Құрғақшылықтан зардап шеккен ауыл шаруашылығы тауарларын өндiрушiлерге көмек көрсету туралы

Қазақстан Республикасы Премьер-Министрiнiң өкiмi 1996 жылғы 24 желтоқсандағы N 580

Құрғақшылық нәтижесiнде үстiмiздегi жылы Семей облысының көптеген шаруашылықтарында өте аз мөлшерде астық жиналды, мұның өзi оған мемлекеттiк ресурсқа астық беру жөнiндегi вексельдiк бағдарламаны орындауға және астық несиесi жөнiндегi берешектi жабуға мүмкiндiк бермедi. Құрғақшылықтан зардап шеккен ауыл шаруашылығы тауарларын өндiрушiлерге көмек көрсету мақсатында:
1. Қазақстан Республикасының Ауыл шаруашылығы министрлiгi, Қаржы министрлiгi, Ауыл шаруашылығын қаржылай қолдау жөнiндегi мемлекеттiк қоры осы облыс шаруашылықтарының қорға қалыптасқан берешегiн жабуды жеделдету жөнiнде шаралар қабылдасын.
2. Мемлекеттiк азық-түлiк контракт корпорациясы мемлекеттiк ресурстан Семей облысының шаруашылықтарына алдын-ала төлем жасау шартымен 9,2 мың тонна дәндi дақылдар тұқымын сататын болсын.
3. Семей облысының әкiмi 1997 жылғы 1 қарашаға дейiн мемлекеттiк ресурсқа 1996 жылғы вексельдер бойынша 14,4 мың тонна мөлшердегi астықтың және 6,2 мың тонна астық несиесiнiң берешегiн жабуды қамтамасыз етсiн.

Премьер-Министр