________________
*2001 жылғы 18 шілдеде күшiне ендi.
Бұдан әрi Тараптар деп аталатын, Қазақстан Республикасы мен Хорватия Республикасы,
Бiрiккен Ұлттар Ұйымы Жарғысының, Еуропадағы қауiпсiздiк пен ынтымақтастық жөнiндегi кеңестiң Хельсинки Қорытынды актiсiнiң және Еуропадағы қауiпсiздiк пен ынтымақтастық жөнiндегi ұйымның кейiнгi құжаттарының мақсаттары мен қағидаттарын басшылыққа ала отырып,
достық қатынасты нығайту және өзара мүдделiлiк бiлдiрiлетiн барлық салаларда ынтымақтастықты дамытуға тiлек бiлдiре отырып,
төмендегiлер туралы келiстi:
1. Тараптар өздерiнiң қарым-қатынасын теңдiк, бiр-бiрiнiң егемендiгiн құрмет тұту және дауларды бейбiт жолмен шешу қағидаттары негiзiнде дамытады және нығайтады.
2. Тараптар халықаралық қауiпсiздiктi қамтамасыз ету әлемде болып жатқан демократиялық қайта құруларды нығайту мен тереңдетуге тығыз байланысты екенiне кәмiл сенiмдi.
3. Тараптар сенiм бiлдiру ахуалы мен қауiпсiздiктi, ынтымақтастық пен өзара түсiнiстiктi нығайтуға, жанжалдардың алдын алуға, сондай-ақ Еуропа мен Азиядағы және әлемнiң басқа да бөлiктерiндегi адам құқығы мен азшылықтың құқықтарын құрмет тұтуға жәрдемдесуге ұмтылатындықтарын растайды.
4. Тараптар осы тұрғыда ядролық қарусыздану мен оны таратпау iсiне, Азиядағы өзара iс-қимыл мен сенiм бiлдiру шаралары жөнiндегi кеңестi шақыру жөнiндегi бастамамен жалғасын тапқан халықаралық және аймақтық қауiпсiздiк пен тұрақтылықты нығайтуға Қазақстан Республикасының қосқан үлесiн жоғары бағалайды.
5. Тараптар өздерiнiң арасындағы саяси пiкiр алмасуға, үкiметаралық және парламентаралық байланыстарды орнатуға, екi жақты және халықаралық проблемалар жөнiнде консультациялар өткiзуге ықпал етедi.
6. Тараптар халықаралық терроризмге, ұйымдасқан қылмысқа, есiрткi құралдарының заңсыз айналымына, заңсыз көшi-қонның, сыбайлас жемқорлыққа, экономикалық қызмет саласындағы құқық бұзушылыққа қарсы екi жақты негiздегi, сондай-ақ халықаралық ұйымдар шеңберiндегi ынтымақтастықтың және күш-жiгердi үйлестiрудiң маңыздылығын атап көрсетедi.
7. Тараптар нарықтық экономика тетiктерiнiң тиiмдi жұмыс iстеуiнiң мүддесi жолында қолға алынып жатқан iс-қимылдарға өзара қолдау көрсететiн болады.
8. Тараптар өздерiнiң бұдан былайғы экономикалық дамуында, әсiресе инвестициялар тарту мен осы заманғы технология, сауда, көлiк және коммуникация, ауыл шаруашылығы мен өнеркәсiп саласында өзара тиiмдi экономикалық ынтымақтастықты кеңейтудiң маңызды рөл атқаратынына сенiм бiлдiредi.
9. Тараптар әлемдiк қауымдастықтың ғаламдық мiндеттерiнiң бiрi қоршаған ортаны қорғау мүддесi жолындағы белсендi ынтымақтастық және экологиялық тепе-теңдiктi қолдауға бағытталған шаралар қабылдау, сондай-ақ осы саладағы халықаралық бақылауды күшейту болып табылады деп есептейдi. Осыған байланысты Тараптар қоршаған ортаны қорғау саласындағы ынтымақтастықты дамытатын болады.
10. Тараптар мәдениет, бiлiм, ғылым, туризм, денсаулық сақтау және спорт салаларындағы ынтымақтастықтың маңыздылығын мойындайды және осы салалардағы екi жақты қатынасты дамыту үшiн күш-жiгер жұмсайтын болады.
11. Тараптар екi жақты қатынастың шарттық-құқықтық негiзiн одан әрi дамытуға және қол жеткiзiлген уағдаластықтарды iске асыруға күш-жiгер жұмсайды.
Загребте 2001 жылғы 18 шiлдеде әрқайсысы қазақ, хорват, орыс және ағылшын тiлдерiнде екi түпнұсқа дана болып жасалды және де барлық мәтiннiң күшi бiрдей. Осы Декларацияның ережелерiн түсiндiруде келiспеушiлiк туындаған жағдайда, Тараптар ағылшын тiлiндегi мәтiндi ұстанатын болады.
(Қолдары)
