Ескерту. Күші жойылды - ҚР Үкіметінің 2010.03.31 № 265 Қаулысымен.
Қазақстан Республикасының Министрлер Кабинетi қаулы етедi: Қазақстан Республикасының Министрлер Кабинетi жанындағы "Қазақстан Мемлекеттiк телерадио хабарларын тарату компаниясы туралы осыған қосылған Ереже бекiтiлсiн. Қазақстан Республикасының Премьер-министрi Қазақстан Республикасы Министрлер Кабинетiнiң 1993 жылғы 4 мамырдағы N 357 қаулысымен Бекiтiлген "Қазақстан" Мемлекеттiк телерадио хабарларын тарату компаниясы туралы ЕРЕЖЕ Жалпы ережелер
1. Қазақстан Республикасының Министрлер Кабинетi жанындағы "Қазақстан" Мемлекеттiк телерадио хабарларын тарату компаниясы /бұдан әрi "Қазақстан" Мемлекеттiк телерадио компаниясы/ Қазақстан Республикасы Президентiнiң "Қазақстан" Мемлекеттiк телерадио хабарларын тарату компаниясын құру туралы" 1992 жылғы қыркүйектiң 18-iндегi N 920 Жарлығына сәйкес құрылды және Қазақстан Республикасының мемлекеттiк басқаруының орталық органы құқында жұмыс iстейдi.
"Қазақстан" Мемлекеттiк телерадиокомпаниясы республикалық теледидардың, республикалық радионың, "Қазақтелефильм" студиясының, облыстық және қалалық телерадиокомпанияларының шығармашылық-өндiрiстiк құрылымдарын бiрiктiредi.
2. "Қазақстан" Мемлекеттiк телерадиокомпаниясы Қазақстан Республикасының бүкiл аумағында және шетелдерде қажеттi шаруашылық-қаржы операцияларын жүргiзетiн, банк мекемелерiнде өзiнiң есеп айырысу, бюджеттiк және валюталық есепшоты бар, сыртқы экономикалық қызметтi заңмен белгiленген тәртiп бойынша жүзеге асыра алатын дербес баланстағы заңды ұйым болып саналады.
3. "Қазақстан" Мемлекеттiк телерадиокомпаниясы өз қызметiнде Қазақстан Республикасының заң актiлерiн, Қазақстан Республикасы Президентiнiң, Министрлер Кабинетiнiң шешiмдерiн, осы Ереженi және өз қызметiнiң саласына қатысы бар басқа да нормативтiк актiлердi басшылыққа алып отырады.
4. "Қазақстан" Мемлекеттiк телерадиокомпаниясының Қазақстан Республикасының елтаңбасы бейнеленген, қазақ және орыс тiлдерiнде атауы жазылған мөрi, фирмалық белгiсi, эмблемасы болады.
5. "Қазақстан" Мемлекеттiк телерадиокомпаниясының орналасқан жерi және заңды мекен-жайы: Алматы қаласы, Желтоқсан көшесi, 175.
"Қазақстан" Мемлекеттiк телерадиокомпаниясының
мiндеттерi
6. "Қазақстан" Мемлекеттiк телерадиокомпаниясы:
теледидар және радио бағдарламаларын әзiрлейдi, оларды республиканың аумағына және шетелдерге таратады, телерадио бағдарламаларының кәсiби деңгейiнiң жоғары болуын қамтамасыз етедi, бұл бағдарламалардың елдегi әлеуметтiк-экономикалық дамуды жеделдетуге, нарық экономикасының қалыптасуы мен қоғамды демократияландыру процестерiн күшейтуге ықпал етуiне мүмкiндiк туғызады;
Қазақстан теледидар мен радио хабарларын жалпы ұлттық құрылым ретiнде дамытудың және оны жүзеге асырудың стратегиясы мен негiзгi бағыттарын қалыптастырады, қалалық, аудандық, облыстық, республикалық және мемлекетаралық телерадио хабарлары ұйымдарының таратушы жүйелерiн дамыту мен пайдалануды, олардың Тәуелсiз Мемлекеттер Достастығына қатысушы республикалардағы және шетелдердегi телерадио органдарымен өзара iс-қимылдарын үйлестiредi;
мемлекеттiк теледидар мен радио хабарларын, теледидар мен радионы басқару жүйелерiн жетiлдiредi, бағдарламалардың шығармашылық деңгейi мен мазмұндылығын арттырады, Қазақстан Республикасының және басқа мемлекеттердiң халқын республиканың саяси-экономикалық және мәдени өмiрiндегi аса маңызды мәселелер жөнiнен хабардар етудi жақсартады;
егемендi құқықтық мемлекет ретiнде республиканың мемлекеттiк және құқықтық өмiрiн теледидар мен радио хабарлары арқылы терең де жан-жақты көрсетiп отырады, әлеуметтiк-экономикалық даму процестерiн шыншылдық тұрғысынан бейнелейдi, рухани прогресс пен нарық экономикасын қалыптастыруға, демократияландыру мен жариялылыққа, ұлтаралық қатынастардың жарасымдылығына, қазақ тiлiнiң қолданылу аясын кеңейтуге, Қазақстан халықтарының мәдениетiн дамытуға және ұлттық ерекшелiктердiң сақталуына, республикада және одан тыс жерлерде жалпы адамгершiлiк iзгi қасиеттерге бағдар ұстауға ықпал етедi;
теледидар мен радио хабарларын тарату саласында бiртұтас техникалық және технологиялық саясат жүргiзедi, ғылыми-техникалық әлеуеттi дамытып, теледидар мен радио саласында ғылыми-зерттеу жұмыстарын ұйымдастырады; теледидар мен радио хабарларын таратудың материалдық-техникалық базасын дамытудың мемлекеттiк бағдарламаларының жобасын жасап, iске асырады;
теледидар мен радио хабарларын дамытудың тиiмдi бағыттары бойынша халықаралық ынтымақтастықты үйлестiредi, тиiстi халықаралық және үкiметтiк емес ұйымдарға, халықаралық техникалық комиссиялар мен ұйымдарға өкiлдерiн қатыстыра алады;
мемлекеттiк теледидар және радио хабарлары органдары қызметiнiң құқықтық қамтамасыз етiлуiн жетiлдiредi.
"Қазақстан" Мемлекеттiк телерадиокомпаниясының
қызметi
Теледидар мен радио бағдарламаларын әзiрлеу
және оларды республика аумағы мен шетелдерде тарату саласында
7. Өз ақпаратының шыншыл, жедел және алғашқы болып таратылуы принциптерi бойынша жұмыс iстей отырып, республика аумағында мемлекеттiк теледидар мен радио хабарлары ұйымдастырады және теледидар мен радио бағдарламаларын шетелдерге таратады. Теледидар мен радио бағдарламаларының жоғары идеялық көркемдiк деңгейiн қамтамасыз етедi. Егемендi мемлекет ретiнде Қазақстан Республикасы, оның iшкi және сыртқы саясаты, адамдар өмiрi мен қоғамда болып жатқан процестер, олар жөнiндегi шетелдiк пiкiрлер, халықаралық оқиғалар мен процестер туралы жан-жақты ақпарат бередi.
Қазақстан Республикасының жоғары мемлекеттiк өкiмет және басқару органдарының қызметi туралы ресми хабарларды ел iшiнде және шетелдерге таратады, олар қабылдаған шешiмдердi түсiндiредi, бұл шешiмдер бойынша келiп түскен пiкiрлерге талдау жасайды.
Теледидар мен радио хабарларының қорына арнап телерадио бағдарламаларын түсiрiп, жазып алады. Материалдардың таралымын анықтайды және көбейтедi.
Теледидар мен радио бағдарламаларының, таңдаулы әдеби және музыкалық шығармалар бәйгесiн ұйымдастырады.
Белгiленген тәртiппен арнаулы әдебиет және басқа баспа өнiмдерiн шығарады, телерадио мәселелерi бойынша республика iшiнде және халықаралық көрмелер ұйымдастырады.
Теледидар мен радио бағдарламаларының перспективалық және жылдық тақырыптық жоспарларын, теледидар мен радио хабарларының қорына арналған жазбаларды, телефильмдер түсiрудiң тақырыптық жоспарларын бекiтедi, телерадио бағдарламаларын қабылдау мен берiлу тәртiбiн анықтайды.
Телефильмдердi өндiрiске өткiзу, оларды көбейту жолдарын белгiлейдi. Белгiленген тәртiппен сценарийлер жазу мен телефильмдер шығаруға байланысты шығындардың ережесiн әзiрлеп,бекiтедi. Телерадио хабарларының өндiрiсiне байланысты нормативтердi бекiтедi.
Заңға сәйкес теледидар мен радио хабарлары үшiн әдебиет пен өнер шығармаларына тапсырыс беру, сатып алу және пайдалану тәртiбiн белгiлейдi.
8. Қазақстан және шетелдерде өзiнiң бөлiмшелерi мен тiлшiлер пункттерiн ұйымдастырады, тiлшiлердi және басқа мамандарды республика шегiнде және шетелдерге iссапарға жiбередi.
9. Теледидар мен радио қызметкерлерiнiң бiлiктiлiк мiнездемелерiн, сондай-ақ тарифтiк санаттарды белгiлеген кезде қойылатын талаптарды бекiтедi /Бұған бiртұтас тарифтiк-бiлiктiлiк талаптары қойылатын қызметкерлердiң мiнездемелерi кiрмейдi/.
10. Халықтың рухани ұлттық байлығы мен оның мәдени мұрасының бiр бөлшегi ретiнде теледидар мен радио шығармаларының, телефильм өндiрiсiнiң бiртұтас қорын iрiктеу, қалыптастыру және сақтау жөнiнде мемлекеттiк қызметтi жүзеге асырады.
11. Көркемдiк, тарихи және мәдени тұрғыдан ерекше құнды болып саналатын телерадио бағдарламалары мен телефильмдердi iрiктеу тәртiбiн, ұзақ уақыт сақтау мерзiмi мен шартын заңға сәйкес белгiлейдi.
12. Кадрлармен жүргiзiлетiн жұмыстың негiзгi бағыттарын анықтайды, теледидар мен радиодағы кадр мәселесiнiң жай-күйiне талдау жасайды. Еңбек қатынастарының шарттық-конкурстық жүйесiн пайдалана отырып, кәсiптiк бiлiктiк деңгейiне қойылатын ортақ талаптар негiзiнде кадрларды iрiктейдi және орналастырады.
Теледидар мен радио қызметкерлерiмен даярлауды, қайта даярлауды және бiлiктiлiгiн үздiксiз арттыруды ұйымдастырып отырады.
Республикалық байланыс және ақпарат жүйесiндегi
бiртұтас мемлекеттiк саясатты жүзеге асыру саласында
13. Республикалық, облыстық, қалалық, аудандық мемлекеттiк телерадио бағдарламаларының мазмұнын, көлемiн және тарату тәртiбiн белгiлейдi.
14. "Баспасөз және басқа да бұқаралық ақпарат құралдары туралы" Қазақстан Республикасының Заңына сәйкес телерадио станциялары мен кабель жүйелерiн дамыта отырып, республика аумағында телерадио ұйымдарымен өзара байланыс орнатады, аудио бейне өнiмiнiң ортақ рыногын қалыптастыруға қатысады.
Телерадио бағдарламаларын әзiрлейтiн және хабар беретiн ұйымдармен шығармашылық-өндiрiстiк және коммерциялық қарым-қатынасын шартты негiзде, шығармашылық ынтымақтастық және өзара тиiмдi мүдделердi орындау жолымен орнатады.
15. Теледидар және радио хабарлары органдары мен ұйымдарының техникалық, экономикалық, құқықтық және басқа да зерттеулердi тереңдету мен жетiлдiру мақсатында телерадио саласындағы ғылыми-техникалық әлеуеттi, дүниежүзiлiк және отандық практиканың жетiстiктерiн пайдаланады.
Мүдделi жақтардың қатысуымен теледидар мен радио хабарлары жөнiндегi органдар мен ұйымдардың қызметiне талдау және болжам жасайды.
16. Байланыс министрлiгiмен бiрлесе отырып, заңда көрсетiлген тәртiппен "Қазақстан" Мемлекеттiк телерадио компаниясының бағдарламаларын қабылдау мен таратуға кедергi жасайтын әрекеттердi жою шараларын қолданады.
17. Телерадио бағдарламаларын, ғылыми-әдiстемелiк, құқықтық, ғылыми-техникалық, коммерциялық және басқа ақпараттар алмасу, республикалық қорларды қалыптастыру мәселелерiн шартты негiзде шешу үшiн басқа телерадио органдарымен екiжақты және көпжақты келiсiм әзiрлейдi және қабылдайды.
18. Республика облыстарындағы телерадио ұйымдары арасында ақпарат алмасуға жәрдемдеседi.
Қазақстан Республикасында бiртұтас техникалық
және технологиялық саясат жүргiзу саласында
19. Республиканың байланыс органдарымен бiрлесе отырып мемлекеттiк теледидар мен радио хабарлары бағдарламаларын әзiрлеп, таратудың бiртұтас жалпы республикалық желiсiнiң қызметiн қамтамасыз ететiн техникалық құралдарды ұтымды орналастыруға және тиiмдi дамытуға көмектеседi, теледидар мен радионың хабар беретiн техникалық құралдары мен республикада телерадио хабарлары бағдарламаларын таратып бөлетiн коммутациялық желiлердi қалыптастырып, қай жерге шоғырландыру қажеттiгiн анықтайды.
20. Теледидар мен радио бағдарламаларын қалыптастырудың техникалық базасының құрылысын салу және жаңарту жөнiндегi перспективалық және жылдық жоспарларды /болжамдарды/ әзiрлейдi.
21. Республиканың Байланыс министрлiгi бөлген техникалық құралдардың тиiмдi пайдаланылуын қамтамасыз етедi.
22. Теледидар, радио және кинотехнологиясы саласындағы техникалық шарттарды, әдiстемелiк нұсқаулар мен басқа да нормативтiк-техникалық құжаттарды әзiрлейдi, оларды келiсiп пайдалану шараларын жүзеге асырады.
Талап етiлетiн өлшем бiрлiгi мен нақтылығына қол жеткiзуге, ғылыми-техникалық прогрестi жетiлдiруге, теледидар мен радио жабдығы жұмысының тиiмдiлiгiн арттыруға, бағдарламалар сапасын жақсартуға бағытталған жұмыстарды метрологиялық қамтамасыз ету шараларын жүзеге асырады.
"Қазақстан" Мемлекеттiк телерадиокомпаниясының бағдарламаларын әзiрлеп, таратудың сапасына бақылау жасайды.
23. Бюджеттен бөлiнетiн қаржы, соның iшiнде еркiн айналымдағы валюта есебiнен тапсырыстар жасап, телерадиоға қажеттi техниканың, технология мен жабдықтың жаңа түрлерiн алу жөнiндегi операцияларды қаржыландырады. Телерадио үшiн жабдық шығаратын кәсiпорындармен, ғылыми-зерттеу ұйымдарымен тiкелей байланыс орнатады. Қажеттi жабдыққа деген сұранымды зерттейдi, бiр орталықтан бөлiнетiн қаржыны, сондай-ақ телерадио хабарлары органдары мен ұйымдарының қаржысын пайдалана отырып, телерадио жабдықтарын өндiретiн қуаттарды дамыту жөнiнде ұсыныстар әзiрлейдi. Ғылыми-зерттеу, тәжiрибе-конструкторлық және технологиялық жұмыстарды орындау жөнiнде шарт жасайды. Теледидар мен радио хабарларына арналған қазiргi талапқа сай техникалық құралдар мен жабдықтар өндiрiсiн үйлестiредi. Телерадио қабылдағыштары өндiрiсiнiң жоспарларын әзiрлеуге қатысады.
24. Телерадио бағдарламаларын таратуды техникалық жағдайларға сәйкестендiру мақсатында салынатын үйлер мен ғимараттар құрылысының техникалық жобаларын белгiленген тәртiпке сай үйлестiредi.
Теледидар, радио және кинотехнология жабдықтарына, босалқы бөлшектер мен пайдалану материалдарына деген сұранымды белгiлейдi. Республиканың Министрлер Кабинетi белгiлеген тәртiп бойынша мемлекеттiк телерадиокомпаниясының кәсiпорындары мен ұйымдарын алдын-ала жасалатын шартқа сай материалдық-техникалық ресурстармен қамтамасыз етедi.
25. Жабдықтарды, материалдарды, босалқы бөлшектердi сатып алу мен үлгiлi қызмет көрсетудi ұйымдастыруға орай шетелдiк фирмалармен ынтымақтаса жұмыс жүргiзедi.
26. Күрделi құрылысқа бюджеттен бөлiнген қаржы мен құралдарды ұтымды пайдаланады, теледидар мен радионың материалдық-техникалық базасын одан әрi дамытуды қамтамасыз етедi.
Теледидар мен радио хабарларының қызметiн
құқықтық қамтамасыз етудi жетiлдiру саласында
27. Қазақстан Республикасында теледидар мен радиохабарын ұйымдастыру мен басқарудың құқықтық негiздерiн әзiрлеуге қатысады.
28. Теледидар мен радиохабарлары туралы теледидар көрермендерi мен радиохабарларын тыңдаушылардың құқықтары мен заң жүзiндегi мүдделерiн қорғау туралы заңдардың орындалуына бақылау жасауға қатысады.
Ақпаратты құқықтық жұмыс жүргiзе отырып, телерадио саласындағы заңдылықтың орындалуын және нығайтылуын қамтамасыз етедi.
Телерадио қызметiн реттейтiн нормативтiк актiлер бюллетенiн әзiрлеп шығарады. Қазақстан Республикасы мен шетелдерде теледидар мен радио саласындағы заңдарды пайдалану тәжiрибесiн қорытындылайды және оны жетiлдiру жөнiнде ұсыныстар әзiрлеп, Республика Президентi мен Министрлер Кабинетiнiң қарауына енгiзедi.
29. Құқықтық құралдар арқылы "Қазақстан" Мемлекеттiк телерадиокомпаниясының сыртқы экономикалық қызметiн қамтамасыз етедi және белгiленген тәртiп бойынша тиiстi халықаралық-құқықтық ұйымдарда оның мүддесiн қорғайды.
Қазақстан Республикасының теледидар мен радио
хабарларын дамытудың басым бағыттары бойынша
халықаралық байланыстары саласында
30. Қазақстан Республикасының теледидар мен радио хабарлары саласындағы мемлекеттiк сыртқы саясат мәселелерi жөнiндегi халықаралық байланыстарын жүзеге асырады, Қазақстан Республикасының халықаралық мiндеттемелерiнiң орындалуын, сыртқы экономикалық байланыстардың кеңейтiлуiн, теледидар мен радио хабарларының экспорттық базасының дамуын қамтамасыз етедi.
31. Қазақстан Республикасының теледидар мен радио хабарлары саласындағы халықаралық және сыртқы экономикалық қызметiне байланысты шараларының жүзеге асырылуын қамтамасыз етедi. Шетелдiк телерадиокомпанияларымен және ұйымдарымен ынтымақтастық туралы келiсiмдер, хаттамалар және басқа құжаттар әзiрлейдi. Сыртқы экономикалық қызмет саласында шарттар жасайды.
32. Теледидар мен радио хабарлары саласында экспорттық-импорттық, өкiлеттiк-делдалдық және басқа да сыртқы экономикалық қызмет түрлерiн жүзеге асырады.
Мемлекеттiк телерадиокомпаниясының құрамына кiретiн бiрлестiктерге, кәсiпорындар мен ұйымдарға шетелдiк фирмалармен байланыс орнатуға көмектеседi.
33. Телерадио хабарлары саласында маманданушы шетелдiк ақпарат құралдарымен, ұйымдармен, компаниялармен, корпорациялармен ынтымақтаса жұмыс iстейдi.
Теледидар мен радио хабарлары жөнiндегi халықаралық ұйымдардың, телерадио хабарлары мәселелерi жөнiндегi халықаралық техникалық комиссиялар мен ұйымдардың қызметiне қатысуға байланысты жұмыстарды ұйымдастырады және атқарады.
Теледидар мен радио хабарларының отандық және шетелдiк техникалық құралдарын дамыту саласындағы жетiстiктердi, шетелдердегi теледидар мен радио хабарларын ұйымдастырудың озық тәжiрибелерiн зерттейдi және енгiзедi.
34. "Қазақстан" Мемлекеттiк телерадиокомпаниясы өзiнiң негiзгi мақсаттары мен мiндеттерiн орындауға, материалдық-техникалық, әлеуметтiк базасын дамытуға және қаржы-экономикалық жағдайын нығайтуға мүмкiндiк беретiн шараларды жүзеге асыра алады, бағдарламаларды радио және бейнежазу таспаларына түсiрiп көбейту, қосалқы шаруашылықпен және қызметтiң басқа да түрлерiмен айналысады.
"Қазақстан" Мемлекеттiк телерадиокомпаниясының
құқықтары
35. "Қазақстан" Мемлекеттiк телерадиокомпаниясы:
мемлекеттiк органдардан, қоғамдық бiрлестiктерден және лауазымды адамдардан телерадио бағдарламаларын әзiрлеуге қажеттi ақпарат алуға, қызмет бабындағы мiндеттердi атқару үшiн мемлекеттiк телерадиокомпаниясының қызметкерлерiне қажет болған жағдайда мемлекеттiк органдар мен қоғамдық ұйымдардан көмек /жәрдем/ алуға, елде болып жатқан аса маңызды оқиғалар туралы фильмдер түсiруге, хабарлар жазып алуға және көрермендер мен радиотыңдаушыларды жедел хабардар етудi ұйымдастыру үшiн компания қызметкерлерiн митингiлерге, жиналыстарға, шерулерге, халықтың ойын-тойларға және басқа да бұқаралық шараларға, сондай-ақ табиғи апаттар мен зiлзала болған аудандарға жiберуге құқылы;
Қазақстан Республикасының заңдары, Президенттiң жарлықтары, Министрлер Кабинетiнiң қаулылары мен өкiмдерi негiзiнде және оларды орындау мақсатында мемлекеттiк саясатты жүзеге асыруға байланысты мәселелер бойынша нормативтiк актiлер шығаруға құқылы;
"Қазақстан" Мемлекеттiк телерадиокомпаниясының құзырындағы мәселелер бойынша заңдылықтың сақталуына бақылау жасауға және тексеруге, Қазақстан Республикасының аумағында теледидар мен радио бағдарламаларын әзiрлеу мен тарату мәселелерi бойынша "Қазақстан" Мемлекеттiк телерадиокомпаниясы шығарған нормативтiк актiлердiң орындалуы жөнiнде ақпарат алуға және оларға талдау жасауға құқылы;
заңда белгiленген тәртiп бойынша телекөрермендер мен радиотыңдаушылардың, басқа да телерадио өнiмдерiн пайдаланушылардың құқықтары мен заңды мүдделерiн қорғау шараларын қолдана алады;
телерадио бағдарламаларын таратудың техникалық шарттарынан ауытқыған үйлер мен ғимараттардың құрылысын тоқтату туралы тиiстi органдарға ұсыныстар жiберуге құқылы;
"Қазақстан" Мемлекеттiк телерадиокомпаниясына бекiтiлiп берiлген белгiленген радиотолқындары, хабар тарату және байланыс арналары бар барлық техникалық құралдардың "Қазақстан" телерадиокомпаниясының бағдарламаларын тарату мақсатында жұмыс iстеу /көлемi мен тәртiбi/ режимiн анықтауға құқылы;
мемлекеттiк телерадиокомпаниясының бағдарламаларын таратудан бос уақытта басқа пайдаланушыларға беруге рұқсат ете алады;
телерадио ұйымдары мен олардың баспа органдарын құруға және олардың қызметiн тоқтатуға, бұл органдардың бағдарламаларын, жарғыларын /ережелерiн/ бекiтуге, оларды қаржыландыруға және материалдық-техникалық жағынан қамтамасыз етуге құқылы;
республиканың Байланыс министрлiгiмен келiсе отырып, халық депутаттарының жергiлiктi Кеңестерiне өз аумақтарында мемлекеттiк телерадиокомпания хабарларының таратылу тәртiбiн өзгерту үшiн рұқсат етуге құқылы;
мемлекеттiк телерадиокомпаниясының қызметкерлерi мен шетелдердегi өкiлдiктерiнiң санын әртүрлi санаттағы қызметкерлердiң арасалмағын ескермей-ақ өз қалауынша белгiлеуге және құрылымды, штатты бекiтуге құқылы;
мемлекеттiк телерадиокомпанияға бөлiнген қаржы және басқа да түсiмдер есебiнен уақытша шығармашылық ұжымдар, теледидар мен радиохабарларын тарату органдарын дамытуға жәрдемдесетiн ұйымдық құрылымдар құруға құқылы;
отандық және шетелдiк мамандарды жұмысқа қабылдауға, олармен шартқа отыруға құқылы;
арнайы тапсырма бойынша әзiрленетiн телерадио хабарларының, сондай-ақ көрсетiлетiн қызмет түрiнiң бағасын өзiнiң қалауы бойынша соммен және шетелдiк валютамен белгiлеуге құқылы;
белгiленген тәртiп бойынша республикадағы және шетелдердегi фирмалар, ұйымдар, өкiлдiктер, бөлiмшелер, агенттiктер,тiлшiлер пункттерi мен бөлiмшелерiн құруға, қайта құруға және олардың қызметiн тоқтатуға құқылы;
теледидар мен радиохабары саласындағы проблемаларға талдау жасауға және олардың ұтымды шешiмдерiн iздестiруге жоғары бiлiктi мамандар мен сарапшыларды, соның iшiнде шетел өкiлдерiн қатыстыруға құқылы;
"Қазақстан" Мемлекеттiк телерадиокомпаниясының қызметiне байланысты конкурстар, фестивальдар және басқа да шаралар өткiзу үшiн қажеттi қаржы мөлшерiн айқындап бекiтуге құқылы;
Қазақстан Республикасының министрлiктерi мен мемлекеттiк басқарудың басқа да орталық органдары үшiн белгiленген тәртiп бойынша республика Министрлер Кабинетiнiң қаулылары мен өкiмдерiн алуға құқылы;
өзiне жүктелген мiндеттер мен қызметтердi орындау барысында "Қазақстан" Мемлекеттiк телерадиокомпаниясы Қазақстан Республикасының мемлекеттiк басқарудың орталық органдарына берiлетiн басқа да құқықтарды пайдалана алады;
36. "Қазақстан" Мемлекеттiк телерадиокомпаниясының құрамындағы немесе оның мүдделерiне қатысты мәселелердi заңда көзделген жағдайларда мемлекеттiк органдар және шаруашылық ұйымдары "Қазақстан" Мемлекеттiк телерадиокомпаниясымен келiсе отырып шешедi.
"Қазақстан" Мемлекеттiк телерадиокомпаниясын басқару
37. "Қазақстан" Мемлекеттiк телерадиокомпаниясын Қазақстан Республикасының заңына сәйкес тағайындалған Төраға басқарады.
"Қазақстан" Мемлекеттiк телерадиокомпаниясы Төрағасының заңда белгiленген тәртiп бойынша тағайындалған орынбасарлары болады. Орынбасарлар арасындағы мiндеттердi "Қазақстан" Мемлекеттiк телерадиокомпаниясы белгiлеп бередi.
38. "Қазақстан" Мемлекеттiк телерадиокомпаниясының Төрағасы компанияның қызметiне басшылық етедi, оған жүктелген мiндеттер мен қызметтердiң орындалуына тiкелей жауап бередi, Төраға орынбасарларының, құрылымдық бөлiмшелер мен құрылымдық бiрлiктердiң, сондай-ақ компания құрамындағы бiрлестiктер, кәсiпорындар, ұйымдар басшыларының жауапкершiлiгi деңгейiн белгiлейдi.
39. "Қазақстан" Мемлекеттiк телерадиокомпаниясында құрамында Төраға, оның орынбасарлары және компанияның басқа да жауапты қызметкерлерi бар коллегия құрылады.
Коллегияны "Қазақстан" Мемлекеттiк телерадиокомпаниясының Төрағасы басқарады. Коллегия мүшелерiн "Қазақстан" Мемлекеттiк телерадиокомпаниясы Төрағасының ұсынуы бойынша Қазақстан Республикасының Министрлер Кабинетi бекiтедi.
Коллегия өзiнiң тұрақты өткiзiлетiн мәжiлiстерiнде "Қазақстан" Мемлекеттiк телерадиокомпаниясының қызметiн жетiлдiру мен дамытудың перспективалы және өзектi мәселелерiн талқылайды, құрылымдық бөлiмшелердiң басшыларын қызметке бекiтедi және қызметтен босатады, сондай-ақ әкiмдермен келiсе отырып, облыстық және қалалық телерадиокомпаниялардың төрағаларын бекiтедi және қызметтен босатады. "Қазақстан" Мемлекеттiк телерадиокомпаниясының бөлiмшелерi туралы ереженi бекiтедi.
Коллегия шешiмдерi әдетте "Қазақстан" Мемлекеттiк телерадиокомпаниясы Төрағасының бұйрығы арқылы орындалады.
"Қазақстан" Мемлекеттiк телерадиокомпаниясының
мүлкi және қоры
40. "Қазақстан" Мемлекеттiк телерадиокомпаниясының мүлкiне негiзгi қорлар мен айналымдағы қаржы, әуе толқыны арқылы берiлетiн телерадио хабарлары, бағасы компанияның дербес балансында көрсетiлген басқа да құндылықтар,сондай-ақ авторлық құқық нормаларымен қорғалатын интеллектуалдық меншiк жатады.
41. "Қазақстан" Мемлекеттiк телерадиокомпаниясы Қазақстан Республикасының қазiргi заңына сәйкес негiзгi және айналымдағы қаржыларды, өз бөлiмшелерiнiң әуе толқыны арқылы хабар тарату уақытын, жер мен табиғи ресурстарды пайдалана алады.
"Қазақстан" Мемлекеттiк телерадиокомпаниясы республика Байланыс министрлiгiнiң хабарлар тарататын техникалық құралдарын жалға алады, ал жаңадан iске қосылатын техникалық құралдар оған бiрiншi кезекте жеңiлдiк жағдаймен берiледi.
42. "Қазақстан" Мемлекеттiк телерадиокомпаниясы өз қызметiн Қазақстан Республикасы Министрлер Кабинетi тағайындап беретiн бiр сағаттық телерадиохабарларының құнына және бiр жылдық хабар беру мөлшерiне орай республикалық бюджеттен бөлiнетiн қаржы, коммерциялық қызметтен түсетiн кiрiс, телерадио хабарларын басқа мекемелерге, соның iшiнде шетелдiк телерадио ұйымдарына сатудан, эфирлiк уақытты сырт ұйымдарға беруден, оларға көлiк, байланыс, телерадио техникасын, аудармашыларды жалға беру, сондай-ақ заңға қайшы келмейтiн басқа да қызмет түрлерiн коммерциялық негiзде жүзеге асыру есебiнен атқарады.
43. Бюджеттен мына мақсаттар үшiн:
республикалық, облыстық, қалалық бөлiмшелердiң хабарларын дайындауға қажеттi, "Қазақтелефильм" студиясының шығыны мен арнайы тапсырысты телерадио бағдарламаларын, телефильмдер мен музыкалық хабарлар дайындауға кететiн шығынды өтеуге қажеттi;
байланыс министрлiгiнен жалға алатын техникалық құралдар үшiн ақы төлеу, соның iшiнде республика аумағында, сондай-ақ одан тыс жерлерде мемлекеттiк және мемлекетаралық телерадио бағдарламаларын таратуға қажеттi;
Мемтелерадиокомпаниясы телерадиохабарларының сапасын арттыруды қамтамасыз ететiн материалдық-техникалық базаны нығайтуға /сом және шетелдiк валюта есебiнен/ қажеттi;
мемлекеттiк өкiмет пен басқарудың жоғарғы органдарының арнаулы тапсырыстарын орындауға жұмсалатын қаржы бөлiнедi.
44. "Қазақстан" Мемлекеттiк телерадиокомпаниясы қазiргi шаруашылық заңдарына сәйкес қор құрып, оны пайдаланудың мөлшерi мен тәртiбiн өз қалауы бойынша анықтайды.
45. "Қазақстан" Мемлекеттiк телерадиокомпаниясы дербес телерадио хабарларын алдын-ала жасалатын шарттың негiзiнде шығармашылық ынтымақтастық пен өзара тиiмдi мүдделердi сақтай отырып, телерадио хабарларын әзiрлеп тарататын кәсiпорындармен шығармашылық өндiрiстiк және коммерциялық қатынасты қалыптастырады.
"Қазақстан" Мемлекеттiк телерадиокомпаниясы және оның қарамағындағы ұйымдар мен кәсiпорындар өздерiнiң шақыруы бойынша Қазақстанға келген шетелдiк азаматтарға жұмсалатын қонақүйдегi жанбас ақы, басқа да шығындарды, соның iшiнде шетел азаматтарын Қазақстан Республикасының аумағында тасымалдауға байланысты авиация кәсiпорындарына кететiн шығындарды соммен төлей алады.
"Қазақстан" Мемлекеттiк телерадиокомпаниясындағы
есеп, есеп беру және бақылау
46. "Қазақстан" Мемлекеттiк телерадиокомпаниясы бухгалтерлiк, жедел және статистикалық есеп жүргiзедi, белгiленген тәртiп бойынша өндiрiстiк-шаруашылық қызметтiң барлық түрлерi бойынша есеп бередi, есеп пен баланстың нақтылығын қамтамасыз етедi.
47. "Қазақстан" Мемлекеттiк телерадиокомпаниясы заңға сәйкес өзiне бағынышты бiрлестiктердiң, кәсiпорындар мен ұйымдардың қаржы-шаруашылық қызметiне жан-жақты тексеру жүргiзудi қамтамасыз етедi.
"Қазақстан" Мемлекеттiк телерадиокомпаниясын
қайта құру және тарату
48. "Қазақстан" Мемлекеттiк телерадиокомпаниясы қолданылып жүрген заңдарға сәйкес қайта құрылады және таратылады.
