Қазақстан Республикасының
Президенті мен Үкіметі актілерінің
жинағында жариялануға тиіс
ҚАУЛЫ ЕТЕМІН:
1. Қоса беріліп отырған Кеден одағына мүше мемлекеттер болып табылмайтын Тәуелсіз Мемлекеттер Достастығына қатысушы мемлекеттермен өзара саудадағы техникалық кедергілерді жою туралы Кеден одағына мүше мемлекеттердің келісімінің жобасы мақұлдансын.
2. Қазақстан Республикасы Премьер-Министрінің орынбасары Қайрат Нематұлы Келімбетовке қағидаттық сипаты жоқ өзгерістер мен толықтырулар енгізу құқығымен Қазақстан Республикасының атынан Кеден одағына мүше мемлекеттер болып табылмайтын Тәуелсіз Мемлекеттер Достастығына қатысушы мемлекеттермен өзара саудадағы техникалық кедергілерді жою туралы Кеден одағына мүше мемлекеттердің келісіміне қол қоюға өкілеттік берілсін.
3. Осы Жарлық қол қойылған күнінен бастап қолданысқа енгізіледі.
Қазақстан Республикасы
Президентінің Н. Назарбаев
Қазақстан Республикасы
Президентінің
2012 жылғы 7 желтоқсандағы
№ 446 Жарлығымен
мақұлданған
Жоба
Кеден одағына мүше мемлекеттер болып табылмайтын Тәуелсіз
Мемлекеттер Достастығына қатысушы мемлекеттермен өзара
саудадағы техникалық кедергілерді жою туралы Кеден одағына
мүше мемлекеттердің келісімі
Бұдан әрі Тараптар деп аталатын Беларусь Республикасы, Қазақстан Республикасы және Ресей Федерациясы,
Кеден одағына мүше мемлекеттердің және Кеден одағына мүше мемлекеттер болып табылмайтын Тәуелсіз Мемлекеттер Достастығына қатысушы мемлекеттер арасындағы өзара сауданы кеңейту мақсатында,
1994 жылғы 15 сәуірде көпжақты сауда келіссөздерінің Уругвай раундының қорытындылары бойынша қабылданған Дүниежүзілік сауда ұйымының Саудадағы техникалық кедергілер жөніндегі келісім мен Санитариялық және фитосанитариялық шараларды қолдану жөніндегі келісімде белгіленген қағидалар мен қағидаттарды, сондай-ақ 1992 жылғы 13 наурыздағы Стандарттау, метрология және сертификаттау саласында келісілген саясатты жүргізу туралы келісімнің, 2005 жылғы 24 наурыздағы Еуразиялық экономикалық қоғамдастыққа мүше мемлекеттердің техникалық регламенттерін үйлестіру негіздері туралы келісімінің, 2008 жылғы 25 қаңтардағы Техникалық реттеу, санитариялық және фитосанитариялық шаралар саласында келісілген саясатты жүргізу туралы келісімнің, 2009 жылғы 11 желтоқсандағы Кеден одағының санитариялық шаралар туралы келісімінің, 2009 жылғы 11 желтоқсандағы Кеден одағының ветеринариялық-санитариялық шаралар жөніндегі келісімінің, 2009 жылғы 11 желтоқсандағы Кеден одағының өсімдіктер карантині туралы келісімінің, 2010 жылғы 18 қарашадағы Беларусь Республикасындағы, Қазақстан Республикасындағы және Ресей Федерациясындағы техникалық реттеудің бірыңғай қағидаттары мен қағидалары туралы келісімінің, 2011 жылғы 18 қарашадағы Еуразиялық экономикалық комиссия туралы шарттың ережелерін назарға ала отырып;
Кеден одағына мүше мемлекеттер болып табылмайтын Тәуелсіз Мемлекеттер Достастығына қатысушы мемлекеттермен өзара саудадағы техникалық кедергілерді жоюға ниет білдіре отырып,
төмендегілер туралы келісті:
1-бап
Осы Келісімде саудадағы техникалық кедергілер деп Кеден одағына мүше мемлекет болып табылмайтын, Тәуелсіз Мемлекеттер Достастығына қатысушы мемлекеттің ұлттық техникалық регламенттері, стандарттары мен сәйкестікті бағалау (растау) рәсімдері талаптарының өзара саудада кедергілерге әкелетін өнімдердің аттас түрлеріне қатысты Кеден одағының техникалық регламенттерінің, Кеден одағында қолданылатын стандарттардың және Кеден одағының сәйкестікті бағалау (растау) рәсімдерінің айырмашылығы түсініледі.
Осы Келісімде қолданылатын өзге ұғымдар 2008 жылғы 25 қаңтардағы Техникалық реттеу, санитарлық және фитосанитарлық шаралар саласында келісілген саясатты жүргізу туралы келісімде, 2009 жылғы 11 желтоқсандағы Кеден одағының санитарлық шаралар жөніндегі келісімінде және 2010 жылғы 18 қарашадағы Беларусь Республикасындағы, Қазақстан Республикасындағы және Ресей Федерациясындағы техникалық реттеудің бірыңғай қағидаттары мен қағидалары туралы келісімде белгіленген мағынада қолданылады.
2-бап
1. Кеден одағына мүше мемлекет болып табылмайтын Тәуелсіз Мемлекеттер Достастығына қатысушы кез келген мемлекет (бұдан әрі - мүдделі мемлекет) Еуразиялық экономикалық комиссиясына (бұдан әрі - Комиссия) өнімнің белгілі бір түрлеріне қатысты өзара саудадағы техникалық кедергілерді жою туралы сұрау салуды жолдауға құқылы.
Комиссия мүдделі мемлекеттің сұрау салуы негізінде мүдделі мемлекеттің сұрау салуында айқындалған өнім түрлеріне қолданылатын Кеден одағының техникалық регламенттерінің тізбесін, сондай-ақ көрсетілген техникалық регламенттерді пайдалану үшін қажетті Комиссия шешімдерінің тізбесін белгілейді және оларды мүдделі мемлекеттің назарына жеткізеді.
2. Мүдделі мемлекеттің сұрау салуында айқындалған өнім түрлеріне қатысты өзара саудадағы техникалық кедергілерді жою шарты мүдделі мемлекеттің Кеден одағының техникалық регламенттері талаптарын және осы Келісімде көзделген тәртіпте әрі жағдайларда осы баптың 1-тармағында көрсетілген Комиссияның тиісті шешімдерін қолдануы болып табылады.
3. Мүдделі мемлекеттің осы Келісімде көзделген тәртіпте және жағдайларда, Кеден одағының техникалық регламенттерін оның аумағында қолдануы оның таңдауы бойынша баламасыз және баламалы негізде жүзеге асырылуы мүмкін.
Кеден одағының техникалық регламенттерін баламасыз негізде қолдану Кеден одағының көрсетілген техникалық регламенттерінің қолданысы саласында мүдделі мемлекеттің ұлттық техникалық регламенттерін және өзге де заңнамалық актілерінің қолданысын тоқтату шартымен алып тастаусыз жүзеге асырылады.
Мүдделі мемлекеттің өтініш берушілерінің (экономикалық қызметтің қатысушылары) таңдауы бойынша Кеден одағының техникалық регламенттерін баламалы негізде қолдану Кеден одағының көрсетілген техникалық регламенттерінің қолданысы саласында мүдделі мемлекеттің қолданыстағы ұлттық техникалық регламенттерімен және өзге де заңнамалық актілерімен қатар алып тастаусыз жүзеге асырылады.
3-бап
Мүдделі мемлекет Кеден одағына мүше мемлекеттермен өзара саудадағы техникалық кедергілерді жою мақсатында:
а) осы Келісімге сәйкес мүдделі мемлекет қолданатын Кеден одағының барлық техникалық регламенттерін, оның ішінде Кеден одағының осындай техникалық регламенттерге енгізілген өзгерістердің, сондай-ақ көрсетілген техникалық регламенттерді қолдану үшін қажетті Комиссия шешімдерінің өзінің аумағында тікелей қолданысын қамтамасыз етеді;
б) 2010 жылғы 18 қарашадағы Беларусь Республикасындағы, Қазақстан Республикасындағы және Ресей Федерациясындағы Техникалық реттеудің бірыңғай қағидаттары және қағидалары туралы келісімнің 6-бабында көзделген Комиссия бекіткен қүжаттар тізбелерін, оның ішінде көрсетілген тізбелерге өзгерістерді қолдануды қамтамасыз етеді;
в) айналымға шығарылатын өнімнің көрсетілген техникалық регламенттерде белгіленген тәртіпте Кеден одағының қолданатын техникалық регламенттерінің талаптарына сәйкестігіне бағалау (растау) жүргізуді қамтамасыз етеді. Кеден одағының техникалық регламенттерін балама негізде қолданған жағдайда, мүдделі мемлекеттің өтініш берушісі Кеден одағының техникалық регламентін таңдаса, осы тармақтың ережесін қолданады;
г) Кеден одағының техникалық регламенттері талаптарына сәйкестігін бағалаудың (растаудың) қажетті рәсімдерінен өткен, қолданысы өнімнің аталған түріне қатысты қолданылатын, Кеден одағының қолданылатын техникалық регламенттері талаптарына сәйкес келетін және көрсетілген техникалық регламенттерде қамтылған талаптарға қатысы бойынша осындай өнімге қосымша талаптар қоймай және сәйкестікті бағалаудың (растаудың) қосымша рәсімдерін өткізбей, Кеден одағына мүше мемлекеттердің нарығында, өз аумағында өнім айналымының бірыңғай белгісімен таңбаланған өнім айналымын қамтамасыз етеді;
д) Кеден одағының қолданылатын техникалық регламенттері талаптарына өнімнің сәйкестігін бағалау (растау) нәтижелерінің салыстырылатындығына қол жеткізу мақсатында өлшем бірлігін қамтамасыз етеді;
е) осы техникалық регламенттерде белгіленген тәртіппен алынған Кеден одағының қолданылатын техникалық регламенттерінің талаптарына өнімнің сәйкестігін бағалау (растау) нәтижелерін қамтитын құжаттарды таниды;
ж) Кеден одағының сертификаттау жөніндегі органдарының және сынақ зертханаларының (орталықтарының) бірыңғай тізілімінің (бұдан әрі - бірыңғай тізілім) ұлттық бөлігін қалыптастыруды және жүргізуді қамтамасыз ететін уәкілетті органды айқындайды;
з) Кеден одағының техникалық регламенттерінде көзделген сәйкестікті бағалау (растау) жөніндегі құжаттардың бірыңғай тізілімінің ұлттық бөліктерін қалыптастыруды және жүргізуді, сондай-ақ оларға еркін кіруін қамтамасыз етумен, оларды органның ресми сайтына жедел орналастыруды жүзеге асыратын уәкілетті органды айқындайды;
и) Кеден одағының тиісті техникалық регламенттерінде көзделген техникалық реттеу объектілеріне мемлекеттік тіркеуді жүзеге асыратын уәкілетті органдарды айқындайды;
к) Кеден одағының қолданылатын техникалық регламенттері талаптарын, сондай-ақ көрсетілген техникалық регламенттері талаптарына өнімнің сәйкестігін бағалау (растау) рәсімдерін жүргізу кезінде бұзушылықтар үшін жауапкершілікті белгілеу саласында өз заңнамасын Тараптардың заңнамасымен үйлестіреді;
л) Кеден одағының қолданылатын техникалық регламенттері талаптарын сақтау үшін мемлекеттік бақылауды (қадағалауды) жүзеге асыратын уәкілетті органдарды айқындайды;
м) техникалық реттеу саласына жататын бөлігіндегі Кеден одағының сыртқы және өзара саудадағы Ықпалдасқан ақпараттық жүйесіне қосылады.
4-бап
1. Осы Келісімде көзделген тәртіпте және жағдайларда Кеден одағына мүше мемлекеттер мен мүдделі мемлекет арасындағы өнімнің белгілі бір түрлеріне қатысты өзара саудадағы техникалық кедергілердің жойылған күні, өнімнің осы түрлеріне қолданылатын Кеден одағының техникалық регламенттерінің тізбесі, көрсетілген техникалық регламенттерді қолдану үшін қажетті Комиссия шешімдерінің тізбесі, осы Келісімнің 3-бабында көзделген жағдайларда мүдделі мемлекеттің орындауын Комиссия белгілегеннен кейін Комиссия және мүдделі мемлекет туралы шарт негізінде Комиссия қол қоятын хаттамада айқындалады.
Көрсетілген хаттамаға мүдделі мемлекет осы Келісімде көзделген міндеттемелерді өзіне қабылдайтыны туралы ереже енгізіледі.
2. Мүдделі мемлекеттің осы Келісімнің 3-бабында көзделген шарттарды орындауын тексеруді жүзеге асыру барысында, Комиссия мүдделі мемлекеттен қажетті ақпаратты сұратуға, сондай-ақ мүдделі мемлекеттің аумағында тиісті көшпелі тексерулер ұйымдастыруға құқылы.
5-бап
1. Мүдделі мемлекет Кеден одағының техникалық регламенттерін баламасыз негізде қолданған жағдайда Тараптар мыналарды:
а) Кеден одағының техникалық регламенттері талаптарына сәйкес келетін және мүдделі мемлекеттің аумағынан түсетін, оның ішінде үшінші елден шыққан Кеден одағына мүше мемлекеттердің нарығындағы, Кеден одағының техникалық регламентінде қамтылған талаптарға қатысты осындай өнімге қосымша талаптар қоймай және сәйкестікті бағалаудың (растаудың) қосымша рәсімдерін өткізбей, Кеден одағының бірыңғай кедендік аумағында, өнім айналымының бірыңғай белгісімен таңбаланған өнім айналымын;
б) Кеден одағының техникалық регламенттерінің жобаларын және осындай техникалық регламенттер өзгерістердің жобаларын бұқаралық талқылау рәсімдерін мүдделі мемлекеттің уәкілетті органының жүргізу мүмкіндігін қамтамасыз етеді.
2. Мүдделі мемлекет Кеден одағының техникалық регламенттерін балама негізде қолданған жағдайда, Тараптар Кеден одағының техникалық регламенттері талаптарына сәйкес келетін және Кеден одағының техникалық регламентінде қамтылған талаптарға қатысты осындай өнімге қойылатын қосымша талаптарды қоймай және сәйкестікті бағалаудың (растаудың) қосымша рәсімдерін өткізбей, Кеден одағының бірыңғай кедендік аумағында мүдделі мемлекеттің аумағынан шыққан, Кеден одағына мүше елдердің нарығындағы өнім айналымының бірыңғай белгімен таңбаланған өнім айналымын қамтамасыз етеді.
3. Кеден одағының техникалық регламенттерін баламасыз немесе балама негізде қолданған жағдайда, Комиссия белгіленген тәртіппен мыналарды:
а) мүдделі мемлекеттің уәкілетті органының Кеден одағының техникалық реттеу саласына жататын бөлігіндегі Ықпалдасқан сыртқы және өзара саудасының ақпараттық жүйесіне қол жеткізуін;
б) мүдделі мемлекеттің уәкілетті органдарының ұсыныстары бойынша сертификаттау (сәйкестікті бағалау (растау) жөніндегі аккредиттелген органдарды (бұдан әрі - сертификаттау жөніндегі органдар) және сынақ зертханаларын (орталықтарын) (бұдан әрі - зертханалар) Бірыңғай тізілімге енгізуді қамтамасыз етеді.
4. Кеден одағының техникалық регламенттерін қолдану мәселелері бойынша мүдделі мемлекеттің уәкілетті органдарымен өзара іс-қимылды Комиссия жүзеге асырады.
6-бап
1. Мүдделі мемлекеттің аумағында Кеден одағының қолданатын техникалық регламенттері талаптарына өнімнің сәйкестігін міндетті бағалау (растау) Кеден одағының тиісті техникалық регламенттерінде белгіленген нысанда жүзеге асырылады.
2. Кеден одағының баламасыз негізде қолданылатын техникалық регламенттері талаптарына сәйкестігін декларациялаған кезде өтінім беруші мүдделі мемлекеттің заңнамасына сәйкес оның аумағында жеке кәсіпкер ретінде не дайындаушы немесе сатушы болып табылатын не жеткізілетін өнімнің Кеден одағының қолданылатын техникалық регламенттерінің талаптарына сәйкестігін қамтамасыз ету бөлігінде және жеткізілетін өнімнің көрсетілген техникалық регламенттерінің талаптарына сәйкес болмағаны үшін жауапкершілік бөлігінде, онымен жасалған шарт негізінде шетелдік дайындаушының (мүдделі мемлекеттердің аумағында шетелдік дайындаушының функциясын орындайтын тұлға) функциясын орындаушы ретінде тіркелген заңды немесе жеке тұлға бола алады.
3. Кеден одағының балама негізде қолданылатын техникалық регламенттерінің талаптарына сәйкестігін декларациялаған кезде өтінім беруші мүдделі мемлекеттің заңнамасына сәйкес оның аумағында дайындаушы болып табылатын жеке кәсіпкер ретінде тіркелген заңды немесе жеке тұлға бола алады.
4. Мүдделі мемлекет қолданатын Кеден одағының техникалық регламенттерінің талаптарына сәйкес келетін және аталған техникалық регламенттермен белгіленген сәйкестікті бағалау (растау) рәсімдерінен өткен өнім, егер Кеден одағының техникалық регламентінде өзгеше белгіленбесе, Кеден одағына мүше мемлекеттер нарығында өнім айналымының бірыңғай белгісімен таңбаланады.
7-бап
1. Мүдделі мемлекеттің аумағында Кеден одағының техникалық регламенттерінде қолданылатын белгіленген талаптарға өнімнің сәйкестігін бағалау (растау) жөніндегі жұмыстарды Бірыңғай тізілімге енгізілген мүдделі мемлекеттің сертификаттау жөніндегі аккредиттелген органдары және зертханалары жүзеге асырады.
2. Тараптар мүдделі мемлекеттің ұлттық аккредиттеу жүйесінде сәйкестікті барлау (растау) бойынша жұмыстарды орындайтын сертификаттау жөніндегі органдар және зертханалар қызметінің нәтижелерін мына шарттарды сақтаған кезде таниды:
мүдделі мемлекеттің ұлттық аккредиттеу жүйесінде аккредиттеуді жүзеге асыру үшін халықаралық стандарттардың талаптарына сәйкес келетін қағидалар мен рәсімдердің қамтылуын;
аккредиттеу мына қағидаттардың:
еріктілік;
аккредиттеу қағидаларының ашықтығы мен қолжетімділігі;
аккредиттеуді жүзеге асыратын органдардың құзыреттілігі мен тәуелсіздігі;
аккредиттеуді алуға үміткер өтінім берушілерге бірдей жағдайлардың қамтамасыз етілуі;
аккредиттеу және сәйкестікті бағалау (растау) жөніндегі қызметті қоса орындауға жол бермеу қағидаттары негізінде жүзеге асырылады.
3. Мүдделі мемлекеттің сертификаттау жөніндегі аккредиттелген органдарын және зертханаларын Бірыңғай тізілімге енгізу Комиссия белгілеген өлшемдерге сәйкес мүдделі мемлекеттің уәкілетті органының ұсынысы бойынша жүзеге асырылады.
8-бап
1. Мүдделі мемлекет қолданатын Кеден одағының техникалық регламенттері талаптарының сақталуына мемлекеттік бақылау (қадағалау) мүдделі мемлекеттің заңнамасында белгіленген тәртіпте жүргізіледі.
2. Кеден одағының техникалық регламенттеріне сәйкестігін бағалау (растау) рәсімдерінен өткен өнімге қатысты бақылау-қадағалау функцияларын жүзеге асыру кезінде мүдделі мемлекеттің мемлекеттік бақылау (қадағалау) органдары осы Келісімге сәйкес мүдделі мемлекет қолданатын техникалық регламенттерді бекіту туралы Комиссия шешімімен айқындалған зерттеулер (сынаулардың) және өлшемдердің әдістерін, үлгілерді іріктеу қағидаларын қолданады.
3. Мүдделі мемлекет аумағында Кеден одағының қолданылатын техникалық регламенттері талаптарына сәйкес келмейтін өнім немесе сәйкестігін бағалауға (расталуға) жататын, сәйкестікті бағалау (растау) туралы айналымға құжатсыз келіп түскен немесе айналымда жүрген және (немесе) Кеден одағына мүше мемлекеттердің нарығында өнім айналымының бірыңғай белгісімен таңбаланбаған өнім айқындалған кезде, мүдделі мемлекеттің уәкілетті органдары мүдделі мемлекеттің заңнамасына сәйкес осы өнімді айналымға және Кеден одағының кедендік аумағына оның әкелінуіне жол бермеу, оны айналымнан алып тастау бойынша шаралар қолданады, сондай-ақ ол туралы Комиссияға хабарлайды және Кеден одағының сыртқы және өзара саудасының Ықпалдасқан ақпараттық жүйесіне тиісті хабарламалар жібереді.
9-бап
Адамның өмірін немесе денсаулығын, өсімдіктер мен жануарлар мүдделерін қорғауды басшылыққа ала отырып, Тараптар мен мүдделі мемлекет зиян келтіру қаупінің болуы туралы қолда бар тиісті ақпарат (халықаралық ұйымдардан алынған ақпаратты қоса алғанда), сондай-ақ басқа мемлекеттер қолданатын санитариялық, ветеринариялық-санитариялық және фитосанитариялық шаралар туралы ақпарат негізінде өнімнің жекелеген түрлеріне қатысты санитариялық, ветеринариялық-санитариялық немесе фитосанитариялық шектеу шараларын уақытша енгізуі мүмкін.
Осындай жағдайда Тараптар мен мүдделі мемлекет уақытша қабылданған шаралар туралы Комиссияға дереу хабарлайды және осы мәселе бойынша консультациялар мен келіссөздер процесіне кіріседі.
Тараптар мен мүдделі мемлекет қауіп-қатерді анағұрлым объективті бағалауға қажетті адамның өмірі немесе денсаулығына, жануарлар мен өсімдіктерге төнген қауіп туралы қосымша ақпарат алуға және ақылға қонымды уақыт кезеңі аралығында уақытша санитариялық, ветеринариялық-санитариялық немесе фитосанитариялық шектеу шараларын тиісінше қайта қарауға ұмтылады.
10-бап
Осы Келісім ережелерін түсіндірумен және (немесе) қолданумен байланысты Тараптар арасындағы даулар келіссөздер мен консультациялар арқылы шешіледі.
11-бап
Осы Келісімге ескертпелерге жол берілмейді.
12-бап
Осы Келісімге өзгерістер Тараптардың өзара келісімі бойынша енгізіледі және жеке хаттамалармен ресімделеді.
13-бап
Осы Келісім депозитарий оның күшіне енуі үшін қажетті мемлекетішілік рәсімдерді Тараптардың орындағаны туралы соңғы жазбаша хабарламаны алған күннен бастап күшіне енеді.
20__ жылғы «__» _________ ______________ қаласында орыс тілінде бір түпнұсқалық данада жасалды.
Осы Келісімнің түпнұсқалық данасы осы Келісімнің депозитарийі бола отырып, оның куәландырылған көшірмесін әрбір Тарапқа жіберетін Комиссияда сақталады.
Беларусь Қазақстан Ресей
Республикасы Республикасы Федерациясы
үшін үшін үшін
