Еуразиялық экономикалық одақтың Кеден кодексінің 433-бабы 3-тармағының 4-тармақшасына сәйкес Еуразиялық экономикалық комиссия Алқасы шешті:
1. Қоса беріліп отырған Аумағында тауарларды уақытша сақтау, кедендік транзиттің кедендік рәсім қолданысын аяқтау жүзеге асырылатын және (немесе) уәкілетті экономикалық операторлар тізіліміне енуге үміткер заңды тұлғаның көлік құралдары мен жұмыскерлеріне кедендік бақылау жүргізілетін құрылыстарға, үй-жайларға (үй-жайлардың бөліктеріне) және (немесе) ашық алаңдарға (ашық алаңдардың бөліктеріне) қойылатын талаптар бекітілсін.
2. Осы Шешім ресми жарияланған күнінен бастап күнтізбелік 30 күн өткен соң, бірақ ерте дегенде 2017 жылғы 11 сәуірдегі Еуразиялық экономикалық одақтың Кеден кодексі туралы шарт күшіне енген күннен кейін күшіне енеді.
|
Еуразиялық экономикалық комиссия Алқасының Төрағасы |
Т. Саркисян |
| Еуразиялық экономикалық комиссия Алқасының 2017 жылғы 3 қазандағы №131 шешімімен БЕКІТІЛГЕН |
Аумағында тауарларды уақытша сақтау, кедендік транзиттің кедендік рәсім
қолданысын аяқтау жүзеге асырылатын және (немесе) уәкілетті экономикалық
операторлар тізіліміне енуге үміткер заңды тұлғаның көлік құралдары мен
жұмыскерлеріне кедендік бақылау жүргізілетін құрылыстарға, үй-жайларға
(үй-жайлардың бөліктеріне) және (немесе) ашық алаңдарға (ашық алаңдардың
бөліктеріне) қойылатын талаптар
І. Аумағында тауарларды уақытша сақтау, кедендік транзиттің кедендік рәсім
қолданысын аяқтау жүзеге асырылатын және (немесе) кедендік бақылау жүргізілетін
құрылыстарға, үй-жайларға (үй-жайлардың бөліктеріне) және (немесе) ашық
алаңдарға (ашық алаңдардың бөліктеріне) қойылатын талаптар
1. Екінші немесе үшінші типті уәкілетті экономикалық операторлардың тізіліміне енгізу туралы куәлік берілумен уәкілетті экономикалық операторлардың тізіліміне енуге үміткер заңды тұлға (бұдан әрі – заңды тұлға) аумағында тауарларды уақытша сақтау, кедендік транзиттің кедендік рәсім қолданысын аяқтау жүзеге асырылатын және (немесе) кедендік бақылау жүргізілетін (бұдан әрі – уәкілетті экономикалық оператордың аумағы) құрылыстарды, үй-жайларды (үй-жайлардың бөліктерін) және (немесе) ашық алаңдарды (ашық алаңдардың бөліктерін), олардың мыналарды:
а) кедендік бақылаудағы тауарлар мен көлік құралдарының сақталуын;
б) кедендік бақылаудағы тауарлармен және көлік құралдарымен кеден органының рұқсатынсыз түсіру, қайта тиеу (қайта аудару) және өзге де жүк операцияларын жасауға жол бермеуді;
в) тауарлар мен көлік құралдарына қатысты кедендік бақылау жүргізу мүмкіндігін қамтамасыз етуі шартымен пайдалануға тиіс.
2. Заңды тұлға уәкілетті экономикалық оператордың аумағында:
а) көрсетілген аумаққа жапсарлас жатқан тиеу-түсіру алаңдарын қоса алғанда, қатты (бетонды, асфальтты немесе өзге де) жабынның;
б) көлік құралдарына арналған тұрақтың;
в) ашық алаңдардың (ашық алаңдардың бөліктерінің) бүкіл периметрі бойынша тұтас қоршаудың;
г) Еуразиялық экономикалық одақтың Кеден кодексі 319-бабының 4-тармағына сәйкес Еуразиялық экономикалық одаққа мүше мемлекеттердің кедендік реттеу туралы заңнамасында белгіленген тәртіппен кедендік бақылау аймақтарын белгілеудің;
д) тауарлар мен көлік құралдарын кедендік қарап тексеру немесе кедендік тексеру үшін бөлінген орындардың;
е) көрсетілген аумаққа техникалық жағынан жарамды кірме жолдардың;
ж) мыналарды:
заңды тұлғаның жұмыскерлерін сәйкестендіруді жүзеге асыра отырып, олардың көрсетілген объектілерге кіру рұқсатын;
заңды тұлғаның жұмыскерлері болып табылмайтын адамдарды сәйкестендіруді жүзеге асыра отырып, олардың көрсетілген объектілерге кіру рұқсатын;
өзінің заңды тұлғадағы қызметін тоқтатқан жұмыскерлердің көрсетілген объектілер мен ақпараттық жүйелерге кіру рұқсатының жедел күшін жоюды қамтамасыз ететін көрсетілген аумақта орналасқан объектілерге, соның ішінде тауарларды тиеу (түсіру) және сақтау орындарына және көлік құралдарына рұқсатсыз енуді жоққа шығаратын ұйымдастырылған өткізу режимі мен күзеттің;
з) тәулік бойғы режимде жұмыс істейтін, күнтізбелік 30 күннің ішінде бейнеақпаратты қарап шығуды, жазуды және сақтауды жүзеге асыруға мүмкіндік беретін бейне бақылау құралдарымен жабдықталған көлік құралдарының кіруін (шығуын) және адамдардың кіруін (шығуын) бақылау жүйесінің;
и) ашық алаңдарды (ашық алаңдардың бөліктерін) қоспағанда, күзет және өрт дабылдамасының;
к) бейне бақылауды қамтамасыз етуге мүмкіндік беретін жарықтандырудың;
л) тауарларды өлшеу мүмкіндігін қамтамасыз ететін, көрсетілген аумаққа, атап айтқанда, палеталарға, поддондарға және тауарларды тасымалдау үшін қолданылатын басқа да ыдыстарға орналастыру үшін болжанатын, Еуразиялық экономикалық одаққа мүше мемлекеттердің заңнамасының талаптарына сәйкес келетін өлшеу шектері және өлшеу дәлдігінің көрсеткіштері бар таразы жабдығының (өлшеу құралдарының);
м) тауарларға кедендік бақылау жүргізу үшін қажетті тиеу-түсіру техникасы мен механизмдерінің;
н) кеден органының лауазымды адамдары кеден операцияларын жасау, кедендік бақылауды жүргізу және кедендік құжаттарды ресімдеу кезінде өз өкілеттіктерін жүзеге асыру уақытында ұсынылатын ұйымдастыру техникасымен және байланыс құралдарымен жарақталған үй-жайлардың (орындардың) (қажет болған жағдайда көрсетілген үй-жайлар (орындар) көрсетілген аумаққа тікелей жақын жерде орналастырылуы мүмкін) болуын қамтамасыз етуге тиіс.
ІІ. Заңды тұлғаның көлік құралдарына қойылатын талаптар
3. Заңды тұлғаның тауарларды тасымалдауды жүзеге асыратын (тасымалдаушы болып табылатын) көлік құралдары Еуразиялық экономикалық одақтың Кеден кодексінің 364-бабына сәйкес кедендік пломбалары және мөрлері бар тауарларды тасымалдауға арналған халықаралық тасымалдаудың көлік құралдарына қойылатын талаптарға сәйкес болуға тиіс.
ІІІ. Заңды тұлғаның жұмыскерлеріне қойылатын талаптар
4. Заңды тұлғаның жұмыскерлері мынадай талаптарға сәйкес болуға тиіс:
а) лауазымдық міндеттеріне кедендік операцияларды ұйымдастыру және (немесе) жасау кіретін жұмыскерлердің кеден ісі саласында кәсіби даярлығы және (немесе) осы салада кемінде 2 жыл жұмыс тәжірибесі болуға тиіс.
Армения Республикасында заңды тұлғаның жұмыскерлері көрсетілген талаптарға қосымша Армения Республикасының заңнамасында белгіленген өзге де талаптарға сәйкес болуға тиіс;
б) заңды тұлғаның қауіпсіздігін және уәкілетті экономикалық оператордың аумағын күзетуді ұйымдастыру үшін жауапты жұмыскерлердің қауіпсіздікті қамтамасыз ету саласында кәсіби даярлығы және (немесе) осы салада кемінде 2 жыл жұмыс тәжірибесі болуға тиіс;
в) ақпаратты қорғау құралдарын қамтитын автоматтандырылған ақпараттық жүйені қолдануға жауапты жұмыскерлердің ақпараттық технологиялар саласында кәсіби даярлығы және (немесе) осы салада кемінде 2 жыл жұмыс тәжірибесі болуға тиіс.
5. Егер қажетті жұмыстарды орындауға кеден өкілдері, мамандандырылған күзет ұйымдарының және қызметін ақпараттық және телекоммуникациялық технологиялар саласында жүзеге асыратын ұйымдардың жұмыскерлері шарттық негізде тартылса, заңды тұлғаның осы Талаптардың 4-тармағында белгіленген талаптарға сәйкес келетін жұмыскерлері болмауы мүмкін.
