Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған 2023 жылғы 22 қыркүйекте Нью-Йоркте жасалған Қазақстан Республикасының Үкіметі мен Бангладеш Халық Республикасының Үкіметі арасындағы дипломатиялық және қызметтік/ресми паспорттардың иелерін визалық талаптардан босату туралы келісім бекітілсін.
2. Осы қаулы қол қойылған күнінен бастап қолданысқа енгізіледі.
|
Қазақстан Республикасының Премьер-Министрі |
Ә. Смайылов |
Қазақстан Республикасының Үкіметі мен Бангладеш Халық Республикасының Үкіметі арасындағы дипломатиялық және қызметтік/ресми паспорттардың иелерін визалық талаптардан босату туралы келісім
Бұдан әрі жеке-жеке "Тарап" және бірлесіп "Тараптар" деп аталатын Қазақстан Республикасының Үкіметі мен Бангладеш Халық Республикасының Үкіметі
екі мемлекет арасындағы достық қарым-қатынасты нығайтуға ұмтыла отырып,
Қазақстан Республикасы мен Бангладеш Халық Республикасының азаматтары – жарамды дипломатиялық және қызметтік/ресми паспорттар иелерінің екі мемлекет арасындағы өзара сапарларын жеңілдетуге ниет білдіре отырып,
өз мемлекеттерінің ұлттық заңнамаларына сәйкес әрекет ете отырып,
төмендегілер туралы келісті:
1-бап
Тараптардың бірі мемлекетінің екінші Тарап мемлекетінің аумағында аккредиттелмеген азаматтары – жарамды дипломатиялық және қызметтік/ресми паспорттардың иелері екінші Тарап мемлекетінің аумағына келген күнінен бастап күнтізбелік 30 (отыз) күннен аспайтын мерзімге визасыз бір мәрте немесе бірнеше мәрте келе алады, одан кете алады, транзитпен өте алады және онда бола алады.
2-бап
Дипломатиялық өкілдіктердің немесе консулдық мекемелердің қызметкері ретінде бір Тарап мемлекетінің аумағында қызметтік іссапарда жүрген Тараптардың бірі мемлекетінің азаматтары – жарамды дипломатиялық және қызметтік/ресми паспорттардың иелері, сондай-ақ олардың отбасы мүшелері – жарамды дипломатиялық және қызметтік/ресми паспорттардың иелері екінші Тарап мемлекетінің аумағына өздері аккредиттелген кезеңге визасыз келе алады, одан кете алады және онда бола алады.
3-бап
Тараптардың әрқайсысының азаматтарының жарамды дипломатиялық және қызметтік/ресми паспорттарының қолданылу мерзімі екінші Тарап мемлекетінің аумағына келген күннен бастап кемінде 6 (алты) ай болуға тиіс.
4-бап
1. Тараптардың бірі мемлекетінің азаматтары – жарамды дипломатиялық және қызметтік/ресми паспорттар иелерінің екінші Тарап мемлекетінің аумағына келуі, одан кетуі және транзитпен өтуі екі мемлекеттің халықаралық қатынас үшін ашық ресми өткізу пункттері арқылы жүзеге асырылады.
2. 1961 жылғы 18 сәуірдегі Дипломатиялық қатынастар туралы Вена конвенциясының және 1963 жылғы 24 сәуірдегі Консулдық қатынастар туралы Вена конвенциясының ережелеріне нұқсан келтірмей, Тараптардың бірі мемлекетінің азаматтары – жарамды дипломатиялық және қызметтік/ресми паспорттардың иелері екінші Тарап мемлекетінің аумағында болған кезеңде осы Тарап мемлекетінің қолданыстағы ұлттық заңнамасын сақтауға міндетті.
5-бап
Тараптардың әрқайсысы болуы қошталмайтын екінші Тарап мемлекеті азаматтарының – жарамды дипломатиялық және қызметтік/ресми паспорттардың иелерінің өз мемлекетінің аумағына келуінен бас тарту не болу мерзімін қысқарту құқығын өзіне қалдырады.
6-бап
1. Тараптардың әрқайсысы ұлттық қауіпсіздікті, қоғамдық тәртіпті немесе қоғамдық саулықты қамтамасыз ету мақсатында осы Келісімнің қолданысын уақытша, ішінара немесе толық тоқтата тұра алады.
2. Осы Келісімнің қолданылуын тоқтата тұру, сондай-ақ қайта бастау туралы шешім қабылдаған Тарап екінші Тарапқа өзінің осындай шешімі туралы ол күшіне енгенге дейін кемінде 72 (жетпіс екі) сағат бұрын дипломатиялық арналар арқылы хабарлайды. Осы Келісімнің қолданылуын тоқтата тұру екінші Тарап мемлекетінің аумағында жүрген осы Келісімнің 1 және 2-баптарында аталған Тараптардың бірі мемлекетінің азаматтарының құқықтарын қозғамайды.
7-бап
Тараптар осы Келісімге қол қойылған күннен бастап күнтізбелік 30 (отыз) күн ішінде дипломатиялық арналар арқылы дипломатиялық және қызметтік/ресми паспорттардың үлгілерімен алмасады. Дипломатиялық және қызметтік/ресми паспорттарға өзгерістер енгізілген жағдайда Тараптардың әрқайсысы олар қолданысқа енгізілгенге дейін кемінде күнтізбелік 30 (отыз) күн бұрын бұл туралы екінші Тарапты хабардар етуге міндетті.
8-бап
Осы Келісімнің ережелерін түсіндіру немесе қолдану кезінде туындайтын кез келген даулар Тараптар арасындағы консультациялар немесе келіссөздер арқылы шешіледі.
9-бап
Осы Келісімге өзара келісу бойынша осы Келісімнің ажырамас бөліктері болып табылатын, жекелеген хаттамалармен ресімделетін және осы Келісімнің 10-бабының 1-тармағына сәйкес күшіне енетін өзгерістер мен толықтырулар енгізілуі мүмкін.
10-бап
1. Осы Келісім оның күшіне енуі үшін қажетті мемлекетішілік рәсімдерді Тараптардың орындағаны туралы соңғы жазбаша хабарлама дипломатиялық арналар арқылы алынған күннен бастап күнтізбелік 30 (отыз) күн өткен соң күшіне енеді.
2. Осы Келісім белгіленбеген мерзімге жасалады және Тараптардың бірі екінші Тараптың оның қолданысын тоқтату ниеті туралы тиісті жазбаша хабарламасын дипломатиялық арналар арқылы алған күннен бастап 6 (алты) ай өткенге дейін күшінде қалады.
2023 жылғы "22" қыркүйекте Нью-Йорк қаласында әрқайсысы қазақ, бенгал және ағылшын тілдерінде 2 (екі) данада жасалды әрі барлық мәтіндер тең түпнұсқалы. Осы Келісімді түсіндіру кезінде сәйкессіздіктер туындаған жағдайда ағылшын тіліндегі мәтін басым күшке ие болады.
|
Қазақстан Республикасының Үкіметі үшін |
Бангладеш Халық РеспубликасыныңҮкіметі үшін |
