1. Қазақстан Республикасының Президентi мен Үкiметiнiң Шаруашылық басқармасының Бурабай орман шаруашылығы қазiргi шекарасының шегiнде Қазақстан Республикасының Президентi мен Үкiметiнiң Шаруашылық басқармасының "Бурабай" табиғи-сауықтыру орман кешенi" мемлекеттiк мекемесi болып қайта құрылсын.
Аталған орман кешенiнiң қызметiн орман және жануарлар дүниесiн күзету, қорғау мен ұдайы өсiру саласында қаржыландыру республикалық бюджетте Қазақстан Республикасы Президентi мен Үкiметiнiң Шаруашылық басқармасына көзделетiн сомалардың есебiнен және олардың шегiнде жүзеге асырылады деп белгiленсiн.
2. Қазақстан Республикасы Президентi мен Үкiметiнiң Шаруашылық басқармасы Қазақстан Республикасы Президентiнiң Iс Басқармасымен келiсе отырып екi ай мерзiм iшiнде аталған орман кешенi Жарғысының жобасын, сондай-ақ Қазақстан Республикасы Президентiнiң 1997 жылғы 27 ақпандағы N 3369 N973369_ өкiмiнiң және осы қаулының қабылдануына байланысты Президент пен Үкiметтiң кейбiр актiлерiне өзгерiстер енгiзу және олардың күшi жойылған деп тану туралы ұсыныстарды әзiрлеп, белгiленген тәртiппен Қазақстан Республикасы Үкiметiнiң бекiтуiне енгiзетiн болсын.
3. Қазақстан Республикасы Ауыл шаруашылығы министрлiгiнiң Орман және аң шаруашылығы комитетi "Бурабай" табиғи-сауықтыру орман кешенiнiң аумағында: 1997 жылы - орман салу даярлық жұмыстарын және осы кешеннiң ормандарын қорғау санаттары бойынша бөлу туралы ұсыныстарды белгiленген тәртiппен бекiтуге енгiзудi; 1998-1999 жылдары - егiс жұмыстары мен орман шаруашылығын ұйымдастыру мен дамыту жоспарын жобалауды жүргiзсiн.
Қазақстан Республикасы Президентi мен Үкiметiнiң Шаруашылық басқармасы аталған жұмыстарды қаржыландыруды қамтамасыз етсiн.
4. Қазақстан Республикасының Ауыл шаруашылығы министрлiгiнiң Орман және аң шаруашылығы комитетi Қазақстан Республикасының ғылым министрлiгi - Ғылым академиясымен бiрлесiп "Бурабай" табиғи-сауықтыру орман кешенiне орман шаруашылығы және биотехникалық шараларды ұйымдастыру мен жүргiзуде қажеттi консультативтiк және ғылыми-әдiстемелiк көмек көрсететiн болсын, сондай-ақ осы кешен ормандарының жай-күйiне мемлекеттiк бақылауды қамтамасыз етсiн.
Қазақстан Республикасының
Премьер-Министрi
