Қазақстан Республикасында өндiрiлген көмiрге 1992 жылғы 1 шiлдеден еркiн (нарықтық) баға белгiленуiне байланысты Қазақстан Республикасының Министрлер Кабинетi қаулы етедi:
1. Балансындағы көмiрдiң есебi биылғы 1 шiлдеге дейiн мемлекеттiк реттелетiн баға бойынша жүргiзiлiп келген кәсiпорындар мен ұйымдар 1992 жылғы 1 шiлдедегi жағдай бойынша көмiр қалдықтарына қайта бағалау жүргiзсiн.
2. Қайта бағалау нәтижелерi:
а) мемлекеттiк бюджет есебiнен ұсталатын кәсiпорындар мен ұйымдар бойынша - қаржыландырудың өздерiндегi көздерiн толықтыруға;
б) бюджеттiк емес кәсiпорындар мен ұйымдар бойынша - қосымша бағалау сомасының 80 процентi - айналым қаржысын қаржыландырудың өздерiндегi көздерiн толықтыруға және қосымша бағалау сомасының 20 процентi - тең үлеспен республикалық және жергiлiктi бюджеттерге жiберiлсiн.
Қазақстан Республикасының
Премьер-министрi
