Офицер кадрларын Қазақстан Республикасының Қарулы Күштерiнде тұрақтандыру мақсатында Қазақстан Республикасының Үкiметi қаулы етедi:
1. Офицерлiк құрам лауазымдарында әскери қызмет өткеру мен осы әскери қызметшiлердi Қазақстан Республикасының қарулы Күштерiнен босату туралы контрактiлер жасасудың тәртiбi туралы қоса берiлiп отырған Уақытша ереже (бұдан әрi - Уақытша ереже) бекiтiлсiн.
2. Былай деп белгiленсiн:
осы қаулының күшi Қазақстан Республикасы Iшкi iстер министрлiгiнiң, Қазақстан Республикасының Мемлекеттiк шекара күзетi жөнiндегi мемлекеттiк комитетiнiң және Қазақстан Республикасының басқа әскери құрамаларының әскери қызметшiлерiне қолданылады;
осы Уақытша ережеде көзделген Қазақстан Республикасы Қорғаныс министрiнiң құқықтары Қазақстан Республикасының Iшкi iстер министрiне, Қазақстан Республикасының Мемлекеттiк шекара күзетi жөнiндегi мемлекеттiк комитетiнiң төрағасына берiледi;
Қазақстан Республикасының Iшкi iстер министрлiгiмен Қазақстан Республикасы Мемлекеттiк шекара күзетi жөнiндегi мемлекеттiк комитетiнiң лауазымды адамдарының құқығын осы Уақытша ережеде көзделген құқықтарға сәйкес олардың ұйымдық құрылымын ескере отырып, тиiстi министрлiктер мен мемлекеттiк комитеттердiң басшылары айқындайды;
контракт бойынша әскери қызметке қабылданған офицерлер Қазақстан Республикасы Қарулы Күштерiнiң офицерлiк құрамындағы адамдар үшiн қолданылып жүрген заңдарда және осы Уақытша ережеде көзделген нормалар мен тәртiп бойынша ақшалай үлеспен қамтамасыз етiледi.
3. Қазақстан Республикасының Қорғаныс министрлiгi:
1996 жылдың 1 сәуiрiнен бастап Қазақстан Республикасы Қарулы Күштерiнде әскери қызмет өткеру туралы контракт жасасуды ұйымдастырсын;
осы қаулыда көзделген шараларды "Республикалық бюджет туралы" Қазақстан Республикасының Заңында тиiстi жылға бекiтiлген қаражат шегiнде қаржыландыратын болсын;
ведомстволық нормативтiк актiлердi осы қаулыға сәйкестендiрсiн.
4. "Офицерлер құрамы лауазымдарында әскери қызмет атқару мен осы әскери қызметшiлердi Қазақстан Республикасының Қарулы Күштерiнен босату туралы контрактiлер жасасудың тәртiбi туралы Уақытша ереженi бекiту туралы" Қазақстан Республикасы Министрлер Кабинетiнiң 1993 жылғы 5 қарашадағы N 1100 қаулысының күшi жойылған деп танылсын.
Қазақстан Республикасының
Премьер-Министрi
Қазақстан Республикасы
Үкiметiнiң
1996 жылғы 12 мамырдағы
N 580 қаулысымен
Бекiтiлген
Офицерлiк құрам лауазымдарында әскери қызмет өткеру
мен осы әскери қызметшiлердi Қазақстан Республикасының
Қарулы Күштерiнен босату туралы контрактiлер жасасу
тәртiбi туралы
Уақытша ереже
1. Жалпы ережелер
Офицерлiк құрам лауазымдарында қызмет өткеру мен осы әскери қызметшiлердi Қазақстан Республикасының Қарулы Күштерiнен босату туралы контрактiлер жасасу тәртiбi туралы Уақытша ереже (бұдан әрi - Уақытша ереже) Қазақстан Республикасы Қарулы Күштерiне офицерлер ретiнде әскери қызметке ерiктi түрде алынатын Қазақстан Республикасы Қарулы Күштерiнiң әскери қызметшiлерiмен, әскери мiндеттемелерiмен, Қазақстан Республикасы аумағында тұратын басқа мемлекеттердiң азаматтарымен және азаматтығы жоқ адамдармен контрактiлер жасаудың мерзiмдерi мен тәртiбiн белгiлейдi және жасалған контрактi шарттарын орындау үшiн тараптардың өзара мiндеттемелерi мен жауапкершiлiгiн реттейдi.
2. Әскери қызметтi өткеру туралы контракт
жасаудың тәртiбi
1. Офицерлiк құрамдағы лауазымдарда әскери қызмет өткеру туралы контракт:
Қазақстан Республикасының Қарулы Күштерiнде әскери қызметтегi офицерлермен;
"Жалпыға бiрдей әскери мiндеттiлiк және әскери қызмет туралы" Қазақстан Республикасы Заңының 20-бабының ережелерiн ескере отырып, запастағы офицерлермен, оның iшiнде әскери қызметте болудың шектi жасынан асқан офицерлермен;
кiшi офицерлер даярлау жөнiндегi курстарға жiберiлетiн 34 жасқа дейiнгi әскери қызметшiлермен;
әскери оқу орындарының (әскери факультеттердiң) тыңдаушыларымен (курсанттарымен) жасалады.
Бұл ретте контрактiлер жасасу бiрiншi кезекте мынадай санаттағы әскери қызметшiлермен:
өз лауазымдарына әскери қызмет өткерiп жүрген және шетел азаматтығы бар немесе азаматтығы жоқ адамдар болып табылатын офицерлермен;
басқа мемлекеттердiң әскери-оқу орындарына оқуға жiберiлетiн әскери қызметшiлермен;
Қазақстан Республикасы әскери оқу орындарының (әскери факультеттерiнiң) курсанттарымен (тыңдаушыларымен);
әскери қызметке алынатын запастағы офицерлермен;
запастан 2-3 жылға шақырылған және Қазақстан Республикасы Қарулы Күштерiнiң кадрлары қатарында қызмет өткеру туралы контракт жасасуға тiлек бiлдiрген офицерлермен;
басқа мемлекеттердiң Қарулы Күштерiнен, сондай-ақ Қазақстан Республикасы министрлiктерiнен, ведомстволарынан, басқа әскерлерi мен әскери құрамаларынан ауысуына байланысты Қазақстан Республикасы Қорғаныс министрлiгiнiң қарамағындағы офицерлермен;
офицерлiк атақ берiлгеннен кейiн әскери-оқу орындарын экстернмен бiтiрген әскери қызметшiлермен, сондай-ақ кiшi офицерлер даярлау жөнiндегi курстарға жiберiлетiн әскери қызметшiлермен жүзеге асырылады.
Қалған санаттағы офицерлермен контрактiлер жасасу жөнiндегi жұмыс 1999 жылдың 31 желтоқсанына дейiн ұйымдастырылады.
2. Контракт бойынша офицерлер құрамындағы лауазымдарда әскери қызмет атқаруға тiлек бiлдiрген әскери қызметшiлер команда бойынша рапорт бередi.
3. Запаста тұрған адамдар қатарынан контракт бойынша әскери қызметке алу үшiн кандидаттарды iрiктеудi Қазақстан Республикасы Қорғаныс министрлiгiнiң кадр басқармасының өтiнiмдерi бойынша әскери комиссариаттар жүргiзедi.
4. Офицер ретiнде әскери қызметке кiргiсi келетiн Қазақстан Республикасының Қарулы Күштерiнде запаста тұрған адамдар, сондай-ақ әйелдер әскери есепте тұратын жерiндегi әскери комиссариатқа мынадай құжаттарды ұсынады:
контракт бойынша әскери қызметке кiргiсi келетiнi туралы өз өтiнiшi;
өз қолымен жазылған өмiрбаяны;
бiлiмi жайлы құжаттың көшiрмесi;
соңғы жұмыс (оқу) орнынан мiнездемесi;
отбасы құрамы мен тұрғылықты жерi туралы анықтама.
Iшкi iстер органдары аудандық (қалалық) әскери комиссариаттардың ресми сұрау салуы бойынша осы адамдарға қатысты өз қолындағы ақпаратты бередi.
Аса маңызды және өте құпия құжаттармен (бұйымдармен) жұмыс iстеуге тағайындалған адамдарға тиiстi орындар арқылы алдын ала рұқсат қағазы рәсiмделедi.
5. Облыстық және әскери комиссариатқа офицерлiк құрам лауазымдарындағы әскери қызметке алу үшiн кандидаттың осы Уақытша ереженiң талаптарына сәйкестiгiн алдын ала бағалайды.
Әскери қызметке офицер етiп алу үшiн iрiктелген кандидаттардың құжаттары түскен өтiнiштерге сәйкес контрактiлерге қол қою құқығы берiлген (бұдан былай әскери бөлiмдер деп аталатын) Қазақстан Республикасы Қорғаныс министрлiгi әскери бөлiмдерiнiң, басқармаларының (бөлiмдерiнiң) мекемелерiнiң, әскери оқу орындарының, кәсiпорындары мен ұйымдарының командирлерiне (бастықтарына), ал өтiнiмдерден тыс құжаттар Қазақстан Республикасы Қорғаныс министрлiгiнiң кадр басқармасына жiберiледi. Әскери қызметке алынғандығы жөнiнде шешiмдер шығарылған адамдарға қатысты әскери комиссариаттарға оларды ақырғы iрiктеу жүргiзу үшiн әскери бөлiмдерге жөнелту туралы шақырту қағаздары жiберiледi. Қалған адамдарға қабылданбау себептерi хабарланып, құжаттары қайтарылады.
6. Қарулы Күштердiң запасында тұрған адамдарды, сондай-ақ әйелдердi әскери бөлiмге жiберудi оларды әскери қызметке ресiмдеу орны бойынша әскери комиссариаттар жүргiзедi.
Әскери бөлiмнiң командирi келгендермен және ақырғы iрiктеуден өткендер мен әскери қызмет өткеру арқылы контракт жасайды, ал әскери қызмет өткеру туралы контракт жасамағандарды тиiстi аудандық (қалалық) әскери комиссариаттарға iссапармен жөнелтедi және олардың жеке iс-қағаздарын қабылданбау себептерiн көрсетiп қайтарады.
7. Контрактiге қол қойған адамдар әскери қызмет орнына Қазақстан Республикасы Қорғаныс министрлiгiнiң қаражаты есебiнен жүргiзiледi.
8. Офицерлер құрамы лауазымдарына әскер қызмет өткеру туралы контракт әскери қызметшiмен немесе әскери қызметке алынатын адаммен Қазақстан Республикасының Қорғаныс министрлiгi арасында жазбаша түрде жасалады.
Контрактiнiң нысаны мен шарттарын қолданылып жүрген заңдарға сәйкес Қазақстан Республикасының Қорғаныс министрi белгiлейдi.
9. Контракт шарттарының орындалуына кепiлдiк беретiн Қазақстан Республикасының қорғаныс министрлiгi атынан запаста тұрған адамдармен, сондай-ақ Қазақстан Республикасы Қорғаныс министрiнiң қарамағындағы офицерлермен контрактiлерге қол қою құқығы офицерлiк құрамының адамдарын тағайындауға арналған лауазымдар номенклатурасына сәйкес жеке құрам бойынша шығарылатын бұйрықтармен жинақталып отырған лауазымдарға офицерлер тағайындауға құқығы бар командирлерге (бастықтарға) берiледi.
Осындай құқық өздерiне бағынатын әскери бөлiмдер және тиiстi әскери-есеп мамандықтары бойынша штатта полковникке дейiнгi әскери атақтар көзделген лауазымдарды жинақтау кезiнде Қазақстан Республикасы Қорғаныс министрiнiң орынбасарларына, Қазақстан Республикасы Қорғаныс министрлiгi басқармаларының (бөлiмдерiнiң), әскер түрлерi мен қызметтерiнiң бастықтарына берiледi.
Контракт жеке құрам бойынша шығарылатын Қазақстан Республикасы Қорғаныс министрiнiң бұйрығымен расталады.
10. Өз лауазымдарында әскери қызмет атқарып жүрген офицерлермен контракт жасаған кезде олардың белгiленген талаптарға сәйкестiгiн анықтап, офицер контрактiге қол қойған соң офицер қызмет атқарып жүрген әскери бөлiмнiң командирi (бастығы) оған тең жеке батальон командирiнен бастап және одан жоғары) контрактiнi және оның жасалуы туралы өтiніштi қызмет сатысы бойынша жiбередi. Қазақстан Республикасының Қорғаныс министрлiгi атынан контрактiге қол қою құқығы осы Уақытша ереженiң 9-тармағында көрсетiлген командирлерге (бастықтарға) берiледi.
Контракт тағайындау номенклатурасына жинақталатын лауазым жататын командирдiң (бастықтың) жеке құрам бойынша шығарылатын бұйрығымен расталады.
11. Контракт бойынша әскери қызметтiң басталуы болып:
құқығы әскери қызметтегi офицерлер құрамындағы адамдар үшiн - контракт жасау құқығы берiлген әскер бөлiм командирiнiң (бастығының) жеке құрам бойынша шығарылған бұйрығымен расталған контракт жасалған күн;
запастан әскери қызметке алынатын офицерлер үшiн - Қазақстан Республикасы Қорғаныс министрiнiң жеке құрам бойынша шығарылатын бұйрығымен расталған, өзi жасаған контракт негiзiнде офицердi әскери бөлiмге жөнелту үшiн аудандық (қалалық) әскери комиссариаттың ұйғарым берген күнi саналады.
12. Контракт бойынша әскери қызмет өткерiп жүрген офицерлерге әскери атақтар беру, әскери атағын төмендету, қызметке тағайындау, қызметi бойынша орын ауыстыру мен жоғарылату Қазақстан Республикасы Қорғаныс министрiнiң 1985 жылғы 6 сәуiрдегi N 100 бұйрығымен күшiне енгiзiлген Қазақстан Республикасы Қарулы Күштерi офицерлiк құрамының әскери қызметтi өткеруi туралы Ережеде белгiленген тәртiпке сәйкес жүргiзiледi.
3. Әскери-оқу орындарында (әскери факультеттерде)
және кiшi офицерлердi даярлау жөнiндегi курстарда
оқып жүрген адамдармен әскери қызмет атқару туралы
контрактiлер жасау
13. Әскери оқу орындарына түскен немесе кiшi офицерлердi даярлау жөнiндегi курстарға жiберiлген адамдар Қазақстан Республикасының Қарулы Күштерi кадрларындағы офицерлер құрамы лауазымдарына оқу және әскери қызмет атқару туралы контракт жасайды. Контракт оқу орнына (курсқа) қабылдау туралы қабылдау комиссиясы шешiм шығарған соң және контрактiнi растау мен оқу орнына қабылдау туралы бұйрық шыққанға дейiн жасалады.
14. Офицерлер атағы жоқ, контракт бойынша әскер қызмет атқарып жүрген және әскери-оқу орнына түскен немесе кiшi офицерлердi даярлау жөнiндегi курстарға қабылданған әскери қызметшiлер оқу орнына (курсқа) қабылданған соң бiрден әскери-оқу орындарының (курстардың) курсанттары үшiн көзделген жаңа контракт жасайды.
15. Қазақстан Республикасы Қорғаныс министрлiгiнiң әскери-оқу орындарында оқып жүрген курсанттармен (тыңдаушылармен) контрактiге Қазақстан Республикасы Қорғаныс министрлiгi атынан әскери-оқу орнының бастығы қол қояды.
Басқа мемлекеттердiң әскери-оқу орындарында, сондай-ақ кiшi офицерлердi даярлау жөнiндегi курстарда оқып жүрген әскери қызметшiлермен контрактiге Қазақстан Республикасының Қорғаныс министрлiгi атынан оның өкiлi қол қояды.
16. Әскери-оқу орындарында және кiшi офицерлердi даярлау жөнiндегi курстарда оқитын әскери қызметшiлердiң контракт бойынша әскери қызметiнiң басталуы болып әскери-оқу орны бастығының бұйрығымен, ал басқа елдерде оқитындар үшiн - Қазақстан Республикасы Қорғаныс министрiнiң бұйрығымен расталған контракт жасалған күн саналады.
17. Әскери шақыру жасына жеткен, контрактiнi бұзған, әскери қызметке жарамды, әскери-оқу орнынан денсаулығына байланысты, үлгермегендiгi немесе тәртiп бұзушылығына байланысты шығарылған курсанттар (тыңдаушылар) Қазақстан Республикасы Қарулы Күштерiнiң Бас штабы бастығының өкiмi бойынша мерзiмдi әскери қызмет өткеруi үшiн әскери бөлiмдерге жөнелтiледi. Әскери оқу орнына түскенге дейiн белгiленген мерзiмдi әскери қызмет мерзiмiн атқарған адамдар запасқа шығарылады.
4. Офицерлiк құрам лауазымдарындағы әскери қызметке
контракт бойынша орналасқан адамдарға қойылатын
талаптар
18. Офицерлiк құрам лауазымдарындағы әскери қызметке контракт бойынша орналасатын адамдар Қазақстан Республикасы Қарулы Күштерiнде медициналық куәландыру туралы Ережеге (бейбiт және соғыс уақытында) сәйкес медициналық куәландырудан өтедi. Медициналық куәландыру нәтижелерi бойынша олардың әскери қызметке жарамдылығы туралы шешiм қабылданады.
19. Контракт бойынша әскери қызметке орналасатын адамдар:
жалпы бiлiм цензi бойынша;
кәсiби даярлық дәрежесi бойынша;
моральдық-психологиялық қасиеттерi бойынша;
дене даярлығы бойынша белгiленген талаптарға сай болуы керек.
Аталған талаптарды Қазақстан Республикасының Қорғаныс министрлiгi белгiлейдi.
20. Контракт бойынша қызмет өткеру үшiн адамдардың белгiленген талаптарға сәйкестiгiн айқындау әскери бөлiмдердiң, сондай-ақ Қазақстан Республикасы Қорғаныс министрлiгiнiң тұрақты жұмыс iстейтiн аттестациялық комиссияларына жүктеледi және оның шешiмдерiн контрактiге қол қою құқығы берiлген командирлер (бастықтар) бекiтедi.
5. Контракт бойынша әскери қызметтiң мерзiмдерi
21. Офицерлер құрамы лауазымдарындағы әскери қызметке орналасу кезiнде Қазақстан Республикасы қарулы Күштерiнiң кадрлары қатарында әскери қызмет өткеру туралы 3 және 5 жылдық мерзiмге контракт жасалады. Контракт мерзiмi аяқталған соң ол белгiленген мерзiмдердiң бiрiне қайта ұзартылуы мүмкiн.
Контракт, сонымен қатар офицер әскери қызметте болудың шектi жасына жеткенге дейiнгi мерзiмде жасалуы немесе ұзартылуы мүмкiн.
22. Әскери-оқу орындарының курсанттарымен (тыңдаушыларымен) оқу орындарында оқу кезеңiне және офицерлер құрамындағы адамдар орын ауыстыруға жататын лауазымдарда 10 жыл (күнтiзбелiк есеппен) қызмет өткеру жөнiнде контракт жасалады. Кейiн контракт осы Уақытша ереженiң 21-тармағында белгiленген мерзiмдерге ұзартылуы мүмкiн.
23. Кiшi офицерлер даярлау жөнiндегi курстарға жiберiлетiн әскери қызметшiлермен контракт курстарда оқу кезеңiнде және осы Уақытша ереженiң 21-тармағында белгiленген мерзiмдерге жасалады.
24. Әскери академияға, адъюнктураға немесе әскери докторантураға түскен офицерлермен, бұрын жасалған контрактiге қарамастан, Қазақстан Республикасы Қорғаныс министрлiгiнiң өкiлi оқу кезеңiне және оқу орнын бiтiргеннен кейiн 5 жылдық әскери қызметке жаңадан контракт жасайды.
25. Контрактiге қол қою құқығы берiлген командир (бастық) контрактiнiң жасалғаны немесе онымен контракт жасаудан бас тартылғаны туралы шешiм қабылдайды және қолданылып жүрген контрактiнiң мерзiмi бiткенге дейiн үш айдан кешiктiрмей бұл жайлы әскери қызметшiге хабарлайды.
6. Қазақстан Республикасы Қарулы Күштерiнде контракт
бойынша әскери қызмет өткерiп жүрген офицерлерге
ақшалай үлес төлеу ерекшелiктерi
26. <*>
27. <*>
28. <*>
ЕСКЕРТУ. 26, 27, 28-тармақтар алып тасталды - ҚР Үкіметінің
2002.07.16. N 789 қаулысымен.
7. Қазақстан Республикасы Қарулы Күштерiнде контракт
бойынша әскери қызмет өткерiп жүрген әскери-оқу
орындарының (әскери факультеттердiң) курсанттарына
(тыңдаушыларына) ақшалай үлес төлеу ерекшелiктерi
29. Қазақстан Республикасының Қарулы Күштерiнде контракт бойынша әскери қызмет өткерiп жүрген әскери-оқу орындарының (әскери факультеттердiң) курсанттары (тыңдаушылары) Қазақстан Республикасы Қарулы Күштерiнiң осы санаттағы әскери қызметшiлерi үшiн заңдарда көзделген нормалар мен тәртiп бойынша ақшалай үлеспен қамтамасыз етiледi.
30. <*>
ЕСКЕРТУ. 30-тармақ алып тасталды - ҚР Үкіметінің 2002.07.16. N 789 қаулысымен .
31. Әскери-оқу орнында (әскери факультетте) оқу және оны бiтiрген соң офицерлер құрамындағы лауазымдарда әскери-қызмет өткеру туралы контракт жасаған әскери-оқу орындарының (әскери факультеттердiң) курсанттарына мынадай ақшалай үлес түрлерi:
а) <*>
б) Қазақстан Респубикасы әскери қызметшiлерiнiң тиiстi санаттары үшiн қолданылып жүрген заңдарға сәйкес қосымша ақы, үстеме ақы, парашютпен секiргенi үшiн сыйақы, теңiз ақша үлесi және басқа да қосымша ақшалай табыс түрлерi төленедi.
Прапорщиктер, мичмандар, мерзiмiнен тыс қызметтегi сержанттар мен старшиналар, сондай-ақ солдаттар, матростар, сержанттар мен старшиналар лауазымдарына контракт бойынша әскери қызмет атқарып жүрген әскери қызметшiлер әскери-оқу орындарына (әскери факультеттерге) түскен кезде Қазақстан Республикасы әскери қызметшiлерiнiң тиiстi санаттары үшiн қолданылып жүрген заңдарда көзделген нормалар мен тәртiп бойынша әскери-оқу орнына түсер алдындағы соңғы атқарған лауазымына қарай ақшалай үлеспен қамтамасыз етiледi.
Басқа мемлекеттердiң әскери-оқу орындарында оқып жүрген және Қазақстан Республикасының Қорғаныс министрлiгiмен контракт жасаған курсанттарға (тыңдаушыларға) ақшалай үлес Қазақстан Республикасының Қорғаныс министрi белгiлеген нормалар мен тәртiпке сәйкес оқу орны бойынша төленедi.
ЕСКЕРТУ. 31-тармақтың а) тармақшасы алып тасталды - ҚР Үкіметінің 2002.07.16. N 789 қаулысымен.
8. Әскери қызметтен босату
32. Контракт бойынша әскери қызмет өткерiп жүрген офицерлiк құрамдағы адамдарды босату "Жалпыға бiрдей әскери мiндеттiлiк және әскери қызмет туралы" Қазақстан Республикасының Заңына сәйкес жүзеге асырылады.
Әскери қызметтен:
а) егер босатылатын адамдар запаста болудың шектi жасына жетпесе және денсаулығына қарай бейбiт немесе соғыс уақытында әскери қызметке жарамды болса - запасқа;
б) егер босатылатын адамдар запаста болудың шектi жасына жеткен болса немесе әскери-дәрiгерлiк комиссия денсаулығы бойынша әскери қызметке жарамсыз деп таныса, әскери есептен шығарыла отырып - отставкаға шығарылуы мүмкiн.
Офицерлiк құрамдағы адамдарды әскери қызметтен босату әдетте, тиiстi командирлердiң (бастықтардың) қарамағында енгiзiлмей өздерi атқарып отырған лауазымдарынан осы Уақытша ереженiң 34-36-тармақтарында көзделген негiздердiң бiрi бойынша жүзеге асырылады.
33. Офицерлiк құрамдағы адамдар әскери қызметтен Қазақстан Республикасы Қарулы Күштерiнiң запасына:
а) қызмет мерзiмiн өткеруi бойынша - контрактiде көрсетiлген қызмет мерзiмiнiң аяқталуына қарай;
б) жасы бойынша - қолданылып жүрген заңдарда белгiленген әскери қызметте болудың шектi жасына жеткен жағдайда босатылсын.
34. Офицерлiк құрамдағы адамдар әскери қызметтен Қазақстан Республикасы Қарулы Күштерiнiң запаста мерзiмiнен бұрын мына негiздер бойынша:
а) науқастануына байланысты - әскери-дәрiгерлiк комиссия бейбiт уақытта әскери қызметке жарамсыз (соғыс уақытында 2-дәрежеде шектеулi жарамды) деп танығанда;
б) денсаулығының шектеулi жарамдылығына байланысты - әскери-дәрiгерлiк комиссияның әскери қызметке шектеулi жарамдылығы туралы қаулысы негiзiнде, денсаулығына қарай өзi атқарып отырған лауазымдағы мiндеттердi орындай алмауына және денсаулық жағдайын ескере отырып, мiндеттерiн өзi орындай алатын лауазымға қызмет бабы бойынша ауыстыру мүмкiндiгi болмағанда;
в) штаттардың қысқартылуына байланысты - штаттарды қысқартуға немесе ұйымдық шараларға (запасқа шығу үшiн басқа негiздер болмағанда) байланысты қызметке пайдалану мүмкiн болмаған жағдайда;
г) отбасы жағдайына байланысты немесе басқа да орынды себептер бойынша:
әскери қызметтi орындауға кедергi келтiретiн отбасы жағдайлары пайда болғанда. Бұл ретте отбасы жағдайлары деп әйелiмен (күйеуiмен) болған қайғылы оқиғалар және осы себептi балаларына күтiм қажет болған (офицер рапорты негiзiнде) немесе офицер-әйелдер үшiн бала тууына байланысты өздерi атқарып отырған әскери қызмет мiндеттерiн олардың орындай алмаған жағдайлары ұғынылады - офицердiң рапорты немесе әскери бөлiм командирiнiң шешiмi негiзiнде (бұл ретте оларды босату жүктi болуына және босануына байланысты демалыстары бiткеннен кейiн жүргiзiлуi мүмкiн);
мемлекеттiк өкiмет органдарына сайланбалы лауазымдарға сайланған кезде;
д) контрактiнiң бұзылуына байланысты - әскери қызметтен мерзiмiнен бұрын босату туралы рапорт берген жағдайда;
е) қызметке сай келмеуiне байланысты - офицер контракт шарттарын орындамаған жағдайда немесе егер ол осы Уақытша ережеде белгiленген талаптарға сай келмеген жағдайда (аттестациялық комиссияның қорытындысы бойынша);
ж) әскери қызметшiнiң ар-намысына кiр келтiретiн iс-әрекеттер жасағаны үшiн - әскери қызметшi арына кiр келтiретiн iс-әрекеттер жасаған жағдайларда - ар сотының шешiмi мен аттестациялық комиссия қорытындысы негiзiнде, оны әскери бөлiм командирi бекiткен соң босатылады.
35. Қылмыс жасағаны үшiн сотталған (әскери атағынан айырмай) офицерлiк құрамдағы адамдар:
а) жасаған қылмысы үшiн бас бостандығынан айырылып сотталуына байланысты әскер қызметтен;
б) жасаған қылмысы үшiн бас бостандығынан айырмай сотталуына байланысты, оның iшiнде үкiмнiң орындалуы кейiнге қалдырылған, сондай-ақ бас бостандығынан айырылып сотталған, бiрақ жазаны өтеуден амнистия бойынша босатылған жағдайда әскери қызметтен запасқа немесе отставкаға мерзiмiнен бұрын босатылады.
36. Офицерлiк құрамдағы адамдар әскери қызметтен:
а) жасына байланысты - запаста болудың шектi жасына жеткенде;
б) науқасына байланысты - әскери-дәрiгерлiк комиссиялар әскери қызметке жарамсыз деп танығанда, әскери есептен шығарыла отырып отставкаға жiберiледi.
37. Белгiленген тәртiп бойынша әскери атағынан айырылған офицерлiк құрамдағы адамдармен контракт мерзiмiнен бұрын бұзылады және олар Қазақстан Республикасы Қарулы Күштерiнiң офицерлiк құрамының тiзiмiнен шығарылады.
38. Осы Уақытша ереженiң 34-тармағының "д", "ж" тармақшаларында, 25-тармақтың "а" және "б" тармақшаларында көзделген негiздер бойынша, сондай-ақ 37-тармақта көрсетiлген жағдай бойынша контрактiнi бұзған кезде контракт бойынша әскери қызмет өткерiп жүрген офицерлердi мерзiмiнен бұрын босату кезiнде олардан контракт жасалған кезде төленген бiржолғы ақшалай жәрдемақы контрактiнiң аяқталуына дейiн қалған уақытты теңестiрiп есептегендегi сомада (әскери қызметтiң толық күнтiзбелiк айлары есебiмен) және алған заттай мүлкiнiң құны қию мерзiмiнiң аяқталуына дейiн қалған уақытты теңестiрiп есептегендегi сомада төлеттiрiп алынады. Бұған қоса, жоғарыда аталған жағдайлар бойынша офицердi әскери қызметтен босатқан кезде одан контрактiнi мерзiмiнен бұрын бұзғаны үшiн контрактi шарты бойынша әрбiр атқарылмаған күнтiзбелiк жылы үшiн ақшалай қаражатының үш жалақысы төлеттiрiп алынады. Бұл ретте ақшалай табысының жалақы мөлшерi офицердiң әскери қызметтен босатылған күнiндегi жағдай бойынша есептеледi.
Басқа мемлекеттiң әскери-оқу орындарында оқыған және олардан оқығысы келмегендiктен, сондай-ақ үлгермеуi немесе тәртiп бұзушылығына орай контрактiнi бұзуына байланысты шығарылған курсанттар (тыңдаушылар) Қазақстан Республикасының Қорғаныс министрлiгiне оларды оқытуға және ұстауға жұмсалған нақты шығынының орнын Қазақстан Республикасының қолданылып жүрген заңдарына белгiленген тәртiп бойынша толтырады. Әскери-оқу орнынан денсаулығына немесе отбасы жағдайына байланысты шығарылған кезде курсанттар (тыңдаушылар) Қазақстан Республикасы Қорғаныс министрлiгiне оларды оқытуға және ұстауға жұмсалған шығындарды қайтармайды.
39. Офицерлiк құрамдағы адамдарды әскер қызметтен босату, оның iшiнде контрактiнi мерзiмiнен бұрын бұзған кезде босату Қазақстан Республикасы Қорғаныс министрiнiң бұйрықтарымен жүзеге асырылады.
Офицерлiк құрамдағы адамдарды босату күнi болып, олар әскер бөлiм бойынша шығарылатын бұйрықпен әскер бөлiм тiзiмiнен шығарылған күн есептеледi.
