ЗҚАИ-ның ескертпесі!
Қолданысқа енгізілу тәртібін 6-тармақтан қараңыз
"Мемлекеттік көрсетілетін қызметтер туралы" Қазақстан Республикасы Заңының 22-бабына сәйкес БҰЙЫРАМЫЗ:
1. "Мүгедектігі бар балаларды үйде оқытуға жұмсалған шығындарды өтеу" мемлекеттік қызметін проактивті нысанда көрсету жөніндегі пилоттық жоба іске қосылсын.
2. Қоса беріліп отырған "Мүгедектігі бар балаларды үйде оқытуға жұмсалған шығындарды өтеу" мемлекеттік қызметін проактивті нысанда көрсету жөніндегі пилоттық жобаны іске асыру кезінде мемлекеттік органдардың өзара іс-қимыл алгоритмі бекітілсін.
3. Пилоттық жобаға қатысушылар жобаның аяқталуына дейін "Мүгедектігі бар балаларды үйде оқытуға жұмсалған шығындарды өтеу" мемлекеттік қызметін проактивті нысанда Smart Data Ukimet ақпараттық-талдау жүйесі арқылы іске асыруды қамтамасыз етсін.
4. Қазақстан Республикасы Еңбек және халықты әлеуметтік қорғау министрлігінің Цифрландыру және мемлекеттік қызметтерді автоматтандыру департаменті, Қазақстан Республикасы Цифрлық даму, инновациялар және аэроғарыш өнеркәсібі министрлігінің Мемлекеттік көрсетілетін қызметтер комитеті және Қазақстан Республикасы Оқу-ағарту министрлігінің Цифрландыру және мемлекеттік қызметтерді автоматтандыру департаменті осы бірлескен бұйрықты жергілікті атқарушы органдар мен мүдделі ведомстволық бағынысты ұйымдардың назарына жеткізсін.
5. Осы бірлескен бұйрықтың орындалуын бақылау жетекшілік ететін Қазақстан Республикасының Еңбек және халықты әлеуметтік қорғау, Оқу-ағарту, Цифрлық даму, инновациялар және аэроғарыш өнеркәсібі вице-министрлеріне жүктелсін.
6. Осы бірлескен бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі және 2024 жылғы 31 желтоқсанға дейін қолданылады.
|
Қазақстан Республикасы Оқу-ағарту министрі |
__________Г. Бейсембаев |
|
Қазақстан Республикасының Цифрлық даму, инновациялар және аэроғарыш өнеркәсібі министрі |
_________Б. Мусин |
|
Қазақстан Республикасы Еңбек және халықты әлеуметтік қорғау министрі |
_______С. Жакупова |
"Мүгедектігі бар балаларды үйде оқытуға жұмсалған шығындарды өтеу" мемлекеттік қызметін проактивті нысанда көрсету жөніндегі пилоттық жобаны іске асыру кезінде мемлекеттік органдардың өзара іс-қимыл алгоритмі
1 тарау. Жалпы ережелер
1. Осы "Мүгедектігі бар балаларды үйде оқытуға жұмсалған шығындарды өтеу" мемлекеттік қызметін проактивті нысанда көрсету жөніндегі пилоттық жобаны іске асыру кезінде мемлекеттік органдардың өзара іс-қимыл алгоритмі (бұдан әрі – Алгоритм) "Мүгедектігі бар балаларды үйде оқытуға жұмсалған шығындарды өтеу" мемлекеттік қызметін проактивті нысанда көрсету жөніндегі пилоттық жобаны іске асыру кезінде Қазақстан Республикасы Еңбек және халықты әлеуметтік қорғау, Цифрлық даму, инновациялар және аэроғарыш өнеркәсібі, Оқу-ағарту министрліктерінің өзара іс-қимыл тәртібін айқындайды.
2. Осы Алгоритмде мынадай негізгі ұғымдар мен қысқартулар пайдаланылады:
1) "Жеке тұлғалар" мемлекеттік дерекқоры" ақпараттық жүйесі (бұдан әрі – ЖТ МДҚ) – азаматтық жай-күйді сәйкестендіру және айқындау үшін жеткілікті Қазақстан Республикасының жеке тұлғалары туралы ақпаратты тіркеу мен сақтаудың бірыңғай жүйесі;
2) "Е-Собес" автоматтандырылған ақпараттық жүйесі (бұдан әрі – Е-Собес ААЖ) – материалдық және заттай көріністе әлеуметтік көмек көрсетудің, арнаулы әлеуметтік қызметтердің бизнес-процестерін автоматтандыруға, жергілікті атқарушы органдар жүргізетін іс-шаралардың дерекқорын қалыптастыруға, жүргізуге және пайдалануға арналған аппараттық-бағдарламалық кешен;
3) көрсетілетін қызметті алушы – мемлекеттік қызмет көрсетілетін жеке тұлға;
4) қысқа мәтіндік хабар (бұдан әрі – SMS-хабар) – ұялы байланыс операторы ұялы байланыс желісі арқылы ақпаратты қабылдау және беру бойынша көрсететін қызмет;
5) мобильді азаматтар базасы (бұдан әрі – МАБ) – ұялы байланыс операторлары ұсынған, жылжымалы желінің абоненттік құрылғылары арқылы мемлекеттік қызметтерді көрсету және ақпараттық хабарларды жолдау, сондай-ақ проактивті мемлекеттік қызметтерді көрсету үшін пайдаланылатын көрсетілетін қызметтерді алушылардың абоненттік нөмірлерінің порталдың есептік жазбасына қосылған база;
6) "Мүгедектігі бар адамдардың орталықтандырылған деректер банкі" автоматтандырылған ақпараттық жүйесі (бұдан әрі – МОДБ ААЖ) – мүгедектікті белгілеу, еңбекке қабілеттілігінен айырылу, абилитациялаудың және оңалтудың жеке бағдарламасын әзірлеу бойынша бизнес-процестерді автоматтандыруға, сондай-ақ медициналық-әлеуметтік сараптама бөлімдерінде куәландырудан өткен адамдар бойынша деректерді сақтау мен өңдеуге арналған аппараттық-бағдарламалық кешен;
7) "Ұлттық білім беру деректер қоры" ақпараттық жүйесі (бұдан әрі – ҰБДҚ АЖ) – білім беру саласындағы әкімшілік және өзге де деректерді жинауға, өңдеуге және талдауға, сондай-ақ басқа ақпараттандыру объектілерімен ақпараттық өзара іс-қимыл жасауды қамтамасыз етуге арналған, оның ішінде Қазақстан Республикасының заңдарына сәйкес балаға қамқорлық жасауды, білім, тәрбие беруді, оның құқықтары мен мүдделерін қорғауды жүзеге асыратын баланың заңды өкілдері туралы деректерді беру бойынша ақпараттық жүйе.
Алгоритмде пайдаланылатын барлық өзге терминдер "Электрондық құжат және электрондық цифрлық қолтаңба туралы" Қазақстан Республикасының Заңында, "Мемлекеттік көрсетілетін қызметтер туралы" Қазақстан Республикасының Заңында, "Ақпараттандыру туралы" Қазақстан Республикасының Заңында және өзге де нормативтік құқықтық актілерде қолданылатын мағынада пайдаланылады.
3. Пилоттық жобаға қатысушылар "Дербес деректер және оларды қорғау туралы" Қазақстан Республикасы Заңының талаптарын, Қазақстан Республикасы Үкіметінің 2016 жылғы 20 желтоқсандағы № 832 қаулысымен бекітілген Ақпараттық-коммуникациялық технологиялар және ақпараттық қауіпсіздікті қамтамасыз ету саласындағы бірыңғай талаптарды сақтайды.
2-тарау. "Мүгедектігі бар балаларды үйде оқытуға жұмсалған шығындарды өтеу" мемлекеттік қызметін проактивті нысанда іске асыру кезінде мемлекеттік органдардың өзара іс-қимыл тәртібі
4. ҰБДҚ АЖ өзектендіру сервисі арқылы күн сайын Е-Собес ААЖ-ға үйде жеке тегін оқытуға қабылданған балалардың тізімін және үйде оқыту кезеңі көрсетілген жеке тегін оқытуға қабылдау туралы бұйрық мәліметтерін, дәрігерлік-консультациялық комиссия қорытындысының нөмірі мен күнін береді.
ҰБДҚ АЖ-ға енгізілген деректердің дұрыстығы мен бұрмаланбауына бастауыш, негізгі орта, жалпы орта білім беру ұйымдары жауапты болады. Қазақстан Республикасының Оқу-ағарту министрлігі "Мүгедектігі бар балаларды үйде оқытуға жұмсалған шығындарды өтеу" мемлекеттік қызметін (бұдан әрі – көрсетілетін қызмет) көрсету үшін негіз болып табылатын ҰБДҚ АЖ-дағы деректердің өзгермеуін қамтамасыз етеді
5. Е-Собес ААЖ ҰБДҚ АЖ-дан алынған тізімді МОДБ ААЖ-да мүгедектіктің бар-жоғына тексеруді жүзеге асырады.
6. Мүгедектігі бар екені расталған жағдайда, Е-Собес көрсетілетін қызметті тағайындауға өтініштің бар-жоғына тексеруді жүзеге асырады.
Мемлекеттік көрсетілетін қызметті тағайындауға өтініш болған жағдайда аталған адам тізімнен шығарылады.
7. Е-Собес ААЖ-да өтініші болмаған жағдайда дербес деректерге қол жеткізуді бақылаудың мемлекеттік сервисі арқылы алынған дербес деректерді жинауға, өңдеуге келісім негізінде тізімге енгізілген адамдарға қатысты туыстық байланысты растауға және мынадай деректерді алуға ЖТ МДҚ-ға сұрау салу жібереді:
- баланың және заңды өкілінің Қазақстан Республикасының аумағында тұрақты тұрғылықты жері бойынша тіркелуі;
- баланың және заңды өкілінің өмірлік мәртебесі туралы;
- баланың туу туралы куәлігі;
- баланың заңды өкілінің жеке басын куәландыратын құжат (өзектілігін тексеру).
ЖТ МДҚ-да ата-ана бойынша деректер болмаған жағдайда, Е-Собес ААЖ дербес деректерге қол жеткізуді бақылаудың мемлекеттік сервисі арқылы алынған дербес деректерді жинауға, өңдеуге келісім негізінде заңды өкіл бойынша мәліметтерді алу үшін ҰБДҚ АЖ-ға сұрау салу жібереді.
Қайтыс болғаны, хабар-ошарсыз кеткені, әрекетке қабілетсіздігі және азаматтығы жоқ екені, Қазақстан Республикасының аумағында тіркелгені туралы жазба болған жағдайда, аталған адам тізімнен шығарылады.
8. Осы Алгоритмнің 7-тармағының нәтижелері бойынша қалыптастырылған тізімге енгізілген заңды өкілдерге қатысты Е-Собес ААЖ дербес деректерге қол жеткізуді бақылаудың мемлекеттік сервисі арқылы алынған дербес деректерді жинауға, өңдеуге келісім негізінде МАБ-та тіркелген ұялы байланыс абоненттік нөмірінің болуына тексеру жүргізеді.
9. МАБ-та тіркелген қалыптастырылған тізімдегі адамдар бойынша Е-Собес ААЖ дербес деректерге қол жеткізуді бақылаудың мемлекеттік сервисі арқылы алынған дербес деректерді жинауға, өңдеуге келісім негізінде Қазақстан Республикасы Еңбек және халықты әлеуметтік қорғау министрлігінің ақпараттық жүйесімен (бұдан әрі – Еңбекмині АЖ) интеграцияланған екінші деңгейдегі банктердің (бұдан әрі – ЕДБ) ақпараттық жүйелеріне арнайы банктік шот нөмірінің (бұдан әрі – банктік шот) болуына сұрау салуды жүзеге асырады:
1) бір ЕДБ-де банктік шот болған жағдайда көрсетілетін қызметті алушыға осы Алгоритмге 1-қосымшаға сәйкес нысан бойынша мемлекеттік қызметті проактивті нысанда алу және белгіленген соманы ЕДБ-нің көрсетілген банктік шотына аудару мүмкіндігі немесе Еңбекмині АЖ интеграциясы іске асырылған ЕДБ-нің басқа банктік шотын таңдау туралы SMS-хабар жіберіледі;
2) бірнеше ЕДБ-де банктік шот болған жағдайда көрсетілетін қызметті алушыға осы Алгоритмге 2-қосымшаға сәйкес нысан бойынша мемлекеттік қызметті проактивті нысанда алу және ЕДБ-нің ұсынылған тізімінен таңдалған банк шотына тағайындалған соманы аудару мүмкіндігі туралы SMS-хабар жіберіледі;
3) банктік шот болмаған жағдайда осы Алгоритмге 3-қосымшаға сәйкес нысан бойынша Еңбекмині АЖ интеграциясы іске асырылған ЕДБ бөлімшесінде банктік шот ашылған жағдайда мемлекеттік қызметті проактивті нысанда алу мүмкіндігі туралы SMS-хабар жіберіледі.
10. Еңбекмині АЖ интеграциясы іске асырылған банктер тізімінен ЕДБ-нің кез келген бөлімшесінде шот ашу мүмкіндігі туралы SMS-хабарлар жіберілген көрсетілетін қызметті алушылар бойынша Е-Собес ААЖ SMS-хабарлар жіберілген сәттен бастап 3 жұмыс күні ішінде шоттарды өзектендіру бойынша және сұрау-жауап режимінде шотты іздеу бойынша ЕДБ сервистеріне мониторингті жүзеге асырады.
Егер қызметті алушы ЕДБ-нің бірінде Еңбекмині АЖ интеграциясы іске асырылған банктер тізімінен банктік шот ашқан жағдайда, Е-Собес ААЖ жәрдемақыны тағайындау және жүзеге асыру үшін ашылған банктік шотты автоматты түрде таңдайды және осы Алгоритмге 1-қосымшаға сәйкес көрсетілетін қызметті алушыға SMS-хабар жібереді.
11. Көрсетілетін қызметті алушыдан үш жұмыс күні ішінде жауап болмаған жағдайда, қызмет көрсету процесі проактивті нысанда аяқталады және осы Алгоритмге 4-қосымшаға сәйкес көрсетілетін қызметті алушыға SMS-хабар жібереді.
12. Әлеуетті көрсетілетін қызметті алушылар келісім берген және банктік шотты таңдаған кезде Е-Собес ААЖ автоматты режимде көрсетілген ЕДБ банктік шотының нөмірі бар электрондық өтінімді қалыптастырады.
Мемлекеттік қызмет көрсетуге байланысты негізгі талаптар, көрсету тәртібі мен мерзімдері Қазақстан Республикасы Еңбек және халықты әлеуметтік қорғау министрінің 2021 жылғы 25 наурыздағы № 84 бұйрығымен бекітілген "Мүгедектігі бар балаларды үйде оқытуға жұмсалған шығындарды өтеу" мемлекеттік қызмет көрсету қағидаларында айқындалады.
13. Жәрдемақы тағайындау туралы шешім қабылданғаннан кейін Е-Собес ААЖ көрсетілетін қызметті алушыны осы Алгоритмге 5-қосымшаға сәйкес нысан бойынша жәрдемақы тағайындау туралы SMS-хабар арқылы хабардар етеді.
14. ҰБДҚ АЖ-дан мүгедектігі бар баланы үйде оқыту фактісін жоққа шығаратын мәліметтер келіп түскен кезде төлем тоқтатылады.
__________________________________________
Құрметті азамат!
Сіздің "Мүгедектігі бар балаларды үйде оқытуға жұмсалған шығындарды өтеу" мемлекеттік қызметін алуға құқығыңыз бар, тағайындалған сома Сіздің {payNameBankRu} банктік шотыңызға түседі.
Келіскен жағдайда 1414 нөміріне {қызмет коды} #3#1 мәтінімен SMS жіберіңіз.
Басқа банкті таңдау үшін 1414 нөміріне {қызмет коды} #3#0 мәтінімен SMS жіберіңіз
Сіздің жауабыңыз "Дербес деректер және оларды қорғау туралы" Қазақстан Республикасы Заңының 8-бабына сәйкес жеке деректерді жинауға және өңдеуге келісім ретінде қабылданады. Жауап 3 жұмыс күні ішінде жіберілуі керек.
Барлық сұрақтар бойынша 1414 нөмірі арқылы Call-орталыққа хабарласа аласыз. Қоңырау шалу тегін.
__________________________________________
Құрметті азамат!
Сіздің "Мүгедектігі бар балаларды үйде оқытуға жұмсалған шығындарды өтеу" мемлекеттік қызметін алуға құқығыңыз бар. Белгіленген соманы есептеу үшін төмендегі тізімнен банктердің реттік нөмірін таңдаңыз: {реттік нөмірі бар банктердің тізімі} / {bankListRu}
1414 нөміріне {қызмет коды} #3#1{Банктің реттік нөмірі} мәтінімен SMS жіберіңіз
Басқа банкті таңдау үшін 1414 нөміріне {қызмет коды} #3#0 мәтінімен SMS жіберіңіз.
Сіздің жауабыңыз "Дербес деректер және оларды қорғау туралы" Қазақстан Республикасы Заңының 8-бабына сәйкес жеке деректерді жинауға және өңдеуге келісім ретінде қабылданады. Жауап 3 жұмыс күні ішінде жіберілуі керек.
Барлық сұрақтар бойынша 1414 нөмірі арқылы Call-орталыққа хабарласа аласыз. Қоңырау шалу тегін.
__________________________________________
Құрметті азамат!
Сіздің "Мүгедектігі бар балаларды үйде оқытуға жұмсалған шығындарды өтеу" мемлекеттік қызметін алуға құқығыңыз бар. Тағайындалған соманы аудару үшін төмендегі тізімнен банктердің кез келген бөлімшесінде шот ашу қажет немесе төмендегі сілтемелерді пайдаланыңыз: {реттік нөмірі бар банктердің тізімі} / {bankListRu}
Банк Сіздің шотыңыздың ашылғаны туралы бізге автоматты түрде хабарлайды. Біз банктен 3 жұмыс күні ішінде хабарлама күтеміз.
Сіздің жауабыңыз "Дербес деректер және оларды қорғау туралы" Қазақстан Республикасы Заңының 8-бабына сәйкес жеке деректерді жинауға және өңдеуге келісім ретінде қабылданады.
Барлық сұрақтар бойынша 1414 нөмірі арқылы Call-орталыққа хабарласа аласыз. Қоңырау шалу тегін.
__________________________________________
Құрметті, {ТАӘ}!
Жауапты күту мерзімі аяқталды.
Мүгедектігі бар балаларды үйде оқытуға жұмсалған шығындарды өтеу бойынша төлемді тағайындау мәселесі бойынша Сіз "Азаматтарға арналған үкімет" мемлекеттік корпорациясы бөлімшесіне, http://egov.kz электрондық үкімет порталы арқылы жүгіне аласыз.
Жақын бөлімшені айқындау үшін Telegram Bot: https://t.me/egovkzbot сілтемесін пайдалана аласыз.
__________________________________________
Құрметті {ТАӘ}!
Сізге {code_service} тағайындалды. Тағайындалған сома Сіздің банктік шотыңызға {payNameBankKz} түседі.
__________________________________________
