"Сауда қызметін реттеу туралы" 2004 жылғы 12 сәуірдегі Қазақстан Республикасының Заңы 1-бабының 41) тармақшасына сәйкес Қазақстан Республикасының Үкіметі ҚАУЛЫ ЕТЕДІ:
1. Тауарларды таңбалау мен олардың қадағалануының бірыңғай операторының мынадай функциялары айқындалсын:
1) тауарларды сәйкестендіру құралдарымен таңбалау саласында Еуразиялық экономикалық одақтың интеграцияланған ақпараттық жүйесімен өзара іс-қимылды қамтамасыз ету;
2) Қазақстан Республикасы Үкіметінің 2016 жылғы 20 желтоқсандағы № 832 қаулысымен бекітілген ақпараттық-коммуникациялық технологиялар және ақпараттық қауіпсіздікті қамтамасыз ету саласындағы бірыңғай талаптарды ескере отырып, тауарлар айналымына қатысушылардың тауарларды таңбалау мен олардың қадағалануының ақпараттық жүйесіне (бұдан әрі – ТТҚ АЖ) үздіксіз қол жеткізуін қамтамасыз ету;
3) үшінші тұлғалармен шарттар жасасу, сондай-ақ тауар айналымына қатысушылармен шарттық қатынастар мен есеп айырысуларды шоғырландыру және ТТҚ АЖ-ға, Ұлттық тауарлар каталогына қол жеткізу және тауарларға сәйкестендіру құралдарын қолдану функцияларын еншілес ұйымдарға беру;
4) ТТҚ АЖ мен Ұлттық тауарлар каталогының жұмыс істеуінің ұйымдастырушылық-техникалық аспектілерін регламенттейтін үлгілік шарттардың, нұсқаулықтардың және өзге де құжаттардың нысандарын бекіту.
2. Осы қаулы қол қойылған күнінен бастап қолданысқа енгізіледі.
|
Қазақстан Республикасының Премьер-Министрі |
А. Мамин |
