Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған Тарифтік жеңілдіктер беру туралы хаттаманың жобасы мақұлдансын.
2. Тарифтік жеңілдіктер беру туралы хаттамаға қол қойылсын.
3. Осы қаулы қол қойылған күнінен бастап қолданысқа енгізіледі.
Қазақстан Республикасының
Премьер-Министрі К. Мәсімов
Қазақстан Республикасы
Үкіметінің
2008 жылғы 4 желтоқсандағы
N 1132 қаулысымен
мақұлданған
жоба
Тарифтік жеңілдіктер беру туралы
ХАТТАМА
Бұдан әрі Тараптар деп аталатын Беларусь Республикасының Үкіметі, Қазақстан Республикасының Үкіметі және Ресей Федерациясының Үкіметі,
2008 жылғы 25 қаңтардағы Бірыңғай кедендік-тарифтік реттеу туралы келісімнің 5 және 6-баптарының ережелерін негізге ала отырып,
экономикалық ықпалдасуды тереңдетуге жәрдемдесу және адал бәсекелестікті жүзеге асыру мақсатында,
халықаралық сауданың жалпыға бірдей қабылданған нормалары мен ережелерін басшылыққа ала отырып,
мына төмендегілері туралы келісті:
1-бап
Еуразиялық экономикалық қоғамдастық шеңберінде Тараптар мемлекеттерінің кедендік аумағына немесе кеден одағына қатысушы мемлекеттердің бірыңғай кедендік аумағына әкелінетін тауарларға қатысты ұсынылатын тарифтік жеңілдіктер тауарлардың шыққан еліне қарамастан қолданылады.
2-бап
Кеден одағы комиссиясы (бұдан әрі - Комиссия) тауарларды Тараптар мемлекеттерінің кедендік аумағына немесе Еуразиялық экономикалық қоғамдастық шеңберінде кеден одағына қатысушы мемлекеттердің бірыңғай кедендік аумағына әкелу кезінде Бірыңғай кедендік тарифті жүргізу жөніндегі Тараптардың өкілеттіктерін ұсынған күннен бастап 2008 жылғы 25 қаңтардағы Бірыңғай кедендік-тарифтік реттеу туралы келісімнің 5-бабында және 6-бабының 1-тармағында көзделмеген жағдайларда ымырашылдықпен қабылданатын Комиссия шешімдерінің негізінде ғана жүзеге асырылады.
3-бап
Осы Хаттама күшіне енген күнінен бастап Комиссияға Бірыңғай кедендік тарифті жүргізу жөніндегі өкілеттіктер ұсынылған күнге дейінгі кезеңде:
Тараптар Комиссияға олардың қолданатын тарифтік жеңілдіктері және тарифтік жеңілдіктерді қолдану мәселелері бойынша Тараптар мемлекеттерінің заңнамасына өзгерістер енгізу туралы хабарлайды;
Комиссия тарифтік жеңілдіктерді қолдану мәселелері бойынша Тараптар мемлекеттерінің заңнамаларына салыстырмалы талдау жүргізеді және 2008 жылғы 25 қаңтардағы Бірыңғай кедендік-тарифтік реттеу туралы келісімнің 5-бабында және 6-бабының 1-тармағында көзделмеген тарифтік жеңілдіктерді қолдану жағдайларына қатысты уағдаластықтарға қол жеткізу мақсатында Тараптармен келіссөздер жүргізуді ұйымдастырады.
4-бап
Тараптардың уағдаластығы бойынша осы Хаттамаға жекелеген хаттамалармен ресімделетін өзгерістер енгізілуі мүмкін.
5-бап
Осы Хаттаманы түсіндіруге және (немесе) қолдануға байланысты даулар мүдделі Тараптардың консультациялары мен келіссөздер жүргізуі жолымен шешіледі, ал келісімге қол жеткізілмеген жағдайда дау мүдделі Тараптардың кез келгенінің бастамасы бойынша Еуразиялық экономикалық қоғамдастықтың Сотына қарауға беріледі.
6-бап
Осы Хаттаманың күшіне ену, оған қосылу және одан шығу тәртібі 2007 жылғы 6 қазандағы Кеден одағының шарттық-құқықтық базасын қалыптастыруға бағытталған халықаралық шарттардың күшіне енуі, олардан шығу және оларға қосылу тәртібі туралы хаттамамен айқындалады.
2008 жылғы "____"_________ қаласында орыс тіліндегі жалғыз түпнұсқа данада жасалды.
Осы Хаттаманың түпнұсқа данасы Комиссия депозитарийінің функцияларын бергенге дейін Еуразиялық экономикалық қоғамдастықтың Интеграциялық комитеті болып табылатын депозитарийде сақталады.
Депозитарий әрбір Тарапқа осы Хаттаманың куәландырылған көшірмесін жібереді.
Беларусь Қазақстан Ресей
Республикасының Республикасының Федерациясының
Үкіметі Үкіметі Үкіметі
үшін үшін үшін
