Жазғы каникул кезiнде балалар мен жасөспiрiмдердiң демалысын, сауықтырылуын және жұмыспен қамтылуын ұйымдастыру, олардың шығармашылық дамуы үшiн қажеттi жағдай жасау, сондай-ақ кәмелетке толмағандардың құқық бұзушылығының, қылмыс жасауының, қараусыз және қадағалаусыз қалуының алдын алу мақсатында:
1. Облыстардың, Астана және Алматы қалаларының әкiмдерi, Қазақстан Республикасы Бiлiм және ғылым министрлiгi:
1) жергiлiктi деңгейде мектептен тыс ұйымдарда қосымша бiлiм беру бағдарламаларын iске асыруға көзделген қаражат, сондай-ақ демеушiлiк және қайырымдылық көмектер тарту есебiнен жазғы каникул кезiнде балалар мен жасөспiрiмдердiң демалысын, сауықтырылуын және жұмыспен қамтылуын ұйымдастыруды және өткiзудi қамтамасыз етсiн;
2) жазғы кезеңде балалар мен жасөспiрiмдердiң демалысын, сауықтырылуын және жұмыспен қамтылуын ұйымдастыру жөнiндегi, сондай-ақ балалар лагерьлерiнiң пайдалануға дайындығын қабылдау жөнiндегi облыстық, қалалық және аудандық комиссияларды қалыптастырсын;
3) ата-аналар мен балалардың қажеттiлiктерiн, облыстардың, қалалардың және аудандардың экономикалық жағдайларын және ерекшелiктерiн ескере отырып, балалар мен жасөспiрiмдердiң 2006-2010 жылдарға арналған демалыс, сауықтырылу және жұмыспен қамтылу бағдарламаларын әзiрлесiн және бекiтсiн;
4) қаланың шетiндегi барлық лагерьлер мен демалыс аймақтарын есепке алуды жүргiзсiн, оларды Қазақстан Республикасының заңнамасына сәйкес лицензиялауды қамтамасыз етсiн;
5) жалпы бiлiм беретiн мектептердiң, мектептен тыс ұйымдардың жанынан тамақтандыратын және тамақтандырмайтын күндiзгi уақыттағы лагерьлердi, еңбек және демалыс лагерьлерiн, мектеп орманшылығын, көркейту және көгалдандыру жөнiндегi жасақтарды ұйымдастырсын;
6) барлық үлгiдегi лагерьлер желiсiн көбейту және олардың қызметiн жақсарту, оларда балалардың болуы үшiн қажеттi материалдық-техникалық, тұрмыстық жағдай жасау, педагог және басқа да кадрлармен қамтамасыз ету жөнiндегi шараларды қабылдасын;
7) бiрiншi кезектегi тәртiппен жетiм балалардың, ата-анасының қамқорлығынсыз қалған балалардың, мемлекеттiк қолдауға мұқтаж отбасыларынан шыққан, көп балалы, толық емес, аз қамтылған отбасылар балаларының, экологиялық қолайсыз аудандарда тұратын балалардың, мүгедек балалардың және даму мүмкiндiктерi шектеулi балалардың демалысын және сауықтырылуын тегiн ұйымдастыруды қамтамасыз етсiн;
8) еңбек заңнамасына сәйкес каникул кезеңiнде жасөспiрiмдердi жұмыспен қамтуды, олар үшiн жеңiл жұмыс бойынша уақытша жұмыс орындарын ұйымдастыруды қамтамасыз етсiн;
9) балалардың өмiрi мен денсаулығын, олардың судағы қауiпсiздiгiн, сондай-ақ балаларды сауықтыру ұйымдарында өртке қарсы қауiпсiздiктi сақтауды қамтамасыз етсiн.
2. Қазақстан Республикасы Мәдениет және ақпарат министрлiгi:
1) жазғы кезеңде балалармен және жасөспiрiмдермен жүргiзiлетiн жұмысқа мәдениет ұйымдарының қатысуына жәрдем көрсетсiн;
2) балалар мен жасөспiрiмдердiң жазғы демалысын, сауықтырылуын және жұмыспен қамтылуын дайындау және оларды өткiзу барысын бұқаралық ақпарат құралдарында жария етудi қамтамасыз етсiн.
3. Қазақстан Республикасы Туризм және спорт министрлiгi:
1) жазғы кезеңде балалармен және жасөспiрiмдермен жүргiзiлетiн жұмысқа спорт ұйымдарының қатысуына жәрдем көрсетсiн;
2) балалар мен жасөспiрiмдер үшiн спорттық-бұқаралық, сауықтыру iс-шараларын өткiзудi ұйымдастырсын.
4. Қазақстан Республикасы Iшкi iстер министрлiгi:
1) балаларды тасымалдау қауiпсiздiгiн және қаланың шетiндегi балалар лагерьлерi мен демалыс аймақтарында қоғамдық тәртiптiң сақталуын қамтамасыз етсiн;
2) жазғы демалыс кезеңiнде жолдар мен көшелерде балалардың жарақат алуын азайтатын алдын алу шараларын қабылдасын.
5. Қазақстан Республикасы Денсаулық сақтау министрлiгi:
1) балалар лагерьлерiнiң, олар орналасқан жерлердегi санитарлық-эпидемиологиялық жай-күйдi тұрақты бақылауды жүзеге асырсын;
2) балалар мен жасөспiрiмдерге медициналық қызмет көрсетуге және сауықтырылуына денсаулық сақтау ұйымдары қызметiнiң үйлестiрiлуiн қамтамасыз етсiн.
6. Қазақстан Республикасы Төтенше жағдайлар министрлiгi:
1) балалардың демалысын, сауықтырылуын және жұмыспен қамтылуын ұйымдастыру орындарының өртке қарсы жай-күйiне тексерiс жүргiзудi қамтамасыз етсiн;
2) балалар лагерьлерiнiң өрт қауiпсiздiгiн қамтамасыз етуге бағытталған iс-шараларды әзiрлесiн.
