жеке сәйкестендіру нөмірі (егер ол жеке басын куәландыратын құжатта көрсетілген болса) |
2. Білімі:
№ | Оқу орнының атауы | Қабылданған жылы – аяқтаған жылы | Мамандығы | Білімі туралы дипломның деректемелері (күні және нөмірі) |
1 | 2 | 3 | 4 | 5 |
3. Жұбайы (зайыбы), жақын туыстары (ата-анасы, балалары, асырап алушылар, асырып алынған балалар, ата-анасы бір және ата-анасы бөлек аға-інілері мен апа-сіңлілері (қарындастары), атасы, әжесі, немерелері) және жекжаттар (жұбайының (зайыбының) ата-анасы, балалары, асырап алушылар, асырып алынған балалар, ата-анасы бір және ата-анасы бөлек аға-інілері мен апа-сіңлілері (қарындастары), атасы, әжесі, немерелері):
№ | Тегі, аты, әкесінің аты (егер ол жеке басын куәландыратын құжатта көрсетілген болса) | Туған жылы | Туыстық қатынастар | Жұмыс орны және лауазымы |
1 | 2 | 3 | 4 | 5 |
4. Еңбек қызметі туралы мәліметтер:
№ | Жұмыс істеген кезеңі | Жұмыс орны | Лауазымы | Тәртіптік жаза қолданудың болуы | Қызметтен шығарылу, лауазымнан босатылу себептері | Өзге мәліметтер |
1 | 2 | 3 | 4 | 5 | 6 | 7 |
Ескертпе: осы тармақта кандидаттың еңбек қызметі, оның ішінде жоғарғы оқу орнын аяқтаған кезден бастап, лауазымын көрсете отырып еңбек қызметі туралы мәліметтер, сондай-ақ кандидат еңбек қызметін жүзеге асырмаған кезең көрсетіледі.
5. Кандидаттың уәкілетті орган банкті төлемге қабілетсіз банктер санатына жатқызу туралы, банктің акцияларын мәжбүрлеп сатып алу, қаржы ұйымын лицензиядан айыру, сондай-ақ Қазақстан Республикасының заңнамасында белгіленген тәртіппен қаржы ұйымын мәжбүрлеп тарату немесе оны банкрот деп тану туралы шешім қабылдағанға дейін бір жылдан аспайтын кезеңде қаржы ұйымының басшы қызметкері болғандығы немесе болмағандығы туралы мәліметтер
_____________________________________________________________
(иә (жоқ), ұйымның атауын, лауазымын, жұмыс істеген кезеңін көрсету)
Микроқаржы ұйымында және (немесе) коллекторлық агенттікте қызмет атқармайтынымды, жақын туыстарымның, жұбайымның (зайыбымның) және (немесе) жекжаттарымның уәкілетті органның, Қазақстан Республикасы Ұлттық Банкінің басшысы немесе олардың орынбасарлары, сондай-ақ уәкілетті орган, Қазақстан Республикасы Ұлттық Банкі құрылымдық бөлімшесінің басшысы лауазымында жұмыс істемейтінін, сондай-ақ мінсіз іскерлік беделімнің бар екенін растаймын.
Осы ақпаратты тексергенімді және оның дәйекті және толық болып табылатынын растаймын.
Тегі, аты, әкесінің аты (егер ол жеке басын куәландыратын құжатта көрсетілген болса)
_____________________________________________________________
(кандидат өз қолымен баспа әріптерімен толтырады)
Қолы___________________________
