«Бюджеттің атқарылуы және оған кассалық қызмет көрсету ережесін бекіту туралы» Қазақстан Республикасы Үкіметінің 2009 жылғы 26 ақпандағы № 220 қаулысына сәйкес республикалық бюджеттің тапшылығын қаржыландыру мақсатында Қазақстан Республикасының Үкіметі ҚАУЛЫ ЕТЕДІ:
1. Қазақстан Республикасының заңнамасына сәйкес капиталдың сыртқы нарықтарында кемінде 500 (бес жүз) миллион АҚШ доллары сомасына мемлекеттік эмиссиялық бағалы қағаздар шығарылсын.
2. Қазақстан Республикасы Қаржы министрлігі:
1) елдің кредиттік рейтингін жаңарту, инвесторларды тарту мақсатында мемлекеттік бағалы қағаздар шығару нарықтары мен әріптестерді айқындау жөніндегі іс-шараларды ұйымдастыруды және өткізуді;
2) осындай мәміле үшін белгіленген талаптарға сәйкес қажетті құжаттаманы дайындауды;
3) мемлекеттік эмиссиялық бағалы қағаздарды орналастырудан республикалық бюджетке қаражаттың түсуін қамтамасыз етуді;
4) мемлекеттік бағалы қағаздар шығарылымы әріптестеріне көрсетілген қызметтерге комиссиялық сыйақы түрінде ақы төлеуді қамтамасыз етуді;
5) осы қаулыдан туындайтын өзге де шараларды жүзеге асырсын.
3. Осы қаулы қол қойылған күнінен бастап қолданысқа енгізіледі.
Қазақстан Республикасы
Премьер-министрі С. Ахметов
