Қазақстан Республикасының Үкіметі
ҚАУЛЫ ЕТЕДІ:
Тәуелсіз Мемлекеттер Достастығына қатысушы мемлекеттердің Өңіраралық және шекара маңы ынтымақтастығы жөніндегі кеңес туралы келісімнің жобасына қол қою туралы ұсыныс Қазақстан Республикасы Президентінің қарауына енгізілсін.
Қазақстан Республикасының
Премьер-Министрі К. Мәсімов
Жоба
Тәуелсіз Мемлекеттер Достастығына
қатысушы мемлекеттердің Өңіраралық және шекара маңы
ынтымақтастығы жөніндегі кеңес туралы
КЕЛІСІМ
Бұдан әрі Тараптар деп аталатын Тәуелсіз Мемлекеттер Достастыгына қатысушы мемлекеттер,
өзара өңірлік және шекара маңы ынтымақтастығын одан әрі дамытуға ұмтыла отырып,
мұндай ынтымақтастықты дамыту олардың халықтарының мүдделеріне жауап беретінін сезіне отырып,
мына төмендегілер туралы келісті:
1-бап
Тараптар өңіраралық және шекара маңы ынтымақтастығына жауапты Келісімге қатысушы мемлекеттер министрліктерінің (ведомстволарының) басшыларынан тұратын Тәуелсіз Мемлекеттер Достастығына қатысушы мемлекеттердің Өңіраралық және шекара маңы ынтымақтастығы жөніндегі кеңесті (бұдан әрі - Кеңес) құрады.
2-бап
Кеңес осы Келісімге қоса берілген және оның ажырамас бөлігі болып табылатын Кеңес туралы ереже негізінде өз қызметін жүзеге асырады.
3-бап
Осы Келісім депозитарий оған қол қойған Тараптардың оның күшіне енуі үшін қажетті мемлекетішілік рәсімдерді орындағаны туралы үшінші жазбаша хабарлама алған күнінен бастап күшіне енеді.
Мемлекетішілік рәсімдерді кештеу орындаған Тараптар үшін осы Келісім депозитарий тиісті хабарламаларды алған күнінен бастап күшіне енеді.
4-бап
Тараптардың өзара келісімі бойынша осы Келісімге осы Келісімнің ажырамас бөлігі болып табылатын тиісті хаттамамен ресімделетін өзгерістер мен толықтырулар енгізілуі мүмкін.
5-бап
Осы Келісім оның ережелерін қабылдайтын және өзіне осы Келісімнен туындайтын міндеттемелерді қабылдауға дайын Тәуелсіз Мемлекеттер Достастығына қатысушы басқа мемлекеттердің қосылуы үшін ашық.
Қосылушы мемлекет үшін осы Келісім депозитарий қосылу туралы құжаттарды алған күнінен бастап күшіне енеді.
6-бап
Тараптардың әрқайсысы депозитарийге Келісімнен шыққанға дейін кемінде 6 ай бұрын осы ниеті туралы жазбаша хабарлама жібере отырып, осы Келісімнен шыға алады.
___________ қаласында 2008 жылғы "____" ________ орыс тілінде бір түпнұсқа данада жасалды. Түпнұсқа дана Тәуелсіз Мемлекеттер Достастығының Атқарушы комитетінде сақталады, ол осы Келісімге қол қойған әрбір мемлекетке оның куәландырылған көшірмесін жібереді.
Әзірбайжан Республикасы үшін Молдова Республикасы үшін
Армения Республикасы үшін Ресей Федерациясы үшін
Беларусь Республикасы үшін Тәжікстан Республикасы үшін
Грузия үшін Түрікменстан үшін
Қазақстан Республикасы үшін Өзбекстан Республикасы үшін
Қырғыз Республикасы үшін Украина үшін
2008 жылғы "____"____________
Тәуелсіз Мемлекеттер Достастығына
қатысушы мемлекеттердің Өңіраралық
және шекара маңы ынтымақтастығы
жөніндегі кеңес туралы келісімге
қосымша
Тәуелсіз Мемлекеттер Достастығына қатысушы мемлекеттердің
Өңіраралық және шекара маңы ынтымақтастығы
жөніндегі кеңес туралы
ЕРЕЖЕ
I. Жалпы ережелер
1.1. Тәуелсіз Мемлекеттер Достастығына қатысушы мемлекеттердің Өңіраралық және шекара маңы ынтымақтастығы жөніндегі кеңес (бұдан әрі - Кеңес) Тәуелсіз Мемлекеттер Достастығына қатысушы мемлекеттердің өңірлер мен шекара маңы аумақтарын орнықты экономикалық дамыту, азаматтардың қауіпсіздігін қамтамасыз ету, достықты және ТМД-ға қатысушы мемлекеттердің тату көршілігін нығайту мәселелерін шешудегі көп жақты өзара іс-қимылын үйлестіру мақсатында құрылады. Кеңес өз қызметін ТМД-ның Экономикалық кеңесімен, Достастықтың жарғылық және басқа да органдарының жанындағы Достастыққа қатысушы мемлекеттердің тұрақты өкілетті өкілдері кеңесімен, ТМД-ның Экономикалық кеңесі жанындағы экономикалық мәселелер жөніндегі комиссиямен және ТМД-ның Атқарушы комитетімен, сондай-ақ ТМД-ның басқа да органдарымен тығыз өзара іс-қимылда жүзеге асырады.
1.2. Кеңестің негізгі міндеттері мемлекеттік билік пен ТМД-ға қатысушы мемлекеттердің жергілікті өзін-өзі басқару органдарының өзара ынтымақтастығы тетіктерін жетілдіру мен дамыту болып табылады.
1.3. Кеңес өз қызметінде халықаралық құқықтың жалпыға танылған қағидаттары мен нормаларын, ТМД-ның негіз қалаушы құжаттарын, ТМД-ның Үкімет басшылары кеңесінің 2004 жылғы 15 қыркүйектегі шешімімен бекітілген Тәуелсіз Мемлекеттер Достастығына қатысушы мемлекеттердің өңіраралық және шекара маңы ынтымақтастығы тұжырымдамасын, өңіраралық және шекара маңы ынтымақтастығына қатысты мәселелер жөніндегі ТМД-ның Мемлекет басшылары кеңесінің және Үкімет басшылары кеңесінің шешімдерін басшылыққа алады.
II. Кеңестің функциялары
Кеңес мынадай функцияларды орындайды:
2.1. ТМД-ға қатысушы мемлекеттердің мемлекеттік басқару, жергілікті өзін-өзі басқару органдарының, заңды тұлғаларының, қоғамдық ұйымдарының ұсыныстарын ескере отырып, Келісімге қатысушы мемлекеттердің өңіраралық және шекара маңы ынтымақтастығының басым бағыттарын айқындау, тұжырымдамалық және практикалық мәселелерін қарау.
2.2. Өңіраралық және шекара маңы ынтымақтастығының негізгі бағыттары бойынша бірлескен іс-қимылдарды үйлестіру жөнінде ұсыныстар әзірлеу.
2.3. Өңіраралық және шекара маңы ынтымақтастығын одан әрі дамыту жөніндегі ұсыныстарды ТМД-ның Мемлекет басшылары кеңесінің, Үкімет басшылары кеңесінің және ТМД салалық ынтымақтастығы органдарының отырыстарында қарауға дайындау.
2.4. Келісімге қатысушы мемлекеттердің өңіраралық және шекара маңы ынтымақтастығы мәселелері жөніндегі өзара қарым-қатынастарын нормативтік-құқықтық реттеу жөнінде ұсыныстар әзірлеу.
III. Кеңестің құқықтары
Кеңес өз функцияларын орындау үшін мыналарға:
3.1. Достастықтың жоғары органдарының қарауына Кеңес дайындаған құжаттардың жобаларын, сондай-ақ өңіраралық және шекара маңы ынтымақтастығы мәселелері жөніндегі шешімдердің орындалуы туралы ақпаратты белгіленген тәртіппен енгізуге.
3.2. Келісімге қатысушы мемлекеттерден және ТМД салалық ынтымақтастығы органдарынан оның құзыретіне кіретін мәселелер бойынша ақпаратты белгіленген тәртіппен сұратуға.
3.3. Қажет болған кезде Кеңес алдында тұрған міндеттерді орындау үшін тұрақты немесе уақытша жұмыс топтарын құруға құқығы бар.
IV. Кеңесті қалыптастыру тәртібі
4.1. Келісімге қатысушы мемлекеттерде өңіраралық және шекара маңы ынтымақтастығына жауапты министрліктердің (ведомстволардың) басшылары немесе Келісімге қатысушы мемлекеттердің өкілетті өкілдері (әрбір мемлекеттер бір-бірден) Кеңестің мүшелері болып табылады. Кеңес мүшесі жұмысқа қатыспаған жағдайда оның өкілеттіктері Кеңес Хатшылығына бұл туралы алдын ала хабар жіберіле (хабарлана) отырып, министрлік (ведомство) басшысының орынбасарына беріледі.
4.2. Кеңесте төрағалық ету бір жылдан аспайтын мерзімге орыс әліпбиі тәртібімен ауыстыру қағидаты негізінде Келісімге әрбір қатысушы мемлекеттің өкілі тұлғасында кезектесіп жүзеге асырылады.
Кеңестің бұрынғы және кейінгі төрағалары оның тең төрағалары болып табылады.
Кеңес Төрағасы уақытша болмаған жағдайда оның міндеттері тең төрағалардың біріне жүктеледі.
V. Жұмысты ұйымдастыру
5.1. Кеңес отырыстары жылына кемінде бір рет өткізіледі. Қажеттілігіне қарай кезектен тыс отырыстар шақыртылуы мүмкін. Егер оларға Кеңес мүшелерінің кемінде үштен екісі қатысса, отырыстар заңды болып танылады. Кеңестің кезектен тыс отырыстарын өзінің бастамасы бойынша немесе Кеңестің кемінде үш мүшесінің бастамасы бойынша Төраға шақырады.
5.2. Отырыстарды өткізу орны Кеңес мүшелерінің алдын ала уағдаластығы бойынша айқындалады.
5.3. Кеңес отырысына кеңестік дауыс құқығымен ТМД-ның салалық ынтымақтастығы органдары мен Атқарушы комитетінің басшылары қатысуы мүмкін.
5.4. Кеңес шешімі бойынша оның отырыстарына бақылаушылар ретінде ТМД-ға қатысушы мемлекеттердің заң шығарушы билік органдарының, әкімшілік-аумақтық бірлік билігінің және жергілікті өзін-өзі басқару органдарының, сауда-өнеркәсіп палаталарының, кәсіпорындар мен ұйымдарының, сондай-ақ өңіраралық және шекара маңы ынтымақтастығын жүзеге асыратын халықаралық ұйымдардың өкілдері қатыса алады.
5.5. Кеңестің шешімдері, егер Кеңес өзгеше айқындамаса, отырысқа қатысушы оның мүшелерінің қарапайым басым дауысымен қабылданады. Кеңестің кез келген мүшесі қандай да бір мәселеге өзінің мүдделі емес екендігін мәлімдей алады, бұл шешім қабылдау үшін кедергі ретінде қаралуы тиіс емес. Шешіммен келіспеген Кеңес мүшелері отырыс хаттамасына енгізілетін айрықша пікір білдіруі мүмкін.
5.6. Кеңестің шешімдері Кеңестің Төрағасы қол қоятын және Кеңестің мүшелеріне, ал қажет болған кезде ТМД органдарына жіберілетін хаттамалармен ресімделеді. Кеңестің шешімдері ұсынымдық сипатта болады.
5.7. Кеңес өз жұмысының регламентін бекітеді.
5.8. Кезекті отырысқа арналған материалдар оны өткізетін күнге дейін 30 күннен кешіктірмей Кеңес мүшелеріне жіберіледі.
5.9. Кеңес Хатшылығының функцияларын ТМД Атқарушы комитетінің тиісті құрылымдық бөлімшесі орындайды.
VI. Қорытынды ережелер
6.1. Кеңестің отырыстарын өткізу жөніндегі шығыстарды аумағында Кеңес отырысы өткізілетін Келісімге қатысушы мемлекет көтереді. Кеңес мүшелерін іссапарға жіберу жөніндегі шығыстарды жіберетін мемлекет көтереді.
6.2. Кеңестің жұмыс істеу тілі орыс тілі болып табылады.
