Қазақстан Республикасының Үкіметі ҚАУЛЫ ЕТЕДІ:
"Кеден одағы шеңберіндегі даулар бойынша шаруашылық жүргізуші субъектілердің Еуразиялық экономикалық қоғамдастықтың Сотына жүгінуі және олар бойынша сот ісін жүргізу ерекшеліктері туралы шартты ратификациялау туралы" Қазақстан Республикасы Заңының жобасы Қазақстан Республикасының Парламенті Мәжілісінің қарауына енгізілсін.
Қазақстан Республикасының
Премьер-Министрі К. Мәсімов
Қазақстан Республикасының Заңы Кеден одағы шеңберіндегі даулар бойынша шаруашылық жүргізуші
субъектілердің Еуразиялық экономикалық қоғамдастықтың Сотына
жүгінуі және олар бойынша сот ісін жүргізу ерекшеліктері туралы
шартты ратификациялау туралы
Мәскеуде 2010 жылғы 9 желтоқсанда жасалған Кеден одағы шеңберіндегі даулар бойынша шаруашылық жүргізуші субъектілердің Еуразиялық экономикалық қоғамдастықтың Сотына жүгінуі және олар бойынша сот ісін жүргізу ерекшеліктері туралы шарт ратификациялансын.
Қазақстан Республикасының
Президенті
Кеден одағы шеңберіндегі даулар бойынша шаруашылық жүргізуші
субъектілердің Еуразиялық экономикалық қоғамдастықтың Сотына
жүгінуі және олар бойынша сот ісін жүргізу ерекшеліктері туралы
шарт
Бұдан әрі Тараптар деп аталатын Еуразиялық экономикалық қоғамдастыққа мүше мемлекеттер,
халықаралық құқықтың жалпы танылған қағидаттары мен нормаларын басшылыққа ала отырып,
2000 жылғы 10 қазандағы Еуразиялық экономикалық қоғамдастықты құру туралы шартты және 2007 жылғы 6 қазандағы Кеден одағының комиссиясы туралы шартты негізге ала отырып,
Кеден одағы шеңберінде жасалған халықаралық шарттарды Кеден одағынa мүше мемлекеттердің біркелкі қолдануын қамтамасыз ету мақсатында,
2010 жылғы 5 шілдедегі Еуразиялық экономикалық қоғамдастық Соты Статутының 14-бабының 3-тармағына сәйкес,
төмендегілер туралы уағдаласты:
1-бап
Осы Шарттың мақсаты үшін мынадай ұғымдар пайдаланылады:
«шаруашылық жүргізуші субъект» - Кеден одағына мүше мемлекеттің немесе үшінші мемлекеттің заңнамасына сәйкес тіркелген заңды тұлға не Кеден одағына мүше мемлекеттің немесе үшінші мемлекеттің заңнамасына сәйкес кәсіпкер ретінде тіркелген жеке тұлға;
«сот шығасылары» - сарапшыларға, куәлерге және аудармашыларға төлеуге жататын ақшалай сома, адвокаттар мен Еуразиялық экономикалық қоғамдастық Сотында шаруашылық жүргізуші субъектінің мүдделерін өндіретін өзге тұлғалардың қызметтеріне ақы төлеуге арналған шығыстар және істің Еуразиялық экономикалық қоғамдастық Сотында қаралуына байланысты ол бойынша Тараптар шеккен басқа да шығыстар;
«Кеден одағы комиссиясының актілері» - Кеден одағы комиссиясының міндетті сипаты бар және кәсіпкерлік пен өзге экономикалық қызмет саласындағы шаруашылық жүргізуші субъектілердің құқықтары мен заңды мүдделерін қозғайтын шешімдері.
2-бап
1. Еуразиялық экономикалық қоғамдастықтың Соты (бұдан әрі - Сот) шаруашылық жүргізуші субъектілердің өтініштері (бұдан әрі - өтініштер) бойынша:
1) Кеден одағы комиссиясының актілеріне немесе олардың жекелеген ережелеріне дау айту туралы;
2) Кеден одағы комиссиясының әрекетіне (әрекетсіздігіне) дау айту туралы істерді қарайды.
2. Кеден одағы комиссиясының актілеріне немесе олардың жекелеген ережелеріне не Кеден одағы комиссиясының әрекетіне (әрекетсіздігіне) дау айту үшін олардың Кеден одағы шеңберінде жасалған халықаралық шарттармен берілген кәсіпкерлік және өзге экономикалық қызмет саласындағы шаруашылық жүргізуші субъектілердің құқықтары мен заңды мүдделерінің бұзылуына әкеп соқтырған осы халықаралық шарттарға сәйкессіздігі негіз болып табылады.
3. Егер дәл сол нысана туралы және дәл сондай негіздер бойынша бұрын қаралған іс бойынша Соттың күшіне енген шешімі болса, Сот өтінішті қарауға қабылдамайды.
3-бап
1. Егер шаруашылық жүргізуші субъектілердің құқықтары мен заңды мүдделерін қозғайтын халықаралық шарттарды және Кеден одағы комиссиясының актілерін қолдану мәселелері істің мәні бойынша шешілуіне елеулі ықпал етсе, Кеден одағына мүше мемлекеттің сот билігінің жоғарғы органы бұл мәселелер бойынша қорытынды шығару туралы сұраумен Сотқа жүгінуге құқылы.
2. Кеден одағына мүше мемлекеттің сот билігінің жоғарғы органында дауды қарау кезінде іске қатысушы шаруашылық жүргізуші субъект өзінің Кеден одағы шеңберінде жасалған халықаралық шарттарда және Кеден одағы комиссиясының актілерінде көзделген құқықтары бұзылды деп пайымдаса, осы органға қорытынды шығару туралы сұрауды Сотқа жіберу туралы қолдаухатпен жүгінуге құқылы.
3. Егер қорытынды шығару туралы сұраумен жүгіну туралы мәселе Кеден одағына мүше мемлекеттің заңнамасына сәйкес ол бойынша шешім шағымдануға жатпайтын Кеден одағына мүше мемлекеттің сот билігінің жоғарғы органының қарауындағы істе мәлімделсе, қорытынды шығару сұралатын мәселелер істің мәні бойынша шешілуіне елеулі әсер етуі және Соттың бұдан бұрын ұқсас сұраулар бойынша қорытындылар шығармауы шартымен осы орган Сотқа жүгінуге міндетті.
4-бап
1. Кеден одағы комиссиясына шаруашылық жүргізуші субъект алдын ала жүгінгеннен кейін ғана Сот өтінішті қарауға қабылдайды.
Егер Кеден одағының комиссиясы келіп түскен өтініш бойынша екі ай ішінде шаралар қабылдамаса, шаруашылық жүргізуші субъект Сотқа жүгінуге құқылы.
2. Сотқа өтініш беру Кеден одағының комиссиясы актілерінің қолданылуын тоқтата тұру үшін негіз болып табылмайды.
5-бап
1. Сотқа жіберілетін өтініште:
1) жеке тұлғаның тегі, аты, әкесінің аты, оның кәсіпкер ретінде тіркелуі туралы деректер немесе заңды тұлғаның атауы және осындай ретінде оның тіркелуі туралы деректер;
2) елдің ресми атауын, пошталық мекенжайын (хат алмасу үшін мекенжай), сондай-ақ телефон, факс нөмірін, электрондық поштаның мекенжайын (егер ондай болған жағдайда) қоса алғанда, жеке тұлғаның тұрғылықты жері немесе заңды тұлғаның орналасқан жері;
3) Кеден одағы комиссиясының дау айтылатын актісінің атауы, нөмірі, қабылданған күні, жарияланған кезі және (немесе) Кеден одағы комиссиясы әрекетінің (әрекетсіздігінің) сипаты;
4) шаруашылық жүргізуші субъектінің пікірінше, Кеден одағы комиссиясының дау айтылатын актісімен және (немесе) Кеден одағы комиссиясының әрекетімен (әрекетсіздігімен) бұзылған құқықтары мен заңды мүдделері;
5) шаруашылық жүргізуші субъектінің Кеден одағы комиссиясының актісін және (немесе) Кеден одағы комиссиясының әрекетін (әрекетсіздігін) Кеден одағы шеңберінде жасалған халықаралық шарттармен өзіне берілген кәсіпкерлік және өзге экономикалық қызмет саласындағы құқықтары мен заңды мүдделерін бұзады деп тану туралы талабы;
6) Кеден одағының комиссиясына жүгінуі туралы мәліметтер көрсетілуге тиіс.
2. Өтінішке мынадай құжаттар қоса беріледі:
1) Кеден одағы комиссиясының дау айтылатын актісінің мәтіні;
2) заңды тұлғаның немесе жеке тұлғаның кәсіпкер ретінде мемлекеттік тіркелуі туралы куәліктің көшірмесі;
3) Кеден одағының комиссиясына жүгінуін растайтын құжаттар;
4) баждың төленгенін растайтын құжат;
5) шаруашылық жүргізуші субъектінің талаптары негізделетін өзге де құжаттар.
3. Сот іс бойынша тараптарды өтінішті қарауға қабылдау туралы не бас тарту негізін көрсете отырып, өтінішті қабылдаудан бас тарту туралы хабардар етеді.
6-бап
Істі қараудың кез келген сатысында Сот шешімінің орындалуын қамтамасыз ету немесе Кеден одағы шеңберінде жасалған халықаралық шарттарда көзделген шаруашылық жүргізуші субъектілердің құқықтары мен заңды мүдделерінің ықтимал бұзылуын болдырмау мақсатында Сот іс бойынша тараптың қолдаухаты бойынша немесе жеке бастамасы бойынша ақылға қонымды, оның ішінде қамтамасыз ету сипатындағы уақытша шараларды қабылдауға құқылы.
7-бап
1. Шаруашылық жүргізуші субъектінің Сотқа жүгінуіне баж салынады.
2. Шаруашылық жүргізуші субъект бажды Сотқа өтініш бергенге дейін төлейді.
3. Шаруашылық жүргізуші субъектінің өтініште көрсетілген талаптарын Сот қанағаттандырған жағдайда, бажды қайтару жүзеге асырылады.
4. Баждың мөлшерін, төлем валютасын есептеу, пайдалану және қайтару тәртібін Еуразиялық экономикалық қоғамдастықтың Мемлекетаралық кеңесі (мемлекет басшылары деңгейінде) анықтайды.
8-бап
Іс бойынша әрбір тарап өздерінің сот шығасыларын өздері көтереді.
9-бап
1. Шаруашылық жүргізуші субъектілердің қатысуымен істерді қарау үшін Сот Кеден одағына мүше әр мемлекеттен бір судьядан қосылатын Сот Алқасын құрады.
2. Істі қарау мерзімі Сот өтінішті алған күннен бастап үш айдан аспайды.
3. Егер осы Шарттың 10-бабында көзделген тәртіппен Сот Алқасының шешіміне шағым жасалмаса, ол Сот шешімі болып табылады.
4. Сот Кеден одағы комиссиясының актісіне және (немесе) Кеден одағы комиссиясының әрекетіне (әрекетсіздігіне) дау айту туралы істерді қарау кезінде сот отырысында:
1) дау айтылатын Кеден одағының комиссиясы актісінің немесе оның жекелеген ережелерінің және (немесе) дау айтылатын Кеден одағының комиссиясы әрекетінің (әрекетсіздігінің) Кеден одағы шеңберінде жасалған халықаралық шарттарға сәйкестігін;
2) Кеден одағы комиссиясының дау айтылатын актіні немесе оның жекелеген ережелерін қабылдауға өкілеттіктерін;
3) Кеден одағы шеңберінде жасалған халықаралық шарттармен берілген кәсіпкерлік және өзге экономикалық қызмет саласындағы шаруашылық жүргізуші субъектілердің құқықтары мен заңды мүдделерінің бұзылу фактісін тексеруді жүзеге асырады.
10-бап
1. Егер Сот Алқасының шешіміне іс бойынша тараптар Соттың Аппеляциялық палатасына шағымданбаса, ол шығарылған күнінен бастап күнтізбелік он бес күннен кейін күшіне енеді.
2. Сот Алқасының шешімімен Кеден одағы шеңберінде жасалған халықаралық шарттармен берілген өзінің құқықтары мен заңды мүдделері оларды дұрыс қолданбауға байланысты бұзылды деп пайымдайтын тарап Сот алқасының күшіне енбеген шешіміне Соттың Аппеляциялық палатасына шағымдануға құқылы.
3. Соттың Аппеляциялық палатасының құрамына Сот Алқасының шешімі шағымдалып отырған істі қарауға қатыспаған Кеден одағына мүше мемлекеттер Соттарының судьялары кіреді.
4. Соттың Аппеляциялық палатасының шешімі Соттың шешімі болып табылады және ол шығарылған күнінен бастап күшіне енеді.
5. Сот шешімі түпкілікті және шағымдануға жатпайды.
6. 2010 жылғы 5 шілдедегі Еуразиялық экономикалық қоғамдастық Соты Статутының 23-бабында көзделген тәртіппен Сот шешімі жаңадан ашылған мән-жайлар бойынша қайта қаралуы мүмкін.
7. Сот шешіміне не оның жекелеген ережелеріне іс бойынша тараптардың өтініші бойынша Соттың өзі ғана ресми түрде, сондай-ақ өз бастамасы бойынша түсініктеме беруі мүмкін.
11-бап
1. Кеден одағы комиссиясының актілеріне немесе олардың жекелеген ережелеріне дау айту туралы істерді қарау нәтижелері бойынша Сот:
1) дау айтылатын актіні немесе оның жекелеген ережелерін Кеден одағы шеңберінде жасалған халықаралық шарттарға сәйкес деп тану туралы;
2) дау айтылатын актіні немесе оның жекелеген ережелерін Кеден одағы шеңберінде жасалған халықаралық шарттарға сәйкес емес деп тану туралы шешімдердің бірін қабылдайды.
2. Кеден одағы шеңберінде жасалған халықаралық шарттарға сәйкес емес деп танылған Кеден одағының комиссиясы актісінің немесе оның жекелеген ережелерінің қолданылуы Сот шешімі күшіне енген күннен бастап тоқтатыла тұрады және Кеден одағының комиссиясы осы актіні немесе оның жекелеген ережелерін Кеден одағы шеңберінде жасалған халықаралық шарттарға сәйкес келтіреді.
3. Кеден одағы комиссиясының әрекетіне (әрекетсіздігіне) дау айту туралы істерді қарау нәтижелері бойынша Сот:
1) дау айтылатын әрекетті (әрекетсіздікті) Кеден одағы шеңберінде жасалған халықаралық шарттарға сәйкес емес және кәсіпкерлік пен өзге экономикалық саладағы шаруашылық жүргізуші субъектінің құқықтары мен заңды мүдделерін бұзады деп тану туралы;
2) дау айтылатын әрекетті (әрекетсіздікті) Кеден одағы шеңберінде жасалған халықаралық шарттарға сәйкес және кәсіпкерлік пен өзге экономикалық саладағы шаруашылық жүргізуші субъектінің құқықтары мен заңды мүдделерін бұзбайды деп тану туралы шешімдердің бірін қабылдайды.
4. Сот шығындарды өтеу туралы талапты немесе мүліктік сипаттағы өзге де талаптарды қараусыз қалдырады.
12-бап
1. Сот шаруашылық жүргізуші субъектілердің Кеден одағы шеңберінде жасалған халықаралық шарттарда көзделген құқықтары мен заңды мүдделері Кеден одағы комиссиясының актісімен немесе әрекетімен (әрекетсіздігімен) бұзылғандығын анықтаған Соттың күшіне енген шешімін Кеден одағының комиссиясы ақылға қонымды, бірақ Сот шешімі күшіне енген күнінен бастап күнтізбелік 60 күннен аспайтын мерзімде орындауға міндетті.
2. Кеден одағының комиссиясы Сот шешімін орындамаған жағдайда, шаруашылық жүргізуші субъект оны орындау жөнінде шаралар қабылдау туралы қолдаухатпен Сотқа жүгінуге құқылы.
3. Сот шаруашылық жүргізуші субъектінің қолдаухаты бойынша ол
түскен күннен бастап күнтізбелік 15 күн ішінде Еуразиялық экономикалық қоғамдастықтың Үкімет басшылары деңгейіндегі Мемлекетаралық кеңесіне (Кеден одағының жоғарғы органы) олар осы мәселе бойынша шешім қабылдауы үшін жүгінуге міндетті.
13-бап
1. Осы Шартпен реттелмеген бөлігінде шаруашылық жүргізуші субъектілердің өтініштері бойынша істерді қарау рәсімі шаруашылық жүргізуші субъектілердің өтініштерін қарау жөніндегі Сот Регламентімен (бұдан әрі - Регламент) айқындалады.
2. Регламентті Сот Еуразиялық экономикалық қоғамдастықтың Парламентаралық Ассамблеясымен келісім бойынша әзірлейді және бекітеді.
14-бап
Осы Шарттың ережелерін қолдануға немесе түсіндіруге байланысты даулар Тараптар арасындағы консультациялар мен келіссөздер жолымен шешіледі.
15-бап
Осы Шартқа өзгерістер Тараптардың өзара келісуі бойынша енгізіледі және хаттамалармен ресімделеді.
16-бап
Осы Шарт осы Шарттың күшіне енуі үшін қажетті мемлекетішілік рәсімдерді Тараптардың орындағаны туралы үшінші хабарламаны депозитарий алған күннен бастап 30-күні күшіне енеді.
Осы Шарттың түпнұсқа данасы осы Шарттың депозитарийі бола отырып, әрбір Тарапқа оның куәландырылған көшірмесін жіберетін Еуразиялық экономикалық қоғамдастықтың Интеграциялық комитетінде сақталады.
Осы Шарт Біріккен Ұлттар Ұйымы Жарғысының 102-бабына сәйкес Біріккен Ұлттар Ұйымының Хатшылығында тіркеуге жатады.
Мәскеу қаласында 2010 жылғы 9 желтоқсанда орыс тілінде бір түпнұсқа данада жасалды.
Беларусь Қазақстан Қырғыз
Республикасы Республикасы Республикасы
үшін үшін үшін
Ресей Тәжікстан
Федерациясы Республикасы
үшін үшін
Беларусь Президенті А.Г. Лукашенко, Қазақстан Республикасының Президенті Н.А. Назарбаев, Қырғыз Республикасының Президенті, Қырғыз Республикасының Премьер-Министрі Р.И. Отынбаева, Ресей Федерациясының Президенті Д.А. Медведев, Тәжікстан Республикасының Президенті Э. Рахмон қол қойған осы мәтіннің толық және «Кеден одағы шеңберіндегі даулар бойынша шаруашылық жүргізуші субъектілердің Еуразиялық экономикалық қоғамдастықтың Сотына жүгінуі және олар бойынша сот ісін жүргізу ерекшеліктері туралы шарт туралы» 2010 жылғы 9 желтоқсандағы № 534 ЕурАзЭҚ Мемлекетаралық Кеңесінің шешім түпнұсқасының көшірмесіне сай екендігін растаймын.
Түпнұсқаның данасы Еуразиялық экономикалық қоғамдастықтың Интеграциялық Комитетінде сақталады.
Барлық 9 бет тігілген,
қолтаңба мен мөртаңбасы
қойылған
ЕурАзЭҚ ИК Секретариатының
Құқықтық департаментінің Басшысы
16.12.10 С. Князев
Мәскеуде 2010 жылғы 9 желтоқсанда жасалған Кеден одағы шеңберіндегі даулар бойынша шаруашылық жүргізуші субъектілердің Еуразиялық экономикалық қоғамдастықтың Сотына жүгінуі және олар бойынша сот ісін жүргізу ерекшеліктері туралы шарт бойынша ЕурАзЭҚ ИК Хатшылығы мәлімдемесінің орыс тіліндегі нұсқасы қазақ тіліне аударылған нұсқасына сай келетінін растаймын.
Қазақстан Республикасы
Әділет министрлігінің
Халықаралық шарттарды
сараптау департаментінің директоры Э. Әзімова
