Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған Шанхай ынтымақтастық ұйымына мүше мемлекеттердің үкіметтері арасындағы қарудың, оқ-дәрілердің және жарылғыш заттардың заңсыз айналымына қарсы күрестегі ынтымақтастық туралы келісімнің жобасы мақұлдасын.
2. Қазақстан Республикасы Ұлттық қауіпсіздік комитетінің төрағасы Амангелді Смағұлұлы Шабдарбаевқа қағидаттық сипаты жоқ өзгерістер мен толықтырулар енгізуге рұқсат бере отырып, Қазақстан Республикасының Үкіметі атынан Шанхай ынтымақтастық ұйымына мүше мемлекеттердің үкіметтері арасындағы қарудың, оқ-дәрілердің және жарылғыш заттардың заңсыз айналымына қарсы күрестегі ынтымақтастық туралы келісімге қол қоюға өкілеттік берілсін.
3. "Шанхай ынтымақтастық ұйымына мүше мемлекеттердің қарудың, оқ-дәрілердің және жарылғыш заттардың заңсыз айналымына қарсы күрестегі ынтымақтастығы туралы келісімге қол қою туралы" Қазақстан Республикасы Үкіметінің 2006 жылғы 15 қарашадағы N 1083 қаулысының күші жойылды деп танылсын.
4. Осы қаулы қол қойылған күнінен бастап қолданысқа енгізіледі.
Қазақстан Республикасының
Премьер-Министрі К. Мәсімов
Қазақстан Республикасы
Үкіметінің
2008 жылғы 26 тамыздағы
N 767 қаулысымен
мақұлданған
жоба
Шанхай ынтымақтастық ұйымына мүше мемлекеттердің
үкіметтері арасындағы қарудың, оқ-дәрілердің және жарылғыш
заттардың заңсыз айналымына қарсы күрестегі ынтымақтастық
туралы келісім
Бұдан әрі Тараптар деп аталатын Шанхай ынтымақтастық ұйымына мүше мемлекеттердің үкіметтері,
қарудың, оқ-дәрілердің және жарылғыш заттардың заңсыз айналымы ауқымының кеңеюіне алаңдаушылық білдіре отырып,
қарудың, оқ-дәрілердің және жарылғыш заттардың заңсыз айналымы Тараптар мемлекеттерінің қауіпсіздігіне айтарлықтай қауіп төндіретінін сезіне отырып,
қарудың, оқ-дәрілердің және жарылғыш заттардың заңсыз айналымына қарсы күреске бағытталған тиімді шараларды қабылдауда өзара мүдделілікке сүйене отырып,
2002 жылғы 7 маусымдағы Шанхай ынтымақтастық ұйымы Хартиясының және 2001 жылғы 15 маусымдағы терроризмге, сепаратизмге және экстремизмге қарсы күрес туралы Шанхай конвенциясының ережелерін назарға ала отырып,
халықаралық құқықтың жалпыға бірдей танылған қағидаттары мен нормаларын басшылыққа ала отырып,
төмендегілер туралы келісті:
1-бап
Осы Келісімнің мақсаттары үшін онда қолданылатын ұғымдар мынаны білдіреді:
қару - ұңғы арнасындағы лақтырғыш зарядтың жануы кезінде пайда болатын газ есебінен бағытталған қозғалыстан алынатын снарядпен қашықтықтағы нысананы механикалық зақымдауға арналған заттар мен құрылғылар, сондай-ақ олардың негізгі бөліктері;
оқ-дәрілер - нысананы зақымдауға арналған және жарылғыш, лақтырғыш, пиротехникалық немесе сындырғыш зарядтарды қамтитын қару-жарақ заттары және лақтыратын жабдықтар не олардың тіркесі;
жарылғыш зат - жинақталған химиялық заттар немесе сыртқы ықпалдың әсерінен белгілі бір жағдайлар кезінде көп көлемде жылу және газ тәріздес өнім бөле отырып, өз бетінше тез таралатын химиялық өзгеріске икемді заттар қоспасы;
қарудың, оқ-дәрілердің және жарылғыш заттардың заңсыз айналымы - Тараптар мемлекеттерінің заңнамасын бұзуға жүзеге асыратын қаруды, оқ-дәрілерді және жарылғыш заттарды жасау немесе жөндеу, өткізу, беру, сатып алу, сақтау, алып жүру, тасымалдау (бұдан әрі - қарудың заңсыз айналымы).
2-бап
1. Тараптар осы Келісімге сәйкес өз мемлекеттерінің заңнамаларын және қатысушылары Тараптардың мемлекеттері болып табылатын халықаралық шарттарды сақтау кезінде қарудың заңсыз айналымына байланысты қылмыстардың алдын алуда, анықтауда, жолын кесуде және әшкерелеуде өздерінің құзыретті органдары арқылы ынтымақтастықты жүзеге асырады.
2. Құзыретті органдардың тізбесін әрбір Тарап өзі анықтайды және оны депозитарийге осы Келісімнің күшіне енуі үшін қажетті мемлекетішілік рәсімдерді орындау туралы жазбаша хабарламаны тапсыру кезінде береді.
Құзыретті органдар тізбесінің өзгерістері туралы Тараптардың әрқайсысы депозитарийге 30 күннің ішінде жазбаша хабарлама береді.
3-бап
Тараптар ынтымақтастықты мынадай бағыттар бойынша жүзеге асырады:
Тараптар ынтымақтастығының құқықтық негіздерін жетілдіру және Тараптар мемлекеттерінің қарудың заңсыз айналымына қарсы күрес саласындағы заңнамасын үйлестіру;
қарудың заңсыз айналымына байланысты қылмыстың жағдайын және серпінін және онымен күрес нәтижелерін талдау;
қарудың заңсыз айналымына қарсы күресте келісілген стратегияны және бірлескен шараларды әзірлеу;
қарудың заңсыз айналымына қарсы іс-қимыл саласында Тараптардың құзыретті органдарының өзара іс-қимыл тетіктерін үйлестіру және жетілдіру;
қарудың заңсыз айналымына қарсы іс-қимыл мәселелері бойынша халықаралық ұйымдарға және халықаралық форумдарға қатысуға арналған ұстанымдарды келісу.
4-бап
1. Тараптар ынтымақтастықты мынадай нысандарда жүзеге асырады:
1) ақпарат алмасу:
қарудың заңсыз айналымына байланысты дайындалып жатқан немесе жасалған қылмыстар және оған қатысты адамдар мен ұйымдар туралы;
қаруды, оқ-дәрілерді және жарылғыш заттарды заңсыз жасайтын орындар туралы;
қару мен оқ-дәрілердің зақымдау қасиеттерін арттыру үшін оларды қайта жасаудың анықталған жаңа заңсыз тәсілдері туралы;
қарудың айналымы саласында қылмыс жасауға ықпал етуі мүмкін анықталған құқық бұзушылықтар туралы;
қарудың заңсыз айналымы фактілерінің алдын алудың, анықтаудың, жолын кесудің және әшкерелеудің жаңа әдістері туралы;
өзара қызығушылықты білдіретін өзге де ақпарат алмасу;
2) террористік актілерді жасау кезінде пайдаланылған қару, оқ-дәрілер және жарылғыш заттар туралы ақпаратты Шанхай ынтымақтастық ұйымы Өңірлік терроризмге қарсы құрылымының деректер банкіне жіберу;
3) жедел іздестіру іс-шараларын жүргізу туралы сұрау салуларды орындау;
4) үйлестірілген жедел іздестіру және алдын алу іс-шараларын жоспарлау және жүзеге асыру;
5) жұмыс тәжірибесімен алмасу, жұмыс бабындағы кездесулер, консультациялар, кеңестер, тәжірибелік конференциялар мен семинарлар өткізу;
6) кадрларды даярлауда және мамандардың біліктілігін арттыруда жәрдем көрсету;
7) өзара қызығушылықты білдіретін мәселелер бойынша бірлескен ғылыми зерттеулер жүргізу;
8) заңнамалық және өзге де нормативтік құқықтық актілермен, ғылыми зерттеулердің нәтижелерімен және әдістемелік ұсынымдармен алмасу.
2. Осы Келісім қылмыстық істер бойынша құқықтық көмек беру және көрсету мәселелерін қозғамайды.
5-бап
Осы Келісім Тараптарға ынтымақтастықтың өзге де өзара қолайлы бағыттары мен нысандарын анықтауда және дамытуда кедергі келтірмейді.
6-бап
1. Тараптар арасындағы ынтымақтастық мүдделі Тараптың жәрдем көрсету туралы сұрау салуы негізінде, сондай-ақ Тараптардың бірінің бастамасы бойынша хабардар ету жолымен жүзеге асырылады.
2. Сұрау салу немесе ақпарат жазбаша нысанда жіберіледі. Кідіртуге болмайтын жағдайда сұрау салу немесе ақпарат ауызша берілуі мүмкін, бірақ олар қажет болған кезде мәтінді берудің техникалық құралдарын пайдалана отырып, 72 сағаттан кешіктірмей жазбаша қайталануы тиіс.
3. Сұрау салудың немесе ақпараттың түпнұсқасына не олардың мазмұнына күдік туындаған жағдайда көрсетілген құжаттарды қосымша растауға немесе түсіндіруге сұрау салынуы мүмкін.
4. Сұрау салу мыналарды қамтуы тиіс:
сұрау салушы және сұрау салынатын құзыретті органдардың атауларын;
сұрау салудың мақсаты мен негіздемесін;
сұрау салынатын жәрдем мазмұнының сипаттамасын;
сұрау салуды уақтылы және тиісінше орындау үшін пайдасы болуы мүмкін басқа да ақпаратты;
егер қажет болса, оның жабықтық дәрежесін көрсетуді.
5. Жазбаша нысанда берілген сұрау салуға немесе ақпаратқа жіберуші құзыретті органның басшысы немесе оның орынбасарлары қол қояды және/немесе осы құзыретті органның елтаңбалы мөрімен куәландырылады.
7-бап
1. Сұрау салынатын құзыретті орган сұрау салуды жылдам және мүмкіндігінше барынша толық орындауды қамтамасыз ету үшін барлық қажетті шараларды қабылдайды және ол келіп түскен күннен бастап 30 тәуліктен аспайтын мерзімде сұрау салушы құзыретті органды оны қараудың нәтижелері туралы хабардар етеді.
2. Сұрау салушы құзыретті орган сұрау салудың орындалуына кедергі келтіретін немесе оның орындалуын кешіктіретін жағдайлар туралы дереу хабардар етіледі.
3. Егер сұрау салуды орындау сұрау салынатын құзыретті органның құзыретіне кірмесе, онда ол сұрау салуды өз мемлекетінің оны орындауға құзыретті басқа органына береді және бұл туралы сұрау салушы құзыретті органды дереу хабардар етеді.
4. Сұрау салынатын құзыретті орган, оның пікірі бойынша, сұрау салуды орындау үшін қажетті қосымша мәліметтер сұратуы мүмкін.
5. Сұрау салуды орындау кезінде сұрау салынатын Тарап мемлекетінің заңнамасы қолданылады.
6. Сұрау салынатын құзыретті орган сұрау салуды өз мемлекетінің аумағында орындау кезінде, егер бұл сұрау салынатын Тарап мемлекетінің заңнамасына қайшы келмесе, сұрау салушы құзыретті органның өкілдеріне қатысуға рұқсат беруі мүмкін.
7. Егер сұрау салынатын құзыретті орган сұрау салудың орындалуы оның мемлекетінің егемендігіне, қауіпсіздігіне, қоғамдық тәртібіне немесе басқа да айтарлықтай мүдделеріне зиян келтіруі мүмкін немесе сұрау салынатын Тарап мемлекетінің заңнамасына немесе халықаралық міндеттемелеріне қайшы келеді деп санаса, оны орындауды кейінге қалдыруы немесе оны орындаудан толық немесе ішінара бас тартуы мүмкін.
8. Сұрау салуды орындауда, егер ол жасаған іс-қимыл сұрау салынатын Тарап мемлекетінің заңнамасы бойынша қылмыс болып табылмайтын болса, онда сұрау салуды орындаудан бас тартуы мүмкін.
9. Егер осы баптың 7 немесе 8-тармақтарына сәйкес сұрау салуды орындаудан толық немесе ішінара бас тартылса немесе оны орындау кейінге қалдырылатын болса, сұрау салушы құзыретті орган бұл туралы оның орындалуына кедергі келтіретін себептер көрсетіле отырып, жазбаша нысанда хабардар етіледі.
8-бап
1. Әрбір Тарап алынған ақпарат пен құжаттардың, егер олар жасырын сипат алса немесе беруші Тарап олардың жария болуын қажет емес деп тапса, құпиялылығын қамтамасыз етеді. Ақпарат пен құжаттардың жабықтық дәрежесін беруші Тарап анықтайды.
2. Осы Келісім негізінде алынған ақпаратты немесе сұрау салуды орындау нәтижелерін сұрау салынған немесе ұсынылған мақсаттардан өзге мақсаттарға ұсынушы Тараптың жазбаша келісімінсіз пайдалануға болмайды.
3. Осы Келісім негізінде бір Тараптың екінші бір Тараптан алған ақпараты мен құжаттары оларды ұсынған Тараптың жазбаша келісімінсіз үшінші тарапқа берілмеуі тиіс.
9-бап
Тараптар өз мемлекеттерінің аумағында, егер әрбір нақты жағдайда өзге де тәртіп келісілмесе, осы Келісімнің орындалуына байланысты ұлттық заңнамаға сәйкес көзделетін шығыстарды дербес өтейтін болады.
10-бап
Осы Келісім шеңберінде ынтымақтастық нәтижелерін талдау және бағалау, сондай-ақ оны жетілдіру жолдарын пысықтау мақсатында Тараптар консультациялар мен кеңестер өткізуі мүмкін.
11-бап
Тараптар осы Келісімнің ережелерін түсіндіруге немесе қолдануға байланысты туындайтын даулы мәселелерді консультациялар мен келіссөздер арқылы шешеді.
12-бап
Осы Келісім Тараптардың олар қатысушылары болып табылатын басқа да халықаралық шарттардан туындайтын құқықтары мен міндеттемелерін қозғамайды.
13-бап
Осы Келісім шеңберінде ынтымақтастықты жүзеге асыру кезінде Тараптар жұмыс тілі ретінде орыс және қытай тілдерін пайдаланады.
14-бап
Осы Келісімге Тараптардың келісімі бойынша өзгерістер мен толықтырулар енгізілуі мүмкін.
15-бап
1. Осы Келісім белгіленбеген мерзімге жасалады және оған қол қойған Тараптардың оның күшіне енуі үшін қажетті мемлекетішілік рәсімдерді орындағаны туралы төртінші жазбаша хабарлама депозитарийге сақтауға берілген күнінен бастап күшіне енеді.
Ол қажетті рәсімдерді кешірек орындаған Тараптар үшін олар тиісті құжаттарын депозитарийге сақтауға тапсырған күннен бастап күшіне енеді.
2. Шанхай ынтымақтастық ұйымының Хатшылығы осы Келісімнің депозитарийі болып табылады, ол осы Келісімге қол қойылған күннен бастап 15 күн ішінде Тараптарға оның расталған көшірмелерін жібереді.
3. Осы Келісім Шанхай ынтымақтастық ұйымына мүше болған мемлекеттердің бірігуі үшін ашық. Біріккен мемлекет үшін осы Келісім депозитарийден бірігу туралы құжатты алған күнінен бастап күшіне енеді.
2008 жылғы "___" _______________ қаласында орыс және қытай тілдерінде бір данада жасалды, бұл ретте екі мәтіннің де күші бірдей.
Қазақстан Республикасының Үкіметі үшін
Қытай Халық Республикасының Үкіметі үшін
Қырғыз Республикасының Үкіметі үшін
Ресей Федерациясының Үкіметі үшін
Тәжікстан Республикасының Үкіметі үшін
Өзбекстан Республикасының Үкіметі үшін
