Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған 2016 жылғы 7 маусымда Бішкекте жасалған Тәуелсіз Мемлекеттер Достастығына қатысушы мемлекеттердің электр энергетикасы объектілеріндегі авариялар жөнінде ақпарат алмасу туралы келісім бекітілсін.
2. Осы қаулы қол қойылған күнінен бастап қолданысқа енгізіледі.
Қазақстан Республикасының
Премьер-Министрі Б.Сағынтаев
Қазақстан Республикасы
Үкіметінің
2016 жылғы 11 қарашадағы
№ 694 қаулысымен
бекітілген
Тәуелсіз Мемлекеттер Достастығына қатысушы мемлекеттердің электр энергетикасы объектілеріндегі авариялар жөнінде ақпарат алмасу туралы
КЕЛІСІМ
Бұдан әрі Тараптар деп аталатын Тәуелсіз Мемлекеттер Достастығына қатысушы мемлекеттердің үкіметтері
2003 жылғы 18 қыркүйектегі Табиғи және техногендік сипаттағы төтенше жағдайлар туралы ақпараттар алмасу, олардың салдарларын жою және зардап шеккен халыққа көмек көрсету кезінде өзара ақпараттық іс-қимыл туралы келісімді назарға ала отырып,
мемлекетаралық ақпарат алмасу саласындағы, оның ішінде ТМД-ға қатысушы мемлекеттер мүшелері болып табылатын халықаралық ұйымдар мен интеграциялық бірлестіктер шеңберінде қабылданған халықаралық шарттарды назарға ала отырып,
ТМД-ға қатысушы мемлекеттердің электр энергетикалық жүйелерінің сенімді жұмыс істеуін қамтамасыз етуде, сондай-ақ ТМД-ға қатысушы мемлекеттердің электр энергетикасы объектілерін пайдалануды ұйымдастыру кезінде тәжірибе алмасу тетіктерін жетілдіруде Тараптардың мүдделілігін ескере отырып,
төмендегілер туралы келісті:
1-бап
Осы Келісім мақсаттарына арналған терминдер мен анықтамалар халықаралық шарттарға және ТМД-ға қатысушы мемлекеттердің заңнамасына сәйкес пайдаланылады.
2-бап
ТМД-ға қатысушы мемлекеттердің электр энергетикалық жүйелерінің сенімді жұмыс істеуін қамтамасыз ету, ТМД-ға қатысушы мемлекеттердің электр энергетикасы объектілерін пайдалануды ұйымдастыру кезінде тәжірибе алмасу тетіктерін жетілдіру мақсатында Тараптар трансшекаралық сипаттағы белгілері бар және ТМД-ға қатысушы мемлекеттердің электр энергетикалық жүйелерінің сенімді қатарлас жұмысын қамтамасыз етуге әсер ететін электр энергетикасы объектілеріндегі авариялар туралы ақпаратпен мемлекетаралық алмасуды жүзеге асырады.
Осы Келісімге қатысушы мемлекеттердің электр энергетикасы объектілеріндегі авариялар туралы ақпарат ТМД-ға қатысушы мемлекеттердің электр энергетикалық жүйелерінің энергетикалық қауіпсіздігі деңгейін арттыруға әсер ететін жүйелі және өзге де сипаттағы аварияға қарсы іс-шараларды әзірлеу кезінде озық тәжірибені зерделеу үшін пайдаланылады.
3-бап
Осы Келісімге қатысушы мемлекеттердің электр энергетикасы объектілеріндегі авариялар туралы ақпарат беру өлшемшарттары, құрамы, форматы (макеті) және тәртібі ТМД-ның Электр энергетикалық кеңесі шеңберінде бекітілетін құжаттармен регламенттеледі.
4-бап
Осы Келісімге қатысушы мемлекеттердің электр энергетикасы объектілеріндегі авариялар туралы ақпарат электр энергетикасы объектілерінің меншік иелері, өзге де заңды иелері немесе оларды пайдаланатын ұйымдар табыс ететін авариялар туралы жиынтық есептердің ресми деректері және/немесе тиісті түрде ресімделген авариялардың себептерін тергеп-тексеру туралы актілердің негізінде қалыптастырылады.
ТМД-ға қатысушы мемлекеттің заңнамасымен таратылуы шектеулі ақпаратқа жатқызылған ақпарат оны қорғау жөніндегі талаптар сақтала отырып табыс етіледі.
Осы Келісім шеңберінде табыс етілетін ақпарат осы ақпарат мүдделерін қозғайтын Тараптардың келісімінсіз үшінші тұлғаларға беруге жатпайды.
Тараптар ақпарат алмасуды орыс тілінде жүзеге асырады.
5-бап
Тараптар осы Келісім шеңберінде ұсынылған ақпаратты осы Келісімде көзделген мақсаттарда ғана және оны табыс еткен Тараптарға залал келтірмей пайдаланады.
6-бап
Осы Келісімге қатысушы мемлекеттердің электр энергетикасы объектілеріндегі авариялар туралы ақпаратты табыс етуді Тараптардың электр энергетикасын басқару органы немесе оған уәкілеттік берген ұйым жүзеге асырады.
7-бап
Тараптар ТМД-ның Электр энергетикалық кеңесіне:
осы Келісімге қатысушы мемлекеттердің электр энергетикасы объектілеріндегі авариялар туралы жиынтық ақпаратты жинақтауды, талдауды және осы Келісімге қатысушы мемлекеттерге жіберуді;
осы Келісімге қатысушы мемлекеттердің электр энергетикасы объектілеріндегі авариялар туралы ақпаратпен мемлекетаралық алмасу саласындағы ынтымақтастық мәселелері бойынша жұмыс кездесулерін және консультациялар өткізуді жүктейді.
8-бап
Осы Келісімді іске асыру жөніндегі қызметті, оның ішінде электр энергетикасын басқару органдарының немесе олар уәкілеттік берген ұйымдардың өзара іс-қимылын үйлестіруді ТМД-ның Электр энергетикалық кеңесі жүзеге асырады.
9-бап
Осы Келісімнің реттеу нысанасына жатқызылатын және онда көрсетілмеген мәселелер Келісімге қатысушы мемлекеттердің заңнамасымен реттеледі.
10-бап
Осы Келісімнің ережелерін қолдану және түсіндіру кезінде туындайтын Тараптар арасындағы даулы мәселелер Тараптардың консультациялары мен келіссөздері арқылы шешіледі.
11-бап
Тараптардың өзара келісімі бойынша осы Келісімге оның ажырамас бөлігі болып табылатын өзгерістер мен толықтырулар енгізілуі мүмкін, олар осы Келісімнің 12-бабында көзделген тәртіппен күшіне енетін хаттамалармен ресімделеді.
12-бап
Осы Келісім оның күшіне енуі үшін қажетті мемлекетішілік рәсімдерді оған қол қойған Тараптардың орындағаны туралы үшінші хабарламаны депозитарий алған күннен бастап 30 күн өткен соң күшіне енеді.
Мемлекетішілік рәсімдерді кейінірек орындаған Тараптар үшін осы Келісім депозитарий тиісті құжаттарды алған күннен бастап 30 күн өткеннен кейін күшіне енеді.
13-бап
Осы Келісім күшіне енгеннен кейін қосылу туралы құжатты депозитарийге беру жолымен ТМД-ға қатысушы кез келген мемлекеттің қосылуы үшін ашық.
Қосылған мемлекет үшін осы Келісім депозитарийдің қосылу туралы құжатты алған күнінен бастап 30 күн өткен соң күшіне енеді.
14-бап
Осы Келісім белгіленбеген мерзімге жасалады. Әрбір Тарап депозитарийге шығу туралы жазбаша хабарлама жібере отырып, осы Келісімнен шығуға құқылы. Осы Келісім депозитарий тиісті хабарламаны алған күнінен бастап 6 айдан кейін осы Тарапқа қатысты қолданысын тоқтатады.
15-бап
Осы Келісім өз мемлекеті қатысушы болып табылатын басқа да халықаралық шарттардан туындайтын әрбір Тараптың құқықтары мен міндеттемелерін қозғамайды.
2016 жылғы 7 маусымда Бішкек қаласында орыс тілінде бір төлнұсқа данада жасалды. Төлнұсқа дана осы Келісімге қол қойған әрбір мемлекетке оның куәландырылған көшірмесін жіберетін Тәуелсіз Мемлекеттер Достастығының Атқарушы комитетінде сақталады.
Әзербайжан Республикасының Ресей Федерациясының
Үкіметі үшін Үкіметі үшін
Армения Республикасының Тәжікстан Республикасының
Үкіметі үшін Үкіметі үшін
Беларусь Республикасының Түрікменстан Үкіметі үшін
Үкіметі үшін
Қазақстан Республикасының Өзбекстан Республикасының
Үкіметі үшін Үкіметі үшін
Қырғыз Республикасының Украина Үкіметі үшін
Үкіметі үшін
Молдова Республикасының
Үкіметі үшін
